Mataio 7
7
Baraba avuvuobuong tavuk maiang non inamaniap la akosarmeng
1Urie, Iesu la tiesong gare ro, “Baraba avuvuoming tavuk maiang non teip ga magaulap la akosarmeng. Babun akosarong Morowa iriet tavuk ira mi gat. 2Are ratmat ga buat akosarming are rie. Memani, Morowa leba avuvuoang tavuk ming at irie tavuk lare rie la mime akosar ira ma non teip ga magaulap. Pa uvuvuo la mime mialo maun non teip ga magaulap, met uriro uvuvuo leba apulang Morowa ira mi. 3Babun ogimaming tatak tatakam la iot na irama a papa ming, pa tale kan agatnung pararima ila kakani la ut na irap mi kan. 4Miptang, leba ot pararima na irap mi kan, tie are mani ga puoming meba amilava papa o lou ming gare ro, “Ei, papa, tuga opugutara tatakam la iot na irama nuo. 5Mimi teip ga magaulap o kakarabunim, lake ka apugutmiara pararima la ut na irap mi ka. Ga tubiat bat eba maset uming ga apugutmiara tatak tatakam la iot na irap a papa ming.” 6“Baraba mialam tiesiap am Morowa mila murum maun inamaniap mila kiram la memaning agat gare kavunap mila suvameng. Babun terigimeng ga makirarameng miriro tiesiap ga mikaratmeng. Are gat to, baraba mialam tiesiap mila murum am Ila Kakani me maun teip ga magaulap mila kiram gare kumep. Memani, eba fugaumeng ira ma miriro ga eba mabutbutmeng pagap la tale mameit la mumurum.”
Morowa leba alam pagap mila murum maun teip ga magaulap la marikmeng me ai
7Urie, inagat tiesong Iesu gare ro, “Marikming ga amikang Morowa meba alang paga miun, ga eba alang miun. Ubiming le man maisinming pagap aun Morowa, ga eba mamioping. Bakbakming ira tabuna, ga eba anavang Morowa mibuo. 8Memani, mirier teip ga magaulap ganam la marikmeng me ai Morowa la mime maiaram pagap. Pa mirier teip ga magaulap la man maisinmeng pagap, la mime mamaiop. Pa teip ga magaulap la bakbakmeng ira tabuna, ume unava Morowa mabuo. 9Miptang, leba poi ba ang noba mi la aika mamo ang meba alang purun ba aun, atabo eba alang mamo tadas ba aun, a? Karuk. 10Are gat to, leba aekang kulot ba mamo ang meba alang a abuluma ba aun, atabo eba alang mamo kagok ula kiro ba aun, a? Iriro gat la karuk. 11Tie, mimi mamop la mitara mime makosar papot tavukup mila kiram, pa mitara mime mialam pagap mila murum maun lop mim. Are gat to, amira maset Mamo ming la unama na panbinim, eba teaba leba alam pagap mila murum maun teip ga magaulap la mime amarik. 12Are ratmat ga mirier tavukup mila murum ganam miga makosarmeng non teip ga magaulap ira mi, mirirot tavukup le makosarming ira ma. Memani, uritmat la muana o maimai ang Moses ga ties maiong unulip tinan.”
Iesu la tiesong me teip ga magaulap le mela maiobung na tatak tabuna
13Urie, Iesu la uaramo non ties o uvuvuo gare ro, “Mila miobung na tatak tabuna. Memani, alang la ila na pianam o iou la kakanu, ga alang la ila na uriro pianam la mitara inava. Ga mitara kakabalo meba omeuluo, are ratmat ga papot ma inamaniap la mime omeuluan uriro alang. 14Pa alang la ila na pianam o ninimiap, la mitara kakapio. Ga alang la ila na urio pianam la mitara mamaranu meba omeuluo, are ratmat ga ut narit narit it inamaniap la mime aisin iriro tabuna ga omeuluo uriro alang.
Temamalienbuong me unulip o kakarabunim
15Urie, Iesu la inagat uaramo ties o uvuvuo ga tiesong gare ro, “Umialeng maset me unulip o kakarabunim. Mime maiaramam tiesiap mila murum meba miladanmeng. Pa agat maiong migat la are kavunap mila suvameng la menam papakip ma sipsipup, meba mivanameng ga mela kagarat mai sipsipup meba umaiaring ma ga menamum ga maiom. 16Miptang, leba agimaming tavuk la mime akosar, tie eba kan manera maset mirie aga migat. Atabo inamaniap la mime maiaram kabop a wain na iagurup mila sisirim, a? Karuk kan. Atabo inamaniap la mime maiaram kabop o fig na palis ila kire ga musengi, a? Karuk kan. 17Are tie ga mirier kuop ganam mila murum la mime maiario parak ula muru, pa kuop mila kiram mime maiario parak ula kiro. 18Migat, kuguom ula muru tale kan puoieng meba iaring parak ula kiro. Are gat to, kuguom ula kiro la tale kan puoieng meba iaring parak ula muru. 19Pa mirier kuop ganam la tale mime maiario parak ula muru, mime mebulam teip ga magaulap ga masuammeng na kit. 20Are ratmat ga agimaming tavuk la mime akosar, ga eba mamira mirie unulip o kakarabunim.
21“Baraba agatming gare tiro, ‘Mirier teip ga magaulap ganam la mime meiva Iesu Ila Kakani, eba mela maiobung na inamon o panbinim ga eba ualeng Morowa mabuo’. Karuk. Inamaniap it la mime omeuluan agat ang Mamo ruang la unama na panbinim, miriet leba maiobung na inamon ang. 22Miptang, tubiat na la ula kakanu o ties ang Morowa, papot ma teip ga magaulap leba tomelava gare ro, ‘Ila Kakani, Ila Kakani, okosarpang ubi o unuli na bonim nuo ga makalapang muranap mila kiram na bonim nuo. Ga na bonim nuo la makosarpang papot pagap o turupnuabap.’ 23Pa na irie tara, eba maralava uakap gare ro, ‘Tale gat mirit. Mimi teip ga magaulap la mime akosar tavuk ila kire, mila touluo!’”
Narain tavukupien o ukosar a luguan
24Urie, Iesu la inagat tiesong gare ro, “Are ratmat ga inamaniap la mepto uriro ties tung ga omeuluan, kamena gare migana la amaning agat ula muru ga akosarong luguan ang tatuan bo tadas. 25Tara la ulum afarat ga iram danuot ga muio nakap, ga ifif la teiara maranit, miriro pagap la mumaio ga airakmeng iriro luguan, pa tale kan ulum. Memani, paparaka a iriro luguan la ula parepong maranit ira tadas ila kakani tatang na kimanam. 26Pa inamaniap la mepto uriro ties tung ga tale omeuluan, kamena gare non migana ila bangutang la akosarong luguan ang nakap bo ubiem agarit. 27Tara la ulum afarat ga iram danuot ga muio nakap ga teiara ifif maranit. Ga miriro pagap la airakmeng iriro luguan ga ulum. Eva, ulum ga kire kan gane.”
28Urie, tara la uaramam ara Iesu miriro tiesiap, teip ga magaulap la turupmaiaba kirat me usingnualap ang. 29Memani, tale kan masinguala gare teip o agat maimai. Karuk. Pa ume masinguala o agat ang kan are migana la amaning kaguma.
© 2001, Wycliffe Bible Translators, Inc. All rights reserved.
