Text: © New Life Computer Institute Audio: ℗ 2022 Hosanna

Shekhawati 2017 NLCI (NT)  Non Drama

सपता का पेला दिन दितबारनै, भागपाट्याई बे लूगाया जखी बो सुगंद देबाळो लेव जिनै बे त्यार करी ही बिनै लेर कबर प गई। बानै कबर का मुंडा आगै को भाठो सरकेड़ो लाध्यो। जणा बे मांयनै जार देखी पण बानै बठै परबु ईसु की लास कोनी लाधी। बे खड़ी-खड़ी सोचबा लागी क, “ईसु की लास कठै गई,” अत्ती बारां मई बाकन दो आदमी आर खड़्या होगा जाका गाबा भळका मारै हा। जणा बे बानै देखर डर क मारी धरती म निची घूण घाली। बे दोन्यु जणा बाऊँ कह्या, “जखो जिंदो ह बिनै मरेड़ा म क्युं ढुंढो हो? बो अठै कोनी। बो जी उठ्यो। बा बात याद करो जखी बो मरबाऊँ पेली गलिल म थारूँ बोली ही। बो बोल्यो हो, ‘आ तो होणी ह क मिनख को बेटो पाप्या क हाता म पड़सी बिनै सुळी प चढायो जासी पण तीसरै दिन जी उठसी।’” जणा बा लूगाया क बिकी बाता याद आई। अर बठैऊँ पाछी आर बे बा ग्यारा चेला अर दुसरानै बे सगळी बाता बताई। अ बाता बताबाळी लूगाया म मरीयम मगदलिनी, योअन्ना अर याकूब की माँ मरीयम अर ओर बी ही जखी बा चेलानै जखा भेजेड़ा चेला खुवाता हा अ बाता बतारी ही। पण बाकी बाता बानै फांप लागी अर बे बाकी बाता प भरोसो कोनी कर्या। पण पतरस आ सुणर भाग्यो जखो कबर प जार थम्यो अर बो झुकर देख्यो जणा बठै गाबा क अलावा क्युंई कोनी हो। जणा बो जोक्यु बठै देख्यो बिपै ताजूब करतो घरा चलेगो।


बि दिनई बिका चेला मऊँ दो जणा यरूसलेमऊँ करीब सात कोस परै इमाउस गाँव जार्या हा। अर बे जोक्यु होयो हो बिपै चालता-चालता आपसरी म बतळार्या हा। अर जद बे बतळार्या हा जणा ईसु बाकै कनै आर बाकै सागै होलिओ। पण बे बिनै देखर बी कोनी पिछाण सक्या। ईसु बाऊँ बुज्यो, “थे चालता-चालता आपसरी म काँई बतळार्या हो?” जणा बे दुखी होर बठैई खड़्या होगा। बामैऊँ किल्युपास नाम को एक आदमी हो बो बोल्यो, “तू एकलोई अंय्यां को आबाळो जाबाळो मिनख ह जिनै गेलड़ा दिना म यरूसलेम म जोक्यु घट्यो बिकै बारां म कोनी बेरो?” जणा ईसु बोल्यो, “अंय्यां को काँई होगो?” जणा बे बिनै बताबा लाग्या क, “अ बाता ईसु नासरी क बारां म ह जखो सगळा मिनखा अर परमेसर की नजर्या म खेबा अर करबा म सक्‍तिसाली अर परमेसर की खेबाळो हो। बिनै म्हारा यहूदि नेता अर परधान याजक पकड़ा'र बिनै मोत की सजा दिवा दिआ अर बिनै सुळी प चढा दिओ गयो। अर म्हें इ बात की आस लगाया बेठ्या हा, की ओई इजरायलनै छुटाबाळो मिनख ह, आ बातानै होया निमड़्या आज तीसरो दिन ह। अर म्हारी टोळी की लूगाया म्हानै ताजूब म गेर दिनी। होयो अंय्यां की आज भागपाट्याई बे कबर प गई। अर बानै बठै बिकी लास कोनी मिली। बे पाछी आर म्हानै आ बोली क म्हानै ईस्बर नगरी दुता को दरसाव होयो ह जखो म्हानै आ बताई की बो तो जीवै ह। जणा म्हारै मऊँ क्युंक कबर प गया पण जंय्यां लूगाया बताई ही बठै ठिक बंय्यांई हो, अर बिको क्युंई अतो-पतो कोनी हो।” जणा ईसु बानै बोल्यो, “थे कंय्यां का बादु अर परमेसर की खेबाळा की बाता प बिस्वास करबा म ढिला हो। काँई मसी ताँई ओ जरूरी कोनी हो क बो आ दुख-तकलिफानै भोगै अर आपकी मेमा धारण करै?” अर बो बानै मूसाऊँ लेर सगळा परमेसर की खेबाळा की बे बाता खोलर बताई जखी पबितर सास्तर म बिकै बारां म मंडरी ह। जद बे बि गाँव क सांकड़ा पुग्या जठै बे जावै हा। जणा ईसु क्युं अंय्यां को बरताव कर्यो जंय्यां बिनै आगै जाणो होवै। पण बे बिनै जिदा-जादि कर आ खेर डाट लिआ की, “इब दिन आथगो ह।” जणा बो मांयनै गयो अर बाकन डटगो। अर जद रोटी खाबा बो बाकै सागै चोकी प बेठ्यो जणा रोटी उठार परमेसर को धनेवाद कर्यो अर रोटी तोड़र बानै दिनी। बि घड़ीई बा सगळा की आँख्या खुलगी अर बे बिनै पिछाण्गा। पण बो बाकै सामैऊँ गायब होगो। जणा बे आपसरी म बतळाबा लागगा, “बो गेला म जद आपणाऊँ बातचित कर्यो हो। अर आपानै सास्तर की बाता समजार्यो हो। बि टेम आपणा मन म जोस पैदा कोनी होर्यो हो के?” जदकी जदई बे खड़्या होर यरूसलेम रवाना होगा। अर बठै बानै बे ग्यारा चेला अर बाकी का एक सागै भेळा होयड़ा मिल्या। बे बोलर्या हा, “परबु सचमई जीगो क्युं क समोन बिनै जीवतानै देख्यो ह।” जणा बे दोन्यु जणा जोक्यु बाकै सागै गेला म होयो बानै बतायो अर आ बी बता दिनी की बे कंय्यां बिनै रोटी तोड़ता टेम पिछाण्या।


हाल बे आ बाता क बारां म बतळार्याई हा क ईसु खुद बाकै मांय आर खड़्यो होगो अर बाऊँ बोल्यो, “थानै स्यांती मिलै।” पण बे बुरी ढाळ डरग्या जंय्यां कोई भूत देख लिओ होवै। जणा बो बानै बोल्यो, “थे क्याले चित उठा राख्या हो? अर थारा मना म ओ भेम कठैऊँ आग्यो? मेरै हात लगार मेरा हात पगानै देखो। क्युं क भूत म हाड-मास कोनी होवै जंय्यां थे मेर म देखर्या हो।” अंय्यां बोलर बो बानै आपका हात-पग दिखाया। पण बे खुसी अर ताजूब क मार्या हाल ताँई बिपै बिस्वास कोनी कर सक्या, जणा बो बानै बुज्यो, “थारै कनै खाबा ताँई क्युं ह के?” बे बिनै भुंदेड़ी मछी को टुक दिओ। बो बिनै लेर बाकै सामै खायो। अर बाऊँ बोल्यो, “अ बे बाता हीं जखी म जनाड़ै बोली ही जद म थारै सागै हो। अ सगळी बात जखी मूसा का नेम-कायदा म, परमेसर की खेबाळा अर भजना की पोथी म मंडरी ह सगळी पूरी होणीई ही।”
अर बो पबितर सास्तरनै समजाबा ताँई बाकी बुदी का पाट खोल दिआ। अर बो बानै बोल्यो, “अ बेई बाता हीं जखी पबितर सास्तर म मंडेड़ी ह की, ‘मसी दुख भोगसी अर मर्या पाछै तीसरै दिन ओज्यु जी उठसी।’ अर बिका नामऊँ पाप की माफी ताँई मन फेरबा का चोखा समचार को यरूसलेमऊँ लेर धरती का सगळा कूणबा म परचार कर्यो जासी। थे आ बाता का गुवा हो। अर जिको करार मेरो परम-पिता मेरूँ कर्यो ह बा पबितर आत्मा म थारै ताँई भेजस्युं। पण थे बि दिन ताँई इ नगरी मई टिक्या रेहज्यो जद ताँई थानै पबितर आत्माऊँ सक्‍ति कोनी मिलज्या।”


जणा बो बानै बेतनिया गाँव ताँई बारनै लेगो। अर बो बानै हात बढार आसिरबाद दिओ। अर बानै आसिरबाद देतानैई नाकै कर ईस्बर नगरी म उठा लिओ गयो। जणा बे बिकी भगती करी अर राजी-खुसी यरूसलेम बावड़्याया। अर बे मनदर म परमेसर को गुणगान करता आपको टेम काटबा लागगा।

सुनें - लूका 24