Matta 10
10
Yesu a lyen kpe-lagbe dan bəw a mbiɗi-kpe
(Markus 3.13-19; Luka 6.12-16)
1Nda waga lagbe dan inə bəw a mbiɗi-kpe, nda vərən gətə gə təna dɨmdə pɨle gə sɨtɨ ɓwaare, təna mɨna dɨm nagi ndawula zərgi ooti som-som mgban.
2Kwaki kpe-lagbe dan nə inə, tənə bəw a mbiɗi-kpe: A kwamətə, Siman (a mya wa atɨ Bitrus) ka mufəngɨn Andrawus, Yakubu nze da Zabadi ka mufəngɨn Yohana, 3Filibus ka Batalamawus, Tomas ka Matta a nzə-luu taa shemtə, Yakubu nze da Alfiyus ka Tadawus, 4Siman nzə-nyatə gə njiya ka Yawuda Iskariyoti, ndi ma vədə Yesu.
5Tən inə bəw a mbiɗi-kpe, Yesu a lyentɨrən, nda fyel-kwakingrən yang: “Ɓe hwunaa wudə a pɨrə waka myee aa Yawude. Ɓe hwunaa pɨrə vor i vɨre da mi Samariyati mgban. 6Wudəmə haka mbagee kyepi a tən mi Israila. 7Zə wudəm, hwuna hiwa ka ləməginə yang atɨ, ‘Həmnə pwa sɨka koyo.’ 8Dɨməmdə ootə gə sɨtɨ myee ka ootə, maɗəmdə wogye, suɓwamgə ootɨ dagde gə sɨtɨ ɓwaare, dɨməmdə ji-dwatə. Wula mya wulakəwnə a nə ɓaa, ɓaa mgban hwun ɓa wula ka ɓwaare. 9Ɓe hwunaa por dyamse ka nggɨrngɨme kat ka taa-kpalame. 10Ɓe hwunaa nggur zambɨrame gə omotə, naasə i sɨɓweti ka hwanye, nagi gaarati mgban ɓe hwunaa kɨsə. Ma kat nzə-lyenti aa dɨ ɗongə moonə lyentɨ dan.
11“Nagi a ndo vor vɨrati hwuna pɨrə, niyəm hwuna ɨl ma tikɨsa ɓa lurəwnə a hwodan, hwuna nza hangɨn baa fəra hwun ɓa ɗaka vɨratɨngɨn də. 12Nagi a ndo hwoɗi hwuna pɨrə, wunamkasə ka mi hwoɗingɨn. 13Anda myee a vor hwoɗingɨn wayadəwnə lurəwnə ka hanɨngtə pepe, ɗoltɨ dəwnə ɓa nza ɓwaa kaarən. Anda mingɨn aa lurəwnə, maa ɗoltɨ dəwnə a mɨna a hakəwnə. 14Myee kat aa lurəwnə, aa kɨl ləməgyee hwuna dɨ boyo, hwun kana ɓa ɗaka hwoɗingɨn naasə mgban vɨratɨngɨn, hwuna kpɨwgə bɨr-bɨra a mbwayingəwnə. 15Diyalə na dɨ boyownə, a fərə ɓashitə, ndɨka ɓashite a nə mi vɨra Sodom ka Gomora a nə mi vɨratɨngɨn.
16“Hɨnə dɨ lyentəwnə ɓətɨ mbage a waka alehawye, gə-angɨn hwuna nza ka kuta ɓətɨ rokonyi, hwuna gə ka ɗəngtə ɓətɨ guguyi.
17“Bəmdə myensəwnə ka ɓwaare gəkɨlə tən ɓa kəttəwnə a zə kəwnə a haa ɓashitə, tən ɓa byengrəwnə a vəni kəndəshe darən. 18Mye ɓa zə kəwnə a humwa nggwamne kat ka həmye gə le de, də hwun ɓa dɨmə a boyərən lə feme de, də mbiɗitɨ myee aa Yawude a ɗɨmə a kɨlə mgban. 19Tən kana kəttəwnə a zə kəwnə a haa ɓashitə, ɓe kala aa gəwnə atɨ ndəng hwunaa dɨ lee la hwun ɓa boyo, a fərəngɨn mya vəwnə la hwun ɓa boyo. 20Gəkɨlə aa hwunə ɓa byelə, Pita Baagəwnə nə ɓa byelə dɨ kwaamɨngəwnə.
21“Jibiye ɓa vədə mufəngɨn gə mya ɓɨlə, sə mgban baatə ɓa vədə nzəngɨn. Je ɓa ndɨlka yə sɨnggərən a vədərən gə mya ɓələ. 22Ɓwaare kat ɓa kwo nəngəwnə gə le de, ma mbasɨsən kanyi kpəkəkə tɨlə kpawtə, mangɨn nə ɓa ɗɨm mbətə. 23Tən kana tənəə dəwnə a haa hiɗə, gyeɓəm muɗəmə a haa. Diyalə na dɨ boyownə, hwunaa dɨ mbəgə njiya Israila kat, hɨn Nze da Ɓwaara na ɓə shi.
24“Nzə-ɗyegənshe aa dɨ pɨrgə nzə-kəndəshe, kɨsa mgban aa dɨ pɨrgə həmɨ-hwodan. 25Ɓə wula nzə-ɗyegənshe a gə ɓətɨ ma dɨ kənənshe, kɨsa mgban a gə ɓətɨ həmɨ-hwodan. Anda mya sa ka həmɨ-hwoɗye atɨ sɨnə Belzabub həme da pɨle ji-dwatə, ɓə shee ji-hwoɗye, mya sa kaarən atɨ shiya?
26“Gə-angɨn ɓe hwunaa gəə kalangrən. Sa mya kupən kat, mya ndɨlgən nda bə bwang, sa mgban mya ɓodən, mya dɨmdən a haa bwange ɓwaare a leyə. 27Ləməgyee na dɨ boyownə a haa ɓotə, boyəmtɨrən a haa bwange bwang. Ləməgi kɨɗək-kɨɗəkye hwuna kɨlə ka kwakingəwnə, hyawam kaarən bərəng. 28Ɓe hwunaa gəə kala myee ɓa ɓɨl sɨtə ɓəmbə, shezə tənaa dɨ mba myentə a ɓɨlə. Ndɨka hwuna gəə kala ma ɓa kɨɗa myentə kat ka sɨtə a ɗiya kaaru-kaaru. 29Ji-kɨteyi kpamləmɨntə kpe, mya dɨ ɗərə peneti. Kat ka angɨn nji-kɨtetə hiɗə aa dɨ fukə njiya a mbɨrə Baagəwnə aa leyə. 30Nagi nda showa a nəngəwnə nə, mye bələ kat. 31Gə-angɨn ɓe kala aa gəwnə, fukasəwnə pɨrgə hɨnggə ji-kɨteye furi-furi.
32“Ma kat bɨldi bwang a humwa ɓwaare, atɨ sɨnə hɨnggi, sə mgban hɨn ɓa bɨldən a humwa Baagi gaarə a vor pwa. 33Ma mgban məntəməshi a humwaa ɓwaare, sə hɨn ɓa məntəməsən a humwaa Baagi gaarə a vor pwa.
34“Ɓe hwunaa niyə ɓətɨ na shi ka ɗoltə ganə a vɨratə, ə'ə taa shi ka ɗoltə ganə a vɨratə, shezə sungwa. 35Na shi gələ na tukuta wakaa
“ ‘nze ka baagən,
njitə ka nuwogərə,
metɨ nze ka shewsə.
36Myee ma a nza kaarən
a vor hwoɗi hiɗə nə
ɓa gəə ji-nyaagən.’
37“Ma mwo baagən ka nuwogən pɨrgi, mangɨn aa kana nda koɗi, ma mwo nzəngɨn, nagi njisən nə nda mwo a pɨrgi, mangɨn aa kana nda koɗi. 38Ma aa nggur kada ɓɨdɨmtɨ dan a koɗi, mangɨn aa kana nda gəə sɨnə hɨnggi. 39Ma ɓəri gə nda kwo ha myensən, ndi ɓa ɗongərə, ma mgban ɗongə myensən gə le de, ndi ɓa ɗɨmtɨrə.
40“Ma lurəwnə, mangɨn luri, ma kat luri, mangɨn luu ma lyanari. 41Nagi ndo ma, a ma wayadə kpale da Həmɨnpwa lurən gəkɨlə ndi kpalə, mangɨn mgban ɓa ɗɨm moone da kpale. Ma wayadə ma pepeye da Həmɨnpwa lurən, mangɨn ɓa luu moone da ma pepeye da Həmɨnpwa. 42Diyalə na dɨ boyownə atɨ, ma kat və hiɗə dɨ vor lagbe de 'ye na lyentɨrən haɓi taltə, nagiya lagbangɨn taa ɗati kan gələ sɨnə lagba de, mangɨn aa dɨ ɗongə moone dan.”
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
