मत्ती 7
7
मिहला क्येन माहता
(लूक ६:३७-३८,४१-४२)
1 “मिहला क्येन माहता, ओहले किन्ज्योगीॱआङ ख्याया़ला क्येन ता़ नाङज्ये म़ेह। 2च्यिबेमाना ख्याया़गी मिहला काह-ठि पेहती क्येन ता़क्यो, ओ़ह ल़ेहमुराङ जेती किन्ज्योगीॱआङ ख्याया़ला क्येन ता़ नाङज्ये येह। ओहले का़हन्दी ठुगी ख्येगी मिहला ताहप्कें ओ़ह ठुगीराङ किन्ज्योगी ख्येॱलाङ ताहप नाङज्ये येह। #मर्क ४:२४ 3च्यिबे ख्येगी राहङगी नो़हगी मी़ला ङ्योहक्तोङ स्य़ूहक्यो थोङगे ओहले राहङदी मी़ला स्यिङ गोन्दोङ स्य़ूहक्योदी मेहथोङगे? 4राहङगी मी़ला स्य़ूहक्योगी स्यिङ गोन्दोङ मेहथोङगेन्दीगी राहङगी नो़हला ‘केरे-केरे, ङाह ख्येगी मी़ला स्य़ूहक्योगी ङ्योहक्तोङ तेन तेर्च्ये’ म़ेदी काह-ठि पेहती मा ख़ूज्ये? 5ए यिहन्दो तेन्गेया़! तोहङले राहङगी मी़ला स्य़ूहक्योगी स्यिङ गोन्दोङ तेन्दोङ ओहले गा नो़हगी मी़ला स्य़ूहक्योगी ङ्योहक्तोङ तेन तेर्च्येला साल्बु थोङगे।”
6 “नाम्पार-ताहक्पा से़हया़ क्यिबुया़ला माहतेर। राहङगी मोतीया़ फा़या़गी दिनला माहक्युर, मिहन्सीमानानी खो राहङगी काङबागी ओ़ह से़हया़ला नेम्ज्ये येह ओहले फिर्च्या ल्होक लो़हदी ख्याया़ थो़ला च्योम ओहङज्ये येह।”
लाङदोङ, छोल्दोङ ओहले कोह तुहङदोङ
(लूक ११:९-१३)
7 “लाङदोङ ख्येगी ज्योर्च्ये येह, छोल्दोङ ख्येगी च्य़ेह सिहन्ज्ये येह, कोहला तुहङदी क़े क्याहप्तोङ ओहले ख्येगी तेहन्दाला नाहङलेगी कोह खा फ़ेज्ये येह 8च्यिबेमाना लाङगेन्दीगी ज्योर्च्ये येह, छोल्गेन्दीगी च्य़ेह सिहन्ज्ये येह, ओहले कोह तुहङदी क़े क्याहप्केन्दीला नाहङलेगी कोह खा फे़ तेर्च्ये येह। 9च्यि ख्याया़ नाहङला दि ल़ेहमु आबाॱआङ येहटो, पुहगी खुरा लाङगेमु आबागी तोह तेर्के? 10ओहले ङ्याह लाङगेमु प्रुहल तेर्के? 11ओ़ह सोङबे ख्याया़ मिह ङ्येहम्बा यिहन्देॱआङ राहङगी पुह पोहमोला या़हबु से़हया़ तेर स्य़े फान्ज्योनी तोहरोङ स्यिहङगामला ज़्य़ू नाङगेन ख्याया़गी याहप किन्ज्यो ङ्याम्बु लाङगेन्दीला काहजे माहङबु जेती या़हबु से़हया़ नाङज्ये येह” म़ेदी येशूगी सुङ नाङसीन।
12 “मिहया़गी ख्याया़ला दि ल़ेहमु पेह तेर्ना ओहङज्ये येहकें म़ेदी सेमला ने़गेन ल़ेहमुराङ ख्याया़गीॱआङ खुङया़ला ओ़ह ल़ेहमुराङ पेह तेर, च्यिबेमाना दिराङ मोशागी छ्य़े-ठिम दाङ लुहङतेम्बाया़गी सुङ नाङग्योकी स्याहल यिहम्बा।” #लूक ६:३१
फेमा कोह दाङ छ्यिम्बु कोह
(लूक ६:३१; १३:२४)
13 “कोह फेमालेगी नाहङला स्य़ूहदोङ च्यिबेमाना छ्यिम्बु कोह दाङ स्याहङ छ्यिम्बु लाहमगी ङ्याल्वाला क्याल्गे। दि लाहमले नाहङला स्य़ूहगेनया़ माहङबुराङ ओहङगे। 14च्यिबेमाना कोह फेमा दाङ स्याहङ फेमागी कोहदी ज्यिबुराङ खेन्दा-का़हबु ओहङगे, यिहॱनाङ दि लाहमगीॱराङ मिहलीला क्याल्गे। दि लाहम च्य़ेह सिहन्गे मिहया़नी ङ्युहङसे़राङ ओहङगे।”
मिह खोगी ल़ेह लाहमलेॱराङ ङोह स्य़ेएँ
(लूक ६:४३-४६; १३:२५-२७)
15 “चिहन क्याहप्के लुहङतेम्बाया़ ङ्याम्बु जेम्दे तेहतोङ। खुङ फि ङो़ले ल़ूह जे़दी ओहङगे, यिहॱनाङ नाहङलादी ज्यी़ज्ये ल़ेहमु फारा ल़ेहमु ओहङगे। 16ख्याया़गी खुङया़ला खुङगी पेहक्यो ल़ेह लाहमलेॱराङ ङोह स्ये़ज्ये येह। च्यि छेर्मा तोहङबोला कुहन्डुम या़हगे ले? च्यि देर्स्या तोहङबोला को़स्यीङ या़हगे ले? 17ओ़ह ल़ेहमुराङ तोहङबो या़हबुला सेदो या़हबु या़हगे। यिहॱनाङ चोक्पा तोहङबोला चोक्पाराङ सेदो या़हगे। 18तोहङबो या़हबुला चोक्पा सेदो या़ह मी़हखुएँ, ओ़ह ल़ेहमुराङ चोक्पा तोहङबोला या़हबु सेदो या़ह मी़हखुएँ। 19या़हबु सेदो मे़हयाएँगी का़ह येहकेन्दी तोहङबोया़ तुप्ती मेहला क्युर्च्ये येह।#मत्ती ३:१०; लूक ३:९ 20ओ़ह ल़ेहमुराङ पेहती ख्याया़गी चिहन क्याहप्के लुहङतेम्बाया़ला खुङगी पेहक्यो ल़ेह लाहमलेॱराङ ङोह स्ये़ज्ये येह।” #मत्ती १२:३३
21 “ओहले ङाहला, ‘ओ़ चो़वो, ओ़ चो़वो’ माएँगी मिहया़ थाम्ज्यीराङ किन्ज्योगी क्याहल्सीला स्य़ूह ङ्युहङज्ये म़ेह, स्यिहङगामला ज़्य़ू नाङगेन्गी याहपकी थु ङ्ये़हएँगी ल़ेह पेहकेनया़ च्यी़राङ स्य़ूह ङ्युहङज्ये येह। 22ओ़ह ङ्यिहमु मिह माहङबुगीराङ ङाहला दि ल़ेहमु माज्ये येह, ‘ओ़ चो़वो, ओ़ चो़वो च्यि ङ्यिहगी राहङगी छेनला किन्ज्योगी लेहङगु माहस्येपा ले? च्यि राहङगी छेन लेहन्दी ल्हेन्डीया़ माहङेपा ले? च्यि राहङगी छेनला ङ्यिहगी याहम्जेम्बा ल़ेहया़ माहबेबा ले?’ म़ेदी माज्ये येह। 23ओहजेला ङाहगी ख्याया़ला माज्ये येह, ‘ए ल़ेह ङ्येहम्बा पेहकेनया़, ख्याया़ला ङाहगी ङोह मे़हस्ये। देलेगी थेन्दी सोङ’!” #भज ६:८
ना ङ्यी़गी खाङबाकी ब्राम
(लूक ६:४७-४९)
24 “ओ़ह सोङबे, ङाहगी माक्योगी ताम थ़ेदी ङ्यिहन्गेन्दी राहङगी खाङबा तोह-पा़रा थो़ला ब्राम तिङदी ज़ोएँ मिह रिहक्पा ख़ेबा ल़ेहमुराङ यिहम्बा। 25खाङबा ज़ो सिहन फान्ज्यो नाम क्याहप्ती स्योलो ओहङसीन ओहले ल्हा़बा लुङजीॱआङ ओहङदी ओ़ह खाङबाला फो़सीन यिहॱनाङ ओ़ह खाङबा माहरोहम च्यिबेमाना ओ़ह खाङबा तोह-पा़रा थो़ला ज़ोक्यो येहकें। 26यिहॱनाङ ङाहगी माक्योगी ताम थे़दीॱआङ मिहङ्यीहन्गेन्दी पेहमा थो़ला खाङबा ज़ोएँ उल्दुम्बा मिह ल़ेहमुराङ यिहम्बा। 27खाङबा ज़ो सिहन फान्ज्यो नाम क्याहप्ती स्योलो ओहङसीन ओहले ल्हा़बा लुङजीॱआङ ओहङदी ओ़ह खाङबाला फो़सीन ओहले ओ़ह खाङबा रोहम्दी फेतोर कोहतोर काहल्सीन!” म़ेदी येशूगी सुङ नाङसीन।
28ओहले येशूगी दि स्याहलया़ सुङ छार फान्ज्यो मिह मिह-माहङ येशूगी सुङदेन थे़दी ज्यिबुराङ ह्अ ल़ेहसीन।#मर्क १:२२; लूक ४:३२ 29च्यिबे मासीमाना, छ्य़े-ठिमकी लोबेनया़गी ल़ेहमु मिहम्बा, येशूगीनी ओङ छ्यिम्बु जेती सुङदेन नाङगो येहकें।
© 2023 (Active), Wycliffe Bible Translators, Inc. All rights reserved.
