Yohanɛsɛ 6
6
Yesu Akɔ Banɔ Akpã Teti Kɛdɔŋɛŋa
1Kibe tili nɛ kɛɛ nɛ nɛe de, Yesu atsɔkɛ avɛ faã nɛ Galelia Aƒu nu tɔ, (ɔkɛlɛ ɔlɛ nu, Tiberia Aƒu), 2klɛ banɔɛza gbɛgbla tili tɔnɔ yɛ alasɛ ba mɔ kɛdɔmumɔ gɛyinɔanɔ gɛ abhɛtɛ nɛ ba nyɛnyɛã nɛ shu. 3Kɛlɛ Yesu ewu avɛ butunɛshu klɛ ada zaesi nɛ́ ɔkɛlɛ nɛ yɛ badɔkpasɛ. 4Yuɖanɛ Tɛfɛfla Kiwuiŋɛŋa nɛ tsobunɔ.
5Gɛ Yesu efeke amɛ ewunɔ klɛ amɔ banɔɛza gbɛgbla tili gɛ kɛ ba yɛ ɔbha, aɖɔ etsre Filipo sɛ, “Fakɔ lɔ ba mɔ kɛŋɛŋa dzi kɔ banɔa nɛ tɛ ba ŋa?” 6Ebisi kibui nɛ ko sɛ tɛ ayɛkɔ efeke yɛ di, alasɛ yɛ atɛ mɔ nɛ yɛ tɔkpu mɛ kɛdɔnɔ gɛ aba bhɛtɛ.
7Filipo ebu ishu nu akɔ yɛ asɛ, “Wele tɛasɔɛ bhɛ bubuyɛa kuratsyɛ kɛtɛ ba dzi gbɛ̃gbɛvu gelee kɔ balɛ mɛayɛ kanyɛaka gɛ aba tã!”
8Yɛ adɔkpasɛ bhlatɔ, Andrɛasɛ, Simɔn Petro yɛadzya, aɖɔ sɛ, 9“anyɛnuvɔɛ tɛli nɛ ɔkɛ̃ nɛ evunɔ gbɛ̃gbɛ̃vu ɛgba bhliyi titi gɛ lɛ dɛ ŋaedzi nɛ kenimɛdzya bhliyi tɛbha, pɔ kide kɛdɔɛ lɛlɛ bana kɔ banɔ gelee anɛ?”
10Yesu aɖɔ sɛ, “Kɔ banɔ nɛ ba za kesi.” Tɛwa kpi lɛ ɔkɛlɛ, klɛ banɔ nɛ zaesi, bavɛ anasɛ banɔ akpã teti. 11Yesu ayɛkɔ gbɛ̃gbɛ̃vu, ehu ahwɛ, klɛ ayɛ kɔ banɔ nɛ gɛ ba zaesi nɛ ɔkɛlɛ anasɛ kɛpɛɛ gɛ ba pɛɛ. Kana ke abhɛtɛ nɛ kenimɛdzyɛa.
12Gɛ balɛ petee aŋa kɛdɔ kɛ pɛɛ gɛ ba pɛɛ, Yesu etsre yɛ badɔkpasɛ nɛ asɛ, “No xogo ewuliwuli nɛ gɛ agɔ. Nɔ tɛkɔ kɛkanyɛaka zi.” 13So be xogo alɛ klɛ ki yuku bushɔ lɔfɔnɛtubha gɛ ba ŋa gɔ.
14Kɛlɛe de gɛ banɔ nɛ amɔ ebui gɛ eyinɔ anɔ gɛ Yesu abhɛtɛ, betenɛ kaɖɔ ɖɔ sɛ, “Kɛgbɛagba yɛ nu Atɔnu gɛ aba ba kanɔ nɛ mɛ.” 15Yesu eti asɛ ba pɛɛ asɛ tɛ ba ba ebe vu yɛ edzu bukisi nɛ tɛgɛganɛ mɛ, so yɛnahwɛ aza shɛ̃ nɛ balɛ ɔbha avɛ butu tulia bha.
Yesu Aga Buni Nɛabha
16Gɛ ɔwulago nɔ na, Yesu badɔkpasɛ be zhi avɛ kɛvɔ nɛabha, 17ɔkɛlɛ be de tsoku keniabha opupu toli mɛ klɛ batsɔkɛ kɛvɔ avɛ Kapɛnum. Ɔtsyɔnɛ otumu ɔdɔ, klɛ Yesu eke be tsoku aplɛnɔ alɛ. 18Kɛ́lɛ́ɛ gɛganɛ tili fu klɛ buni nɛ lɔ guragura. 19Gɛ bege opupu nɛ avɛ anasɛ imuenekɔ tɛta ɔvɛnɔ tɛta nɛ kapɛ, bamɔ Yesu agà buni nɛabha etsobunɔ opupu klɛ kifu tenɔ alɛ ku. 20Pɔ Yesu etsre alɛ sɛ, “Mɛ, no ti sifu.” 21Kɛlɛ pɛa sɛ tɛ ba yɛkɛ yɛ akpɛ opupu nɛ mɛ, kiwũ dɛdze opupu nɛ ku kigbigbe nɛ tɔ nɛ ɛkɛlɛ gɛ be dzu amɛ avɛ.
22Kiwui bhla banɔɛza gɛ baza kɛvɔ nɛapɛ bhla, ba mɔ sɛ opupu torikpo ko ɔlɔ za ɔkɛlɛ klɛ Yesu edi tsoku ɔlɛmɛ plɛnɔ yɛ badɔkpasɛ, pɔ sɛ balɛ tite ko ashɛ̃. 23Kɛlɛ ipupu tili de Tiberia ba dzurɔ tsobunɔ ɔkɛlɛ gɛ banɔ na ba tã gbɛ̃gbɛvu gɛ Apalete nɛ ehu ahwɛ. 24Gɛ banɔɛza nɛ amɔ sɛ Yesu nɛ yɛ badɔkpasɛ ba ba ɔkɛlɛ nɛ, beku ipupu avɛ Kapɛnaum sɛ tɛ ba da pɛɛ yɛ.
Yesu Enu Ɛkpã Kɛdɔŋɛŋa
25Gɛ ba da mɔ yɛ nɛ kɛvɔ nɛapɛ bhla, be bisi yɛ asɛ, “Adɔkasɛ, kibeɖuweɖu ɔboku ɔkɛ̃ nɛ?”
26Yesu ebulɛnu asɛ, “Itsre nɔ kɛgba, nɔɔ pɛɛ mɛ, ganɛ sɛ nɔ mɔ kɛdɔmumɔ gɛ yinɔanɔ so, pɔ alasɛ nɔ tã gbɛ̃gbɛ̃vu klɛ no xui so. 27Nɔ tɔwa kɛxwɛ kɔ kɛŋɛŋa gɛ kɛ bazi, pɔ nɔ pɛɛ kɛdɔ ŋɛŋa gɛ kɛbakɔ ɛkpã mabeke gɛ Anɔdzyrame Yi aba kɔ nɔ. Nɛ yɛabha Aka Kpayɛa atrɔ ahwɛ.”
28Kɛlɛ be bisi yɛ asɛ, “Kide lɔ ba bhɛtɛ gɛ bu bawa Kpayɛa axwɛ gɛ kɛ bisi sɛ tɛ bu bhɛtɛ?”
29Yesu etsre alɛ asɛ, “Kpayɛa xwɛ kɛlɛ nu sɛ, tɛ nɔ yɛkɛ anɔ nɛ gɛ akpɛ nɛabha ŋa.”
30So be bisi yɛ asɛ, “Kɛde ebui gɛ eyinɔ anɔ mumɔ ɔbɔ kɔ gɛ bu ba mɔ lɛ klɛ bu bayɛkɛ wɔabha ŋa? Kɛde wɔ bɔ bhɛtɛ? 31Bulɔ bakashishe ba ŋa manna nɛ odzogbe kesukpa nɛabha anasɛ gɛ ba ŋlɔmɛ: ‘Akɔ alɛ gbɛ̃gbɛ̃vu denɔ owũsise sɛ tɛ ba tã.’ ”
32Yesu etsre alɛ sɛ, “Itsre nɔ kɛgbɛ, ganɛ Mose yɛa kɔ nɔ gbɛ̃gbɛ̃vu denɔ owũsise, pɔ mɛ Aka yɛ akɔ nɔ gbɛ̃gbɛ̃vu kɛgbɛagba denɔ owũsise. 33Alasɛ gbɛ̃gbɛ̃vu nɛ gɛ kɛ de Kpayɛa kɔ kɛlɛ nu anɔ nɛ gɛ ezhi de owũsise aba, klɛ akɔ ɛkpã kanɔ.”
34Baɖɔ sɛ, “Apalete, denɔ ɔtsɔnɛ kɔlɔ gbɛgbɛvua nɛɛ di.”
35Kɛlɛ Yesu ebu etsre alɛ asɛ, “Mɛ nu ɛkpã gbɛ̃gbɛvu. Anɔ nɛ gɛ aba mɛ ɔkɔ bubhɛ tɛ ba yi yɛ, klɛ anɔ nɛ gɛ ayɛkɛ nɛabha ŋa oniwɛ tɛ bɔ tɛ yɛ. 36Pɔ anasɛ gɛ ɛtsre nɔ, nɔ mɔ mɛ klɛ tsyɛ nɔ dɛ yɛkɛŋa. 37Banɔ nɛ petee gɛ Kpayɛa akɔmɛ ba baba mɛ ɔkɔ, klɛ anɔnyanɔ gɛ aba mɛ ɔkɔ ɛtɛ ba kɛkɛ yɛ. 38Alasɛ ede owũsise aba anɛ sɛ tɛ ɛba bhɛtɛ mɛnahwɛ tɛtɛtrɔ pɔ tɛ ɛbhɛtɛ yɛ tɛpɛpɛɛ agɛ yɛ akpɛ mɛ. 39Klɛ kɛɛ nɛ kɛlɛ nu agɛ akpɛ mɛ nɛ tɛpɛpɛɛ, sɛ ɛtɛ lɛla bagɛ balɛ petee akɔ mɛ, pɔ tɛ ɛnyɛmɛ alɛ nɛ kiwui gugɔɛ nɛabha. 40Alasɛ Maka yɛ tɛpɛpɛɛ kɛlɛ nu sɛ anɔnyanɔ gɛ edi Eyi klɛ ayɛkɛ yɛ abhaŋa aba mɔ ɛkpã gɛ tɛ ba beke, klɛ ɛba nyɛmɛ yɛ kpɛ kabha nɛ kiwui gugɔɛ nɛabha.”
41Nɛ kɛnɛnɛ mɛ belɛlɛ Yuɖanɛ be tenɔ onugbuesi kpɛ kɔ yɛ, alasɛ aɖɔ asɛ “Mɛ nu gbɛ̃gbɛ̃vu gɛ ezhi de owũsise ba.” 42Ba ɖɔ sɛ, “Anɛ yɛe nu Yesu, Yosef yɛeyi gɛ aka anɛ̀ eni bu nyi? Kɛlɛ ɔtsɔlɛ aba ɖɔ sɛ, ‘Ezhi de Owũsise ba’? ”
43Yesu etsre alɛ sɛ, “Nɔ yɛlɔ onugbukpɛesi nɛ wunɔ mɛ.” 44“Anɔnyanɔ atɛ ba ba mɛ ɔkɔ gɛ odinu sɛ Aka nɛ gɛ akpɛ mɛ yɛe gbanɛ yɛ asɛsɛ mɛ, klɛ ɛba nyɛmɛ yɛ nɛ kiwui gugɔɛ nɛabha. 45Ebuiɖɔlu Ba ŋlɔmɛ nɛ Atɔnu keplukpa nɛ mɛ asɛ: ‘Kpayɛa aba kasɛ alɛ petee dɔ.’ Anɔnyanɔ gɛ ata Aka na tɔ klɛ akpasɛ bui denɔ yɛ ɔkɔ aba ba mɛ kɔ. 46Anɔnyanɔ aka mɔ Aka, ɔdɛ sɛ anɔ nɛgɛ ede Kpaya ɔkɔ, yɛ ko yɛ atɛ mɔ Aka. 47Itsre nɔ kɛgbɛ sɛ, anɔ nɛgɛ ayɛkaŋa aba mɔ ɛkpã mabekemabeke. 48Mɛ nu gbɛ̃gbɛvu gɛ akɔ ɛkpã. 49Wunɔ bakashishe ba ŋa manna nɛ odzogbe kesukpa nɛabha, tsyɛ bɛ tsi. 50Pɔ kɛlɛ nu gbɛ̃gbɛvu gɛ kɛde owũsise aba, gɛ anɔ abà ŋa klɛ eti bɛ tsi. 51Mɛ nu ɛkpã gbɛ̃gbɛ̃vu gɛ ede owũsise aba. Onugɛ anɔ teli atã gbɛ̃gbɛvui nɛ, aba za nɛ ɛkpã ɔvɛnɔ mabekemabeke. Gbɛ̃gbɛ̃vui nɛ kɛlɛ nu mɛ ishuidzya, gɛ ɛba yɛkɔ lu kɔ ɛkpã kɔ kanɔ.”
52Ɔkɛlɛ Yuɖanɛ be tenɔ ishu etsi tsiɔ̃ nɛ aglɔ mɛ, “Kɛlɛ anyɛa nɛ aba yɛkɔ yɛ shuidzya akɔ lɔ sɛ tɛ bu tã?”
53Yesu etsre alɛ sɛ, “Itsre nɔ kibui kɛgba, odinu sɛ nɔ tã Anɔdzyrame Yi nɛ ishuidzya klɛ nɔ wɔẽ yɛ dzyosu, ɛkpã tɛ ba za wɔnɔ mɛ. 54Anɔ nɛ gɛ atã mɛ ishuidzya klɛ awɔɛ̃ mɛ dzyosu ɛkpã mabekemabeke lɛ yɛ ahwɛ, klɛ ɛba nyɛmɛ yɛ nɛ kiwui gugɔɛ nɛabha. 55Alasɛ mɛ ishuidzya nu kɛdɔwɛ̃wɛ̃ dzyɔgo klɛ mɛ dzyosu enu kɛwũwɔ̃ɛ dzyɔgo. 56Anɔ nɛ gɛ atã mɛ ishuidzya klɛ awɔɛ̃ mɛ dzyosu awɔ mɛ mɛ klɛ mɛ ɛlɛ yɛ mɛ. 57Anasɛ gɛ ɛkpã Aka akpɛ mɛ klɛ ɛlɛ alasɛ Aka nɛ so, anɔ nɛ gɛ aŋã dɔ nɛ mɛabha aba za nɛ ɛkpã alasɛ mɛ so. 58Kɛɛ nɛ nɛ nu gbɛ̃gbɛ̃vu gɛ de owũsise ba. Wunɔ bakashishe ba tã manna klɛ be tsi pɔ anɔ nɛ gɛ atã gbɛ̃gbɛ̃vui nɛ aba za nɛ ɛkpã mabeke mabeke.” 59Yesu aɖɔ kibui nɛ kɛbelɛlɛ gɛ akasɛdɔ nɛ Yuɖanɛ oxogokɔvu nɛ mɛ nɛ́ Kapɛnum.
Badɔkpasɛ Gelee Besialɔ Yesu
60Nɛ ebuianɛ tɛnunu, yɛ badɔkpasɛ gelee ba ɖɔ sɛ, “Kɛɛ nɛ kɛlɛ nu kɛdɔ kɛkasɛ gɛganɛ. Ane yɛ aba yɛkɛ lɛ?”
61Yesu eti asɛ yɛ badɔkpasɛ ba kpɛ onugbuesi nɛ kibui nɛ shu, Yesu etsre alɛ sɛ, “Kɛlɛ kibui nɛ lɔɛtiti nɛ wunɔ shu? 62Kide onugɛ nɔ mɔ Anɔdzyrame Eyɛi etsodzi ewu avɛ ɔkɛlɛ gɛ aza flogo! 63Ɔfufɔɛ nɛ ɔkɔ kpã, ishuidzya kɛ dɛ nu kɛdɔnyɛdɔ. Ebui nɛ gɛ ɛɖɔ tsre nɔ le nu ɔfufɔɛ klɛ le nu ɛkpã. 64Pɔ wunɔ teli nɔ dɛ yɛkɛŋa.” Alasɛ Yesu eti ti denɔ kesikpɛkpɛ ke bagɛ ba dɛ yɛkɛŋa klɛ agɛ aba kɔ yɛ akpɛ ahwɛ. 65Avɛ lɛabha aɖɔ asɛ, “Kɛlɛ so gɛ itsre nɔ sɛ anɔnyanɔ atɛ ba ba me ɔkɔ gɛ odunu Aka nɛ yɛ akɔ yɛ dzo.”
66Denɔ kibelɛlɛ nɛ mɛ yɛ badɔkpasɛ gelee ba be tsyinaede klɛ ba da za yɛ ede.
67Yesu ebisi yɛ banɔ lɔfɔ nɛtiabha nɛ asɛ, “Wunɔ tsyɛ nɔ dɛ pɛɛ sɛ tɛ nɔ shɛ̃, nɔ pɛɛ?”
68Simɔn Petro ebulɛnu akɔ yɛ asɛ, “Apalete, ane yɛ ɔkɔ bu ba vɛ? Wɔ ahwɛ ɛkpã mabekemabeke ebui na lɛ. 69Bu yɛkɛŋa klɛ bunyi sɛ wɔ nu Kpaya dzyɔgo Anɔ.”
70Yesu ebuilɛnu asɛ, “Anɛ mɛ klu nɔ banɔ lɔfɔ nɛtiabha? Pɔ sɛ wunɔ mayɛ teli enu Abonsam!” 71(Yuɖasɛ yɛ aɖɔ, Simɔn Iskarɔtɛ yɛeyi, pɔ kɛlɛ lɛ mɛ sɛ enu kɛfɔnɛtɛabha nɛ mayɛ̃ teli, nɛ kɛlɛede aba yɛkɔ mɛ akpɛ ahwɛ.)
נבחרו כעת:
Yohanɛsɛ 6: tcd
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Ghana Institute of Linguistics, Literacy and Bible Translation
