Yohane 2

Ukwati mu muzi wa ku Kana

1Pa zuŵa la chitatu kukaŵa ukwati mu muzi wa ku Kana mu Galileya ndipo ŵanyina ŵa Yesu ŵakaŵapo. 2Yesu nayoso wakachemeka ku ukwati pamoza na ŵasambiri ŵakhe. 3Para vinyo likamara, ŵanyina ŵakamuphalira Yesu ŵakati, “Ŵalije vinyo.”

4Yesu wakati ku ŵanyina, “Mwe amama, nchivichiso ichi kwa ine na imwe? Nyengo yane yindakwane.”

5Ŵanyina ŵakhe ŵakati ku ŵateŵeti, “Chilichose icho wamuphaliraninge chitani.”

6Sono pakaŵa viŵiya vya mawe vinkhonde na chimoza ivyo ŵaYuda ŵakaŵika kwakuyana na maluso ghakujitozga. Chiŵiya chimoza chikazuranga na malita gha maji pafupi 100. 7Ntheura Yesu wakati ku ŵateŵeti, “Zuzgani maji mu viŵiya ivi.” Ŵakazuzga viŵiya vira mpaka pa kaŵende. 8Yesu wakati kwa iwo, “Sono neghanipo ndipo mukapereke ku murara wa chiphikiro.” Ntheura ŵakatora. 9Murara wa chiphikiro wakalaŵa maji agho ghakazgoka vinyo, kweni wakamanya chara uko likafuma. (Ŵateŵeti pera awo ŵakanegha maji ghara ndiwo ŵakamanya.) Ntheura murara wa chiphikiro wakachema mwene-nthengwa, 10na kumuphalira kuti, “Munthu yose pakudanga wakuŵapa ŵanthu vinyo liweme, ndipo para ŵakhuta, wakuŵapa vinyo ilo ndiheni. Kweni iwe wasunga vinyo liweme mpaka sono.”

11Yesu wakachita chimanyikwiro chakudanga ichi ku Kana mu Galileya, na kurongora uchindami wakhe, ndipo ŵasambiri ŵakhe ŵakapulikana nayo.

12Pamanyuma pa ichi, Yesu wakaruta ku Kaperenaumu pamoza na ŵanyina na ŵanung'una ŵakhe, ndiposo na ŵasambiri ŵakhe, ndipo ŵakakhara kwenekura mazuŵa ghachoko waka.#Mat 4.13

Yesu wakutozga Nyumba ya Chiuta

(Mat 21.12-13; Mrk 11.15-17; Luk 19.45-46)

13Yikati yaneng'enera nyengo ya chiphikiro cha Paska la ŵaYuda, Yesu wakaruta ku Yerusalemu.#Kuf 12.1-27 14Mu Nyumba ya Chiuta, wakasangamo ŵanthu ŵakuguliska ng'ombe, mberere na nkhunda, ndiposo na awo ŵakasinthanga ndarama#2.14 ŵakasinthanga ndarama: Pa baraza linyakhe la Nyumba ya Chiuta ŵakaguliskanga vya kuŵeta kuti ŵanthu ŵapereke sembe. Ndipo ŵakasinthanga ndarama za chiRoma na za chiYuda chifukwa kuti ŵakazomerezganga kupereka ndarama za chiRoma chara. mu matebulu ghawo. 15Yesu wakapanga chikoti cha vingwe, ndipo wakaŵachimbizga wose mu Nyumba ya Chiuta pamoza na mberere na ng'ombe. Wakagadabula matebulu gha awo ŵakasinthanga ndarama na kuthira ndarama zawo. 16Yesu wakaŵaphalira awo ŵakaguliskanga nkhunda wakati, “Fumyanimo vinthu ivi. Mureke kuyizgora nyumba ya Ŵadada kuŵa ya malonda.” 17Ŵasambiri ŵakhe ŵakakumbuka kuti kuli kulembeka kuti, “Phamphu ilo ndili nalo pa nyumba yinu, liti lindikome.” #Mas 69.9

18Ntheura ŵaYuda ŵakati kwa iyo, “Kasi ungatirongora chimanyikwiro uli chakuti uli na mazaza ghakuchitira vinthu ivi?”

19Yesu wakaŵazgora wakati, “Bwangandulani Nyumba ya Chiuta iyi, ndipo ine nditi ndiyizenge mu mazuŵa ghatatu.”#Mat 26.61, 27.40; Mrk 14.58, 15.29

20ŴaYuda ŵakati, “Nyumba iyi yikatora virimika 46, kuti ŵayizenge. Kasi uti uyizenge mu mazuŵa ghatatu?”

21Kweni para wakayowoyanga kuti Nyumba ya Chiuta, wakanenanga thupi lakhe. 22Ntheura Yesu wakati wawuka ku ŵakufwa, ŵasambiri ŵakhe wakakumbuka kuti wakaŵayowoyera ichi. Ndipo ŵakapulikana na malembo ndiposo na mazgu agho Yesu wakayowoya.

Yesu wakumanya ŵanthu wose

23Pa nyengo iyo Yesu wakaŵa mu Yerusalemu pa chiphikiro cha Paska, ŵanthu ŵanandi ŵakapulikana mu zina lakhe para ŵakawona vimanyikwiro ivyo wakachita. 24Kweni Yesu wakaŵagomezga chara, chifukwa wakaŵamanya ŵanthu wose makora ghene. 25Ndipo kuti kukakhumbikwa chara kuti munthu waliyose wamupanikizgire za munthu chifukwa iyomwene wakamanya ivyo vikaŵa mu munthu.

वर्तमान में चयनित:

Yohane 2: Tumbuka

हाइलाइट

कॉपी