Matiye 3

Waaji Yuhaana gaɗoowo batisi

(Marku 1.1-8; Luka 3.1-18; Yuhaana 1.19-28)

1Wakkati majjum, Yuhaana gaɗoowo *batisi suppitii. Oo waajoo der ladde haro Yahudiya, oo wi'a: 2«Tuubee, gam *Laamaare Alla faanake #3.2 Der Yunaninkeere: Laamaare Kammu..»

3Kanko nun annabi *Esaaya batani, wi'i:

«Daane neɗɗo e bata dow dow, der haro, e wi'a:

Moƴƴinee laawol Joomiraawo,

poonnitee laabi makko #3.3 Esaaya 40.3!»

4Yuhaana e ɓorninoo gineeji cannyiraaɗi leeɓi jeelooba, oo haɓɓii ɓelɓelol gurol dow funŋudu makko. Nyaamdu makko laatii baɓatti e juuri ladde. 5Himɓe *Urusaliima, e leydi Yahudiya, e tawaaɓe takkol maayo Urdun fu, wari to makko. 6Ɓe tuubi hakkeeji maɓɓe, go Yuhaana waɗi ɓe batisi der maayo Urdun.

7No o yi'i *Farisaaɓe e *Sadukiiɓe ɗuuɓɓe e wara waɗeego batisi, o wi'i ɓe:

«Ɓiɓɓe bolle pure! Moy tintini on doggon mone Alla waroore? 8Gaɗee golle kollitooje on tuubii. 9To on miilee e ɓerɗe mooɗon bi'on: ‟Iburahiima nun woni maama amen!” Gam mii wi'a on, Alla e waawi waylitingo kaaƴe, ɗe laatoo ɓiɓɓe Iburahiima! 10Jooni, jammere ɓantaama gam feƴƴa leɗɗe faa e ɗaɗi mum. Den, leggal ŋal rimataa ɓiɓɓe booɗɗe fu wudditinte, faɗɗee der yiite. 11Min, e diyam nun gaɗiranmi on batisi, gam hollitingo on tuubi. Amma garoowo ɓaawo am, e ɓurimmi baawɗe. Mi fotay du baa jimminaago, ɓorta paɗe makko. Kanko, o waɗan on batisi e *Ruuhu Ceniiɗo, e yiite. 12Oo jogii besirɗum e junŋo makko, o laaɓinan fiyirde makko. O loowa gawri der rummuure makko, o wula nyaane der yiite ŋe nyifataa.»

Yeesu waɗaama batisi

(Marku 1.9-11; Luka 3.21-22)

13Wakkati majjum, Yeesu ƴiwi *Galili, wari maayo Urdun to *Yuhaana, gam Yuhaana waɗa mo *batisi. 14Amma Yuhaana nootaaki, wi'i: «Min nun haajaa gaɗanaa batisi, ko an nun wari to am mi waɗanee?»

15Yeesu toontii mo, wi'i: «Noota ɗum laatoo non non jooni, gam hande non kebbinirten ko foonnitii fu.»

Den Yuhaana nootii. 16Ɗon maa ɗon, no Yeesu waɗaa *batisi, wurtii e diyam, kammu maɓɓitii. O yi'i *Ruuhu Alla e jippoo dow makko, hande tantabaraaru. 17Ɗon daane gom nanaa dow kammu, e wi'a: «Oo ɗo nun laatii *Ɓiɗɗo am jiɗaaɗo, mo ceyoriimi.»

वर्तमान में चयनित:

Matiye 3: BFB

हाइलाइट

कॉपी