TOWUNÖT 12

1 # Ist 7:2-3; Epr 11:8. Kïlenchï ECHOTYON Apram, “Pïstenö korengwo nko pikökwo nko kato papongu aiwö itang kor nyo owetan oporunyi. 2Oghinyi lïkune pipö kor akonga cho chang tya. Osoyöninyi aghinyi rumtenö lasiny atelïkuna kisoyönöt. 3#Kal 3:8. Osoyönan pich cho soyöninyi, wölo ochïpan chi nyo chïpinyi akesoyönöy pipö ngwïny kïmïkul ompö nyi.”

4Kïlenyona, kïwö Apram lenyini kimwochï ECHOTYON, kïwö Lot tïkwïl. Kitïng Apram könyis 75 otini kingetunö Aran. 5Kumït Apram korkenyi Saray nko Lot werto werïngwa, akwip tïkukwa löwïr cho kinyorchï korononi nko pich löwïr cho kinyorchï koro Aran, kïnget tökïpa kutang koro Kanan. Otini kitïta chane koro Kanan. 6Kïruto Apram kuwerata kwenu korononi ntökïtenö kwitïta Syekem, wölo kimi ket nyo tïlil ompö More. Kimöngöy pipö Kanan korononi osiswechoni. 7#Ist 7:5; Kal 3:16.Kuchumchï ECHOTYON Apram akïlenchï, “Otöninan moneku koronete.” Atolapay kïtekyï Apram ECHOTYON ato kïpelo amöros. 8Atolapay kïweghö atoni ntökwit kutïng nyo kimi wölnö le kongasispa Petel akïpörtochï emenyi. Kitöpunö kwenu Petel okumpö ta nko Ai okumpö kongasis. Kïtekyï wöloni tïkwïl ato kïpelo amöros akïsagh ECHOTYON. 9Atolapay kïweghö Apram atoni akulet tagh kutang Kanan okumpö tagh.

Mi Apram Misri

10Kimito kömöy osiswechoni koro Kanan. Kingwan nyoman kömöyunoni nyo kigh Apram kïröyto ngat kutang okumpö tagh ntökwit koro Misri tökumï kïmang wöloni osis cho te. 11Otini kirich kïlït koro Misri, kïlenchï korkenyi Saray, “Anyï ichinyi korka nyo pïchigh. 12Otini kasïwïnyi pipö Misri kunonöy lö, ichinyi korkenyan, atolapay kïpechï kïparanïn akïpïstinyi. 13Kïlenyona imwochï chane lö, ichinyi cheptöncha tökïpïstanïn akwighwanïn nyo karam ompö nyi.” 14Otini kilït Apram koro Misri, kïsïwa pipö Misri lö, kipïchigh Saray koko Apram nyoman. 15Nyini kisïwa opisatina Parao Saray wölini kipïchigh kïlïkwï, kïpa kïmwochï Parao, kemït kamanay wölini le kö pö Parao. 16Kwighchï pöytoghintonay Apram nyo karam akwompö Saray, akutö Apram kechir nko tïch nko kiru sïkïröy nko tamasay.

17Wölo kunyaril ECHOTYON Parao nko konyi kïmïkul ompö Saray nyo kile koko Apram. 18Kïkur nyu Parao Apram akïlenchï, “Ne kitö nyï keghwaninyi? Kölö ne tömemwowaninyi lö korkengu Saray? 19Ompö ne temwaghanyi lö cheptönkwa aipïswaninyi achengan nyinte kïlïkwï korkenyan? Anyï korkengu, mïta aiwechï kegh!” 20Kuyomis pöytoghintonay pikachi kïpa kumït Apram kïngeta korengwa nko korkenyi nko tïkuchi löwïr cho kitïng.

Köpesyö Apram nko Lot

वर्तमान में चयनित:

TOWUNÖT 12: PIPÏLIA

हाइलाइट

कॉपी