Lucas 6
6
Jesús y'ixpëjkpëttëjjk tsapmoojk tkojjkjuut'të poo'kxë'nxëëw'it
1Tu'kpoo'kxë'nxëëw'it, jäm y'ijjty Jesús ttayo'oyë tsapmoojk. Jäts y'ixpëjkpëttëjjk tkojjkjuut'axajjtë tsapmoojk nits kyë'jë'm twinxatstë jäts tjëë'kxtë tsapmokpajjk. 2Jäts ni'ey fariseostëjjk tyëktëëtë Jesús:
—¿Tikëjx miits xtuntë mati' kappaajt'ajjtë'p ntuu'në'n poo'kxë'nxëëw'it?
3Jäts Jesús y'atsoojjëtë:
—¿Kä'ämts miits nöky xwin'ijxy ntsoj David y'atëëjtsy tu'kyaajjë ku yuuj pyaajtëtë mëët myuku'uktëjjk? 4Ku tsaptijkypy tyëjjk'eetyë nits tsapkääky tkoony mati' y'ijjty tëj Yës Teety yyëktawintsë'ëkë, jäts myuku'uktëjjk ttamëëtkaay, mnijaa'w'eetyë'p miits yëkxon ku jä' tsapkääky teety jä' jä'yë tkaytyë'p kä'ä opyënë jaa'y tkay.
5Nits Jesús wyan'atëëjtsy:
—Jäj yaa'ytyëjjk y'uu'nk mëjk'ajjt tjakyepy jäts tniwintsënë't poo'kxë'nxëëw'it.
Jesús tyëktso'oky tu'uk pa'amjaa'y poo'kxë'nxëëw'it
6Ku jatu'uk poo'kxë'nxëëw tpaajty, nits Jesús tyëjjk'ëëy maj y'ijjty Judiostëjjk yo'ymyuktë nits jaa'y tyëk'ixpëjk'axajjy. Jäjp y'ijjty tu'uk yaa'ytyëjjk mati' y'akaa'nykyë' tëj xyujxnë; 7jäts pawaa'n yëk'ixpëjkpëttëjjk mëët fariseostëjjk jä'jä' y'ijjty jyup'ijxtë'p pën yëktsökypy Jesús jä' pa'amjaa'y poo'kxë'nxëëw'it, najjts ayuujk tpaat'të't ntsoj y'ijxë tniwampät'të't. 8Jäts Jesús nyijaa'w'eepy jä' y'ijjty ntsoj jä' wyinmaytyë, nits tnëëjmjaay jä' pa'am jaa'y:
—Tenkyukkë, jäts tänë itkujjky.
Nits jä' pa'amjaa'y tyenkyuk'ajjty, 9jäts Jesús tnëëjmjaay nitukkë'yë jaa'y nii'xyë'n jäjp y'ijjty tëj yo'ymyuktë:
—Yë' ëjts miits nyëktëwämpy: ¿Ntsoj y'ijxë nyikuttuk'ätyë tij jyeexyë ntuu'nyë'm poo'kxë'nxëëw'it: mati' oy ok mati' ka'oy? ¿Nyëknitsoojkë'm tu'uk jüky'ajjt ok nyëkkutakkoo'yë'm?
10Nits tu'uk jatu'uk jaa'y twin'ijxy mati' jäjp ijt'të, jäts tnëëjmjaay jä' pa'amjaa'y:
—Xajjtëw.
Kuts jä' pa'amjaa'y xyajtëëy, nits kyë' y'oy'ajjty. 11Jä'äts mëjk y'ampëjktë jaa'y mati' jäjp ijt'të nits tkajpx'oyë'y'axajjtë ntsoj ttu'ntë't Jesús ku najj y'atë'ëtsy.
Jesús twin'ijxy twinway nimajkmätsjk y'ixpëjkpëttëjjk
12Nit'ämpy, Jesús nyijkxy kojpkëjxm nuu'kxtakpë, jäjpts tu'ktsunäxy Yës Teety tmunuu'kxtaajky. 13Kuts it xyëëjntyaajky, nits tyaajxjaay nitukkë'yë y'ixpëjkpëttëjjk, jäts twin'ijxy twinwaay nimajkmäjtsk, mati' kyuxëëw'ajjt apóstoles. 14Jäts ojts twinway: Simón mati' kyuxëëw'ëëy Pedro mëët Andrés Simón y'ütsy; Santiago, Juan, Felipe, Bartolomé, 15Mateo, Tomás, Santiago Alfeo myajjnk; Simón mati' y'ijjty yëkkuxëëw'eepy celote, 16Judas Santiago myajjnk, jäts mëët Judas Iscariote, mati' ojts Jesús tkë'yäky.
Jesús tyëk'ixpeky nimaynyäxy jaa'y
17Nits Jesús jyuptaknë jäm kojpkëjxm mëët nitukkë'yë jaa'y mati' y'ijjty jäm myëët, kuts kyitaktë joykyëjjxy. Jämts y'ijjty nimay pyattuu'yo'ypyëttëjjk mëët jaa'y mati' tsoo'ntë'p Judea'y'itjotm, Jerusalén'y'itjotm jäts mati' tsoo'ntë'p Tiro jäts Sidón y'itjotm. 18Tëj y'ijjty yo'ymyuktë jäm jäts tmatoojjëtë't Jesús y'ixpëjjkë'n nits mëët yëktso'okëtë't. Jäts pënjäty yyëk'ayoojjëtë'p mëjjku'ujy tyumpë, mëët jä' y'ijjty tsyo'oktë. 19Jakëjxts nitukkë'yë jaa'y y'ijjty ttsoktë ttaxajjpätwa'antë Jesús, jä'ku nyijaa'w'eetyë'p jäts ku ttaxajjpät'të't pitsë'mp jä' myëjk'ajjt nyikkëjxm nits yëktso'okëtë't.
Mati' Yës Teety myëjj'ijxypy
20Nits Jesús twin'ijxy y'ixpëjkpëttëjjk tu'uk janitu'uk jäts tnëëjmjaay:
«Xëmëkkëjxm miits mxonta'aktë't ayoopëttëjjk, jä'ku miits yë' mjä'ä Yës Teety kyuttujktaajk.
21»Mëjj xontaajk miits mjup'ijxypy ku ixyam ayuuj axëëw mjükyëtë, mpaat'të'p miits jä' may kääky tojkx.
»Jotkujjknäxy xëmëkkëjxm miits ku ixyam mjë'ëytyë mya'axtë, miits nijkxy jekynyë'm mxi'iktë mxonta'aktë.
22»Jotkujjknäxy xëmëkkëjxm miits ku jaa'y mmu'ampëkkëtë't, ka'ijxyë'm mjaa'w'attëtë't, mka'oymyukkäjpxëtë't, jäts ku jaa'y mkamëjj'ijxëtë't, jakëjx ku Yës Teety y'uu'nk xtëyjyawëtë. 23Jotkujkta'aktë, xonta'aktë jä' xëëw, jä'ku miits jä' myëkmo'otë'p mati' jäjp Yës Teety y'awaa'n'eepy tsapjötypy; jä'ku ninyajj yë' jaa'y y'ap y'ok ojts tyëk'ayowtë yëk'ayuujknajxpëttëjjk.
24»¡Ayoopë miits kumeenyjyaa'ytyë, tëj na'it nii'xyë'n mxonta'aktë!
25»¡Ayoopë miits ku ixyam yuuj xka'ijxëtë, miits yuuj m'ooktë'p!
»¡Ayoopë miits pënjäty ixyam xiktë'p xontaktë'p, miits wyä'në mjëytyë'p myaxtë'p!
26»¡Ayoopë miits ku nitukkë'yë jaay mkäjxta'akëtë't, najj jä y'ijjty yë' jaa'y y'ap y'ok tkäjxta'aktë mati' nityijyë yëk'ayuujknajxtë'p!
Tsoktë pën mutsip'ajjtëtë'p
27»Miits ëjts ixyam nnëëjmjääpy amatoowëttëjjk: Tsoktë pënjäty mmutsip'ajjtëtë'p, tuujnëtë may'ajjt pën mmu'ampëjjkëtë'p, 28kunuu'kxtë pën mka'oytyijjëtë'p, kunuu'kxta'aktë pën mka'oymyukkajpxëtë'p. 29Ku pën kutso'oy mtunë't jaa'y'akujjky, katij xmuwimpit'te wä'n kutso'oy mtünyë pën winaakyaajjë tsöky; ku pën mpëjjkxë't mtsamaan, mo'o mëët mtsamaanpa'tk. 30Pëntij jaa'y m'amatoojjë'p, mmo'ojä', ku pën tij mpëjjkxë't mati' mijts mjä'eepy, katij xtappayo'oy. 31Tuujnëtë najj mmuku'uktëjjk naa'xk miits xtsoktë myëkmuttu'ntë't.
32»Ku miits jä'yë xtsoktë pënjäty mtsojjkëtë'p, ¿tits miits jawäänë oy mtuntë'p? Ninyajj pökytyumpëttëjjk jyaa'yëtë. 33Pën miits may'ajjt mtuujnjääpy jä'yë pën may'ajjt mtuu'nxëtë'p, ¿maj miits mtikkätsy? Ninyajj pökytyumpëjaa'y y'atë'ëtstë. 34Pën miits m'anüü'kxymyoypy jä'yë pën m'a'ijx'eetyë'p tyëkwimpitp, ¿mats miits mtikkätsy? Ninyajj pökytyumpëjaa'y tnatya'anüükyxyëtë tu'uk janitu'uk, nits t'a'ijxtë nyamyukopättëtë't. 35Jäts miits, mtsojktë'p jä' jyeexyë pën mmutsip'ajjtëtë'p, tuujnëtë may'ajjt, anüü'kxymyo'otë jäts kä'ä x'a'ijxtë't junë tyëkwimpitt. Najjts miits Yës Teety tsapjotm m'uu'nk'attëtë't jäts mjuu'ny mmo'ojëtë't, jä'ku najj jä' tpa'ayoy pën kawintsë'ëjk'ajjtë'p mëët ka'oyjyaa'ytyëjjk. 36Yëkyo'oytyë miits pa'ayoo'n, naa'xk mteety'ajjt pa'ayoo'n tyëkyo'oy.
Katij mmuku'uktëjjk xtëytyuntë
37»Katij mmuku'uk xtëytyuntë, jäts kä'ä Yës Teety mtëytyunëtë't. Katij mmuku'uk x'ayoo'nmo'otë, jäts kä'ä Yës Teety m'ayoo'nmo'ojëtë't. Mmää'kxtuktë, najjts Yës Teety mmää'kxtukkëtë't. 38Mmo'otë mmuku'uk tij ka'ijjtxëtë'p, najjts Yës Teety mmo'ojëtë't tij miits mka'ijjtxëtë'p. Mo'jëtë'p jä' pu'uky kä'pxy, xijttse'kxy jäts ujjts kujxtaajn. Naa'xk miits mmuku'uktëjjk xkijpxëtë, ninyajj Yës Teety myëkwimpijjtxëtë't.»
39Nits Jesús tu'uk ijxpäjjt tmatyaajky: «¿Tu'uk jaa'y mati' ka'ok'ijxnë'p, tyuu'wawë'p jä' yi'it myuku'uk mati' ninyajj? ¿Kä'ä jä' kyuyo'ynyaxtë't jutjötypy? 40Nippën tu'uk ixpëjkpë tkawinäxy pën yyëk'ixpëjjkë'p: ku jä' y'ixpëjjkë'n tyëk'apaatë't ninyajj jä' tya'nt naa'xkë'n yëk'ixpëjkpë.
41»¿Tikku mijts x'aa'xtüky ku mmuku'uk wäänë tyuntakkoy, jäts kä'ä x'ijxy ku jawäänë mëjj mtakkoo'ny? 42Pënkä' kë'm mtakkoo'ny x'ijxpaaty, ¿ntsoj mwinmay ku mmuku'uk tyakkoo'ny xtamuya'axy? ¡Katij kë'm mnawyin'ëënyë!, Na'y'ijxë jawyiin kë'm pën kä'ä mtakkoo'ny y'ok'ijtnë, nits mayë't jäts mmuku'uk xtëytyu'nt.
Tyëëmkëjxm tëëm'eewyë kepy yëk'ijxë
43»Kä'ä tyi'ity oy kepy mati' ka'oy tëëm'eepy, jäts kä'ä tyi'ity ka'oy kepy mati' oy tëëm'eepy. 44Tyëëmkëjxm tu'uk jatu'uk kepy yëk'ijxë: Kä'ä junë tsawäjkx yëktüky yo'tspëkkëjxm, nikkä' mëët uvë'tsa'am yëkpiy kujpkëjxm. 45Jaa'y mati' oyjyaa'y oy jä' xyi'iky kyäjpxy jä'ku y'oywyë jäm y'am jyotm, jäts jaa'y mati' ka'oyjyaa'y ka'oy jä' xyi'iky kyäjpxy jä'ku kya'oywyë jäm y'am jyotm. Jä'ku jä' mati' jäm jaa'y y'am jyotm jä'äts jä' xyikypy kyäjpxypy.
Nimäjtsk tëjkojjpë
46»¿Tikku ëjts miits xnëëjmë, "Wintsën, Wintsën", jäts kä'ä najj xtuntë naa'xk ëjts nwa'any? 47Wä'n ëjts tnikkäjpxy tu'kpënë'n wyimpitsemy jaa'y mati' ëjts xnimimp jäts tmatoy tij ëjts nkäjpxypy jäts najj tkuytyüny: 48Najj jä' wyimpitsemy naa'xkë'n tu'uk jaa'y mati' y'ijjty tyëjjk tyëk'oyëwyamp, jawyiin këëjk tnittaj'ëëy, kunë'm tpaajty mëjknaajx jäjpts tsappötsy tyëkpattëjjk'ëëy. Kuts mëjjnëkkom nyimiijnë, kä'ä jä' tëjjk ntsoj jyajjty, jä'ku mëjknaxkejxypy jä' y'ijjty nyittaj'ätyë. 49Jäts jaa'y pën ëjts xmatoop jäts kä'ä tkuytyüny naa'xk ëjts nwa'any, najj jä' wyimpitsemy naa'xk tu'uk jaa'y mati' tyëjjk tyëk'oy'ajjt jääyë naxwinkëjjxy nikkä' tnittaj'ajjty; kuts mëjjnëkkom nyimiijnë jätyë'ts jä' tëjjk kyitaakëjjxy.»
נבחרו כעת:
Lucas 6: LUKMya
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
