THA 15
15
Jerosalem kito ndwi katu
1Sateichii Judiya kito mei kangkanii tatliitsii “Moses mah ajaitingshang taiswisii tiigyii malem suleponii gonyiinii keikapyii kasaga karing tei doupei wolakle” sii kangsanamei dakii ahnyiinii tam ralipyii tutakle. 2Teito Pol nei Barnabasnii hangkapii hungsii sam kajyii katu kito sam kajyiisii kalei aikaang ki aito Pol nei Barnabas ninado ahnyii kak kito mei kangkago Jerosalem kikii Tiilamlwi kapyiimei ninado katingmeigo maa kadou matu tang karam jangpii kalai wotakle.
3Teijangpii Charshnii ahnyiigo pwidikii lang mpatsii, luikaki meinii lungkali kalu samtei tamsii tamsii ahnyiinii Phonisiya ninado Samariya sazyiiki tat majupat takle, sateichii kangsanamei hang go hangkapii tii ntapyii takle. 4Sateichii ahnyiinii Jerosalem ki gongtang wosek-kii, lat mpat kalumei, Tiilamlwi kapyiimei ninado katingmei hangteinii ahnyiigo lukai wotakle, sateichii Saraanii ahnyiigo kaswipyii sanii tiikalu atha hangtei ahnyiinii tampyii takle. 5“Nlenii ahnyii tiigyii malem tang karamle sateichii Moses mah ajaitingshang tei jumtang karam jangpii ahnyii dakii kakhatpyii tang karamle” sii kabijai katiimei tai kaswimei kamalum mei kangkanii gungtu satsii tam takle.
6Teito Tiilamlwi kapyiimei nei katingmeihang tei sam aikaang ki aito karashii njoitang karam jangpii ndwi wotakle. 7Teito samtei hang- kapii kajyiipat tusek-kii, Pitarnii gungtu sanii ahnyii dakii tamle, “He, kangsanamei, lui kakimeinii gu mwi kito kabi rasam tei shii wosii malum tang karam jangpii ndou karei kito Saraanii gonyii kak kito n-gu kalai mpat pyiitakle katu ai gonyiinii tile. 8Sateichii lungdo tikalei Saraa teinii nyii dakii tiipyii kabam tei takum- piinii ahnyii dakiido rangii kamatei tei pyiisanii, ahnyii dakii sakchyii pyiitakle. 9Sateichii kamalum mah paikito ahnyii lung tiimatei pyiisanii, mpounii nyii nei ahnyii ai samah kado tam kaki ai mbam makle. 10Teijangpiinii aitoi nyiipei nyii paomeiniido nyiiniido pungpei kalak pot kamaswi ai Tiilamlwi kapyiimei mah kagung gamkii gonyiinii kuikai pyiisii Saraago kadajangpii ajai juleipo? 11Nlenii Bangpii Jisu mah kalungset teipiinii ahnyiigo njoisii nyiido Keikapyii kasaga karing doutangle katu tei nyiinii malumle.”
12Teito meihang teinii malhii- supii bam takle, sateichii Pol nei Barnabas paikito lui kakimei kak-kii Saraanii tiikamangou ninado kama- dat kamadat hang tiikapyii tei mpoupiinanii tam ka-mpat tei ahnyiinii shiile. 13Sateichii ahnyiinii tamsang kaleitai, Jemsnii khekalatle, “He, kangsanamei, gusam shiipyiilo; 14Saraanii mpou zei jangpiinii lui kakimei kak kito meigo poi mpat tang karam jangpiinii karei kito kada takumpiinii mikjot tei jupyiipo katu tei Simonnii tam mpatpyii takle. 15sateichii ainii Lungkakalingmei hang mah sam gotei njoile, aitiisii ryiibamle,
16‘Ai tha hangtainii I gong tangle sateichii Devit mah sagong sazyii tei Inii tiimatuloi tangle,
sateichii teimah magakalei tei Inii nlailoisii tiimatu tangle;
sateichii Inii teitei tiisangting pyii tangle.
17Masak kalei mei hangnii sateichii guzeigo lukai kalu lui kakimei hang teinii Bangpii go fiitangle.
18karei kito sam hang ai mati kapyii Bangpiinii tamle.’
19“Teijangpiinii Inii kamaningnii, lui kakimei kak kito Saraada nryii kagongmei ahnyii hang gotei nyiinii tiikamage lak tang karamle. 20Nlenii ahnyiinii tingtugo pyiikatoi matei kasu pot tei chiilak tang karam jangpii; ahnyiinii masung mahalak tang karam jangpii, sateichii zai mpat supiinii tiitat kalei kounah ninado ajai kachii aihangki aito mpat tang karam jangpii nyiinii ahnyii dakii ryiile. 21Kadaponii ndou karei kito namdi namdi kito Moses mah ajaitingshang mah larek bung hangtei tam rali kapyiimei leisii teitei bam ntak piinei leimik mata Jehudimei ndwi kito fiileile.”
Lui kakaimei kamalum mei dakii ryii kapyii
22Sateichii ahnyii kangsanamei hang kak kito meinii adzyii ka-nrou- meigo, zei Barnabas sii kalat Judas ninado Sailas go, kalai mpat tosii Pol ninado Barnabas go kaswisii Antiyok kikii lang mpat tang karam ai Charsh hang, Tiilamlwi kapyiimei hang, ninado katingmei hangnii bitanglesii maning takle. 23Sateichii aitiisii ryii wosii ahnyii bah kikii matat aitakle: “Nyii kangsanamei, tiilamlwi kapyiimei ninado kating- mei hangnii Antiyok, Sairiya ninado Silisiya kito kalei lui kakimei kangsanamei dakii salam tiileile. 24Nyiinii Kamazhii pyii kasumei kangkanii nyii dato tatpat tosii, gonyii lung tiikamagesii gonyiigo sampiinii lung tii lungnyii lung- haopyii takle katu tei nyiinii shiiwo kalu jangpiinii, 25nyiinii lungswi hangninii tiisii meigo kalai mpat tosii, nyii Bangpii Jisu Krista mah zei jangpii tiilung pyiitoi kalei, 26nyiinii kamanang lungkasyii Bar- nabas ninado Pol go kaswisii ahnyiigo lang ka-mpat bitakle sii maning takle. 27Teijangpiinii nyiinii Judas nei Sailas go lang leile; ahnyii pum sekpiiniido gonyii dakii mah hangtei mwipiinii tampyii tangle. 28Kadapochiinii kisii bitang karam ai supiinii kisii kamaswi pot tei gonyii phyiiryiikii kai kasu teinii bilesii rangii kamateiniido, nyiiniido maning takle, 29katunii Saraa dakii pyiitoi kalei amah, ajai kachii, azai mpat supii tiitat kalei kounah ninado sapwimei sapfiimei kashyii kahong tha katii hang aikito gonyiinii mpaa kalu bile; gonyii roinapiinii aihangki aito swiwo lepochiinii, gonyii mah kabi tei tangle; gonyii sadoi bimatulo.”
30Aitiisii ahnyiigo lang mpat tosii, Antiyok ki tatliit takle; sateichii meihang go lat ndwi wosii ahnyiinii larek tei pyiitakle. 31Sateichii ahnyiinii tei tei fiiwosii, lung tiimadi kapyii jangpiinii nta takle. 32Satei- chii ahnyii pum sekpiiniido lungkakalingpii Judas nei Sailasnii kangsanamei gotei sam hangkii tamsii katwi pyiisii, ahnyiigo lung tiisangting pyiitakle. 33Tinglang shangniikii ahnyiinii bamkaisanii, kangsanamei kak ki teito ahnyiigo lang ka-mpat meida katang tei majungsii mpatpyii takle. 34(Nlenii Sailasnii teikito kabam bilesii maning takle.)
35Nlenii Pol nei Barnabasnii mei kakimeigo kaswisii Antiyok kito Bangpii mah kabi rasam ralipyiisii ninado tam ralipyiisii bam takle.
Pol nei Barnabas kapak katu
36Sateichii tinglang shangniikii tai Polnii Barnabas dakii tamle, “Nyiinii Bangpii mah kabi rasam tam ralipyii kabam namdi hang kiteito kangsanamei hangteinii kada takumpiinii bampo katu aitoinii nlailoisii jule je.” 37Sateichii Barna- basnii Mark sii lat kalei Jon godo ahnyiigo kaswisii pangtatnyii takle. 38Nlenii Pamphaliya kito ahnyiigo toi aisii tha katii kiteito ahnyiigo kaswisii tat kasu ah aigo ahnyiigo kaswisii pangtat katu ai kabi mak- lesii Polnii maning takle. 39aitiisii kajyiipatsii ahnyii hangninanii hangniniigo kapak aitakle, sateichii Barnabasnii mpougo kaswisii Mark- go pangsii Kaipras ki katang malyii hoisii tat tutakle. 40Nlenii Polnii Sailas go kalai mpat takle sateichii kangsanamei hangnii ahnyiigo Bangpii mah kalungset kito pyiitoi aisii ahnyiinii tat tutakle. 41Sateichii mpounii Charsh hang go tiisangting pyiisii Sairiya ninado Silisiya tat majusii tat tutakle.
वर्तमान में चयनित:
THA 15: NAG2
हाइलाइट
शेयर
कॉपी
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
