1. Mose 6
6
O mensheskro čilačepen
1I menshe van boud oun boudeder ap i phoub. Oun ča van boldo lendar. 2Koy dikan i Debleskre čave#6:2 Kova nay kharella: bolepangre (dik: Hiob 1:6) ninna rayengre morsh čave (dik: 2. Samuel 7:14)., har shoukar i menshengre ča hi. Oun yon lan penge kolen, kay yon kaman, te romedinerenn yon len. 3Koy penas o baro Devel: “Miro djipaskro dourho ačell gar hako tsiro an o mensheste. Yob hi mass. Yob vell gar phoureder har 120 (sheel-te-biish) bersha.”
4An ko tsiro, har i Debleskre čave khetne van i menshengre čentsa oun lendar čave bolde van, djivan bare menshe ap i phoub. Ninna pal ko tsiro. Kolla his čače morsha an ko phouro tsiro: baro oun an-diklo.
5O baro Devel dikas, kay o menshengro čilačepen baro hi ap i phoub. Halauter, hoy len an lengre djia hi, his čilačo o tselo dives. 6Kova doukas les an leskro dji. Oun o baro Debles khaytas, kay kras yob i menshen ap i phoub. 7Doleske penas o baro Devel: “Me lau i tsele menshen, kay me krom, pale krik i phoubyatar, ninna i firhen, i baren oun i tiknen, oun i čirkle. Khaytell man, kay krom len.”
8O Noah kokres his lačo glan o baro Debleskre yaka.
O Noah krell i panyeskro kheer
9Kova hi ko liil, kay činlo hi pral o Noah peskre čaventsa. O Noah his i morsh, kay lačo oun čačo his. I tsele menshendar an ko tsiro kras yob kokres kek čilačepen. O Noah djivas o Debleha. 10Les his triin čave: o Sem, o Ham oun o Yafet. 11-12Oun i phoub his bouder gar lačo glan o Debleskre yaka. I menshe kran, kay his i phoub pherdo čilačepen oun midjak koova. Har o Devel ap i phoub dikas, dikas lo, te djan i tsele menshe ap i čilačo drom. 13Doleske penas o Devel ap o Noah: “Kolla, kay djivenn ap i phoub, kran, te vas i phoub pherdo čilačepen oun midjak koova. Kamau gar, te djivenn le doureder. Ava, me krau, te merenn i tsele menshe oun halauter, hoy ap i phoub hi.
14Kre touke i panyeskro kheer dran zorelo kasht. Kre boud isema dren. Oun mak vin oun dren teera#6:14 teera goudron pre! 15Kre ko panyeskro kheer yaake: 150 (sheel-te-panč-desha) metarya lengsto, 25 (biish-te-panč) metarya bourhlo oun 15 (deesh-te-panč) metarya pral. 16Kre i dacha! Oun tel i dacha mouk i paash metari pre troul o tselo kheer! Oun kre i voudar ap i rig! Kre ko panyeskro kheer yaake, te venn triin isema yek pral o vavar. Yaake hi les boud isema tella, mashkral oun pral.
17Dik! Me moukau i baro pani te vell pral i tseli phoub, te tassenn lauter, kay djipen an lende hi. Halauter merella, hoy ap i phoub djivella. 18Tout dau miro lab, kay ačeh djido. Koy dau miro vast pre. Oun tou djas tire čaventsa oun tiri romyah oun tire čavengre romyentsa an o panyeskro kheer dren. 19I tsele firhendar, an douy kotar an o panyeskro kheer dren: i morsh oun i djouvel, te ačenn le ninna djido. 20Douy kotar hake čirklendar oun hake firhendar, ninna hake tikne firhendar ap i phoub, hounte djan pash toute an o panyeskro kheer, te ačenn le djido. 21Le hako firheske peskro rhapen peha oun ninna doha touke oun tire menshenge!”
22Oun o Noah kras lauter yaake, har o Devel leske penas.
נבחרו כעת:
1. Mose 6: Sint-Man2024
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.