Kucangtsi 25
25
Ibrahim Mbe Kyi Unda Titawe M Cwu
(1 Kucin 1:32-33)
1Ibrahim mbe kyi unda iki ti rinyi-wu si Ketura. 2Unda wu mbae na wu Zimran ti Jokishan ti Medan ti Midiyan ti Ishabak ti Shuwa. 3Jokishan si itse na Sheba ti Dedan. Rishi na Dedan ti si ande ti Ashur ti ande Letushi ti ande Lewumi. 4Anyisu Midiyan si Efa, ti Efer ti Hanoki ti Abida ti Eldaa. Abane meme si anyisu Ketura.
5Ibrahim pu meme iken ti awu site na Ishaku. 6Ti kiye ti Ibrahim ta ti unyang, awu pu rinyangwae na meme anyisu uwa-wu ketura ti tsitsi, u tē ba ru uten ti ta uwe usir ti kiskinn ikyaen ti a som rurwen te umbae-wu Ishaku.
7Meme asang Ibrahim ka ukob kinjo ti mae ita mbe rijwe asu itsong (175). 8Ama Ibrahim ci mae ukum-wu, u cwu putsa abitse-wu. 9Anyisu-wu, Ishaku ti Ishimayel, sa wu nji fifae na Makpela fer ti Mamre, uwae risaen na Efiron umbae Zohar urae Hiti. 10Riben wu si riben ti Ibrahim jab mbe kujwo ande ti Hiti. Ayi si atang ti a nji Ibrahim ti uwa-wu Saratu. 11Isim iticwu Ibrahim, Rimam nde umbae-wu Ishaku itinyang. Ishaku nae fer Ribung Lahai Royi.
Rishi na Ishimayel
(1 Kucin 1:28-31)
12Abane si rishi Ishimayel umbae Ibrahim, ti Hagar unda Ejib, upyi Saratu, mbae na Ibrahim. 13Rinyi anyisu Ishimayel bag ti umbae ti kucang ba sang umbae ti ricwunnkyi ta re. Umbae ti tawe si Nebayoti, utiputsa-wu si Kedar, ti Adibeyel, ti Mibisam, 14ti Mishima, ti Duma, ti Masa, 15ti Hadad, ti Tema, utiputsa-wu si Jetur, ti Nafishi, ti Kedema. 16Abane ti si anyisu ti arom Ishimayel ti si abikwe risu uten-ba, ti uwog ti som-ba. 17Ishimayel nde asang ukob kinjo ti rijweta mbe itsongfaen (137), ama u ci mae ukum-wu u cwu, u cwu putsa abitse-wu. 18Rishi-wu nae nwunn ti Havila ka sang ti Shur, fifer ti uten Ejib, asiti afu a putsa Asiriya. Aba nae txi ra ti uwog ti ameinja-ba nae atang.
Itimbae Esuwa ti Yakubu
19Rishi Ishaku, umbae Ibrahim ta re. Ibrahim si itse na Ishaku. 20Ishaku site asang mae ifaen kiye ti awu mbe Rebeka, unda Betuwel unde ti Aram, ti ta Padan-aram. Rebeka wu si mbiya Laban, unde ti Aram. 21Ishaku jwam Rimam risu uwa-wu, ikyaen ti awu kunn utsob. Yaweh fxen itijwam-wu, ama uwa-wu Rebeka kyaen rishwu. 22Anyisu ishe ba ku kwab atso ikwab uwae rishwu iya-ba, ama awu ri baa, “Ayine si imi ti ku nde uwae rishwu-m ne?” Ikyaen yine awu ka rang imbyi yi uwog Yaweh.
23Yaweh ri te wu baa,
“Anyisu ishe ba ti ta rishwu-fu ne
u kafe mbukwen ande ifaen.
Aba u cwe-ba ira atso be.
Kinjo u kpag skeb ti ifaen,
ti ndufu u ta imbyi ti itinying.”
24Kiye ti rishwu Rebeka ben pu wu ti ti mbae, awu mbae anyisu ishe. 25Umbae titawe ruye, u si itibyaen, ijwe-wu meme kum asing. Ikyaen yine aba fa rinyi-wu baa, Esuwa. 26Isim ayine, inja-wu ruye, kujwo-wu ye shi Esuwa kufxen. Ikyaen yine, aba kunn wu baa, Yakubu. Ishaku site asang mae ita kiye ti Rebeka mbae anyisu bane.
Esuwa sa Ndufu-wu Jabci
27Anyisu ba ser ben. Esuwa kafe tatu, ku kyang kutur. Yakubu ama ku ri-wu ira ti kufe be, u ku som ti kununn. 28Ishaku site ure ti Esuwa timambe, ikyaen ibye kutur ti awu ku wen ba. Rebeka ama site ure ti Yakubu.
29Kiye iki tiri Yakubu ku to wuci, ama Esuwa ru kutur ba, awu pù rikòb. 30Awu ri te Yakubu baa, “Si na m wuci tibyaen-fu ayine ti ame u ci, bē ame pù pu m rikòb.” Ne si iken ti nde aba ku kunn wu baa Edom#25:30 Imbyi Edom baa, tibyaen..
31Yakubu ri te wu baa, “Sa ndufu-fu jabci na m titawe.”
32Esuwa ri baa, “Nung, rimenn ti ku wen m wen ne, imi ti ndufu u nde na m?”
33Ama Yakubu ri baa, “Ben uben titawe.” Ama awu cwe, u ben uben, u sa ndufu-wu jabci na Yakubu. 34Tiri, Yakubu pu wuci na Esuwa, awu ci u ngwa, ama u nwunn ru-wu. Ayine si fengo ti Esuwa saeru rurob ndufu-wu.
वर्तमान में चयनित:
Kucangtsi 25: kubNT
हाइलाइट
शेयर
कॉपी
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
