MATEO 11
11
Gu Juan jaꞌtkam bopkondam na ja jootsaꞌ jɨꞌkchi gu jaꞌtkam tugiꞌñ nam tɨtkapuꞌ gu Jesuus noꞌr diꞌ guch Xoiꞌkam guiꞌ na saak bha jootsaꞌ gu Dios jix dhaam dɨr
(Lk. 7:18‑35)
1Baꞌ nat paiꞌ dhuuk tɨɨmo gu Jesuus na tu ja aꞌgidhimɨk gu mambhɨɨx daman gook noonbiꞌñ, pu jii mu jaꞌp na paiꞌ ɨꞌlhich jir kikcham kaꞌ guiꞌ na dhiꞌ pɨx bhaan jup bipioꞌ gu dɨbɨɨr.
2Baꞌ bhammɨ na paiꞌ kuupkaꞌ gu Juan jaꞌtkam bopkondam, puiꞌ ba tɨ kai na mu paiꞌ pɨx oirɨt jix kɨɨꞌp jum duukam jup tu bua gu Jesuus. Baꞌ muiꞌ ma ja joot jɨꞌkchi gu jaꞌtkam tugiꞌñ guiꞌ nam kaichgɨdaꞌ 3nam sap tɨtkapuꞌ noꞌ sap moor diꞌ guch Xoiꞌkam guiꞌ na saak bha jootsaꞌ gu Dios jix dhaam dɨr, piam ku guꞌ sap noꞌ jax kaiꞌch nar jumai nam baꞌ nɨɨradaꞌ guiꞌ.
4Baꞌ mummɨ jiimdat puiꞌp ba tɨtdaim am gu Jesuus. Baꞌ guiꞌ cham ja aagiꞌñ miꞌ jotmodaꞌ, dai nat xim jotmaꞌñ pɨx nat mi jaꞌp naiꞌ xi ja duduaꞌñ gux kakoꞌkkam. Miꞌ dhɨr baꞌ moop ja tɨtda:
―Ea na pim aaꞌñdhapuꞌ gu Juan jaꞌtkam bopkondam gu puiꞌ na pimɨt jax bañ chɨɨ na ñich ja duduaꞌñ dhiñ jaaduñ nam kax kakoꞌk kat, gio baꞌ puiꞌ na pimɨt jax bañ kai nañ ja aagiꞌñ nam jax jaꞌk duñiaꞌ nam baꞌ jimiaꞌ jix dhaam jaꞌk buiñor gu Dios. 5Jaꞌp japim tɨɨdaꞌ na ñich tu ja tɨɨꞌñchoda guiꞌ nam cham ñiññia kat, gio baꞌ guiꞌ na tootolhidhat ka gakiidhat gu ja tutkuꞌ na ñich bɨɨx jup ja duduaꞌñ. Gio baꞌ guiꞌ nam kax mamaꞌmkulhiꞌ kat nam pu cham tu oipot, bɨɨx japim jup xi aagiꞌñdhaꞌ na ñich ja duduaꞌñ, gio baꞌ jaiꞌ guiꞌ nam cham tɇ kɇɇkɇt. Gio baꞌ jaiꞌ guiꞌ nam ba koꞌiix kat na ñich bɨɨx jup ja baapmiꞌ ja duduaꞌñdhak. Gio baꞌ nañ tu ja aꞌgiꞌñdhaꞌ gux bhaiꞌm kaiꞌchdham ñioꞌkiꞌñ gu Dios guiꞌ nam cham tuꞌ biaꞌ nam gampaiꞌ tuꞌm, nam soiꞌ pɨx jum ɨlhiiꞌñ, nañ ja aagiꞌñdhaꞌ nam jax jaꞌk duñiaꞌ nam baꞌ jimiaꞌ jix dhaam jaꞌk buiñor. 6Jaꞌp moo joidham jix bhaiꞌ tu jimiaꞌ gu jaroiꞌ noꞌ pu gammɨjɨ tɨ jɨɨgiꞌñ aañ jiñ bui.
7Baꞌ pu jii mɨt gu jaꞌtkam tugiꞌñ gu Juan jaꞌtkam bopkondam daipuꞌ nat puꞌñi xi ja tɨɨꞌn gu Jesuus. Miꞌ dhɨr baꞌ moop ja tɨtda gu Jesuus gu jaꞌtkam guiꞌ nam jɨꞌk miꞌp tuꞌiiꞌ:
―¿Tuꞌ pimɨt mu tɨɨꞌmpuk mummɨ gampɨx jix chu gak kɨr janoꞌ na pimɨt paiꞌ dhuuk mu jimɨɨk? ¿Gu junboꞌ aa na miꞌ joidham jum bua na bhaiꞌ xi jɨbɨɨr? 8¿Kaꞌ tuꞌ ji pimɨt mu tɨɨꞌmpuk na pimɨt baꞌ moom dɨkooꞌñ na pimɨt mu jii? ¿Kaꞌ jaroiꞌ aa mi oirɨ ji chɨm tɨiꞌdhat gu jajannulh jix aꞌbhar jix dhaꞌram namkɨm? Moo chi guꞌ cham ji, na guꞌ na pim jax bax maat bo jia na guiꞌ nam pu chuꞌm tɨm tɨꞌiiꞌñkaꞌ, dai mummɨx joiꞌñdhaꞌ am nam darkaꞌ ja bui gux ioꞌm gɇꞌgɇrkam jum aaꞌndam. 9Moo chi guꞌ guiꞌ ji na pimɨt mu tɨɨgim guiꞌ nax ioꞌm jix bhaiꞌ xi buadaꞌ na tu aꞌgadaꞌ, cham tuꞌ puiꞌ na jax guiꞌ nam bɨjɨk bhaankamuꞌn jup tu aꞌgimɨk gu Dios. 10Guiꞌ dho Juan jaꞌtkam bopkondam jañ aagat jup kaiꞌch, na guꞌ dhiꞌ aagat jup kaiꞌch guñ Gɨꞌkoraꞌ miꞌ na paiꞌ tu uaꞌñix gu ñioꞌkiꞌñ na jaꞌpnim kaiꞌch:
Jumaiñ bɨɨpɨꞌ mu jootsaꞌ na baꞌ ba ja mattudaꞌ gu jaꞌtkam nap jootom muiꞌ ba jim.
11Baꞌ gu Juan jaꞌtkam bopkondam, aañ gɇꞌkam kɨꞌn biaꞌ ja bui gu jaꞌtkam, nat guꞌ gɇꞌkam kɨꞌn bhaan tɨ tɨɨ guñ Gɨꞌkoraꞌ. Ku baꞌ guꞌ gu jaroiꞌ noꞌ miꞌ puiꞌ ba jim na jax jix aaꞌ guñ Gɨꞌkoraꞌ, puiꞌ pɨx gɇꞌkam kɨꞌn jup biaꞌkaꞌ iñ ji, na guꞌ jaꞌxbuiꞌ puiꞌ bhaan jup ba tɨ nɨidhidhaꞌ guñ Gɨꞌkoraꞌ.
12’Baꞌ tɨix muꞌaam kaꞌ am gu jaꞌtkam gu Juan jaꞌtkam bopkondam janoꞌ dɨr nat paiꞌ dhuuk ya ai, nam guꞌ tɨi cham kaim kaꞌ na tɨi ja aagiꞌñdhaꞌ nam jax jaꞌk duñiaꞌ na baꞌ ja aꞌm ba tɨ nɨidhidhaꞌ gɨt gu Dios, guꞌ ji nam guꞌ dai xix bhaakut. 13Baꞌ puꞌñi tɨi pu tu ja aꞌgiꞌñdhaꞌ am gu jaꞌtkam guiꞌ nam bɨjɨk bhaankam jup tu aꞌgimɨk gu Dios na jax jaꞌk tu ja aꞌgidhimɨk gu Juan jaꞌtkam bopkondam, gio baꞌ na mɨt tɨi tu uaꞌnak gu ñioꞌkiꞌñ gu Dios nam baꞌ jiñkuidhai miꞌ puiꞌ ba jimiaꞌ gɨt, guꞌ ji nam guꞌ ba puiꞌ pɨx cham jup tɨ jɨɨgiꞌñdhaꞌ. 14Baꞌ gu Juan jaꞌtkam bopkondam jir diꞌ pɨx gu Eliiyas guiꞌ na bɨjɨk bhaankamuꞌn tu aꞌgimɨk gu Dios, na guꞌ puiꞌ jaꞌk tu uaꞌñix gu ñioꞌkiꞌñ gu Dios na saak puꞌñi gio yaꞌp ba aayaꞌ. 15Moo pim jix bhaiꞌ xim gaꞌngadaꞌ na jax jir jum duukam gu dhiꞌ puiꞌ nañ jax jam tɨtda na pim baꞌ miꞌ puiꞌ jimiaꞌ noꞌ pim tɨ jɨɨgiꞌñ nar sɨlhkam.
16’¿Tuꞌñ gɨt bhaan ji uaꞌrgidhai tu jam aagidhaꞌ nam jax jaꞌk ji buan gu jaꞌtkam guiꞌ nam xib jix jaiꞌch? Jaꞌp ji buan am dho na jax gu aꞌaalh noꞌ mɨt muiꞌ maap xim daagɨk mu paiꞌ ma tɨtbim jax chuꞌm giotɨr. Baꞌ noꞌ mɨt jaiꞌ bha jaꞌp ji dharaibuk ma tu saas, baꞌ nam paiꞌ dhuuk xi saasbichui jup ja tɨɨdaꞌ am gu jaiꞌ ja bɨpnaꞌ aꞌaalh: 17“Ni jɨꞌx ku pimɨt iam tɨ nɨi na chich tɨi ma tu saas, ni ku pimɨt xi susuanɨ na tɨi joiꞌmdam jum kaiꞌchɨt gu saasab.” 18Puꞌñi jaꞌk ji buan am gu jaꞌtkam guiꞌ nam xib jix jaiꞌch. Tɨɨꞌ na guꞌ gu Juan jaꞌtkam bopkondam nat tɨi yaꞌ xi ɇɇk ja bui, puiꞌ aiꞌchux jamɨt na jaꞌook bhaan jup tuiꞌñgɨdaꞌ, sia ku guꞌ gammɨjɨ tɨim saabdaꞌ gio na tɨi cham paiꞌ dhuuk ioꞌdaꞌ gu biiñ. 19Gio baꞌ aañ nat bhañ joot guñ Gɨꞌkoraꞌ, maakam jup jiñ aiꞌchux jamɨt, sia kuñ guꞌ tɨi cham paiꞌ dhuuk jiñ xaabdaꞌ. Puiꞌ kaiꞌchdhaꞌ am nañ sap giilhim gɇꞌ tu kuaꞌ gio sap nañ giilhim jix iꞌmuk, jix ja oiꞌñ iñ sap guiꞌ nam cham tuꞌ kaꞌm tɨ nɨiꞌñ gio guiꞌ nam jir tuumiñ tutaandam tugiꞌñ gux ioꞌm gɇꞌkam Rooma kam. Ku baꞌ guꞌ gu Dios pɨx mattudaꞌ ji gu jaroiꞌ na tuꞌ sɨlhkam jix maachim kaꞌ nañ jir tuꞌp tuꞌm daꞌ.
Nam cham miꞌ puiꞌ jimiaꞌ na jax jix aaꞌ gu Dios gu Korasiiñ oiꞌñkam gio gu Betsaida kam
(Lk. 10:13‑15)
20Baꞌ bhaan bhaiꞌp ji chu aꞌga gu Jesuus gook kap na paiꞌ muiꞌ maap daaꞌñxim jir kikcham kaꞌ, miꞌ nat paiꞌ pɨk jix ioꞌm muiꞌx kɨɨꞌp jum duukam jup tu duu, guꞌ ji na mɨt guꞌ cham miꞌ puiꞌ jii na jax jix aaꞌ gu Dios. Baꞌp kaiꞌch:
21―¡Jaꞌp moo cham bhaiꞌ tu jam jimiaꞌ aapiꞌm na pim Korasiiñ oiꞌdhaꞌ gio baꞌ aapiꞌm na pim Betsaida jaꞌk jup oiꞌdhaꞌ, na pimɨt guꞌ cham miꞌ puiꞌ jii na jax jix aaꞌ guñ Gɨꞌkoraꞌ! Tɨi ñich jam nɨiꞌñchudat joidham jix kɨɨꞌp jum duukam jup tu duu jam bui na pim tuꞌ cham paiꞌ dhuuk nɨidhat. Iam chi na pimɨt guꞌ tɨɨgɨk miꞌ puiꞌ ba jii. Na guꞌ noꞌñ mu jaꞌk Tiiro puiꞌ joidham jix bhaiꞌm duukam jup tu duñiaꞌ gɨt, gio mu jaꞌk na paiꞌ Sidoon jup tɨ tɨɨꞌ, moo janoꞌ gɨt nam tɨ jɨɨꞌñdhai gu jaꞌtkam buiñor guñ Gɨꞌkoraꞌ miꞌ puiꞌ ba jimiaꞌ na jax jix aaꞌ, baꞌ dai nam ba tɨm tɨiꞌdhaꞌ gɨt gu jajannulh jix xaasak, ni kum bar tu batbiadam kaꞌ gɨt, gio nam mu jaꞌp pɨx ba daraakaꞌ gɨt na paiꞌ jax kaat gu matai, baꞌ dhiꞌ bhaan jix maatɨꞌ kaꞌ gɨt nam jix ioꞌm soiꞌ bam ɨlhiiꞌñ. 22Baꞌ xib tuꞌ na jax chuiꞌkaꞌ, janoꞌ na paiꞌ dhuuk tum kuugalhdhaꞌ yaꞌ dhi oiꞌñgaꞌn bhaan, na paiꞌ dhuuk guñ Gɨꞌkoraꞌ ja aagiꞌñdhaꞌ bɨɨx gu jaꞌtkam nam jɨꞌk tuꞌ jax buimɨi, aapiꞌm giilhim jam tulhiiñchudaꞌ, cham tuꞌ puiꞌ na jax gu Sidoon kam jaꞌtkam gio gu Tiiro kam. 23Baꞌ aapiꞌm na pim Kapernaum oiꞌdhaꞌ, ¿jaꞌp jum aaꞌ pim aa na pim aayaꞌ jix dhaam jaꞌk buiñor guñ Gɨꞌkoraꞌ? Matgɨm mu jaꞌk ji na xi jam jootsaꞌ jix ioꞌm tuukab jaꞌk na paiꞌ gɇꞌ tɨ dɨꞌ, na pimɨt guꞌ cham miꞌ puiꞌ jii na jax jix aaꞌ. Na guꞌ noꞌñ mu jaꞌk Sodooma puiꞌ joidham jix kɨɨꞌp jum duukam jup tu duñiaꞌ gɨt, moo janoꞌ gɨt nam tɨ jɨɨꞌñdhai miꞌ puiꞌ jimiaꞌ na jax jix aaꞌ guñ Gɨꞌkoraꞌ, xib dho pui miꞌr kiicham kaꞌ gɨt. 24Baꞌ aañ yaꞌ pu jam tɨtda na janoꞌ na paiꞌ dhuuk ja aagiꞌñdhaꞌ guñ Gɨꞌkoraꞌ bɨɨx gu jaꞌtkam nam tuꞌ jax buimɨi, aapiꞌm giilhim jam tulhiiñchudaꞌ, cham tuꞌ puiꞌ na jax gu Sodooma kam kat.
Gu Jesuus na ba ja aꞌgiꞌñdhaꞌ gu jaꞌtkam nam jax jaꞌk duñiaꞌ nam baꞌ cham kam tulhiiñaꞌ
(Lk. 10:21‑22)
25Baꞌ miꞌ puiꞌ xi kaiꞌchimɨk gu Jesuus, bhaiꞌ ji chu daanɨ jix dhaam jaꞌk, jup kaiꞌch:
―Taxchaab baꞌñ Gɨꞌkoraꞌ nap jir Gɇꞌkam jix dhaam gio yaꞌ dhi oiꞌñgaꞌn bhaan, na pich guꞌ ba ja mattuda gu jaꞌtkam guiꞌ nam cham gɇꞌgɇrkam jum ɨlhiiꞌñ na tuꞌr jix bhaiꞌm duukam. Jaꞌp xi ja duuk japich guiꞌ nam puiꞌm aaꞌ nam panaas jix ioꞌm jix maat gum ñiꞌook, na guꞌ dai nam bhaan pɨx gɇꞌgɇrkam jum ɨlhiiꞌñ. 26Puiꞌ dhoñ Gɨꞌkoraꞌ, puiꞌ jaꞌk jix aaꞌ ap.
27Miꞌ dhɨr baꞌ moo jaꞌpni bhaiꞌp ji chu ja aꞌgi gu jaꞌtkam, jup ja tɨtda:
―Aañ bhañ joot guñ Gɨꞌkoraꞌ jix dhaam dɨr nañ baꞌ bhaankam ya jaꞌp ja aagiꞌñdhaꞌ gu jaꞌtkam na tuꞌr jix bhaiꞌm duukam. Baꞌ dɨɨlh pɨx jix maat guñ Gɨꞌkoraꞌ nañ jir tuꞌp tuꞌm daꞌ, nañ guꞌr Maraaꞌn, gio aañ yaꞌ dɨr mu jaꞌk dɨɨlh pɨx jup jix maat ɨp guñ Gɨꞌkoraꞌ nar tuꞌp tuꞌm daꞌ. Ku baꞌ guꞌ gu jaroiꞌ noꞌ moo jaꞌp tuꞌ sɨlhkam kɨꞌn jix maachim nach jir tuꞌp tuꞌm daꞌ gook dɨt guñ Gɨꞌkoraꞌ, aañiꞌ dho aagiꞌñdhaꞌ. 28Bañ kaichgɨdaꞌ pim bɨɨx na pim jɨꞌk jix xijaim tu jim, aañ jam aagiꞌñdhaꞌ na pim jax jaꞌk duñiaꞌ na pim baꞌ cham puiꞌ jaꞌk ka tu jimdaꞌ. 29Miꞌ pim puiꞌ xi jimɨi nañ jax jam tɨtda, chaꞌpim dai gɇꞌgɇrkam jum taat kaꞌ, jaꞌp na jax aañ nañ guꞌ gampaiꞌñ ɨlhiiꞌñ, cham tuꞌ gɇꞌkam jiñ chaat iñ. Baꞌ aapiꞌm puꞌñi jaꞌk jam aꞌm jup jum aaꞌ na pim miꞌ puiꞌ jimiaꞌ na pim baꞌx bhaiꞌm taat kaꞌ. 30Baꞌ dhiꞌ puiꞌ nañ jax jaꞌk jam aagiꞌñ na pim jiñ kaichgɨdaꞌ, cham tuꞌ puiꞌx xijai na pim miꞌ puiꞌ jimiaꞌ.
© 2007, Wycliffe Bible Translators, Inc. All rights reserved.
