Luka 17
17
Kizizi, Tɛyɛyɛkɛŋa, Kɛxwɛwɛwa
1Yesu etsre yɛ badɔkpasɛ asɛ: “Kɛdɔ nɛ gɛ kɛkɔ ba bhɛtɛ kizizi kɛ lɛ sɛ tɛ kɛ ba, pɔ butɔ kɔ anɔ nɛ gɛ yɛ abha kɛba ga ba. 2Kɛ ba pɛ̃ kɔ yɛ dɛ sɛ tɛ batsa buhɔ akpɛ yɛ oli tɛ ba yɛkɔ atɛ̃ akpɛ aƒu mɛ sɛ tɛ akɔ banuvɔ bhli anɛ teli ada bhɛtɛ buzizi. 3Kɛlɛ so nɔ di wunɔ shu abha.
“Onugɛ wɔ adzya abhɛtɛ kibui zizi amɛna wɔ kɔ, nyɛna nɛ yɛ abha, klɛ onugɛ etsyinaɛtemɛ, enu kɔ tsye yɛ. 4Onugɛ abhɛtɛ kizizi amɛna wɔ kɔ abhɛtɛ tegene nɛ kiwui tirikpo mɛ, klɛ atɛtegene etsodzi aba wɔ kɔ klɛ aɖɔ sɛ, ‘Etsyinɛtem,’ kɔ tsye yɛ.”
5Banɔkpɛkpɛ nɛ etsre Apalete nɛ asɛ, “Kɔ bulɔ tɛyɛyɛkɛŋa nɛ kpe trɔ!”
6Etsre alsɛ, “Onugɛ tɛyɛyɛkɛŋa bhliyi anasɛ musta eyuyu alɛ wunɔ ahwɛ, nɔ bɔ na tsre osiɔnɛ sɛ, ‘Kpa nɛ igu klɛ ododzu shu nɛ aƒu nɛ mɛ,’ klɛ lɔ bɔ ta wɔ atɔ.
7“Kɛbɛlɛmɛ sɛ axwɛdɛ alɛ wunɔ mayɛ teli ahwɛ gɛ adɛ buya pɛnɔ anyɔnɔ ibhoshi. Ebe tsre axwɛdɛ nɛ gɛ ede ayakpa nɛ mɛ aba sɛ, ‘Ba mɛ ɔbha tɛ ɔbɔ za kesi tɛ ɛŋa kɛdɔ’? 8Ata aba ɖɔ asɛ, ‘Bhɛtɛ mɛ dɔ ŋɛŋa, bala shu klɛ tɛ ozopo mɛ kibelɛlɛ gɛ ɛŋaɛdɔ klɛ mɛ ɛwɛ̃ dɔ; kɛlɛede tɛ wɔ tsyɛ ɔdɔ ŋa tɛ owɛ̃’? 9Ete hu axwɛdɛ nɛ ahwɛ alasɛ awa kɛxwɛ nɛ gɛ ɔkɔ yɛ sɛ tɛ awa? 10So wunɔ tsyɛ, kibenɔ gɛ nɔ bhɛtɛ kɛkanyaka gɛ be tsre nɔ sɛ tɛ nɔ bhɛtɛ, nɔ ɖɔ sɛ, ‘Bulɔ bunu axwɛdɛ gɛ bu dɛ na, bulɔ axwɛ ko lɔ wa.’ ”
Yesu Ebeke Banɔ Lɔfɔ Bunyadzɛdzã
11Ɔtsɔ̃ nɛ gɛ atɔnɛ kidzo avɛ́ Yerusalɛm, aga Samaria nɛ Galeli bubo nɛabha. 12Gɛ avɛ ɔma bhliyi toli mɛ, banɔ lɔfɔ gɛ bunya dzɛdzã lɛ balɛ shu nɛ batsyanɛ yɛ. Ba za odzroɖokɔ 13klɛ ba kpɛ ogugu gɛganɛ eklu yɛ asɛ, “Yesu, Apalete, di lɔ eshutukubui!”
14Gɛ amɔ alɛ, etsre alɛ sɛ, “Nɔ vɛ, tɛ nɔ dɔyɛkɔ ishu nɛ ɔkasɛ Kpayaɔzakɔanɔ.” Klɛ gɛ bavɛ, balɛ shu bhui.
15Anɔ terikpo nɛ banyɛnya nɛ shi gɛ amɔ sɛ yɛ bunya nɛ beke nɛ yɛ shu, etsodzi aba, kpɛ Kpaya kinyi nɛabha nɛ ogugu. 16Ezhiadɔ nɛ Yesu butsrukpɔ nɛ ɔbha klɛ ehu yɛ ahwɛ—klɛ anɔ nɛ edzi Samaria eyi.
17Yesu ebisi asɛ, “Anɛ banɔ lɔfɔ petee shu bhui? Fakɔ banɔ tiezhita gugɔɛ nɛ alɛ? 18Ba dɛ mɔ anɔnyanɔ gɛ kɛlɛ sɛ etsodzi aba klɛ tɛ aba kpɛ Kpaya nɛabha ɔyɛkɔ dɛ efua nɛ ko?” 19Etsre yɛ asɛ, “Lɔ tɛ ɔshɛ̃ wɔ tɛyɛyɛkɛŋa kɔ wɔ shu bhui.”
Kpaya Kusiɔŋakɔ Nɛ́ Tɛbɛba
20Kiwui tili, Farisianɛ be bisi asɛ kibe ɖuwebe Kpaya Bukusiɔŋakɔ nɛ ɔbɔ ba, Yesu ebulɛn asɛ, “Kpaya Bukusiɔŋakɔ bu dɛ ba nɛ̀ kɛ dɔ luluawɔ̃ mɔmɔ, 21pɛnɔ banɔ ba ba ɖɔ sɛ, ‘Ɔmɔ yɛ nɛ ɔkɛnɛ,’ pɛnɔ ‘Kedea alɛ,’ alasɛ Kpaya Bukusiɔŋakɔ bu lɛ wunɔ mɛ.”
22Ɔkɛlɛ etsre yɛ badɔkpasɛ asɛ, “kiwui tili baa gɛ nɔ bɔ pɛɛ sɛ tɛ nɔ mɔ Anɔdzyrame Yi kiwui tiɖikpo pɛ, pɔ nɔ tɛ bɔ mɔ lɛ. 23Banɔ be tsre nɔ sɛ, “Alɛ kedea nɛ!’ pɛnɔ ‘Alɛ ɔkɛnɛ!’ Nɔ tɔ kɔeyi sɛ nɔ kpatɔnɛ yɛ. 24Alasɛ Anɔdzyrame Yi nɛ yɛ kiwui nɛ mɛ kɛ ba dzi anasɛ sɛbhaɛfu bubu, gɛ ebui fu mlãmlã nɛ kɛlɛmɛ akana ɔkɔ terikpo ɔvɛnɔ ɔbhlatɔ kɔ. 25Pɔ tɛtɔpu alasɛ tɛ amɔ butɔ ebui gelee klɛ tɛmumɔɛ nɛ be bu yɛ akpã.
26Anasɛ gɛ kɛza nɛ Noa kiwui nɛ mɛ, kanake kɛ baza nɛ Anɔdzyrame Yi nɛ kiwui nɛ mɛ. 27Banɔ ba za ŋɛdɔ, ba za wɔɛ̃dɔ, klɛ ba gbanɛ aglɔ klɛ ba kɔ aglɔ tɛgbɛgbanɔ ɔdɔtɔnɔ kiwui nɛabha gɛ Noa otsyokpo nɛ mɛ. Ɔklɛ buni yiyi nɛ ba klɛ buvu alɛ petee.
28“Kanake lɛ za nɛ Lɔt yɛ kiwui nɛ mɛ. Banɔ ba za ŋɛdɔ klɛ ba za wɔɛ̃dɔ, be dzi kɛdɔ dɔ klɛ ba dɛ dɔ, ba ɖɛdɔ klɛ be dzu bevu. 29Pɔ kiwui nɛabha gɛ Lɔt ashɛ̃ nɛ Sodom, kifu wɔlɛ denɔ owũsise klɛ la tã banɔ nɛ petee.
30“Kanakɛ kɛbaza nɛ kiwui nɛabha gɛ ba be bu Anɔdzyrame Yi akasɛ. 31Nɛ kiwui lɛlɛ nɛabha ànɔnyanɔ gɛ etsri ovutɔ, gɛ yɛ dɔ lɛ buvu mɛ, atɛɖɔ sɛ ekoeyi tɛ ada yɛkɔɛ lɛ. Kanakɛ anɔ nɛ gɛ alɛ buya mɛ atɛɖɔ sɛ etsodzi ashɛ̃ vɛ kɔ kɛdɔnyɛdɔ. 32Nɔ baka Lɔt yɛedzini! 33Anɔ nɛ gɛ aba bhɛtɛ asɛ tɛ ebu yɛ ɛkpã aba lɛla ɛlɛ, klɛ ánɔ nɛ gɛ aba lɛla yɛ ɛkpã lɛ ba wɔ yɛa hwɛ. 34Itsre nɔ sɛ, kiwui lɛlɛ nɛ elishi banɔ tiabha ba wusɔ oputso torikpo abha; ba ba yɛkɔ anɔ terikpo ashɛ̃nɔ klɛ baba shɛnahwɛ abhla nɛ shu elu. 35Badzɛ tiabha ba ba za hɔ agɔnɛ ketsu nɛ buhɔ abha, ba be feke terikpo klɛ ba ba shɛ̃ lɔ abhla. 36Banyɛ tiabha ba ba za buya mɛ; ba ba yɛkɔ terikpo klɛ ba ba shɛ̃ lɔ abhla.
37Yɛ badɔkpasɛ bɛ bisi yɛ asɛ, “Fakɔ, Apalete?”
Ebui lɛ nu asɛ. “Ɔklɛ gɛ kɛdɔ tsitsi lɛ, ɔklɛ eshishi la za.”
© Ghana Institute of Linguistics, Literacy and Bible Translation
