Mateus 3
3
Yohanes a Dopuman
Markus 1:2-8; Lukas 3:1-17; Yohanes 1:6,19-34
1Someni yari na baka, Yohanes a Dopuman bigin preiki ini a Dreisabana fu Yudea. 2A taigi den sma taki: “Un drai un libi, bika her'esi Gado o bigin tiri libisma.” #Mat 4:17; Mrk 1:15 3A profeiti Yesaya ben taki fu Yohanes di a taki:
Wan sma e bari wroko
ini a dreisabana taki:
Meki pasi klari gi Masra,
puru ala boktuboktu gi En. #Jes 40:3
4Yohanes ben e weri krosi di meki fu kameel-wiwiri, èn a ben e tai wan leribuba na en bere. A ben e nyan sprenka nanga bus'oni. #2Kron 1:8 5Dan den sma fu Yerusalem, nanga den sma fu a heri distrikti Yudea, sosrefi den sma fu a heri kontren na a Yordanliba, hari go na Yohanes. 6Dan a dopu den ini a Yordanliba te den ben taki sortu sondu den du.
7Furu fu den Fariseiman nanga Saduseiman kon na Yohanes fu teki dopu tu. Ma di a si den, a taigi den taki: “Un sneki unu! Suma gi un wan pingi fu lon gi a strafu fu Gado di de fu kon? #Mat 12:34; 23:33 8Efu trutru un drai un libi, meki a de fu si dan. 9Un no mus prakseri tak' un kan taigi unsrefi taki: ‘Wi na bakapikin fu Abraham.’ Bika mi e taigi un taki: Gado kan meki den ston disi tron bakapikin fu Abraham. #Yoh 8:33 10A aksi de klar'klari kba na den rutu fu den bon. Ibri bon di no e gi bun froktu, den o kapu puru èn fringi go ini a faya. #Mat 7:19
11Mi e dopu unu nanga watra leki wan marki tak' un drai un libi. Ma a Wan di e kon na mi baka abi makti moro mi. Mi no warti srefi fu tyari En susu gi En fu A weri. Na En o dopu unu nanga a Santa Yeye èn nanga faya. 12A hori En wrokosani na ini En anu fu wai a buba puru ini a aleisi. A aleisi A o poti na ini maksin, ma den buba A o bron na ini faya di no man dede.”
A dopu fu Yesus
Markus 1:9-11; Lukas 3:21-22; Yohanes 1:32-34
13Yesus kmoto fu a distrikti Galilea go na Yohanes na a Yordanliba, fu Yohanes dopu En. 14Ma Yohanes no ben wani dopu En. A taigi En taki: “Fa Yu kan kon na mi fu mi dopu Yu? Na Yu mus dopu mi!”
15Ma Yesus piki en taki: “Yu kan dopu Mi, bika a fiti fu un du ala sani soleki fa Gado wani.” Dan Yohanes dopu Yesus.
16Fa Yesus dopu, A kmoto wantron na ini a watra. Ne heimel opo, èn Yohanes si fa a Yeye fu Gado saka leki wan doifi kon tapu Yesus. 17Dan wan sten kmoto fu heimel taki: “Disi na Mi Manpikin di Mi lobi. Mi abi prisiri nanga En.” #Gen 22:2; Ps 2:7; Jes 42:1; Mat 12:18; 17:5; Mrk 1:11; Luk 9:35
© 2002, Wycliffe Bible Translators, Inc. All rights reserved.
