Text: © Wycliffe India Audio: ℗ Hosanna 2024 and WPT

Pangwali 2023 WBT (NT) Drama

जे शब्द असा, से ब्रह्माण्ड त धरती बणुण केआं पेहले थिआ। से परमेश्वर जुए रेही अओ असा। त सेईंए परमेश्वर भो। ब्रह्माण्ड त धरती बणुण केआं पेहले से परमेश्वर जुए थिआ। परमेश्वरे तसे बेलि ईं सम्हाई कुछ बणाउ। ईं कोई बि चीज नेईं जे तसे बेलि ना बणु। जे शब्द असा तस केईं जीवन देणे शक्ति असी। त तसे जीवने मनख जे परमेश्वरे सच्चाई टगड़ियार ईं हराली। मनख अन्हारे अन्तर असा। त टगड़ियार तेन्हि केईं पुजती, पर से टगड़ियार कदी समझ ना बटते।

परमेश्वरे यक मेह्‍णु तेन्हि केईं लंघा, जेस नओं यूहन्ना थिउ। से परमेश्वरे लंघो टगड़ियारे बारे उगाह देण जे ओ थिआ ताकि मेह्‍णु तस टगड़ियार पुठ विश्वास करियेल। यूहन्ना अपफ से टगड़ियार नेओथ, पर से तेस टगड़ियारी बारे उगाह देण जे अओ थिआ। किस कि परमेश्वरे लंघो से टगड़ियार, जे यीशु असा, से धरती पुठ एण बाड़ा थिआ। से परमेश्वरे सच्चाई मेह्‍णु हरालता।

पता, यीशु धरती पुठ आ। तसे बेलि सम्हाई कुछ बणु, तोउं बि मेह्‍णु से ना पिछाणा। से अपु देश जे आ पर मेह्‍णु से ना मना। पर जेन बि से मना तेन तेन्हि सम्हाई जे परमेश्वरे गभुर भुणे हक दिता। से सम्हाई ना मेह्‍णु के ऊड़ी केईआं, ना जिसमे इच्छाई बेलि, होर ना ई बोउए इच्छाई बेलि परमेश्वरे गभुर भुन्ते, पर परमेश्वरे इच्छाई बेलि भुन्ते।
जे शब्द असा से मनखे रूप नी कइ असी बुच रेहा। यूहन्ना बि तसे बारे ईं उगाह दी कइ जोरी जुए बोलु “ए सेईंया भो, जेस बारे मेईं बोलो थी कि जे में पता एन्ता से मोउं केआं बि बोडा असा, किस कि मोउं जमुण केआं पेहले ईं से थिआ।” असी अपफ परमेश्वरे इकलौते कोईये महिमा काई छो असी जे परमपिता परमेश्वर केईआं अओ असा। तेन असी परमेश्वरे पूरी दाह हरालो असी त परमेश्वरे सच्चाई असी जे बोलो असी। किस कि तसे कृपादृष्टि असी पुठ सुआ असी, तोउं त असी रज्जि अशुश मेती। ई सच्चु असु कि परमेश्वरे मूसा केईआं हें धे नियम दिता, पर सच्चाई त कृपादृष्टि असी यीशु मसीह केआं मेई। परमेश्वरे इकलौते कुआ छड़ दी कइ केनि बि कदी परमेश्वर ना का। किस कि सेईंए ईं परमपिता परमेश्वर जुए उई मी कइ रिहो असा, त सद तेन ईं मेह्‍णु परमेश्वर गुण हराला।



यक रोज, यहूदी जाति के कुछ नेते यरुशलेम केआं केहि पुजारी त कारखानी यूहन्ना केईं ई पुछुण जे लंघाए कि “तुस कोउं भीन्‍थ”। त यूहन्ने मनु त सिधे सिधे बोलु कि “अउं मसीह ना भो”। त तेन्हि तस केआं पुछु, “त तुस कोउं भो, तुस की भविष्य वक्ता एलिय्याह भो ना?” यूहन्ने तेन्हि जे बोलु, “ना, अउं से ना भो।” त यहूदी तस केआं दुबारी पुछु, “त कि तुस से भविष्य वक्ता भो ना जेस अस भाड़ बिशो असे?” तेन बोलु, “ना।” त तेन्हि तस जे बोलु, “त तुस कोउं भीन्‍थ? असी जे बोलीण दे कि असी अपु लंघाणे बाड़ी जे की बोलुण। तुस अपु बारे की बोते?” यूहन्ने बोलु, “यशायाह भविष्य वक्ता कताब अन्तर जे मेह्‍णु अरुणि धार ‘प्रभु जे बथ बणाण दिए’ हक देन्ता, अउं से मेह्‍णु भो।” ए मेह्‍णु फरीसी नओएं यहूदी मेह्‍णु के यक धार्मिक दले लंघो थिए। त तेन्हि तस केईआं पुछु, “अगर तुस मसीह ना भो, होर ना एलिय्याह भो, होर ना से भविष्य वक्ता भो त किस मेह्‍णु चुसता?” यूहन्ने तेन्हि जे बोलु, “अउं त सद पाणि अन्तर चुसता। पर तुसी बुच यक ईं मेह्‍णु असा, जे तुसी पिरियाणोरा नेईं। से में पता एन्ता, तोउं बि तसे सेवा करणे त तसे प्युले बि खुआणे लेएक अउं नेईं।”
ई सोब घटना यरदन दरेउए पूरब दिशा बैतनिया ग्रां अन्तर भुई, जेठि यूहन्ना पाणि अन्तर चुसताथ।

होउस, जपल यूहन्ने यीशु अपु ए जे एन्ते का त बोलु, “हेरे, हेरे! एस हेरे! ए परमेश्वर जे यक किएऊ ईं असा; जे सम्हाई के पाप लिए अपु भकत देन्ता। ए से भो जेसे बारे मेईं बोलो थिउ कि ‘जे में पतोती एणे बाड़ा असा, से मोउं केआं बोडा असा, किस कि से मोउं केआं पेहले थिआ’। पेहले अउं तस ना पिछाणताथ, पर अउं तोउं पाणि अन्तर मेह्‍णु चुसुण लगा, ताकि से इस्राएले मेह्‍णु के अगर खड़ी घियाल।” तोउं यूहन्ने ईं उगाही दिती कि “मेईं शुची आत्मा अलणी वेश अन्तर स्वर्ग केआं एन्ते त यीशु पुठ बिश्ते काई। मोउं पता ईं नेओथ कि ए से भो। पर परमेश्वर, जेन अउं पाणि अन्तर मेह्‍णु चुसाण जे लंघा, तेन मोउं जे बोलु कि जेस पुठ तु परमेश्वरे आत्मा एन्ती त बिश्ति केईयेल, सेईंए ईं शुची आत्मा अन्तर चुसुणे बाड़ा भो। मेईं ई सोब यीशु पुठ भुन्ते काउ त अउं सोह कता कि ए परमेश्वरे कुआ भो।”

तढ़िया होउस, दुबारी यूहन्ना अपु दुई चेली जुओई तठि खड़ खड़ थिआ। जपल यीशु तेनबाई घेण लगा त तस हेर कइ यूहन्ने बोलु, “ईये हेरे, परमेश्वरे किएऊ!” तेन्हि दुई चेली यूहन्ने शुणु त यीशु पतोती घेण लगे। जिखेईं यीशु पतूं खिरक कइ हेरु कि से दुहिए तसे पतोती एण लगो असे, त तेन्हि केआं पुछु, “तुसी की लुओ?” तेन्हि बोलु, “रब्बी, तुस कोठि बिश्ते?” (इब्रानी भाषा अन्तर “रब्बी” मतलब “गुरुजी” असा।) त तेन तेन्हि जे बोलु, “हंटे, त पता लग घेन्ता!” त से गे त तसे बिशणे जगाह हेरी। तपल तकर ब्यादि चोउर बज गो थिउ त से ब्यादि तकर तस जुए बिशे।
जेन्हि दुहि यूहन्ने बोक शुणो थी त यीशु पतोती गो थिए, तेन्हि बुचा यक अन्द्रियास थिआ, जे शमौन पतरसे भाई थिआ। तेन पेहले अपु सक्के भाई शमौन जुएई मी कइ तस जे बोलु, “असी ‘ख्रिस्तुस’ मतलब ‘मसीह’ मेओ असा।” तोउं से शमौन यीशु मीण जे घिन आ। यीशु तसे धे हेरु त बोलु, “तु यूहन्ने कुआ, शमौन भो। पर अभेईं केआं खड़ तु ‘कैफा’ बोलिन्ता।” (कैफा मतलब “पलण” भो। यूनानी भाषा अन्तर एस जे “पतरस” बोते)।
दोके रोज, यीशु गलील राज्य जे घेणे ठीक किउ त घेन्ते घेन्ते बथ तस फिलिप्पुस मेआ। त तेन तस जे बोलु, “में पतोती आई त में चेला बण!” फिलिप्पुस, अन्द्रियासे त पतरसे ग्रां बैतसैदे थिआ। पता, फिलिप्पुसे नथानयेल तोपा त तस जे बोलु, “ओ यारा, तोउ पता असा ना असी मसीह मेओ असा, जेस बारे मूसे नियमे कताब अन्तर त भविष्य वक्ते अपु अपु कताबी अन्तर लिखो असु। से नासरत ग्रांए यूसुफे कुआ यीशु भो।” त नथानयेले हैरान भोई कइ तस जे बोलु, “नासरत ग्रां केआं कि कोई अब्बल चीज एई सकती ना? कदी बि ना!” फिलिप्पुस तस जे बोलु, “मोजी कने, हेरिण दे”।
जीं यीशु नथानयेल अपु कना जे एन्ता का त तसे बारे बोलु, “ई भो यक सच्चा इस्राएली जाति मेह्‍णु, जेस अन्तर कोई दुरबुध नेईं।” नथानयेल तस केआं पुछु, “तेईं अउं कीं पिछाणो असा?” यीशु तस जे बोलु, “फिलिप्पुसे तोउ हक देणे केईआं पेहले ईं जपल तु अंजीरे बुटे पड्डे थिआ, तपल मेईं तु काओ थिआ।” त नथानयेल बोलु, “ए गुरु, तुस सच्चे परमेश्वरे कुआ भो त तुस इस्राएले राजा भो।” यीशु तस जे बोलु, “तु मोउं पुठ तोउं विश्वास करण लगो असा किस कि मेईं बोलु कि तु अंजीरे बुटे पड्डे का। अउं तोउ जे बोता कि तु एस केआं बि ज्यादा बोडे बोडे कम हेरता।” तोउं यीशु सोबी जे बोलु, “तुस स्वर्ग खुला त जेठि अउं ‘मनखे कुआ’ भुन्ता, तठि परमेश्वरे स्वर्गेदूत स्वर्ग एन्ते घेन्ते हेरते।”

सुनें - यूहन्ना 1