CAWA'TA TUNITA 7
7
1Ma-Vatɗina di tam Nuwa ala: Nuwa kalaŋ kalaf hay lumna, naŋu hiɗi sum sa vo hay ziyna vaŋ kafe. Kay nan ɗuw kayni, naŋ kiran ɗigere suw sum sa ka hiɗi naŋ kafe. 2Jar muuriyan ma peldetna, naŋ ma yawam kulo kuɗaŋ jub-jub' siɗiya, kayn di ala cata hiɗi jufn ca ca', muuriyan ma may peldetɗina naŋ ma yawam kulo kuɗaŋ ma' ma', kayn di ala ma juf ɗaw ta ca ɗaw. 3Layayn ma dukalawn kaw naŋ ma yawam kulo kuɗaŋ jub' jub' siɗiya lay, kayn di ala ma jufn hiɗi ta cat ca ca'. Kay jafna valam ma hin iriya, a nam ma hot biya gaa kay nagat lo. 4Kay hini buur siɗiya ɦawa nan min hin niyn si gaa kay nagata ir buur dok-fiɗi, sle ma irina ma nan kotom gaa kay nagat kafna nan min vatam goyo. 5Nuwa li sle ma Lawn dumtin kaf.
6Busata vi Nuwa coowa kis-karkiya hay li ma niyn tun caw de gaa kay nagata.
7Nuwa hiɗi gurona valamu, hiɗi cata valamu hiɗi boyna vi gurona valam kaf cuk hay lumna, kay ŋay tuwsi niyna ma min de gaa kay nagata. 8Jaf muuriyan ma peldetna hiɗi ma may peldetɗin kaf, layayna hiɗi sle ma geɗ gaa kay nagat kaf, 9nam cuk kulo kuɗ Nuwa hay lumna, kuɗ tuwam jub-jub', ma juf ɗaw, ta ca ɗaw ki Lawn di nala.
10Li buur siɗiya bugolda kayni, niyn ma ŋolla tun caw sulur gaa kay nagata. 11Hay busata kis-karkiyata vi Nuwa, hay til ma ma'na, hay buur ma doogo yam siɗiyana vi tilla kayni, niyn ma hay zul ŋol ma wiŋŋa kaf vunam mal goyo, nam jaŋay goyo, ɗugul ma dukalawna vunam mali goyo. 12Niyn but ŋolo gaa kay nagata ir buur dok-fiɗi. 13Hay buur na'ta Nuwa kal kalaf hay lumna hiɗi gurona valamu Sem, Kam hiɗi Yafet, cata valamu hiɗi boyna vi gurona valamu sa ɦidina pet kaw. 14Nisi cuk hay lumna kayn hiɗi muuriyan kuɗ jafam kaf, farayn kuɗ jafam kaf, muur ma ɦarmat gaa kay nagatna kuɗ jafam kaf, layayna kuɗ jafam kaf, layayn ma gurayn kaw, sle ma zlimit talamna kafe. 15Nam cuk kulo tam Nuwa hay lumna, nam kuɗ tuwam jub-jub' kaf, slen ma irina ma sukka hayamna kafe. 16Nam cuk kayni, ma juf ɗaw ta ca ɗaw, sle ma irin noŋ kaf cuk kayni ki Lawn vul hagat tam Nuwa nala. Bugol kayni Ma-Vatɗin duk vun lumnis kulo kalamu.
17Niyn de ŋolo gaa kay nagata ir buur dok-fiɗi, niyn ti ŋolo, nam sli lumda kulo kalamu, ta-ta lumda kalay kulo gine ŋolo hiɗi nagata. 18Niyn ti ŋolo gaa kay nagata, nam hob liyn kaf. May lumda vi Nuwa ka dol kulo kalamu. 19Niyn ti vokom ŋol suwa suwa, ta-ta hiɗiy ma fiyokŋa kay nagata ɗubi goy kafe. 20Bugol ɗubna vi hiɗiyna, nam jik kulo kalam ir goldoŋ doogo yam vasl lo. 21Sle ma sukka hayamna gaa kay nagat kaf vat goyo; layayn lay, farayn lay, muuriyan lay, sle ma ɦarmatn kaf lay, sumun noŋ kaf lay. 22Slen ma irim hayamna kaf, ma gi sukka hiɗi cinamu kaf, hiɗi slen ma kulo ɗeŋ kay nagat kaf miti goyo. 23Sle ma ka iri gi suk kay nagat kaf Ma-Vatɗin vatam goyo. Tun cawis tam san pa ta-ta tam farayna, tam sle ma ɦarmatna ta-ta tam layayn ma dukalawn goŋ'. Jafam vatis goy kay nagat noŋ karɓacak'. Hin mi Nuwa hiɗi sle ma kulo kuɗum hay lumna tuta. 24Niyn kulur yam nagata ta-ta ir buur kis hiɗi diram dok-vasl.
נבחרו כעת:
CAWA'TA TUNITA 7: Massana
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
BIBALDA TA PELDETTA © L'Alliance Biblique du Cameroun, 2001