खास चेलन 6

सातठे सेबकन काहीं चुना जाब

1ऊँ दिनन माहीं जब चेलन के संख्या जादा बढ़ँय लाग, तब यूनानी भाँसा बोलँइ बाले, इब्रानी भाँसा बोलँइ बालेन के ऊपर कुड़कुड़ाँय लागें, कि रोज के जरूरत के चीजन काहीं बाँटत माहीं, हमरे बिधबन के ऊपर ध्यान नहीं दीन जाय। 2तब ऊँ बरहँव खास चेला लोग, चेलन के मंडली काहीं अपने लघे बोलाइके कहिन, “हमरे पंचन के खातिर इआ ठीक नहिं आय, कि हम पंचे परमातिमा के बचन के सेबा काहीं छोंड़िके, खबामँइ पिआमँइ के सेबा माहीं रही। 3एसे हे भाइव, अपने बीच म से सातठे नीक मनइन काहीं चुनि ल्या, जउन पबित्र आत्मा से भरपूर अउर बुद्धिमान होंय, कि जउने उनहीं हम पंचे इआ काम करँइ के जिम्मेबारी सउँपि देई। 4अउर हम पंचे त प्राथना करँइ माहीं, अउर बचन सुनामँइ के सेबा माहीं लगे रहब।” 5अउर इआ बात चेलन के मंडली काहीं नीक लाग, अउर ऊँ पंचे स्तिफनुस नाम के एकठे मनई काहीं जउन बिसुआस के काबिल अउर पबित्र आत्मा से भरपूर रहे हँय, अउर फिलिप्पुस, अउर प्रुखुरूस, अउर नीकानोर, अउर तीमोन, अउर परमिनास, अउर अन्ताकिया प्रदेस के रहँइ बाले नीकुलाउस काहीं जउन यहूदी मत काहीं अपनाय लिहिन तय, चुनि लिहिन। 6अउर इनहीं यीसु के खास चेलन के आँगे ठाढ़ किहिन, तब ऊँ पंचे प्राथना कइके उनखे ऊपर आपन हाँथ धरिन।

7अउर इआमेर से परमातिमा के बचन फइलत ग, अउर यरूसलेम सहर माहीं चेलन के संख्या खुब बढ़त गय; अउर याजकन के एकठे बड़ा समूह घलाय, यीसु मसीह के ऊपर बिसुआस करँइ लाग।

स्तिफनुस काहीं गिरफतार करब

8स्तिफनुस किरपा अउर सामर्थ से भरपूर होइके, मनइन के बीच माहीं बड़े-बड़े अचरज के काम, अउर चमत्कार देखाबत रहे हँय। 9तब उआ यहूदी सभाघर म से जउन लिबिरतीनों के कहाबत रही हय, उहाँ कुरेनी सहर अउर सिकन्दरिया सहर, अउर किलिकिया प्रदेस, अउर आसिया प्रदेस से आए कइअक जने ठाढ़ होइके, स्तिफनुस से बाद-बिबाद करँइ लागें। 10पय उआ ग्यान अउर पबित्र आत्मा के, जउने के सामर्थ से ऊँ बातँय करत रहे हँय, ऊँ पंचे उनखे आँगे ठहर नहीं पाएँ। 11तब ऊँ पंचे कइअक जनेन काहीं उकसाइन, जउन कहँइ लागें, “हम पंचे इनहीं परमातिमा के सँदेस बतामँइ बाले मूसा, अउर परमातिमा के बिरोध माहीं बुराई के बातँय कहत सुने हएन।” 12इआमेर से ऊँ पंचे खुब मनइन काहीं, अउर यहूदी समाज के धारमिक अँगुअन, अउर मूसा के बिधान सिखामँइ बालेन काहीं भड़काइके बोलाय लाएँ, अउर स्तिफनुस काहीं पकड़िके महासभा माहीं लइगें। 13अउर झूँठ गबाहन काहीं ठाढ़ किहिन, जउन कहँइ लागें, कि “इआ मनई इआ पबित्र जघा, अउर मूसा के बिधान के बिरोध माहीं बोलब नहीं छोंड़य। 14काहेकि हम पंचे एही इआ कहत सुने हएन, कि नासरत गाँव माहीं रहँइ बाले यीसु, इआ जघा काहीं नास कइ देइहँय, अउर उन रीति-रिबाजन काहीं बदल डरिहँय, जउन मूसा नबी हमहीं पंचन काहीं दिहिन हीं।” 15तब सगले जने जउन महासभा माहीं बइठ रहे हँय, स्तिफनुस कइती बड़े ध्यान से देखिन, त “उनखर मुँह स्वरगदूत कि नाईं देखान।”

वर्तमान में चयनित:

खास चेलन 6: bag

हाइलाइट

कॉपी