LOPNA 22
22
1Nigi ɓosiyonna hiɗi sumiyanu, wulini humgi va ma nan min digita kay sem lawta vanu. 2Hay li ma nisi hum ala nam di yoboyn tisi kayni hay vun Hebrena, nisi lakay ŋal suwa. Paulus ka di ala: 3Nanu nan mi sa ma Yudiyana, nan vuɗi hay Tarsus hay Kilikiya, may nan wul hay hoyok-ziyn tani, nan wul gaa kuɗ gay Gamaliyel, hatay hay gatta vi sumiyaya kay li kuɗa'a hay liyam ɗiger. Nan ay hobay ŋolo hiɗi ciwerta kay Lawna ki nigi vaydi kaf ka li nala kaw. 4Hagata na'ta kayni nan lasa' ta-ta tam mitta, nan jun jufayna hiɗi boyna, cuksi daŋgaya kaw. 5Mul-ma-ɗifinna hiɗi sa maariyana kaf as li di-goyta kanu. Nan sli ɗerwelda ays hay ɓisi pa kay tuɗ jun ɓosiyayna sa hay Damas, a marsi juni jun hay Yerusalem kay lisi lasi.
6Van li tanu hay li ma nan ka hay hagata goboy co hay Damas, hay falayt calak', liyn mun goy kan wiŋ de', haraŋ ŋolla may wuralawni pa, fo liyn goy kan pirek-pirek'. 7Nan nig gaa'a kay nagata, nan hum della ma ka di ay tan ala: Saulus, Saulus, naŋ lan las kay mige? 8Nan hot dita: Naŋ mi gige Bum-Sumuna? Nam ka dan ala: Nan kayni mi Yesu ma Nasaretna, ma naŋ ka lasamna. 9Nisi kaf sa ay hiɗi nanu wi haraŋa, may nisi hum del ma ka law hiɗi nannaɗi. 10May nan di'e: Nan ma lum mi mige Bum-Sumuna? Bum-Sumuna danu: Fokaŋ kulo'o, tuɗaŋ hay Damas, ɗawni nisi ma daŋ kay sle ma naŋ ma lumna. 11Ki nan muɗi wi loɗi kay wileta vi haraŋa kayni, nisi sa ay hiɗi nanna van ɓanu, tubalanu, ta-ta nan co hay Damas.
12San kep ay ɗawni, ma semda valamu Ananiyas, sa ma li nar kuɗ gatta, sa ma sum sa Yudiyan kaf hay Damas li di-goyta ta ŋaata kalamu, 13nam ma tanu, ka dan ala: Saulus ɓasunna, iraŋ ma muɗ wi'e. Hay leer namna de kayni iran muɗ wi'e, nan ɗuwumu kaw. 14Nam di'e: Lawna vi sumiyaya vilekaŋawa goyo kay wi minda valamu, kay ɗuw sa ma ɗigera, kay hum del ma may goy hay vunam pana kaw; 15kay naŋ ma muɗ mi sa ma li di-goyta kalamu, vok sumuna kaf, kay slen ma naŋ wumu, humumu kaw. 16Wulini naŋ vi yaŋ kayn kay mige? Fokaŋ kulo'o, naŋ ma fi baptisma, li muzi goy kaw kay sulukŋa vaŋu, hay li ma naŋ yi semda valamu.
17Hay hotta van hay Yerusalem, nan ay hay Tempella kay siɗawa, va vul tuwam kiranu. 18Nan wi Bum-sumuna ma ay dan ala: Laŋ koloyo, kalaŋay goy hay Yerusalem pa gosoyo, kay nisi ma vi di-goyta vaŋ ma kannaɗi. 19Nan di ala: Bum-Sumuna, nisi kaw wi goy haraŋ ala nan ka tuɗ hay sinagogayna sinagogayna kaf, kay yaw sum sa vi kuɗaŋŋa, kay cuksi daŋgaya, watsiya kaw, 20Hay li ma sumun ɦok busuwna vi Stefanus sa ma di-goyna vaŋ goyo, nan kaw ay hay liy namna, nan firi kuɗ lawta kayni, nan ŋom sligara vi nisi sa cum goyna kaw. 21Nam di tan ala: Tuɗaŋu, kay nan min gaŋ goy gine'e tam sa waana.
Paulus ɗek goy kay tuwam ala nam mi sa ma Romena
22Nisi humum ta-ta co tam yoboyna kayni. May nisi siwel hiɗi delsi kulo'o di'e: Sa ma ki kayn nalana cum ciy goyo, hinim mus iriɗi! 23Nisi ci ɗuwul digi-digi', cuk sligara visi goyo, ko butuwn kulo'o kaw. 24Komandaŋŋa vul hagata kay kal Paulus ay kalaf hay ziyda ta gulmun ta'ta, jobom vunam hiɗi libetna kaw, kay wi va ma sumun ka ciriy kuɗum kalamna kayni. 25Hay li ma nisi vulum goy vun libetna vulla, Paulus di tam ma ŋol ma sojen kalam kisna ala: Hagata vuli tigiya kay wat sa ma Romena hiɗi libetna bay ka kitat kalam jewe su? 26Hay li ma ŋol ma sojen kalam kisna hum dit kayni, nam kaliya, di lawta mi komandaŋ ala: Naŋ ma li ɗawn linige? Kay san kayni mi sa ma Romena! 27Komandaŋ kalay talamu dum ala: Danay hawtige, naŋ mi sa ma Romena su? Nam hotom dit ala: Awa. 28Komandaŋ hot sli lawtiya: A nan muɗ goy sa ma Romen kayni, nan gus sem na'ta hiɗi gurjut ŋolo. May Paulus di'e: Nan mi sa ma Romena hay vu'da van pa. 29Wulini, nisi sa min jobomna zlet tuwsi goyo. Hay li ma komandaŋ hum ala Paulus kayni mi sa ma Romena, nam li nar ŋolo kay jun ma nam junumna.
Paulus ka vok sa ɗiger-lawta
30Hay buurta ka'ta, hay li ma nam min wi caw slen ma sa Yudiyana pi lawt kalam kuɗumna goy haraŋi, nam gumu, vul hagata mi muliyan ŋulo sa-ɗifinna hiɗi sa ɗiger-lawta kay nisi ma daka; bugolda nam jik Paulus ay gaa'a, colom voksiya.
נבחרו כעת:
LOPNA 22: Massana
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
BIBALDA TA PELDETTA © L'Alliance Biblique du Cameroun, 2001