THA 21
21
Polnii Jerosalem ki kagong
1Sateichii nyiinii ahnyii dato tat n-nou kaleitai malyii gam tong gongsanii Kos ki katang pwidi tat majyiitok gongsanii, adoipiinei leimik kitei Roda ki sateichii Patara ki gong wotakle, 2Sateichii Phoni- siya ki tat majupat tang karam malyii dou wosanii, nyiinii tei tei tong wosii hoigong takle. 3Sateichii nyiinii Kaipras tei ngou wosek-kii, tei tei abilamkii kai aisii Sairiya lam- pang hoigong sanii Tair ki khiitakle. 4Sateichii boumeigo kadou wosii, teikito leimik sana bam takle, ahnyii teinii rangii kamatei paikito Polgo Jerosalem ki maa matulak tang karam jangpii sam tam takle. 5Sateichii leimik tei sang sekkii aitiisii pat takle, nyiinii tat n-nou wosii nyii tiibui pwidi tei tat tutakle, sateichii ahnyii-noumei ninado ahnyii nah meihang kaswisii nyiigo namdi ki kajang katang tei kapoupyii takle, sateichii dwijaiku teito kok kumsii riitasanii nyii hangninanii hangni- niigo n-nou tang karam sam tam takle; 6Sateichii nyiinii malyii gam tong wotakle sateichii ahnyiinii kilampang nlaitu takle.
Kaisariya ki kagong
7Sateichii nyiinii malyii gamto katat tei sang aisii, Tair kito Tolema ki gong wotakle, sateichii nyiinii kangsanamei hang go salam tiisanii ahnyiigo kaswisii tingneikii bam takle. 8Sateichii supounei leimik tei nyiinii tat n-nou aisii Kaisariya ki gong takle. Sateichii mei sana kak kiteito mei hangninii kabi rasam tam katatpii Philip ki kalung tei liit wosii mpougo kaswisii bam takle. 9Sapfii mpou aipou kinah ralhiimeinah madai bamle, ahnyii tei Saraa sam katam meile. 10Nyiinii tinglang shangniikii teiki bam leibangpii, Ju- diya kito Lungkakalingmei hangninii zei Agabas katupii tei gongle. 11Mpounii nyiida gongsii, Pol mah haikak teipii mpoupi mpoubah hangtei peinei aisii tamle, “Aitiisii rangii kamateinii tamle, ‘ai haikak apumpii aigo ai takumpii Jehudi- meinii Jerosalem kito peinei tangle, ninado ahnyiinii mpougo lui kakimei bah kikii pyiitoi aitangle.’ ”
12Ai ai nyiinii shii wosek-kii nyiinii ninado teikito kalei meihangnii Polgo Jerosalem kitei gongsulosii namle. 13Nlenii mpounii khekalatle, “Gonyii kadapei tiileipo, aitiisii hatsii ninado gulung tiipaksii? Jerosalem kito n-gu reng peitang karam jangpiinii Inii tiikada takle.”
14Sateichii mpougo hempei woka- lak kito, nyiinii tou aisii tamle, “Bangpii mah kamaning tei tiimatulo.”
15Tinglang shangniikii teiki bam kaleitai, nyiinii nyiimah tiikada wosii, Jerosalem ki katang pitang karam jangpii tat tutakle. 16Sa- teichii nyiigo Kaisariya kito boumei chengniikado kaswisii tatle, ahnyii- nii nyiigo ki rhii matutang karam jangpii ndou karei kak boumei hangninii, Kaipras kito kalungmei Manason ki kalungkii pang gong takle.
Polnii Jemsda kagong
17Sateichii nyiinii Jerosalem ki gong sek-kii kangsanamei teinii ntasii lukai pyiitakle. 18Sateichii adoipiinei leimik tei Polnii nyiigo kaswisii Jems kitei liit takle sateichii katingmei hangdo haile. 19Teito mpounii ahnyiigo salam tiikaleitai, mpounii tha katii kito Saraanii lui kakimei kak kikii tiikapyii atha tei nsang nsangpiinii mpounii tam mpat tutakle. 20Sateichii ahnyiinii tei tei shii wosek-kii, Saraago tam matoile. Sateichii ahnyiinii mpou dakii tamle, “Kangsanapii Pol, nangnii ngoule, Jehudimei kak kito malum kalumei thang kadazii leipo? Sateichii ahnyii- hangnii ajai tingshang gotei kada- ziikapii lungliitpo? 21Teijangpiinii kadapei tiitangpo? Kadapokii nang gongtakle katu ahnyiinii soisupii shiitang takle. 22Teijangpiinii kadapei tiitangpo? Kadapokii nang gongtakle katu ahnyiinii soisupii shiitang takle. 23Teipiinii nyiinii godakii katam ai tiiseilo, ahnyii roinapii riishii tiikabam nyiimei sapfiimei madai leile. 24Ai sapfiimei ahnyiihang aigo pangsii ahnyiigo kaswisii nang roinapii tiimatei ailo, sateichii ahnyiinii ahnyii phyiitaitoi tang karam jangpii ahnyii mah pat kalei tei pung pyiilo; sateichii ahnyii dakii go kaang kito tam kalei samtei kasang makle, nlenii nangdo ajai- tingshang taiswisii ryiisii tat leile katu tei ahnyiihangnii titangle. 25Nlenii malum kalu lui kakimei kaang kito, Saraa dakii pyiitoi kalei pot, azai kachii, azai mpatsupii tiika- tat kamyii ninado sapwimei sapfiimei kashyii tha katii hang kito ahnyiinii mpou mpou roinapiinii mpaa matu tang karam jangpii nyiinii samtak tiisii larek ryiipyii aitakle.”
26Teito Polnii sapwimei hang gotei pangsii adoipiinei leimik tei ahnyiigo kaswisii mpoupum tiimatei aisii, ahnyii meihang jangpii pyiitoi tang karam pot tei pyiitoi kaleitai, tiikamatei mah leimik kashang mati tang karam jangpii Saraa kamaning kilung tei mpounii tatliitle.
Saraa kamaning kilungto Pol go jum kalu
27Sateichii leimik sana tei sang- tuna Asia kito Jihudimeinii mpougo Saraa kamaning kilungkii ngou wosek-kii, meihang gotei katwisii mpou phyiiryiikii bah kaisii, 28saa mpatle, “He Isrel ki sapfiimei, tiihalo! Bamlyii hang kito nyii meigo ajaitingshang go sateichii bam aigo tam mashyiisii meihang go rali- kapyiipii tei aile sateichii aidoito kisii mpounii Grikmeihang go Saraa kamaningki lung pangliitsii kamatei bam aigo tiimahong aitakle.” 29Kadaponii aisung kareiki ahnyiinii Iphisas mpfii Trophimas go mpounii kaswisii kalei tei namdi kikii ngoule. Sateichii mpougo Polnii Saraa kamaning kilungkii pangliit taklesii ahnyiinii maning wotakle.
30Teito namdi hang kitei akoi moitu takle sateichii mei hang kaswisii paksii ahnyiinii Polgo jum wosii, Saraa kamaning ki lung teito mpougo chyii mpat takle, sateichii teisek-kii takam hangtei kakam aitakle. 31Sateichii ahnyiinii mpougo gitanglesii tiileibangpii, Jerosalem bamlyii hang rampou aitaklesii saryiimei kak kito kasagoi kadipii dakii sam ai poimakhii takle. 32Teito mpounii saryiimei ninado saryiimei hai phyiiryiito apum katii katii- meihang go pangsii ahnyiida katang tei pak hum takle; teito ahnyiinii kasagoi kadipii ninado saryiimei gotei ngou wosek-kii, Polgo dat kalei tei toutakle. 33Teitinglang kitei kasagoipii kadipii teinii mpouda ma- nangliitsii mpougo jum wosii sagyii bah rangkat hangnapiinii peitang karam jangpii mwija pyiitakle, sa- teichii mpou ai tapo ninado mpounii kadapei tii aitakpo katu n-nhiitakle. 34Sateichii meihang kak kiteito mei kangkanii sam hangninii, kangkanii kaki sam hangninii saa mpat takle sateichii kasaa kalei koi nrung jangteipiinii mpounii kasang tei tipei wokalak jangpiinii mpougo sakui kilungkii pangliit kai ailosii mwija pyii aitakle. 35Sateichii mpounii pihai kitei tat khii sek-kii, meihang- piinii kalak kathai jangpiinii mpougo saryiimeinii kasisii poitatle. 36Kada- pokii meihang teinii “Mpougo gi ailo!” sii saasii saasii atai swi leile.
Polnii mpou roinapiinii dang katu
37Sateichii Polgo sakui kilung pangliit tuna mpounii kasagoi saryiiki kadipii dateikii tamle, “Inii godakii sam tamne!” Teito mpounii tamle, “Nang Grikmei lat timakpo? 38Tei- tiileponii, leimik aihang doiki teito meigo kagi sapfiimei thang madaigo katwisii sazyii kamarong kikii chyii ka-mpat Izip mpfii tei nang makde?”
39Nlenii Polnii tamle, “Silisiya kito kalei Tarsas, arou katii namdi kito lungkalei mei hangniniile, n-gu lungsyiisii meimoi dakii sam tam matulo.”
40Sateichii mpounii ahgo mazhii- pyii sek-kii, Polnii pihai gam teito tusat tosii meimoi dateikii mpou- bahpii kahai takle; sateichii meimoi teinii malhiisu takle sek-kii mpounii Hebru latpii malhiisii ahnyiidakii tamle.
वर्तमान में चयनित:
THA 21: NAG2
हाइलाइट
शेयर
कॉपी
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
