मत्ती 8
8
यीशु कोढ लागेल माणहाह हुदारने
(मरकुस 1:40-45; 5:12-16)
1जेवी यीशु बोयड़ा पोर रेन बुंदे उतरनो, एने माणहान मोटली गेरदी तान पासाण चाल देनी। 2#8:2 ओहलो मानतेह काय ज्यी बेमारी माणहाह देरमान नेम उगे मोजबुत किरेह एने ता एक कोढ लागेल माणुह बी ता एतो, तो तान आहने तान ओंगाण पाया पोड़ीन केयो, “एय मालीक, केदी तारी मोरजी एय, ते तु माहु हुदार सिकेह।”
3तेवी यीशु आथ ओंगाण केरीन ताह सापलीन केयो, “मारी मोरजी हे, तु हुदेर जाय।” एने चालोच तो हुदेर गीयो। 4तेवी यीशु ताह केयो, “होमेल ज्य कुणीह मा किहे; पुण तु जाईन चाकऱ्याह देखाड़जे एने जो चेड़ावो मुसा ठेरायेल हे, ताह बेट चेड़ाव काय ता पोर माणहान केरता पुरावो एय।”
एक रोमन आदिकारीन बुरहो
(लुका 7:1-10)
5जेवी यीशु कफरनहूम हेयरा माय आवो, ते एक रोमन आदिकारी ता फाय आवीन मोदेकीन केरता विन्ती किऱ्यो, 6एने केयो, “एय मालीक मारा एक पावराह लोखवो लाग जायेल हे एने ताह जुलूम तेकलीत ईथे।”
7तेवी यीशु ताह केयो, “मी आवीन ताह हुदारूह।”
8आदिकारी ताह जापाप आप्यो, “एय मालीक मी ज्यान लायेक नाह सुतो काय तु मार गेरा माय आवी, केरीन निस्तो एक उकुम आप दे, ते मारो पावोर हुदेर जाय। 9काहाकाय मी बी एक ओहलो माणुह हे एने सिपाय मार आथा माय हेते। एने जेवी मी एकाह केथु, ‘जा,’ ते तो जाणे; एने दिहराह ‘आव,’ ते तो आवणे; एने मी मार पावराह केणे काय ज्य केर, ते तो ताह केरने।”
10ज्य होमलीन यीशु बोंगलाय गीयो, एने तान पासाण आवणारे जा माणहे एता ताह केयो, “मी तुमूह खेरीच केथु, मी ओलो पाको बुरहो इस्राएल माय बी कुणीस माय नाह दिख्यो। 11#लुका 13:29एने मी तुमूह केथु काय जुलूम माणहे पुर्व एने पश्चिम रेन आवीन अब्राहाम, इसहाक, एने याकुब हेऱ्या हेरगान राज ने खाणा माय बोहती। 12#मत्ती 22:13; 25:30; लुका 13:28पुण राज ने सोरा बाहेर आंदारा माय टाकाय जाती, ताहरी रेड़णो एने दात केकड़ावणो रेय।” 13तेवी यीशु आदिकारीह केयो, “गेर जा, जोहलो तार बुरहो हे तोहलोस तार केरता एय।” एने तान पावोर तुलेचबूखे हुदेर गीयो।
यीशु मोकतास दुखाऱ्याह हुदारने
(मरकुस 1:29-34; लुका 4:38-41)
14यीशु जेवी पतरसान गेर पोचनो, ते तो पतरसान हाहवोकीह हेरी माय दुखारी खाटला पोर लोट रियेल दिख्यो। 15एने यीशु तीन आथाह सापल्यो; एने तीन हेरी उतरी गियी, एने ती उठीन तान सेवा चाकरी केरने बाज गियी।
16एने हाजीन वेला मोकतास माणहे यीशु फाय जुलूम होवटा माणहाह लावा। जा माय खाराब जीवे एता, तो ता खाराब जीवाह तान बोल केरीन निकाल दिनो, एने आखा दुखाऱ्याह हुदार दिनो। 17काहाकाय जो वचन यशाया जाणकारान द्वारे कियेल एतो तो पुरो एय: यीशु सोता आपणी कोमजोरीह लेय लिदो, एने आपणी बेमारीह विस लिदो।#यशाया 53:4
यीशुन चेला बोणनेन किमोत
(लुका 9:57-62)
18यीशु जेवी तान कावदेन माणहान एक मोटली गेरदी दिख्यो, ते तो तान चेलाह देरीयान ती मीरे जाणेन उकुम आप्यो। 19तेवी एक देरेमगुरू आहने आवीन ताह केयो, “एय मास्तेर, जा बी तु जाहे, मी तार पासाण चाल देह।”
20यीशु ताह जापाप आप्यो, “कोल्यान देर, एने वादलान चीड़ान पांजरा रेतेह, पुण माणहान बेटाख फाय मुंड लीकाड़ ने बी जागो नाह सोतो।”
21एक उंजु दिहरो चेलो ताह केयो, “एय मालीक, पेल माहु जाणे दे, काय मी मार आबाख बुज देव।”
22यीशु ताह केयो, “तु मार पासाण चाल दे, मोरेलाह तान मुरदाह बुजणे दे।”
यीशु तुफानाह ठावको केरने
(मरकुस 4:35-41; लुका 8:22-25)
23जेवी यीशु डोंडह्या पोर चेड़नो, ते तान चेला बी तान पासाण चेड़ना। 24एने उचकाहुच देरीया माय ओहलो मोठो तुफान आवो काय डोंडह्यो लाटा माय बुजाणे बाज गीयो, पुण यीशु हुवणे बाजरियेल ईतो। 25तेवी चेला आहने आवीन ताह जागाड्या। एने केया, “एय मालीक, आमुह वोचाड़, आपु खेतेम एणे बाजरेनाह!”
26तेवी यीशु ताह केयो, “एय अविश्वासी काहा बितेह?” एने तो उठीन वादोण एने पाण्याह दोपकाड्यो, एने आखो ठावको एय गीयो।
27एने चेला बोंगलायीन केणे बाज गीया, “ज्यो कोहलो माणुह हे? वादोण एने पाणी बी ज्यान उकुम मान्तेह।”
यीशु दुय खाराब जीव लागेल माणहाह हुदारने
(मरकुस 5:1-20; लुका 8:26-39)
28जेवी यीशु ती मीरे गदरेनियोन देसा माय पोचनो, ते ताह माहणा माय रेन जाणे बाजरियेल ईतो तेवी दुय माणहे मिलना, जा माय खाराब जीव एता, ता दुयू ओला बियावी ओहला एता, काय कुण बी ती वाटे रेन जाय नाह सेकतालो। 29ता आयड़ीन केणे बाज गीया, “एय बोगवानान बेटाख, आमरो तुवा हेऱ्यो काय काम? काय तु टेमीह रेन पेल आमुह दुख देणेन न्या आयेल हे?”
30ताह रेन जारीक सेटोह जुलूम होवटा हुवऱ्यान एक टुलो चेरने बाजरियेल ईतो। 31ता खाराब जीव ताह विन्ती केरीन केया, “केदी तु आमुह बाहेर निकालेह, ते पोला हुवऱ्यान टोला माय मोकेल दे।”
32यीशु ताह केयो, “जावो,” तेवी ता ता माणहा माय रेन निकलीन ता हुवऱ्या माय रिग गीया। ओलो आखो हुवऱ्यान टुलो आड़वाया माय रेन उतरीन देरीया माय जाय पोड़नो, एने बुड़ीन मोर गीया।
33ज्य देखीन हुवऱ्यान गोवाले नाठा, एने हेयराम जाईन ज्यु आख्यु वातु एने जा माय खाराब जीव एता, तान बाराम आखो काय केय होमलाया। 34तेवी आखा हेयरान सोब माणहे यीशुह मिलनेन केरता आवा; एने ताह देखीन विन्ती केऱ्या काय तो तान ईलाका माय रेन दिहरी जागे जात रेय।
נבחרו כעת:
मत्ती 8: NTNii2020
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
