Yohanɛsɛ 10
10
Ibhoshi Agbɛgbanɔ Nɛ Yɛ Ibhoshiha
1“Itsre nɔ kɛgba nɛ sɛ, ánɔ gɛ adɛ ga kedunu flogo gɛ etsoku obhoshi buka nɛ mɛ, pɔ ewu buka aga kidzo bhlatɔ etsoku, enu ezi nɛ edzobhui. 2Anɔ nɛ gɛ aga kedunu yɛ nu ibhoshi nɛ agbɛgbanɛ. 3Epupo nɛ adanɛ buka nɛ akɔ lɛ, klɛ ibhoshi nɛ nu yɛ olimɛ. Eklu yɛ nahwɛ ibhoshi nɛ kinyi gɛ akɔɛ lɛ klɛ agbanɛ lɛ koeyi. 4Kibelɛlɛ gɛ agbanɔ yɛ nahwɛ yɛ petee koeyi, eputɔ kɔɛ lɛ klɛ yɛ ibhoshi nɛ lɛ yɛede alasɛ lɛ nyi yɛ olimɛ. 5Pɔ ibhoshi lɛ tɛ ba tɔnɔ efu, kɛgbɛagba, lɛ ba butsrɛ mɛ alɔ yɛ, alasɛ lɛ tɛ nyi efu nɛ olimɛ.” 6Yesu akpɛ kɛkpalɛ nɛ akɔ alɛ, pɔ be dinu kibui nɛ gɛ etsre alɛ nɛesi.
7Kɛlɛso Yesu aza ɖɔ sɛ, “Itsre nɔ kɛgba sɛ, mɛ nu kedunu kɔ ibhoshi. 8Banɔ petee gɛ beputɔ kɔ mɛ benu bezi nɛ bevuyɛ, pɔ ibhoshi nɛ dɛ nu balɛ ilimɛ. 9Mɛ nu kedunu, ánɔ gɛ aga mɛabha etsoku ba ba yɛkɛ kɔ yɛ. Ebe tsoku klɛ ebe koeyi klɛ atɛpɛɛ kɛdɔ ŋɛŋa. 10Ezi aba ko sɛ tɛ ebe zuru klɛ tɛ eyi anɔ nɛ tɛ ezidɔ. Ɛba sɛ tɛ banɔ ba mɔ ɛkpã, klɛ tɛ bayɛkɛ lɛ tɛ lɛ na.
11Mɛ nu ibhoshi agbɛgbanɔ dzyɔgo. Agbɛgbanɔ dzyɔgo ayɛkɔ yɛ kpã akɔ ibhoshi. 12Anɔ nɛ gɛ ba yɛkɔ sɛ agbanɔ ibhoshi ganɛ yɛ enu ibhoshi nɛ elete. So kibe lɛ gɛ amɔ ayakpamɛ kakudzɔgɛ nɛ gɛ kaa ba, áshɛ̃nahwɛ ibhoshi nɛ shu klɛ eesi ashɛ̃. Ɔkɛlɛ ayakpamɛ kakudzɔgɛ nɛ kee ku ibhoshiha nɛ mɛ klɛ kaa pɔɛ lɛ ehle. 13Anɔ ebe bu tɛtsrɛmɛ ashɛ̃ alasɛ ba yɛ kɔ yɛ asɛ tɛ edi lɛabha klɛ adɛ yɛkɔ kibuinyɛbui nɛ ibhoshi nɛ mɛ.
14“Mɛ nu ibhoshi agbɛgbanɔ dzyɔgo, inyi mɛ ibhoshi klɛ mɛ ibhoshi nɛ nyi mɛ— 15anasɛ gɛ Aka nɛ nyi mɛ klɛ inyi Aka—klɛ ɛyɛkɔ mɛ kpã kɔ ibhoshi. 16Ibhoshi bhlatɔ lɛ mɛ ahwɛ gɛ lɛ ma ibhoshi buka nɛ mɛ. Ɛba tɛ gbanɛ lɛ tsyɛ mɛna. Ɛlɛ tsyɛ ba nu mɛ olimɛ, klɛ ibhoshiha tirikpo nɛ agbɛgbanɔ Terikpo. 17Kibui nɔ nɛ so gɛ ma Aka adɛmɛ mɛ bui kɛlɛ nu sɛ ɛshɛnahwɛ mɛ kpã shu—tɛ ɛtsodzi ɛlɛ ayɛkɔ ko. 18Anɔnyanɔ adɛ yɛkɛ ɛkpã nɛ mahwɛ, pɔ mɛ nahwɛ mɛ dɛmɛ ashɛ̃nahwɛ lɛ shu. Kabhaŋɛŋa lɛ mahwɛ sɛ tɛ ɛshɛnahwɛ ɛlɛ shu klɛ kabhaŋɛŋa lɛ sɛ tɛ ɛtsodzi yɛ kɔɛ lɛ. Ɔshãa nɛ mɛ yɛkɛ denɔ mɛ Aka nɔ kɔ.”
19Nɛ ebuia nɛ so Yuɖanɛ nɛ za yɛ́ aglɔ mɛ. 20Be gelee aɖɔ sɛ, “Ɔfufɔɛzizi lɔlɛ yɛ ahwɛ klɛ lɔ kpɛ yɛ kegugu. Kideso gɛ nɔ tatɔ nɛ yɛ?”
21Pɔ babhlatɔ asɛ, “Kaɖɔa nɛ ke di nu anɔ nɛ gɛ ɔfufɔɛzizi lo tsri yɛabha nɛa yɛ. Ɔfufɔɛzizi lɔ bɔ na awɔ̃hũ danɛ kɔ anhũpu?”
Yuɖanɛ Tɛ Mayɛkɛŋa
22Ɔkɛlɛ Tɛbubukasɛ kiwui nɛ ba nɛ Yerusalɛm. Kibe lɛlɛ nɛ dzi bublɔɛ bɛ, 23klɛ Yesu anyɔ kpayavu nɛ be, nɛ Solomon Kagba nɛesi. 24Yuɖanɛ ba za kana yɛ, klɛ ba ɖɔ sɛ, “Kɛlɛ dze ɔpɛɛ sɛ tɛ lɛ dze flogo tɛ obu lɔ nɛ sasuma nɛ mɛ? Onugɛ wɔ nu Kristo tsre lɔ wee.”
25Yesu ebushunu sɛ, “Ɛtɛ tsre nɔ, pɔ nɔ dɛ yɛkɛŋa. Ebuiyinanɔ gɛ ɛbhɛtɛ nɛ mɛ Aka nɛ nyi mɛ kɛ ɖɔaɖɔ kɔ mɛ, 26pɔ nɔ dɛ yɛkɛŋa alasɛ nɔ dɛ nu mɛ ibhoshi. 27Mɛ ibhoshi nɛ nu mɛ olimɛ, ɛnyi lɛ klɛ lɛ za mɛede. 28Ɛkɔ alɛ ɛkpã mabeke mabeke, klɛ lɛtɛ ba tsi, anɔnyanɔ atɛ ba bhɛ lɛ nɛ mɛ ahwɛ. 29Mɛ Aka, gɛ akɔ mɛ alɛ, etri adɛ alɛ petee klɛ anɔnyanɔ atɛ ba bhɛ alɛ nɛ ma Aka nɛ ahwɛ. 30Mɛ nɛ Aka bunu anɔ terikpo.”
31Yuɖanɛ ba za yɛkɔ aklãgbu sɛ tɛ bata hu yɛ, 32pɔ Yesu etsre alɛ sɛ, “Ɛbhɛtɛ ebuiyinɔanɔ gelee kasɛ nɔ denɔ Aka nɔ kɔ. Kiɖueɖu shu so gɛ nɔ hu mɛ aklãgbu?”
33Yuɖanɛ ba ɖɔ sɛ, “Bu tɛ hu wɔ aklãgbu nɛ ebuanɛ shu,” “pɔ wɔ ebuisobui so alasɛ anɔ ko wɔ nu, ɔbhɛtɛ ishu anasɛ Kpaya.”
34Yesu ebushunu asɛ, “Ba dɛ ŋlɔmɛ akpɛ wunɔ Ɛshã nɛ mɛ sɛ, ‘Mɛ ɖɔ sɛ bakpaya no nu’? 35Onugɛ Kpaya eklu alɛ sɛ ‘bakpaya,’ gɛ Kpayɛbui nɛ ba kɔ—klɛ ba tɛ ba tsyina Kpayɛbui nɛ gɛ ba ŋlɔmɛ elu— 36kide nɔ ɖɔ denɔ agɛ Aka ebu lɛ ɔtɔ anasɛ yɛnahwɛ ayɛ klɛ akpɛ yɛ nɛ kanɔ nɛ mɛ? Kɛdɛso gɛ ɔtsɔlɛ nɔ butɔ mɛ sɛ ɛɖɔ ebuisobui alasɛ ɛɖɔ sɛ, Kpaya yɛ Yi mɛ nu? 37Nɔ tɛ yɛkɛ mɛabhaŋa ɔdɔtɔnɔ sɛ ɛbhɛtɛ ebui gɛ mɛ Aka sɛ ɛbhɛtɛ. 38Pɔ onugɛ ɛbhɛtɛ lɛ, tsyɛ kɛlɛmɛ nɔ dɛ yɛkɛ mɛabhaŋa, nɔ yɛkɛ ebuiyinɔanɔ nɛabhaŋa, sɛ tɛ nɔ bɔ ti tɛ nɔ nu kilɛesi sɛ Aka na lɛ mɛ mɛ klɛ mɛ lɛ Aka nɛ mɛ.” 39Ba za pɛɛ sɛ tɛ be vu yɛ, pɔ ekoeyi nɛ balɛ ahwɛ.
40Kɛlɛ Yesu etsodzi avɛ kede ada tsyɔkɛ Yɔdan ɔkɛlɛ gɛ Yohanɛsɛ azà pɛ akpɛ buni kɛvuvɔ be. Ɔkɛlɛ nɛ aza, 41klɛ banɔ gelee ba ba yɛ ɔkɔ. Baɖɔ sɛ, “Kɛlɛlɛmɛ sɛ Yohanɛsɛ adɛ bhɛtɛ kɛdɔmumɔ gɛ yinɔanɔ, ebui nɛ petee gɛ Yohanɛsɛ aɖɔ denɔ anyɛ shu le nu kɛgbɛagba.” 42Klɛ nɛ ɔkɛlɛ banɔ gelee ba yɛkɛ Yesu abhaŋa.
נבחרו כעת:
Yohanɛsɛ 10: tcd
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© Ghana Institute of Linguistics, Literacy and Bible Translation
