Luka 15
15
Kɛkpalɛ Nɛ́ Obhoshi Lɛ́la Shu
1Ɔtsɔnɛ ɔma badɔdzyɔ anɛ̀ “bezizi” bexogo nɛ Yesu ɔbha sɛ tɛ benu yɛ ebui. 2Pɔ Farisianɛ anɛ ɛshã badɔkasɛ bakpɛ onugbuesi kɔ yɛ sɛ, “Anyɛa nɛ ayɛkɛ banɔ kpã bui klɛ aŋaɛ dɔ nɛ alɛ.”
3Ɔkɛlɛ Yesu akpɛ kɛkpalɛ nɛ akɔ alɛ: 4“Kɛbɛlɛm sɛ, ibhoshi kɛfɔɛfɔ lɛ wunɔ mayɛ teli ahwɛ klɛ torikpo lɛla. Ata shɛlɔ afɛtezhita nɛ-tiezhita nɛ́ ayakpa nɛ́ mɛ gɛ atɛ pɛɛ torikpo nɛ́ gɛ lɔ lɛla ɔdɔnanɛ kibe gɛ amɔ ɔlɛ? 5Klɛ onugɛ amɔ ɔlɛ, ebe feke ɔlɛ atrɔ buŋudɔ nɛ same 6klɛ aba vɛ kepi. Kɛlɛede ebe klu yɛ ɛbhɛyalɛ, nɛ yɛ ɔhaɛalɛ exogo klɛ aba ɖɔ sɛ ‘Nɔ mɔ same nɛ mɛ, ɛmɔ mɛ obhoshi lɛla.’ 7Itsre nɔ sɛ kana ke samemumɔ gelee aba za owũsise nɛ́ ezizi terikpo gɛ etsyina temɛ shu dɛ banɔ dzyɔgo afɛtezhita nɛ-tiezhita gɛ kitemɛ tsyitsyina va ma balɛ shu.
Kɛkpalɛ Nɛ́ Kɔba Lɛla Shu
8“Pɛnɔ kɛɛ ba kɛlɛ mɛ sɛ kɔba fufu xwɛtsɛ lɔfɔ alɛ adzɛ teli ahwɛ, klɛ alɛla terikpo. Adzɛ nɛ ete deke kanɛgbɛ, gɛ aba gba bupa nɛ mɛ klɛ aba pɛɛ kɔba nɛ mɔmɔ ɔdɔtɔnɔ kɛbenɔ nɛ gɛ amɔ kɔba nɛ? 9Klɛ onugɛ amɔ yɛ, ebe klu yɛ ɛbhɛyalɛ nɛ yɛ beshopo exogo klɛ aba ɖɔ sɛ, ‘Nɔ mɔ same nɛ mɛ, ɛmɔ mɛ kɔba nɛ ge alɛla.’ 10Nɛ kidzo lɛlɛ nɛabha, itsre nɔ sɛ, samemumɔ aba za Kpaya axwɛdɛ amɛ nɛ ezizi terikpo gɛ etsyina temɛ.”
Kɛkpalɛ Nɛ́ Eyianyɛ lɛla Shu
11Yesu avɛlɛabha: “Anyɛ teli aza gɛ beyianyɛ tiabha aza yɛ ahwɛ. 12anuvɔ nɛ tsre yɛ aka sɛ, ‘Aka, yekɔ mɛ ɔŋakɔ nɛ wɔ kɛdɔ nɛ mɛ ɔkɔ mɛ.’ So ayɛkɔ yɛ dɔ kapɛ akɔ akanyaka.
13“Kiwũe dɛ dze, eyinuvɔ exogo dɔ nɛ petee gɛ kɛlɛ yɛ ahwɛ, atɔnɛ dzo avɛ oho dzidze toli mɛ klɛ ede zi yɛ dɔ nɛ̀ ɛkpã zizi zɛza. 14Gɛ ezi yɛ kɛdɔnyɛdɔ beke, bubhɛ gɛganɛ tuli badɔ nɛ ɔma petee mɛ, klɛ ebe tenɔ kɛdɔ pɛɛ. 15So avɛ klɛ ada yɛkɔ yeshu akɔ ɔma nɛ mɛ eyi teli, gɛ asɛsɛ yɛ nɛ yɛ buya mɛ sɛ tɛ ada nyinɔ bahɛ. 16Anyɛnuvɔɛ apɛɛ asɛ tɛ aŋa kɛdɔ gɛ bahɛ na ŋa, pɔ anɔnyanɔ adɛ kɔ yɛ kɛdɔnyɛdɔ.
17“Kɛbelɛlɛ nɛ gɛ ebe ti, aɖɔ sɛ, ‘Mɛ aka baxwɛwa tsɛashɛ̃ ahwɛ kɛŋɛŋa lɛ gɛ la ba kɔa nɔ, klɛ ɛlɛ ɔkɛ nɛ pɛ ɛba tsi! 18Ɛba tɔnɛ dzo ɛtsodzi vɛ mɛ aka kɔ tɛ ɛda tsre yɛ sɛ: Aka, ɛbhɛtɛ kɛbui kpã nɛ owũsise anɛ wɔ shu. 19Ɛda dzyenɔ sɛ tɛ be klu mɛ sɛ wɔe yi, yɛkɔ mɛ anasɛ wɔ bawɛwa nɛ ɔmayɛ teli.’ 20So alɔ klɛ atɔnɛ yɛ aka avɛ.
“Pɔ kibelɛlɛ nɛ gɛ akalɛ odzidze kɔ, yɛ aka nɛ amɔ yɛ asɛsɛ klɛ yɛ bui kuyɛ eshutukubui, akpanisi avɛ ye yi nɔ bha, akpahwɛ yɛ oli klɛ amɔkɔɛ yɛ onugbu.
21“Eyi nɛ etsre yɛ aka nɛ asɛ, ‘Maka, ebhɛtɛ kɛbuikpã nɛ́ owũsise nɛ̀ wɔ shu. Ɛdaka dzyenɔ sɛ tɛ bɛ klu mɛ asɛ wɔ eyi.’
22“Pɔ aka nɛ etsre yɛ baxwɛdɛ nɛ asɛ, ‘Kɔyɛatsɔ! Yɛkɔ awui dzidze dzyɔgo ɔmɛna tɛ ɔyɛkɔ kpɛ kɔ yɛ. Kpɛ kɛsugbɛ nɛ yɛ wɔɛ, tɛ ɔyɛkɔ ɔtsɛrɛklɔ ɔkpɛ kɔ yɛ. 23Dɔ vu nɛnytsyɔɛeyi gɛ elubɔ mɔmɔ tɛ ɔyi. Kɔ lɔ ŋaɛwui klɛ tɛ bumɔ same. 24Alasɛ mɛ yia nɛ ɛtsi, klɛ akalɛ nɛ ɛkpã, alɛla klɛ bumɔ yɛ.’ So ba kpɛ same mumɔesi.
25“Kibelɛlɛ mɛ, eyi shishe aza ayakpa mɛ. Gɛ abe tsobunɔ bupa, enu kivu bhubho klɛ nɛ tɛyuyu. 26So eklu axwɛdɛ terikpo klɛ ebisi yɛ asɛ kɛbuiɖueɖu kɛlɛ vɛ abha? 27Ebulɛnu asɛ ‘Wɔ adzya bhli nɛ yɛ aba, klɛ wɔ aka evu nɛntsyɔɛ nɛ gɛ elubɔ dɛ eyi alasɛ amɔ yɛ yi gɛ aba nɛ tɛzɛza dzyɔgo mɛ klɛ alɛ mɔmɔ.’
28“Adzya shishe nɛ amɔ oblo klɛ asɛ atɛ ka vɛ bupa nɛ mɛ. So yɛ aka atɔnɛ avɛ ada kpɛ kɛtɔkpuesi kɔ yɛ. 29Pɔ etsre yɛ aka sɛ, ‘Di! Agɔ ɖoɖoanɛ gɛ ɛwa kɛxwɛ kɔ wɔ anasɛ anɔdzidzi klɛ ɛka lɔɛtiti nɛ wɔ ɔshã shu di. Pɔ tsyɛ ɔkɔ kɔ me epidzya eyi di sɛ tɛ mɛ tsyɛ tɛ ɛyɛkɔ mɔ same nɔ nɛ mɛ ɛbhɛyalɛ nɛ di. 30Pɔ gɛ wɔe yi anɛ gɛ avɛ de futsu wɔɛ dɔ nɛ́ aglɔbui bhɛbhɛtɛ gɛ aba kepi, klɛ ɔdo yi nɛntsyɔɛ gɛ elubɔ kɔ yɛ!’
31“Aka nɛ aɖɔ sɛ, ‘Mɛ yi,’ wɔ ɔlɛmɛ ɔbha kɛbɛnyɛbɛ klɛ kɛdɔnyɛdɔ ge kɛlɛ mahwɛ wɔɛ yɛ lɛnu. 32Pɔ kɛ lɛ kɔ lɔ sɛ tɛ bumɔ same te buŋa kɛdɔ alasɛ wɔ adzya ne etsi pɔ akalɛ nɛ ɛkpã alɛla klɛ bumunɔ yɛ.’ ”
© Ghana Institute of Linguistics, Literacy and Bible Translation
