THA 16
16
Timothinii Pol nei Sailas go kaswisii katat
1Sateichii mpounii Derbe ninado Laistra kido gongtakle, satei- chii julo, kamalum Jehudimei pwi hangninii nah sapfiimei zei Timothi sii kalat boumei hangninii teiki tei leile; mpou pfiinii Grikmeile. 2Laistra sateichii Ikoniam kito kalei kangsanameinii mpou kaang kito hangkapii tam mbisii bam leile. 3Polnii mpougo kaswisii tatnyii takle; teipiinii teiki sazyii kito kalei Jehudimei hang jangpii mpounii mpougo pangsii tiigyii malempyii aitakle, kadaponii mpou pfii ai Grikmeile katu tei ahnyii hangnii tile. 4Sateichii ahnyiinii namdi namdi kitei pwidi tatsii kagong kito Jerosalem kito kalei tiilamlwi kapyiimei ninado katingmei hangnii mazhii kalu samtei switang karam jangpii ahnyii dakii ahnyiinii pyiitakle. 5Aitiisii charsh hangteinii kamalum kito sangtingkhii tutakle sateichii sating kata mei moibui buitu takle.
Troas kito Pol go madhang kapyii
6Sateichii Asiya kito kabi rasam tam ka-mpat tei, rangii kamateinii mazhii kasu jangpiinii ahnyiinii Phairgiya ninado Galati sazyiiki tat majupat-to takle. 7Sateichii ahnyiinii Maisiya sazyii kajudou kitei gong wosek-kii, ahnyiinii Betani ki liit tang karam jangpii tiile, nlenii Jisu mah rangii teinii mazhiipyii sutakle. 8Teijangpii Maisiya sazyii kuto tat majyiitok patsii ahnyiinii Troas ki tatliit takle. 9Sateichii tinghum Polda madhang kapyii hangninii mangoule: Mesidoniya ki sapfiimei hangninanii satpii mpou dato khangle; “Mesidoniya ki gongseisii nyiigo tiihalo.” 10Madhang kapyii tei ngouwo sek-kii Saraanii ahnyii dakii kabi rasam tam ralipyii matutang karam jangpii nyiigo latpyii takle katu tei tigong wosanii, teisek-kii nyiinii Mesidoniya ki maa tang karam jangpii tiikada wotakle.
Pilipi kito Laidiyanii lungkali kalu
11Teijangpiinii nyiinii Troas kito malyii hoigongsii majyiitoksii Samo- tres ki katang gong takle sateichii adoipiinei leimik tei Neopolis ki katang gongtakle, 12sateichii teiki teito nyiinii Pilipi ki katang gong wotakle. Abam ai Mesidoniya mah namdi sateichii Rom meinii kabam nile, sateichii nyiinii namdi teiki teito leimik shangniikii bamle. 13Sateichii bam ntak piinei leimik nyiinii kongkarang Takam ki teito tatpat tosii karyii kuto riita tang karam jangpii bamlei tanglesii maningsii teiki tei maa takle. Sateichii nyiinii bamsanii gong ndwi kalei sapwimei hang dakii tam ralipyiitu takle. 14Sateichii Taiyatira namdi kito zei Laidiya sii kalatpei majyiikabi peimani joi kaleipei ninado Saraago mata kaleipei sapwi mpei hangninanii tam rali kapyii tei shiiwole, Polnii tam ka-mpat samtei lung liitsii shii matu tang karam jangpii Bangpiinii mpoupei lungtei laatpyii takle. 15Mpoupeido mpou- peiki kalungmei hangniido dwi mpum kalutai mpoupeinii nyii dato khangle, “I-ai Bangpiigo kamalum meilesii gonyiinii maning leponii, guki gong bamseilo.” Sateichii mpoupeinii nyiigo tiigatpii haitakle.
Pilipi mah kabang kito
16Tingneikii nyiinii kariita bamki tat leibangpii sara kashyii kaswi kalei, ki kalei ralhiimeinah hangni- nanii nyiigo kadou wotakle, sara kashyii teinii mpoupeigo pat kasunakii reipii tam mpat kabuimah teimaham tei pyii leile. Mpoupeinii Peimhiisii gongtang karam sam tam kapyii kito mpoupei mah apum meihang teinii hangkapii sana liipat dou woleile. 17Sapwi mpei ainii Pol ninado nyii tai swigong sanii saa mpatle, “Nyii dakii keikapyii kasaga karing mah pwidi tam ralipyiisii kalei mei hang ai sagoi kaki Saraa mah kikaleimeile.” 18Sateichii mpoupeinii tinglang kathangkii ai ai aitii takle. Nlenii Polnii samou supiinii nryiigong sii rangii dateikii tamle, mpoupei dato tatpat totang karam jangpii Inii Jisu Krista zei kito godakii mwija pyii leile. Tei tinglang sek-kii, rangii teinii patto takle,
19Nlenii mpoupei mah apum mei teinii ahnyii mah liipat doutang karam mah kamalum tei tat katu tei ngou wosek-kii, ahnyiinii Pol nei Sailas go jum wosii saliki lungto apum katiimei doikii chyiigong takle. 20Sateichii ahnyiinii mpoupiinago samtak katiimei doikii pang gongsii tamle, “Ai mei ai Jehudimeile, ahnyiinii nyiimah namdi kikii koi nrung tiikaile. 21ahnyiinii nyiimah ajaitingshangnii mazhii kasu hang ai tam ralipyiile; nyiinii Romki sazyii nahle sateichii nyiinii ajaitingshang hang ai lukai lakle ninado swiwo lakle.” 22Sateichii meihangnii ahnyiigo mazhii supiinii gungtu satto takle; sateichii samtak katiimei teinii ahnyii peimani tei het toi pyiisanii mpoupiinago tingrangpii kache matu tang karam jangpiinii mwija pyii aitakle. 23Sateichii ahnyiinii ahnyii phyiiryiikii tingrangpii laklak pyii- sanii ahnyiigo kabang kilungkii bang aisii kabangki kakoimeigo tiigatpii koi matutang karam jangpii mwija pyii aitakle. 24Sateichii mpounii kakhatsam tei dou wosek-kii, mpou- piinago kabang kilung teikii toikai aisii ahnyii-pi tei ting kadi hangna kak-kii peinei aitakle.
25Nlenii tinghum asumkii Pol nei Sailasnii Saraa dakii riitasii ninado lhii tiisii bamle; 26teito binasekkii katei malyii kachyii hangninii gongsanii kabang kibangmaa hang- tei nlai takle; sateichii binasekkii takam hangteido laat takle, meihang go pei kabam sagyiireng hangteido tak takle. 27Sateichii kabangki ka- koipii teinii ziitsii kengtu kabangki takam hangtei laat kabam tei ngou wosek-kii, kabang kito kaleimei hang pakga taklesii maning wosii mpoumah saryiikhang tei jok mpatsii mpou roinapiinii gitanglesii tiitakle. 28Nlenii Polnii lat sagoisii saale, “Goroinapii n-go tiimaga tang karam tiisang tiisulo, kadaponii nyiihang aikito bamle.”
29Teito kabangki kakoipii teinii thaomi khang wosii pakliit takle sateichii kahingpiinii nchyiikok koksii Pol nei Sailas doito koumang takle. 30Sateichii mpounii mpoupii- nago pang patsii tamle, “Goneiwo, kalei kapyii doutang karam jangpii Inii kadapei tiitangpo?”
31Teito mpoupiinanii tamle, “Bangpii Jisugo malumlo sateichii nangdo goki kalungmeido kaleikapyii tei doutangle.” 32Sateichii mpoupii- nanii mpou dakiido mpouki kalungto kaswisii kalei meihang dakiido Bang- pii mah kabi rasam tei tam ralipyii takle. 33Sateichii teipiinei tinghum teitinglang sek teikii mpounii mpoupiinago pang wosii mpoupiimah tingrang jam tei shyii mateitoi pyii aitakle, sateichii teisek-kii mpoudo mpouki kalungmei hangdo dwi mpum wotakle. 34Teito mpounii mpoupiinago mpouki pang gongsii mpoupiina doikii chiitang karam amah tei dungpyii takle, sateichii Saraa dakii malum wosii mpouki ka- lungmei hang go kaswisii hangkapii nta takle.
35Nlenii tingtang sek-kii, samtak katiimei teinii dargameigo lang mpatsii tamle, “Ahnyii gotei mpat ailo.”
36Teito kabangki kakoipii teinii Pol dakii sampao tei tam takle, “Samtak katiimeinii gonyii go mpat aitang karam jangpii n-gu lang magong leile, teijangpiinii aitoinii majungsii tat tulo.”
37Nlenii Polnii ahnyii dakii tamle, “Samtak tiisang tiisupiinii Rom mei nyiigo mei machii doito ahnyiinii datsii kabang ki lungkii jumkai pyiitakle, sateichii aitoinii ahnyiinii nyiigo makumpii mpat aitangpo? Mazhiisang mazhiinyii makle; ahnyii pum sekpiinii gongsii nyiigo poi mpat matulo.”
38Teito dargamei teinii samtak katiimei dakii sam ai tam sek-kii, ahnyii Rom ki meile katu tei shii- wosii ahnyiinii hingtakle sateichii ahnyiinii gongsanii mpoupiina dato khangtakle. 39Teito ahnyiinii mpou- piinago poi mpat pyiisanii teiki namdi ki teito tat matu tang karam jangpii khangtakle. 40Sateichii ahnyiinii kabang ki teito pat tosii, Laidiya ki kalung tei liit takle; satei- chii ahnyiinii kangsanamei gotei kadou wosii ahnyiigo tam katwi pyiisanii n-noutu takle.
वर्तमान में चयनित:
THA 16: NAG2
हाइलाइट
शेयर
कॉपी
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
