Лука 8
8
Глава 8
Асал, Иисусту бодчал
1Тадук Иисус городалдули, билэкэлдули ӈэнрин, Өрэлдэм Мэтум Хэвки Тэгэмэрэдеккон тэлэӈникэн. Ноӈнюнни мян дӫр хупкуттыӈэлни ӈэнритэн, 2асал-да боддитан, бутэнэктук, ариӈкадук Иисус айчални: Мария, Магдалинач гэрбутты, Иисус ноӈан эмдэдукун надам ариӈкав нӫвкэнин, 3Ирод дюгуртэмӈэн Иоанна Хуза атыкаӈан, Сусанна, унэт хоя хөнтэл-дэ, мэн эӈэедюр Иисусу ноӈартан бэлритэн.
Исувкэчимӈэв тэлэӈ
4Иисустэки хоя бэил чэлэн городалдук ӈэнритэн. Өмнэкэн хоя бэил чакаптакатан, Иисус ноӈартакитан өмэм тэлэӈу тэлэӈрин:
5– Килебу исувкэтты бэй исувкэчидилрин. Няӈтав исудэн усиӈэчиддэкэн, хаӈан няӈтаӈални хотаран холилэн тикритэн, таралбу няӈталбу хэкритэн, няниндула дэгготтыл дэгил дептитэн. 6Хан няӈтал дёлакагла тикритэн, нян исудилми, олгаритан, ач мөмна бими. 7Хан ичик долан тикритэн, ичик исуми, таралбу няӈталбу кадаттин. 8Хан айла төрлэ тикритэн, исуми, аю эгдем нямав няӈтав исувкэнитэн.
Нян тарав тэлэӈриди, Иисус дылгурач гөнин:
– Ӈи кориталкан, тарав долдадан!
Тэлэӈу уталуканмай
9Хупкуттыӈэлни Иисусу улгимидилритэн, яв эрэк Ноӈан тэлэӈрин.
10Ноӈан барагрин:
– Ху Хэвки Тэгэмэрэдекэн делэмон#8:10 Делэм – здесь: тайна, секрет. ханнасан, хөнтэл бэил тэлэӈу-ткэн ханнатан, коеми-дэ этывутэн иттэ, долдами-да этывутэн унур. 11Эрэк-нян тэлэӈ гөнни: няӈта – эрэк Хэвки төрэнни. 12Няӈтал, хотаран холилэн тикчэл, тарак бэил төрэм долдачал, тадук-нян дявал эмрэкэн, мявундукур тарав төрэм дявалду гавчал, эдэтэн тэдер, эдэтэн айчивра. 13Няӈтал, дёлакагла тикчэл, тарак бэил төрэм долдачал, долдами өрэлдэчэл, нян ӈиӈтэтэн ачча бисэкэн, теми адыв-да тэдеччоттэ, нян осэчилми, тэдемур бэривэттэ, Хэвкив омӈаватта. 14Няӈтал, ичик долан тикчэл, тарак бэил төрэм долдачал, нян гургэдюр, эӈэедюр, өрэлдэвкэндюр тынниввөттэ, тарбач нӫчэӈэтэн эсни иррөттэ. 15Нян няӈтал, айла төрлэ тикчэл, тарак бэил төрэм долдачал, айла илрамагандула мявундулавур тарав төрэм нэкчичэл, хилусу дабдуканчал, аю няӈтав балдавкавөтта.
Нейкэ, нейкэруклэ илатты
16Нейкэв нейкэриди, ӈи-дэ екэч эсни кумтэвэттэ, тэдэн-дэ хэрдэлэн эсни тэввөттэ. Тарав нейкэв нейкэруклэ тэввөттэ, эйдучэндюр ирил ӈэрим коедэтэн. 17Як-та иррөчин хумэчин ачча, эты айдит од, як-та иррөчин дяючин ачча, эсимэ эты аӈапты од, эты-дэ ичури од. 18Тарбач мэнтэкивур амаски коеткэрэлрэ, он-да долчиривур: ӈи-ккэ яӈан-да бидин – тарак унэт бөвдин, ӈи-ккэ яӈан-да ачча – биннэв-дэ ноӈандулан тарав-да тевдин.
Иисус Христос энинни, нөӈилни-дэ
19Өмнэкэн Иисус энинни, акнилни-да ноӈантакин эмритэн, нян хоя бэил чакаптакатан, дагамӈа туркуритэн. 20Иисустэки болганаритан:
– Хин энинси, акнилси-дэ төллэ илатта, Хиннюн ичилдэдэвур некрэ.
21Тарбач Ноӈан болганарилтакин барагрин:
– Ӈи Хэвки төрэмон долчиваттан, тачин гөнчэгчинни неккотэн, таралди Би эннэттэм, акнаттам.
Иисус Христос биялгав тывнэвкэнни
22Өмнэкэн Иисус хупкуттыӈэлтэкий гөнин:
– Төӈэр бардаткин давдакун.
Ноӈартан момила ойчиритан, бассаки момираснитан. 23Даваддакатан, Иисус хуклэснин. Таракамат энтэкэе хунӈэ хунӈэлрин, төӈэрлэ биялга один. Даваддыл момитан хунӈэду усиӈэчиврин, мөдэмрин, хэӈунь ӈэлэм один. 24Иисус хупкуттыӈэлни, ӈэлэлридюр, Ноӈантакин дагамридюр, хоруритэн:
– Хупкучимӈэ, мөлэ тыкэдилрэп!
Ноӈан илрин, хунӈэв хунӈэривэн одуканин, биялгав тывнэвкэнин, эрэли ач иглэ один. 25Таракам Ноӈан хупкуттыӈэлтэкий гөнин:
– Илэ-нян хун тэденсэн?
Ноӈартан-аси, хэӈулчэл, мэр доливур мяӈчидилритан: «Ӈи-нян Ноӈан? Эсөми хунӈэтки, мөтки-дэ төрэрэкэн, тарал Ноӈман долдар».
Ариӈкалду хилрив бэю айчидяк
26Тарбач Гадаринскайла төрлэ, Галилея бардалан бисилэ, ноӈартан момирритэн. 27Иисус ӈяла төттэкэн, Ноӈман өмэн бэй арчанин, тарак бэй тытэрэптук ариӈкаду хилрин, ач-та ойла гиркаваттин, буин бисин, алдысагач-та дюлаттин. 28Иисусу иттыди, иркалрин, Ноӈман дэпки хэнӈэнди тикрин, гөникэн:
– Яв мину Хи наданри, Иисус, Ойлэ Биси Хутэн? Накарам Хину, эди мину хилгаткил.
29Иисус тарак бэй эмдэдукун ариӈка нӫдэн гөнин, теми-дэ бэй тачин гөнин. Укал гөру тарак бэй ариӈкаду хилрин, куиргач ноӈман бодэллин, ӈаллин оневэттэ, тарбач ариӈкаду хилми, тарав куиргав дэбгэрроттэн, тар бугуски хэтэкэвэттэн, ариӈкаду хөрруввоттэн.
30– Ӈи хин гэрбэс? – Иисус ноӈман улгэмрин.
– Легион, – тарак барагрин, хояду ариӈкаду эмдэлэй ивэвми.
31Тарал ариӈкал Иисусу накадилритан, Ноӈан тарак бэй эмдэдукун ноӈарбутан эдэн бунилтэки хөрукэн. 32Тала-тта хопкэчэндулэ чиввиннял эгден хада оӈкаддитан. Ариӈкал Иисусу гастидилритан, чиввиннял эмдэтэн долан идэвур. Иисус ивкэнин. 33Ариӈкал, бэй эмдэн додукун нёридюр, чиввиннял эмдэлтэн долан иритэн: тарбач тарак хада элрэнӈэдук мэлуӈчирин, төӈэрлэ гобэнӈэрин. 34Косчимӈэл, тарав иттыдюр, хэтэкэнитэн, городла, билэкэлдули коечэвур тэлэӈнэритэн. 35Бэил итнэритэн хадавур, як-та бичэвэн. Иисустэки ӈэнридюр, бэю иттитэн, тарак эмдэн додукун ариӈкал нёритэн, тарбач тек тарак бэй абгар, тэтыч тэтутты, Иисус бодэлэн хатлан тэгэттин. Бэил хэӈулритэн. 36Коечэл эмчэлтэки тэлэӈритэн, он-да тарак ариӈкалду хилча бэй абгар один. 37Тарбач эйдучэндюр бэил Гадаринскайла төрлэ бичэл, ӈэлэмэч хэӈулридюр, Иисусу гасчидилритан, төрэӈдукутэн Ноӈан хөрдэн. Иисус момила ойчирин, амаски момираснин. 38Ариӈкадук айчан бэй Ноӈнюнни бодасандай гасчидилрин. Нян Иисус ноӈман тынин, гөникэн:
39– Дюткий мучули, тэлэнӈэнри-дэ, яв-да хинду Хэвки некчэвэн.
Тарак бэй хөррин, городла чэлэдун бисилтэки тэлэӈрин, яв-да Иисус ноӈандун некчэвэн.
Иаир хунаддён, хуӈэлэӈкэрив-дэ асив бэгдэчидек
40Иисус амаски мучуракан, хоя бэил, эмривэн алачиччал, Ноӈман арчанитан. 41Тарбач өмэн бэй, Иаир гэрбэди, нэӈэдек дю ӈунэмэчимӈэн, эмрин; Иисусу дэпки хэнӈэнди тикриди, дюлан ӈэндэн Ноӈан гасчирин. 42Бэй өмнин хунадин, мян дӫрди анӈанаӈди асаткан, көкэддин.
Иисус бэйду бодаснин, чэлэн бэил Ноӈан гиркаракан, эрэли кадаттитан. 43Өмэн аси мян дӫр анӈану хуӈэлэӈкэрин. Ноӈан эйду эӈэей манрин бэгдэчимӈэлду таматми, ӈи-дэ ноӈман эч айра. 44Амаргич дагамриди, тарак аси Иисус тэтын холивэн тэмиснин, тармадит хуӈэлэӈкэрий оддин.
45– Ӈи Мину тэмиснин? – Иисус улгэмрин.
Эйду бичэл бэил эчэвур тэмир гөнитэн. Таракам Петр гөнин:
– Хупкучимнэ, Хину эрэли бэил илгараӈчир, тэрингич кадатта.
46– Эсни, ӈи-дэ Мину тэмиснин, – Иисус-нян барагрин, – Би Миндук Эӈив нӫривэн харам.
47Таракам аси, хумэтьӈэ туркуми, дюлэски, хилгэникэн, гиркарин, Иисусу дэпки хэнӈэнди тикрин, эйдуткин бичэлтэки бэилтэки тэлэӈрин, ями-да ноӈан Иисусу тэмисэнчэй, он-да тармадит ай очай. 48Иисус гөнин:
– Хунадив, хин тэденси хину айрин. Аймакань ӈэнэссоли!
49Иисус эдлэн унэт төрэрий мудакра, нэӈэдек дю ӈунэмэчимӈэн дюдукун бэй эмрин, болганарин:
– Хунадис көкэрин, эди Хупкучимӈэв бурдэӈиткил.
50Тарбач Иисус, тарав долдариди, Иаиртаки гөнин:
– Эди ӈэлкил. Тэдетли-ткэн, таракам хутэс ай один.
51Дюла ими, Иисус ӈив-дэ мэннюми эч ивкэн, Петэру, Иоам, Иакову асаткан-да энтилбэн ивкэнин. 52Дю долан эйду бичэл хоӈритан, тыӈэндулэвур чорникан. Нян Иисус гөнин:
– Эдилрэ хоӈкилра, ноӈан эч көкэр, хуклэнтэкэн.
53Ноӈартан Ноӈандин ининэдилритэн, асаткан көкэчэвэн хами. 54Иисус-нян эйдувэн бэилбу төлэски эрэссиди, көкэчэ ӈаллон гадыди, төрэснин:
– Асаткан! Илли!
55Тарак хираснин, тармадит илрин, Иисус асаткан дебдэн бөдэтэн гөнин. 56Энтылни мянитан. Тарбач Иисус гөнин, ӈитки-дэ коечэвур эдэтэн тэлэӈрэ.
वर्तमान में चयनित:
Лука 8: eve
हाइलाइट
शेयर
कॉपी
Want to have your highlights saved across all your devices? Sign up or sign in
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
