Yohanɛsɛ 11
11
Lazazus Yɛ Tɛtsitsi
1Ɔtsyɔnɛ anyɛ teli gɛ bé klu asɛ Lazarus adɔ nya. Ede Betani, kɔxoe nɛ mɛ gɛ Maria nɛ yɛ ada Mata be de. 2Maria nɛ gɛ ye adzya yɛ nu Lazarus gɛ ànya, yɛ nu adzɛ alɛlɛ nɛ gɛ abalɛ bubɔ huhũ nɛ Apalete nɛabha, klɛ ayɛkɔ yɛ kɛtɔkputɛka etsuru yɛ butsrɛkpɔ. 3So bada nɛ akpɛ anɔ nɛ Yesu ɔkɔ sɛ, “Apalete, anɔ nɛ gɛ ɔdɛmɛnɔ adɔ nya.”
4Gɛ Yesu enu kibui nɛ, aɖɔ sɛ, “Bunya nɛ tɛ bagbanɛ yɛ avɛnɔ butsi mɛ. Ao, kɛ nu Kpaya nyi kpɛkpɛabha so sɛ tɛ ba kpɛ Kpaya yɛ Yi nɛabha ɔganɔ lɛabha.” 5Yesu adɛmɛnɔ nɛ Mata, anɛ yɛada anɛ Lazarus. 6Pɔ gɛ enu asɛ Lazarus anya, aza ɔkɛlɛ gɛ alɛ ewui tabha nyɔ.
7Nɛ ɔkɛlɛ Yesu ɛtsre yɛ badɔkpasɛ nɛ asɛ, “Nɔ kɔ lɔ tsodzi vɛ Yuɖea.”
8Yɛ badɔkpasɛ baɖɔ sɛ, “Pɔ Adɔkasɛ, kiwũe kadze gɛ Yuɖanɛ ba pɛɛ asɛ tɛ behu wɔ aklãgbu, klɛ pɔ ɔkɔ tsodzi ɔvɛ ɔkɛlɛ?” 9Yesu etsre alɛ sɛ, “Ganɛ ɛɖa lɔfɔntɛbha ɛlɛ lɛ kelizɛza tierikpo mɛ? Anɔ nɛ gɛ agà nɛ kemuze mɛ eti tui tsrɛ, alasɛ amɔ nɛ kanɔa nɛ mɛ kifu. 10Pɔ onugɛ aga nɛ elishi mɛ ebe tuɛtsɛrɛ, alasɛ kifu ma yɛ ahwɛ.”
11Gɛ aɖɔ kibui nɛ bekɛ avɛ lɛabha etsre alɛ asɛ, “Bulɔ ɔbhɛya Lazarus avɛnɔ tɛɖa, pɔ ɛvɛ ɔkɛlɛ tɛ ɛda nyɛmɛ yɛ.”
12Yɛ badɔkpasɛ baɖɔ sɛ, “Apalete, onugɛ adɔ tɛra, aba pɛ̃ndɛ.” 13Yesu àɖɔaɖɔ denɔ Lazarus butsi shu, pɔ yɛ badɔkpasɛ nɛ ba yɛkɔɛ lɛ asɛ, tɛra dɛdɔ dzyɔgo bui yɛ aɖɔ.
14Kɛlɛso ebuilɛmɛ etsre alɛ wee sɛ, “Lazarus etsi, 15klɛ alasɛ wunɔ tɔkpu so same kumɛ sɛ ɛdɛ za ɔkɛlɛ, sɛ tɛ nɔ bɔ yɛkɛŋa. Pɔ nɔ kɔ lɔ vɛ yɛ ɔbha.”
16Ɔkɛlɛ Toma (agɛ be klu asɛ Didamusɛ) aɖɔ tsre yɛ badɔkpasɛ gugɔɛ na sɛ, “Nɔ kɔ bulɔ tsyɛ vɛ tɛ bu da tsi plɛnɔɛ Yesu.”
Yesu Evudzyi Akpɛ Bada Nɛ Te
17Nɛ yɛ ɔkɛlɛ tɛkuku, Yesu amɔ sɛ ba tɛ kpɛ Lazarus nɛ odzre nɛ mɛ ewui tãlɛ̃ na nɛ. 18Bɛtani adɛ na tɛ mumone ɛzakɔɛ tɛbha kidzo gɛga denɔ Yerusalɛm, 19klɛ Yuɖanɛ gelee ba ba Mata anɛ Maria ɔbha sɛ tɛ ba ba yɔ yɛ idzyi nɛ balɛ adzya butsi nɛ shu. 20Gɛ Mata enu asɛ Yesu aba, avɛ sɛ tɛ ada tsyanɛ yɛ, pɔ Maria xũnɛ awɔ bupa nɛ mɛ.
21Mata etsre Yesu sɛ, “Apalete, ɔtɔsɛ ɔza ɔkɛ̃ nɛɛ, mɛadzya nɛ agɛ ete etsi. 22Pɔ ɛnyi sɛ ɔtsɔnɛ tsyɛ sɛ Kpaya aba kɔ wɔ kɛdɔnɔ gɛ obisi.”
23Yesu etsre yɛ asɛ, “Wɔ adza ebe tsodzi alɔ.”
24Mata ebuilɛnu sɛ, “Inyi sɛ aba tsodzi alɔ nɛ kiwui gugɔɛ nɛabha gɛ banɔ tsitsi petee ba ba nyɛmɛ.”
25Yesu etsre yɛ asɛ, “Mɛ nu bekpuimɛ alɛlɔ nɛ̀ ɛkpã. Anɔ gɛ ayɛkɛ mɛabhaŋa, aba za nɛkpã kɛlɛlɛmɛ sɛ etsi tsyɛ, 26klɛ anɔ nɛ gɛ alɛ nɛ ɛkpã gɛ ayɛkɛ mɛabhaŋa eti be tsi. Ɔyɛkɛ kibui nɛabhaŋa?”
27Mata etsre Yesu asɛ, “Ee, Apalete, ɛyɛkɛ lɛabha ŋa sɛ wɔ nu Kristo, Kpaya yɛ Yi, gɛ abà kanɔ nɛ mɛ.”
28Klɛ kɛlɛede gɛ aɖɔ kibui nɛ beke, etsodzi avɛ kede klɛ eklu yɛ ada Maria eyinɛde klɛ aɖɔ se, “Adɔkasɛ nɛ alɛ ɔkɛ nɛ, klɛ ebisi wɔɛ tɔkpu.” 29Gɛ Maria enu kibui nɛ, alɔ zia avɛ yɛ ɔbha. 30Ɔtsɔ̃nɛ Yesu ekeku kɔxoe nɛ mɛ, pɔ akalɛ ɔkɛlɛ gɛ Mata ada tsyanɛ yɛ. 31Yuɖanɛ gɛ ba lɛ bupanɛ mɛ anɛ Maria, gɛ ba yɔ yɛ dzyi, gɛ bamɔ kɛ lɔ nɛ gɛ alɔ zia klɛ ekoeyi, ba lɔ atɔnɛ yɛ, nɛ balɛ shuimɛ sɛ avɛ odzre nɛ ɔbha tɛ ede biyo nɛ ɔkɛlɛ.
32Gɛ Maria eku ɔkɛlɛ gɛ Yesu alɛ klɛ amɔ yɛ, ezhiakpla nɛ butsrukpɔ ɛ ɔbha klɛ aɖɔ sɛ, “Apalete, ɔtɔsɛ ɔza ɔkɛ̃ nɛ, mɛadzya nɛ egi te tsi.”
33Gɛ Yesu amɔ sɛ ebiyo, klɛ Yuɖanɛ gɛ ba lɛ yɛ ɔbha tsyɛ be biyo, Yesu dzyi ahwa nɛ ɔfufɔɛ mɛ klɛ eshutukubui eku yɛ. 34Ebisi asɛ, “Fakɔ nɔ vubɔɛ yɛ?”
Ba ɖɔ tsre yɛ asɛ, “Ba tɛ ɔbo di, Apalete.”
35Yesu ebiyo.
36Yuɖanɛ ba ɖɔ sɛ, “Nɔ di kana gɛ adɛmɛ yɛ bui!”
37Pɔ Yudanɛ beteli aɖɔ sɛ, “Anɛ yɛ adanɛ awɔ̃hupupu elete nɛ awɔ̃hu ata kɔ sɛ anya nɛ agɛ tɛ etsi?”
Yesu Anyɛmɛ Lazarus Denɔ Bekpuim
38Yesu yɛ dzyi aza hwa, avɛ odzre nɛ ɔbha. Odzre nɛ lɔ nu aklãgbu ozi gɛ ba yɛkɔ kɛklãgbu ada kedunu. 39Aɖɔ sɛ “No feke kɛklãgbu nɛ kedunu.”
Mata anɔnɛ gɛ etsi nɛ yɛada aɖɔ sɛ, “Pɔ, Apalete, ɔtsɔnɛ aba za lɔ̃, alasɛ alɛ ɔkɛlɛ ewui talɛ̃ na.”
40Ɔkɛlɛ Yesu aɖɔ asɛ, “Ɛdɛ tsre wɔ sɛ onugɛ ɔyɛkɛŋa, ɔbɔ mɔ Kpaya kabhaŋɛŋa?”
41Nɛlɛso be bu kɛklãgbu nɛ odzre nɛ kedunu. Kɛlɛ Yesu ebu amɛ kpɛ kabha klɛ aɖɔ sɛ, “Aka, Ihu wɔ ahwɛ sɛ onu mɛ bui. 42Inyi sɛ kɛbenyɛbe onu mɛ bui, pɔ ɛɖɔ kibui sɛ tɛ banɔ nɛ gɛ ba lɛ ɔkɛnɛ ba yɛkɛŋa sɛ wɔ kpɛ mɛ.”
43Gɛ aɖɔ kɔbui nɛ beke, Yesu akpɛ ogugu nɛ olimɛ gɛganɛ sɛ, “Lazarus, koeyi ɔba!” 44Anɔ tsitsi ekoeyi aba, ba yɛkɔ kɛpɔtɛ ogbo frɛrɛ anya yɛ ɛhwɛ nɛ ɛtsɛrɛ klɛ ba yɛkɔ kɛpɔtɛ anya yɛ amɛ.
Yesu etsre alɛ sɛ, “Nɔ bu butsi dɔ nɛ yɛ shu tɛ nɔ kɔ yɛ ashɛ̃.”
Tɛtɛtrɔ Sɛ Tɛ Be Yi Yesu
45Kɛlɛso Yuɖanɛ gelee gɛ ba ba sɛ tɛ ba da sɛnɛ Maria, gɛ ba mɔ kɛdɔ nɛ gɛ Yesu abhɛtɛ, ba yɛkɛ yɛ abhaŋa. 46Pɔ be teli ba vɛ ede tsre Farisianɛ ebui nɛ gɛ Yesu abhɛtɛ. 47Ɔkɛlɛ kpayaɔzakɔanɔ gbla anɛ Farisianɛ be kulu kɛtɔkpu tsyɛtsya nɛ Bamani.
Be bisi asɛ “Kide lɔ ba bhɛtɛ?” “Anyɛ nɛ abhɛtɛ ebuiyinɔanɔ gelee. 48Onugɛ bu kɔ yɛ ashɛ̃ ana, anɔnyanɔ aba yɛkɛ yɛ abhaŋa, klɛ kɛlɛede Romanɛ na ba ba klɛ ba ba yɛkɛ bulɔ ɛza kɔ anɛ̀ bulɔ kesukpa.”
49Anɔ terikpo ede balɛmɛ, gɛ be klu asɛ Kefasɛ, gɛ edzi kpayaɔzakɔanɔ ɖɛɖama nɛ kɛgɔ lɛlɛ nɛ mɛ, aɖɔaɖɔ sɛ, “No ti nyi bui kura! 50Nɔ tɔ mɔ sɛ apandɛ kɔ nɔ sɛ tɛ anɔ terikpo etsi kɔ banɔ, dɛ sɛ tɛ kɛmadi petee de tsi.”
51Adɛ ɖɔ kibui nɛ yɛ nahwɛshu ahwɛ, pɔ anasɛ kpayaɔzakɔanɔ ɖɛɖama nɛ kɛgɔɛ lɛlɛ mɛ, aɖɔbuielu asɛ, Yesu ebe tsi nɛ Yuɖa ɔma nɛ tɔkpu, 52klɛ anɛ kɔ ɔma lɛlɛ tite so, pɔ kɔ Kpaya banuvɔ nɛ gɛ balɛ ebha tɛ ba gbanɛ ala exogo tɛ ba bhɛtɛ alɛ terikpo. 53Kɛlɛso denɔ kiwui lɛlɛ nɛabha ɔvɛnɔ ba ba trɔ sɛ tɛ be bu yɛ kpã.
54Kɛlɛ so Yesu adɛ ka ba ga akana nɛ́ Yuɖanɛ nɛ shi. Nɛ kɛlɛ ɔzakɔ aba shɛ̃ avɛ kibé tili gɛ tsobunɔ anyɛsɛ̃ kesukpa, nɛ ɔmabhli toli gɛ be klu asɛ Efraim, ɔkɛlɛ aza nɛ yɛ badɔkpasɛ.
55Gɛ Yuɖanɛ nɛ Tɛfɛflawi nɛ gɔɛbɔɛ tɛ kɛ na, banɔ gelee ba shɛ̃ nɛ balɛ ɛma nɛ mɛ be wu avɛ Yerusalɛm sɛ tɛ be de gu ishu puplu bugu flogo tɛ Tɛfɔflawui ba na. 56Banɔ nɛ be tenɔ Yesu apɛɛ, klɛ kɛbelɛlɛ gɛ ba za kpayavu nɛ mɛ, be bisi ehaglɔ sɛ, “Kide wunɔ kɛtɔkpui mɛ tsre nɔ? Nɔ yɛkɛŋa sɛ aba ba Kiwui nɛ ɔŋa kɔa?” 57Pɔ kpayazakɔanɔ gbla anɛ̀ Farisianɛ ba kɔ ɔshã sɛ onugɛ anɔ teli amɔ ɔkɛlɛ gɛ Yesu alɛ, aɖɔ tɛ be de vu yɛ.
נבחרו כעת:
Yohanɛsɛ 11: tcd
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Ghana Institute of Linguistics, Literacy and Bible Translation
