Psalmyn 19
19
PSALM XIX.
PART I
1Ny niaughyn, Hiarn, ta er nyn skyn,
T’ad soilshagh magh dty ghloyr;
Obbyr dty laueyn heose ’syn aer,
Ta prowal jeh dty phooar.
2-3Caghlaaghyn kinjagh laa as oie
Cur toiggal dooin dy plain;
Dy vel y phooar ren ad ’oardrail,
Erskyn y roshtyn ain.
4Ta sheean jeu ayns dy chooilley cheer,
Yn feiyr oc trooid y theihll;
Baght cronnal jeu ta er ny ghoaill
Liorish dy chooilley ’eill.
Cabbane ayns shen ren oo da’n ghrian,
5Speeint goll myr fer-noa-poost,
Magh ass e hiamyr, ny myr foawyr,
Ayns siyr dy roie e choorse.
6E bree ta goll veih shiar gys sheear,
Myrgeddin jiass as twoaie;
Dagh ayrn jeh’n seihl t’ee geddyn magh,
Veg cha vel follit vo’ee.
PART II
7Leigh Yee te glen, chyndaa yn cree,
Gys craueeaght as foays;
Creenaght te coyrt da’n boght annoon,
Soilshey ’sy ghorraghys.
8Ynrick ta slattyssyn y Chiarn,
Eunyssagh as gerjoil;
Ta ’anney, ronsit magh dy geyre,
Niartagh yn shilley moal.
9Aggle y Chiarn ta shickyr soit,
Er undin nagh jean craa;
E leighyn corrym, er nyn dowse
Ayns meighyn kiart dy bra.
10S’boght soylit huc ta meanyn airh,
Ny’n airh hene ta roït voue;
Yn vill, ny kerenyn-molley hene,
Cha vel cha millish roo.
11M’Ir-choyrlee cooie treishteilagh ad,
As raue'ghyn dooie foardrail;
Leagh flaunyssagh ta gour nyn lheid,
Ta’n vea oc roo cordail.
PART III
12E skyrraghtyn quoi oddys ginsh,
E vennick goll jeh’n raad?
Veih m’oiljyn follit glen mee, Hiarn,
Uss ta’n slane coontey ayd.
13Ny lhig da peccah daaney, Hiarn,
M’y reayll fo reill e phooar;
Dy voddym’s sauchey fo dty scaa,
Scapail yn olkys mooar.
14My phadjer eisht, as booise my chree,
Vees er ny lowal liort;
As mish, fo sauchys dty endeil,
Nee coyrt my varrant ort.
वर्तमान में चयनित:
Psalmyn 19: PS1761
हाइलाइट
शेयर
कॉपी
Want to have your highlights saved across all your devices? Sign up or sign in
maintained by the British and Foreign Bible Society