LOPNA 13
13
ROGOYTA VI PAULUS HAY LOPNA
Rogoyta ta jewta hay lopna vi sunda, Barnabas hiɗi Saulus hay Kiprus
1Hay ziyda-Lawna ta ay hay Antiokiya, sa jobta-Lawna hiɗi sa hatta aya: Barnabas, Simon ma yum Niger, Lukiyus ma Sirenena, Manayen ma wul vok Herod, ma musi kay gal ma fiɗina vi mulda, hiɗi Saulus. 2Hay li ma nisi girif Bum-Sumuna, li laata kaw lina, Ŋusta-Peldetta di'e: Lakan Barnabas hiɗi Saulus goy visiya kay lopna ma nan yisi kalamna. 3Hay li ma nisi li laata, siɗaw kaw, bugolda nisi bar bisi kisiya, hinsi tuɗa.
4Nisiya, sa Ŋusta-Peldetta cuksiyawa, tuɗ hay Selewkiya, ɗawni nisi dol hay Kiprus. 5Hay li ma nisi co hay Salamin, nisi kus yoboyna hay sinagogayna vi sa Yudiyana. Yohana ay kuɗsiya kay sunsiya. 6Hay li ma nisi kurut jokota co ta-ta hay Pafos, nisi fi sa ma li gul-yalda, sa ma jobta-Lawna ma bay-gasina ma Yudiyana, ma semda valam ala Bar-Yesus 7ma ay musi hiɗi guverner Sergiyus Paulus, sa ma ka hiɗi yamda-wida. San kayni yi Barnabas hiɗi Saulus talamu, hiɗi varta kay gar a hum yoboyna vi Lawna. 8May Elimas, sa ma li gul-yalda, kay semda valam muɗi kayn nala, col kirsi dono kit-kit', gar kay muɗ guvernera goy hay vida pa. 9Nala Saulus ma yum Paulus, ma hobay hiɗi Ŋusta-Peldetta cuk iram kalam ŋiresl', 10Dum ala: Naŋ ma hobay hiɗi mileta hiɗi ɗutta kaw, goora vi Matna, naŋ ma ka gawta kat ɗigerta kaf, hagata ɗigerta vi Bum-Sumuna naŋ ma guna' dela' ki kayn nala ta-ta lancitige? 11Wulin kayn ɗuwaŋu, ɓam Bum-Sumuna ka kaŋu, iraŋ ma duka, kay ir liyn neeɗa iraŋ ma wi fattaɗi. Ki vunay ma din nala liyn duk kalam jufun nil', nam muɗ tupa tiŋ' tani tiŋ' tani, tun caw gar sumuna kay vum ɓalamu. 12Hay li ma guvernera wi va ma lina, nam vi'e, kay hatta vi Bum-Sumuna muɗum ɦuyum' ŋolo.
Kusta-yoboyna hay Antiokiya vi Pisidiya
13Hay Pafos pa, Paulus hiɗi sum sa kuɗumna dol hiɗi lumna kay tuɗ hay Perge hiɗi Pamfiliya, Yohana ɓuraw hiɗi nisiya, hot hay Yerusalem. 14Hay Perge pa, nisi tuɗ hay hagata visiya, co hay Antiokiya ta hay Pisidiya. Nisi cuk kalaf hay sinagogayna hay buur ma sabatna, nisi lakay gaa'a. 15Bugol jaŋga vi ɗerwelda vi gatta hiɗi sa jobta, sa ŋulona vi sinagogayna ka di tisi ala: Ɓosiyomana, la yoboy ma teŋ-irta tam sumuna ka kigiya, nigi as dum wulini. 16Paulus fokay kulo'o, li ɗekka mara hiɗi ɓalamu di ala: Nigi sa Israyella, nigi sa li nar kuɗ Lawna, humgiya! 17Lawna vi sum sa Israyella vilek sumiyay goyo, nam slisi yisi kulo'o hay li ma nisi ay hay nagata Egipte, bugolda nam kalsi goyo hiɗi ɓalam ma gaŋeraŋa. 18Nam ziysi hay fulda ir busat dok-fiɗi'; 19Hay li ma nam vat jafna kuɗ derem siɗiya goy voksi hay nagat Kanaan vatna, nam vulsi nagat misiya. 20Busata goboy ki kis-fiɗi diram dok-vasl nala. Bugol kayni nam vulsi muliyan sa ka kitana ta-ta tam sa ma jobta-Lawna Samuel.
21Bugolda nisi job mulda, Lawna vulsi Sawul goora vi Kis, ma hay jafna vi Benyamin, nam ti mul kisiya ir busat dok-fiɗi.
22Hay li ma nisi gi Sawul goyo, nam vulsi David mulu, ma nam li di-goyta tani kalamu ala: Nan fi David, goora vi Isay, sana ma ŋray hiɗi dikanu, ma min li minda van kaf.#13:22 Ɗuw hay 1 Sam 13:14.
23Lawna, kuɗ deŋga valamu, nam vul Yesu ki sa ma su'da nala kay sa Israyella goy hay jafna valam pa. 24Jew mata valamu, Yohana kus yoboyna kay baptisma vi hamda tam sum sa Israyella. 25Hay li ma Yohana vat jaŋŋa valam vatna, nam di ala: nan kayni mi ma nigi ka var kalamnaɗi, may ɗuwgiya, nam ma ka co bugolonu, nan nagay kay butum tuguruna goy selemɗi.#13:25 Ɗuw hay Yoh 1:20-27.
26Ɓosiyonna, nigi gurona sa hay jafna vi Abraham, hiɗi nisi sa jargi li nar kuɗ Lawna, yoboyna ma su'da kayni vuli tay naya. 27Kay sumuna sa hay Yerusalem hiɗi sa ŋulona visiya ɗuw Yesu birek-ceke, yoboyna vi sa jobta ma ka jaŋam goy hay sabatna kafn kaw, nisi ɗuwum birek-ceke, nisi hobom vunam kulo kayn hiɗi kitata ta nisi ka' kalamta. 28Nisi fi lawta kalamu kay ka kitata tam mittaɗi, nir-na'ta kep nisi job tam Pilatus kay cum goyo. 29Nala nisi hobom kulo kayn mi vun slen kaf ma ɗoy kalamna, nisi slumay goy gaa kay gu-ma-grakŋa, burum hay zulla kaw. 30May Lawna dayam kulo'o jar sa mitina pa. 31Nisi sa may hiɗi nam hay Galileya pa, kal hay Yerusalemna, nam vul tuwam kirsi ir buur ŋolo, nisi sa wulini muɗi si sa di-goyna valamu tam sumuna. 32Numa digi kay labara ma ŋaana ma deŋga li tam sumiyay kuɗumna kayni, 33Lawna hobom vunamawa kulo kaya, kay nay gurona, hay li ma nam day Yesu kulo'o, ki ɗoy hay Nulla ma' nala:
Naŋu mi goora vanu, nan vuɗaŋawa vaydi.#13:33 Fi kayni hay Nul 2:7.
34Nam dayamawa kulo'o jar sa mitina pa, kay nam min hinim hay lo'da-goyta noŋɗi, kayni mi va ma nam dum ala:
Nan ma vulgi slen ma peldetna vi David,
slen ma nagay kay vida,#13:34 fi kayni hay Es 55:3.
35Kuɗ kayni goy hay liy hena nam di lo ala:
Naŋ ma hin ma Peldetna vaŋu wi lo'da-goytaɗi.#13:35 Fi kayni goy hay Nul 16:10.
36Kay David, nam li sunda kuɗ gatta vi Lawna jar sa hay jafna valam lina, nam kalay sene, buri gaa'a tam sumiyamu, nam wi lo'da-goyta kaw. 37May nam ma Lawna dayam kulona wi lo'da-goytaɗi. 38Nigi ɓosiyoma'na, humgi van kayni: Hay san kayni gida vi sulukŋa kusawa goy tigiya, 39hay namu gigekaw ma vi'e, fi ɗigertawa hay slen kaf ma nigi as fi ɗigerta haya kuɗ gatta vi Musus noŋɗi. 40Kuɗ kayni ligi ŋali kay slen ma diy goy hay vun sa jobta-Lawna ma co kigiɗi:
41Ɗuwgiya, nigi sa hobay hiɗi ɗuw ma birek-cekŋa,
Nigi ma muɗ ɦuyum', nigi ma pira kaw,
kay nan min li lop kep hay buura vigiya,
Lop ma nigi as vi hayam noŋɗi,
La sumuna vigi labara valam kaw.#13:41 Fi kayni hay Hab 1:5 ŋra Luk 19:42-43.
42Hay li ma nisi cukay goy jiya, sumuna jobsi kay nisi ma kus yoboyna kayni hay buura vi sabatna ma vokŋa, 43Tokŋa meriya, sa Yudiyana ŋolo hiɗi nisi sa vi kuɗ vida vi Yudiyana sa diksi min Lawna tapay kuɗ Paulus hiɗi Barnabas, nisi ka kasla hiɗi nisiya, ɗeksi kaw kay nisi ma lak juni tam slugota vi Lawna.
44Hay sabatna ma vokŋa, ŋol sumuna sa hay hoyok-ziyna dak kuɗulu', kay hum yoboyna vi Lawna 45May hay li ma sa Yudiyana wi vokŋa ŋol ɦini ɦini, diksi hobay hiɗi hunayta, nisi ɓulak slen ma Paulus dumna hiɗi ŋulda. 46Paulus hiɗi Barnabas disi goy haraŋ ala: Yoboyna vi Lawna kusi goy jew kayni tigi nigiya, may nigi gum goyo, nigi may ɗuw tuwgiya ki nigi nagay kay irita vatɗita naɗi, nala ɗuwgiya, wulini numa min muɗ irma tam sa waana. 47Kayni mi va ma Bum-Sumuna dum tay ala:
Nan tungiyawa kay nigi ma li haraŋa tam jaf-sumuna,
Kay tuɗ labara vi su'da ta-ta goy keŋ nagata kaf.#13:47 Fi kayni hay Es 49:6.
48Hay li ma sa wana hum kayni, nisi li firi ŋolo, nisi subur yoboyna vi Bum-Sumuna, nisi kaf sa vilekay goy kay irita vatɗita vi'e. 49Yoboyna vi Bum-Sumuna biyay goy kay nagata kafe. 50May sa Yudiyana zut boyna vi sa vi kuɗ vida vi sa Yudiyana, hiɗi sa ŋulona vi hoyok-ziyna kaf kay fok kulo kisiya: nisi mar lasta kay Paulus hiɗi Barnabas, digiɗsi goy hay nagata visi pa. 51May nisi po butuwna ma sesina goy tisiya, kal misi hay Ikoniyum. 52Sa hatayna ay hobay hiɗi firita, hiɗi Ŋusta-Peldetta kaw.
נבחרו כעת:
LOPNA 13: Massana
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
BIBALDA TA PELDETTA © L'Alliance Biblique du Cameroun, 2001