ይዃንስት ወንጌል 5
5
ፈወነ 5
እየሱስ ቅዳምሲንቭት ግርየዝ ድውይ እጅር ቓዘጘ
1እንዝ ግረ ኣይዅዳኒዙ በልድ ችጝ ዊናንስቅ፣ እየሱስም እየሩሳልየም ፊሩ። 2እየሩሳልየምስም ቢቀ ሚረይዝ ጋቢል እቭራይስጢዝ፦ «በተሰይደ»#5፡2 ላው ላው ኽፅምትቍ ብራንጥ መፃፋንድ፦ «በተሰይደ» ይጛንድ፣ ላው ላውድ ቈሽ፦ «በተዛተ» ይጘኵ፤ ጝትርጕምድም፦ «ስቝርትዙ ጝን» የነት የጝ። የነው ላው ጣምቅሸነው ምኝጭ ዊኑ፤ ጝጅልወይልም ጝታንየይል ተዘን ተስንቍ ዋጥርጥረነቍ ኣኰ ደረጅጥ ዊን። 3እንዛይ ዋጥርጥረነቍ ደረጅጢልም ንቕፀቍ ድውያን፣ ኻርብ፣ ኻካዛን ኽሪጛ ዊን። [ጛይም ኣቚዙ ናውፅሽተነውድ ሊሚድጛ ዊን። 4ላው ላው ግርየ ኣደረት መላክ ጊም ኣቝድዛት ናውፃንድ፣ ቃውስ ኣቚል ጥወው እጅርድቅ ጝፃይሸው ፅውዘይስ ቓዳ ዊኑ።]#5፡4 ኽፅምትቍ ብራንጥ መፃፋንድ እግዘ ሻቘ ኻትሸነይዙዊስ ክርም እግዘ ሲዘይዙ ኻትሸነይል ኣሽ ፅበውድየንት ቈሻቍም።
5ጝግልም ሰውርጝን ሰውጠ ምት ምሉዝ ፅዊት ፅበው ላው እጅር ዊኑ። 6እየሱስም እኒን እጅርድ ጝግል ኽሪ ፅበጘ ቓላንድ እክሰው ግርየ እነይ ፅበጘ ኣርቕ ጝት፦ «ቓድተ በንረኵመ?» የው ዋቕሩ። 7እድ ፅውዝጅነ እጅርድም፦ «ኣደረወ! ኣቝድ ናውፅሽታንድ ይት ጒ ፊስ ኣቚል ድወው እጅርም እጀር፤ ይቕም ጥውጨ ሚኵራንድም ላየ እጅር ይት ቃውስ ጥወኵ» ዩ። 8እየሱስም፦ «ጕ! ክኽርየነድ መውትር ፊጥ!» ዩ። 9እጅርድም በውዝ ቓዱ፤ ጝኽርየነድየንትም መውር ፊሩ፤ እንም ኣቐውድ ቅዳምሲንቭት ግርየዝ ዊኑ።
10ኣይዅዳንድም እድ ቓደው እጅርድየንት፦ «ንጭ ቅዳምሲንቭት ግርየዝ ክኽርየነድየንት መውርተ ወሪትት ኽግድ ፊቅዳውም» ይ።#ንኽ. 13፡19፤ የር. 17፡21። 11ጘጝ ግን፦ «ይት ቓዘው እጅርድ፦ ‹ክኽርየነድ መውትር ፊጥ› የውኩ» የው ዊሱ። 12ጛይም፦ «ክኽርየነድ መውትር ፊጥ የውድ ኣው የጝ?» ይጝ ዋቕር። 13ጘጝ ግን ኽዝቭድ ንቕፃንስቅ፣ እየሱስም ጝጊስ ፈቀቅ የው ዊናንስቅ፣ ጝት ቓዘው እጅርድ ኣው ኣቐጘ ኣርቒየውም ዊኑ።
14እንዝ ግረ እየሱስ እድ እጅርድየንት መቅደስ ጝኒስ ችጝ፦ «እንወ ቓድርኵሩ፤ ነስየይስ ግን እኒስ ወሰው ችጛይረጘ ኽጥያት ሰራሽተ» ዩ። 15እጅርድም ጝት ቓዘውድ እየሱስ ኣቐጘ ፊር ኣይዅዳኒዝ ድቁ። 16ቅዳምሲንቭት ግርየዝ እነየው ዊገ ሰራሻንስቅ ኣይዅዳንድ እየሱስት ሲድሰነው ኪርም። 17እየሱስ ግን፦ «ይር ዊትርቅ ሰራሸኵ፤ ያንም ሰራጨኵን» ዩ። 18ነስየ ኣይዅዳንድ እየሱስ ቅዳምሲንቭት ሸሩዝ ጭቝ ኣዪጘቀ ጝቕምት እደረ ጅቅ እርውዝ፦ «እደረ ይር የጝ» ያንስቅ ጝት ቁጥጘ ቐናዝጝ ደምዘነው ኪርም።
እደረት ዅርት ስልጣንድ
19እየሱስም እንት ዩ፦ «እማን እማን የኵን! ጚር ሰራሻንድ ቓለውድየንት የጝጚ ዅር ጝቕምቲስ ውርቅ ሰራሽጠ ቸላውም፤ ኣይር ሰራሸውድየንት ዅርም ጘጝት ሰራሸኵ። 20ኣይር ጝዅርት ቀነው ኣቓንስቅ ጘጝ ሰራሸውድየንትቅ ጝጭስ ቓሊሰኵ፤ ክትን ዲንቅሽስርናንስ ማጥን እንዛጊስም ዲቈው ሰቭ ቓሊሰኵ። 21ኣይር ክረቍድ ጒሳንትጘ ርዅየም ይዋንትጘ ዅርም ጘጝት ጘጝ ዊደዊዝቅ ርዅየ ይወኵ። 22ኣይር ኣውማውትልቅ ፊርዳውም፤ ዊገድ ግን ፊርደነውድቅ ጝዅርስ ይውኩ። 23እንት ሸውድም እቅድቅ ኣይርት ኪብርዝጛንትጘ ዅርትም ኪብርዝጛንስ ማጥን የጝ፤ ዅርት ኪብርዛውድቅ ጝት እፃቐው ኣይርት ኪብርዛውም።
24«እማን እማን የኵን! ይቃልድየንት ወሸው፣ ይት እፃቐውድየንትም ኣምነውድቅ ዘላልምዙ ርዅየ ችጝጡ፤ ጘጝ እጅርድ ክርጘይስ ርዅየዝጐ ከሩጚ ኲንንሻውም። 25እማን እማን የኵን! ክረቍድ እደረት ዅርት ድመድ ወሽጘው ግርየ ተርጡ፤ እንም ነን የጝ፤ ወሸቍድቅም ርዅየዝ ፅብጥቍ። 26ኣይር ጝቕም ርዅየ ጕርየ ኣቐጘ ዅርም ጘጝት ርዅየ ጕርየ ኣቓንስ ማጥን ይውኩ። 27እጅር ዅርም ኣቓንስቅ ፊርድጠ ማጥን ኣይር ጝቕም ፊርደነው ስልጣን ይውኩ። 28እንዝ ዲንቅሽትርነ፤ መቃቭሪል ፅበቍድቅ ጝድመድ ወሽጘው ግርየ ተርጡ። 29ቀሰው ሰራሸቍድ ርዅየዙ ጐነዝ ፍጥቍ፣ ጭቓ ሰራሸቍድ ቈሽ ኵነንየዙ ጐነዝ ፍጥቍ።#ዳን. 12፡2። 30ያን ይለ ውረውረቅ ፃቭጨ ቸለቅም፤ ያን ፊርጠውድ ወጨውድየንት ጭቝ የጝ፤ ይቕምት ፍቃድድ ኣዪጝቀ ይት እፃቐዊዙ ፍቃድድ ፃቨር ኣቓንስቅ ይፍርድድ ጭቅየው የጝ።»
እየሱስት ማጥን ይውሽተው ሚዝርነይድ
31«ያን ይቕምስ ሚዝርጣን ይሚዝርነይድ ለምርሻውም። 32ዊገድ ግን ይማጥን ሚዝርደው ላየ እኩ፤ ጘጝ ይማጥን ሚዝርደውድ እማን ኣቐጘ ኣርቐኵን። 33ክትን ይዃንስትል እቅ እፃቕርን ዊንድርኑ፤ ጘጝም እማንት ማጥን ሚዝርድኩ።#ይዃ. 1፡19-27፤ 3፡27-30። 34እኒንት ዊግጠውድ ክትን ቓድርናንስ የርጚ ያን እቀ ሚዝርነይ በነር ኣቕም ኣየው። 35ይዃንስ ኻውያ መቭራት ይወው ብርኻን ዊኑ፤ ክትንም ዊትወ ግርየስ ጝብርኻኒዝ ዲስ ይትርነ በንርኑ። 36ያን ይዃንስት ሚዝርነይስ ዲቈው ሚዝር ፃቀር የጝ፤ ሰራጨ ማጥን ኣይር ነየው፣ ያንም ሰራጨው እኒን ሰቭድ ኣይር ይት ኣፃቐጘ ሚዝር የጝ። 37ይት እፃቐው ኣይርም ይማጥን ሚዝርድኩ፤ ክትን ግን ስሪስቅ ጝድመድ ወሺርነቅም፤ ጝሚልክድም ቓሊርነቅም።#ማቲ. 3፡17፤ ማር. 1፡11፤ ሉቃ. 3፡22። 38ጘጝ እፃቐውድየንት ኣምናይርነቅ ኣቕርናንስቅ ጝቃልድ ክታግል እጀውም። 39ክትን ቅዱሳን መፃፋኒዝ ዘላልምዙ ርዅየ ችጝትርንቅ ተካ ጛት ሚርምርድርነኵ፤ ጛይም ይማጥን ሚዝርደቍ ጛይ። 40ኣነጚ ርዅየ ችጝርናንስ ማጥን ይጐ ተረነው በናይርነቅም።
41«ያን እጅርዙ ክቭር በነቅም። 42ዊገድ ግን እደረት ፍቅርድ ክታእዘኒል እጀው ኣቐጘ ክታት ኣርቐኵን። 43ያን ይርት ሽዝ ተጡን፤ ክትን ግን ይት ለምሪርነቅም፤ ላየድ ጝቕምት ሽዝ ተራን ግን ለምርትርንቅ። 44ክትን ክታስ ክታይ ክቭር ለምረ ለምርሽትርነቅ፣ ዊገድ ግን ላው እደረቲስ ተረው ክቭርድየንት በናይርነቅ ኣርነውዝየ ኣወይርን ኣምነነው ቸልትርና? 45ያን ክታት ኣይርት በዊል ኪሰር ተኪነ፤ ክትን ቲስፈ ፃቭርነው ሙሴ የጝ ክታት ኪሰውድ። 46ሙሴት ኣምንድርናንስ ይት ኣምንትርነ ዊንድርኑ፤ ምላሰንድም ሙሴ ፃፈውድ ይማጥን የጝ። 47ጘጝ ፃፈውድየንት ኣምኒርነውዝየ ያን ዊግጠውድየንት ኣወሽርን ኣምንትርና?»
वर्तमान में चयनित:
ይዃንስት ወንጌል 5: ኽምጣኣኪ
हाइलाइट
शेयर
कॉपी
Want to have your highlights saved across all your devices? Sign up or sign in
