ወንጌል ዘዮሐንስ 4
4
ምዕራፍ 4
በእንተ ሐዊሮቱ ገሊላ
1 #
3፥22-26። ወአእሚሮ እግዚእ ኢየሱስ ከመ ሰምዑ ፈሪሳውያን ከመ በዝኁ አርዳኢሁ ለእግዚእ ኢየሱስ ወአብዝኁ አጥመቆ እምዮሐንስ። 2ወባሕቱ ለሊሁሰ እግዚእ ኢየሱስ ኢያጥመቀ ዳእሙ አርዳኢሁ። 3ወኀደጋ ለምድረ ይሁዳ ወሖረ ካዕበ ገሊላ፤ 4ወእንዘ ሀለዎ ይኅልፍ እንተ ሰማርያ። 5#ዘፍ. 48፥22፤ ኢያ. 24፥32። በጽሐ ሀገረ ሳምር እንተ ስማ ሲካር ቅሩበ ዐጸደ ወይን ዘወሀቦ ያዕቆብ ለዮሴፍ ወልዱ። 6ወሀሎ ህየ ዐዘቅተ ማይ ዘያዕቆብ ወደኪሞ እግዚእ ኢየሱስ በሐዊረ ፍኖት ነበረ ህየ ኀበ ውእቱ ዐዘቅት ወቀትር ሶቤሃ ጊዜ ስሱ ሰዓት።
በእንተ ሳምራዊት
7ወናሁ መጽአት ብእሲት እምሰማርያ ከመ ትቅዳሕ ማየ ወይቤላ እግዚእ ኢየሱስ አስትይኒ ማየ። 8እስመ አርዳኢሁሰ ሖሩ ሀገረ ከመ ይሣየጡ ሲሳዮሙ። 9#ዕዝ. 4፥1-5፤ ነህ. 4፥12፤ ማቴ. 10፥5። ወትቤሎ ይእቲ ብእሲት ሳምራዊት እፎኑ እንዘ አይሁዳዊ አንተ ትስእል እምኀቤየ ትስተይ ማየ እንዘ ሳምራዊት አነ እስመ ኢየኀብሩ ሕርመተ አይሁድ ምስለ ሳምራውያን።#ቦ ዘይጽሕፍ «ኢይትሐወሱ ወኢይዴመሩ» 10#7፥38-39። ወአውሥአ እግዚእ ኢየሱስ ወይቤላ ሶበሰ ተአምሪ ጸጋሁ ለእግዚአብሔር ወመኑ ውእቱ ዘይስእለኪ ወይብለኪ አስትይኒ ማየ አንቲኒ ዓዲ እምሰአልኪዮ ወውእቱኒ እምወሀበኪ ማየ ሕይወት። 11ወትቤሎ ይእቲ ብእሲት እግዚእየ ማሕየብኒ አልብከ ወዐዘቅቱኒ ዕሙቅ ውእቱ እምአይቴ እንከ ለከ ማየ ሕይወት። 12አንተኑ ተዐቢ እምያዕቆብ አቡነ ዘወሀበነ ዘንተ ዐዘቅተ ውእቱኒ ሰትየ እምኔሃ ወአንስትያሁኒ፤#ቦ ዘኢይጽሕፍ «ወአንስትያሁኒ» ወደቂቁኒ ወእንስሳሁኒ። 13ወአውሥአ እግዚእ ኢየሱስ ወይቤላ ኵሉ ዘይሰቲ እምዝ ማይ ይጸምእ ዳግመ። 14#6፥27። ወዘሰ ይሰቲ እማይ ዘእሁቦ አነ ኢይጸምእ ለዓለም አላ ውእቱ ማይ ዘእሁቦ አነ ይከውን ውስቴቱ ነቅዐ ማይ ዘይፈለፍል ለሕይወት ዘለዓለም። 15#6፥34። ወትቤሎ ይእቲ ብእሲት እግዚእየ ሀበኒዮ እምውእቱ ማይ ከመ ኢይጽማእ ወኢይምጻእ ዝየ ዳግመ እቅዳሕ ማየ። 16ወይቤላ እግዚእ ኢየሱስ ሑሪኬ ጸውዒ ምተኪ ወንዒ ዝየ። 17ወአውሥአቶ ይእቲ ብእሲት ወትቤሎ አልብየ ምት ወይቤላ እግዚእ ኢየሱስ ሠናየ ትቤሊ አልብየ ምት። 18ቀዲሙሰ ኀምስቱ ዕደው ነበሩ ምስሌኪ ወይእዜሰ ዘሀሎ ምስሌኪ ኢኮነ ምተኪ ወዘንተሰ አማን ትቤሊ። 19#6፥14። ወትቤሎ ይእቲ ብእሲት እግዚእየ እሬእየከ ከመ ነቢይ አንተ። 20#ዘዳ. 12፥5፤ መዝ. 121፥1። አበዊነሰ በዝንቱ ደብር ሰገዱ ወአንትሙሰ ትብሉ ከመ በኢየሩሳሌም መካን ውእቱ ኀበ ይሰግዱ። 21#ሚል. 1፥11፤ ሉቃ. 17፥20-23። ወይቤላ እግዚእ ኢየሱስ እመንኒ ብእሲቶ ከመ ትመጽእ ሰዓት ወይበጽሕ ጊዜሁ አመ ኢ በዝንቱ ደብር ወኢ በኢየሩሳሌም ዘኢይሰግዱ#ቦ ዘይቤ «ዘይሰግዱ» ለአብ አላ በኵሉ ገጸ መካን።#ቦ ዘኢይጽሕፍ «አላ በኵሉ ገጸ መካን» 22#ዘፍ. 49፥10፤ 2ነገ. 17፥29፤ ሚክ. 5፥2። አንትሙሰ ትሰግዱ ለዘኢተአምሩ ወንሕነሰ ንሰግድ ለዘነአምር እስመ መድኀኒት እምነ አይሁድ ውእቱ። 23ወባሕቱ ትመጽእ ሰዓት ወይእዜ ይእቲ አመ እለ በርቱዕ በአማን ሰጋድያን ይሰግዱ ለአብ በመንፈስ ወበጽድቅ እስመ አብኒ ዘከመዝ የኀሥሥ እለ ይሰግዱ ሎቱ። 24#2ቆሮ. 3፥17-18፤ መዝ. 50፥10-15። እስመ እግዚአብሔር መንፈስ ውእቱ ወእለሂ ይሰግዱ ሎቱ በመንፈስ ወበጽድቅ ሀለዎሙ ይስግዱ ሎቱ። 25#1፥42፤ ዳን. 9፥25። ወትቤሎ ይእቲ ብእሲት ነአምር ከመ ይመጽእ ማስያስ ዘይብልዎ ክርስቶስ ወአመ መጽአ ውእቱ ይነግረነ ኵሎ። 26#ኢሳ. 52፥6፤ 65፥1። ወይቤላ እግዚእ ኢየሱስ አነ ውእቱ ዘእትናገረኪ። 27ወእምዝ መጽኡ አርዳኢሁ ወአንከርዎ እስመ ምስለ ብእሲት ይትናገር ወባሕቱ አልቦ ዘይቤሎ ምንተ ተኀሥሥ ወምንተ ትትናገር ምስሌሃ። 28ወኀደገት ቀሡታ ይእቲ ብእሲት ወአተወት ሀገረ ወነገረት ለሰብእ። 29ወትቤ ንዑ ትርአዩ ብእሴ ዘነገረኒ ኵሎ ዘገበርኩ እንዳዒ ለእመ ውእቱ ክርስቶስ። 30ወወፅኡ እምሀገር ወሖሩ ኀቤሁ። 31ወእምዝ ይቤልዎ አርዳኢሁ ረቢ ብላዕ እክለ። 32ወይቤሎሙ እግዚእ ኢየሱስ አንሰ ብየ መብልዕ ዘእበልዕ ዘኢተአምሩ አንትሙ። 33ወተባሀሉ አርዳኢሁ በበይናቲሆሙ፤ ቦኑ እንጋ ሰብእ ዘአምጽአ ሎቱ ዘይበልዕ፤#ቦ ዘይጽሕፍ «ወሚመ ዛቲ ብእሲት» 34#6፥38-40፤ መዝ. 40፥9። ወይቤሎሙ እግዚእ ኢየሱስ ሊተሰ መብልዕየ ውእቱ ከመ እግበር ፈቃዶ ለአቡየ ዘፈነወኒ ወከመ እፈጽም ግብሮ። 35#ማቴ. 9፥37። አኮኑ አንትሙ እለ ትብሉ እስከ ራብዕ ወርኅ ይከውን ማእረር ወናሁ እብለክሙ አንሥኡ አዕይንቲክሙ ወነጽሩ ኀበ በሓውርት ከመ ጻዕደወ ወበጽሐ ማእረር። 36እስመ ዘየዐጽድኒ ይነሥእ ዐስቦ ወያስተጋብእ ፍሬ ለሕይወት ዘለዓለም ከመ ኅቡረ ይትፈሥሑ ዘሂ ይዘርዕ ወዘሂ የአርር። 37ወዝንቱ ነገር ቃለ ጽድቅ እሙን ውእቱ ከመ ካልእ ዘይዘርዕ ወካልእ ዘየአርር። 38ወአንሰ ፈነውኩክሙ ትእርሩ ዘኢጻመውክሙ ዘባዕድ ጻመወ ወአንትሙ ትበውኡ ውስተ ጻማሆሙ ለእልክቱ። 39ወብዙኃን እምይእቲ ሀገረ ሳምር እለ አምኑ ቦቱ በእንተ ዘትቤሎሙ ይእቲ ብእሲት ዘስምዐ ኮነት እንዘ ትብል ነገረኒ ኵሎ ዘገበርኩ። 40ወበጺሖሙ ኀቤሁ ኵሎሙ ሳምራውያን አስተብቍዕዎ ከመ ይንበር ኀቤሆሙ ወነበረ ህየ ሰኑየ መዋዕለ። 41ወብዙኃን ጥቀ እምኔሆሙ እለ አምኑ ቦቱ በእንተ ቃሉ። 42ወይቤልዋ ለይእቲ ብእሲት አኮ እንከ በነገረ ዚኣኪ ዘአመነ ቦቱ አላ ለሊነ ሰማዕነ ወጠየቅነ ከመ ዝንቱ ውእቱ ክርስቶስ በአማን መድኅነ ዓለም። 43#ማቴ. 4፥12-13። ወእምድኅረ ሰኑይ መዋዕል ወፅአ እግዚእ ኢየሱስ እምህየ ወሖረ ገሊላ። 44#ማቴ. 13፥57፤ ማር. 6፥4፤ ሉቃ. 4፥24። ወለሊሁ እግዚእ ኢየሱስ ሰማዕተ ኮነ ከመ ኢይከብር ነቢይ በሀገሩ። 45#2፥23። ወበዊኦ ካዕበ ገሊላ ተቀበልዎ ኵሎሙ ገሊላውያን እስመ ርእዩ ኵሎ ተኣምረ ዘገብረ በኢየሩሳሌም አመ በዓል እስመ እሙንቱሂ ሖሩ ለበዓል።
ዘከመ አሕየዎ እግዚእ ኢየሱስ ለወልደ ገብረ ንጉሥ
46 #
2፥1-11። ወሖረ ካዕበ እግዚእ ኢየሱስ ውስተ ቃና ዘገሊላ ኀበ ረሰየ ማየ ወይነ ወሀሎ አሐዱ ገብረ ንጉሥ ሰብእ አብያታዊ ወይደዊ ወልዱ በቅፍርናሆም። 47#ኤር. 17፥14። ወሰሚዖ ከመ መጽአ እግዚእ ኢየሱስ እምይሁዳ ውስተ ገሊላ ሖረ ኀቤሁ ወሰአሎ ከመ ይረድ ወያሕዩ ሎቱ ወልዶ እስመ አልጸቀ ይሙት። 48#2፥18፤ 1ቆሮ. 1፥22። ወይቤሎ እግዚእ ኢየሱስ እመ ተአምረ ወመንክረ ኢርኢክሙ ኢተአምኑ። 49ወይቤሎ ውእቱ ገብረ ንጉሥ ሰብእ አብያታዊ እግዚኦ ረድ ፍጡነ ዘእንበለ ይሙት ወልድየ። 50#2፥22። ወይቤሎ እግዚእ ኢየሱስ ሑር ወልድከሰ ሐይወ ወአምነ ውእቱ ብእሲ በቃል ዘይቤሎ እግዚእ ኢየሱስ ወሖረ። 51ወእንዘ ይወርድ ተቀበልዎ አግብርቲሁ ወዜነውዎ ወይቤልዎ ወልድከሰ ሐይወ። 52ወተስእሎሙ ሰዓታ እንተ ባቲ ሐይወ ወይቤልዎ ትማልም ጊዜ ሰብዐቱ ሰዓት ኀደጎ ፈፀንቱ። 53ወአእመረ አቡሁ ከመ ጊዜ ይእቲ ሰዓት እንተ ይቤሎ እግዚእ ኢየሱስ ወልድከሰ ሐይወ ወአምነ ቦቱ ውእቱ ወኵሉ ሰብአ ቤቱ። 54ወዝንቱ ካዕበ ዳግሙ ለእግዚእ ኢየሱስ ዘገብረ ተኣምረ መጺኦ እምይሁዳ ውስተ ገሊላ።
נבחרו כעת:
ወንጌል ዘዮሐንስ 4: ሐኪግ
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
