ይዃንስት ወንጌል 2
2
ፈወነ 2
እየሱስ ቃነ ዘገሊለቱ ቅየኒስ ፃቨው ታምርዙ ምልክትድ
1ሸወትረ ግርየይዝም ገሊለት ኣውረጀይዝወ ቃነ የነይ ኻተመየንትል ቅየን ዊኑ፤ እየሱስትኘም ጝግል ዊንች። 2እየሱስስመ ጝክንደጢዝም ቅየኒል ጭጝሽጝ ዊን። 3ወይንዙ ሚዘድ ኣቢታንድም፤ እየሱስትኘ ጝት፦ «ወይንዙ ሚዘድቃል ኣቢቱ» ይች። 4እየሱስም፦ «እውነ ክተ! ያን ክጅቅ ውር ፃቀር? ይግርየድ ገነ ችጚየውም» ዩ። 5ጚይም ጝግል ዊነቍ ኣሳላፍያንድዛት፦ «ጘጝ የውድየንትቅ ፃቭጥን» ይች።
6ኣይዅዳንድ ዊር የነው ስረት ፃየቍ ዊንጛንስቅ ሊጘ፣ ዊንም ሻቘ ጭንጥ ጕየቍ ቕርጝዝቍ ዋልጠ ገንጥ ጝግል ዊን። 7እየሱስም ኣሳልፍያንድዛት፦ «ገንጥድዛት ኣቝ እቻዝጥን» ዩ፤ ጛይም ገንጥድዛት ጝታምቸይል ኣሽ ኣቝ እቻዝ። 8ጘጝም፦ «ፈርጥን ቐዳቕርን ኣሳላፍያነ ኻልቀይዝ ይውጥን» ዩ፤ ጛይም ቐዳቕጝ ይው። 9ኣሳላፍያነ ኻልቀድም ወይንዙ ሚዝ ኣቐቍ ኣቝድዛት ጣማንድ፣ ኣዊስ ተርጘጘ ኣርቒየውም፤ ኣቝድ ቐዳቐቍ ኣሳላፍያንድ ግን ኣዊስ ተርጘጘ ኣርቕጘኵ፤ ጘጝም ኣስንድየንት ጝለ ጭጝ፦ 10«እጅር እጝቅ በዊል ቀሰው ወይንዙ ሚዘድ ኣልሰኵ፤ ኣብንድ ዝይጝ እፍትጘት ግረ ቈሽ ኣቝተውድ ኣልሰኵ፤ ክት ግን ቀሰወ ወይንዙ ሚዘድ ነኳን ኣሽ ዊንዝሩ» ዩ።
11እየሱስ እኒን ታምራኒዙ ምልክቲዝ ኪርመነድየንት ገሊለት ኣውረጀይዝወ ቃነ ኻትመየንቲስ ፃቩ፤ እነሽም ጝክቭርድ ጋልፁ፤ ጝክንደጥድም ጝት ኣምን።
12እንዝ ግረ እየሱስ ጝኘስመ ጝፅኒዝጅቅ ጝክንደጢጅቅም ኣቕ ቅፍርናዀም ጊሙ፤ ጝግልም ዊትቍ ግርቅ ጐይ።#ማቲ. 4፡13።
እየሱስ መቀደስ ጝኒል ኣቕጝ ኒግረቍድዛት ጅግዘጘ
(ማቲ. 21፡12-13፤ ማር. 11፡15-17፤ ሉቃ. 19፡45-46)
13እየሱስም ኣይዅዳኒዙ ፈዝየ በልድ ችጝጠ ጕ ዊናንስቅ እየሩሳልየም ክብዩ።#ዘፀ. 12፡1-27። 14መቅደስ ጝኒስም ቢል፣ ቢቅ፣ እርግቫን፣ ቅየቚዝመ ቍርሻን ላውጥውጠቊዝዛት ጐይጝ ኣርይድጛ ችጙ። 15ኣይንድ ቀቭረዙ ጂረፈ ተስ ቢቂዝመ ቢሊዝዛትቅ መቅደስ ጝኒስ ጅግዙ፤ ላውጥውጥጘቍ ቍርሻንድዛትም ቢትኑ፤ ጝታጠረቢዝጥድዛትም ጊልብርብሩ። 16እርግቫን ቅየቍ እቅድዛትም፦ «እንዛት እድጐ እክልስጥን! ይርት ጝንድየንት ኣሪ ጝን ፃቭትርነ!» ዩ። 17ኣይንድ ጝክንደጥድ፦ «ያን ክጝኒዝቍዝ ቀንየው ቅናትድየን ይት ልየይዝጘ ዀኵ» ይሽት ፃፍሸጘ ትዝ ይ።#መዝ. 69፡9።
18ኣይንድም ኣይዅዳንድ፦ «እኒንትቅ ፃቨነው ስልጣን ፃይረር ኣረጘ ደደደድሰው ውር ምልክት ቓሊስትር?» ይ። 19እየሱስም፦ «እኒን መቅደስ ጝንድየንት ፋዝጥን፤ ያንም ሻቘ ግርቅዝ ዊስ ተስጭር» ዩ።#ማቲ. 26፡61፤ 27፡40፤ ማር. 14፡58፤ 15፡29። 20ጛይም፦ «እኒን መቅደስ ጝንድ ተሰነውድ ኣርቭዝ ዋልጠ ምት ፊስኩ፤ እደስለ ክት ኣወሽር የጝ ሻቘ ግርቅዝ ተስረውድ?» ይ። 21እየሱስ ግን፦ «መቅደስ ጝን» የው ዊግተውድ ጝሰውነድየንት ዊኑ። 22ጝክንደጥድም ጘጝ ክርጘይስ ጐት ግረ እኒንት ዊግት ዊነጘ ትዝ ይ፤ መፃፊዙ ቃሊዝመ እየሱስ ዊግተው ቃሊዝም ኣምን።
23እየሱስም ፈዝየ በሊዝ እየሩሳልየም ፅባ ፃቨቍ ምልክታንድ ቓልጛንድ ንቕፀቍ እቅ ጝሽዝ ኣምን። 24እየሱስ ግን ኣውማውትቅ ኣርቐው ኣቓንስቅ ጛት ኣምኒየውም። 25ጘጝ እጅርዙ እዘኒል ፅበውድየንትቅ ኣርቐው ኣቓንስቅ ኣውማውቅ እጅርዝቍዝ ጝጭስ ድቍጠ በንዛውም ዊኑ።
वर्तमान में चयनित:
ይዃንስት ወንጌል 2: ኽምጣኣኪ
हाइलाइट
शेयर
कॉपी
Want to have your highlights saved across all your devices? Sign up or sign in
