Mateo 3
3
Yohana msingula wanhu kalawilila
1Milongo hiyo kenukila Yohana Msingula wanhu, yolonga mbuli ya Mulungu muluwala lwa Uyuda, 2yolonga, “Galukeni, lekeni gehile, kilumbo Undewa wa Mulungu ukwenhuka!” 3Yohana iyo yuyo yalongigwe na Mtula-Ndagu Yesaya yolonga:
“Dizwi ja munhu yotowa nyangi kuluwala,
Isanghaneni goya nzila ya Bwana,
ugoloseni ubito wake!”
4Aheyo Yohana kakala na guwo jake ja usinga wa ngamiya, na lukumbulu lwa kwembe mkigudi chake; mandiya gake gakala mbalangulu na uki wa muhulo. 5Baho wamgendela wanhu wa Yerusalemu na Uyuda wose na ziisi zose zili mmambwegambwega mwa Yordani. 6Na heyo kawagela mazi muiti muna ulwanda lwa Yordani, kuno wopeta matozo gawo.
7Avija viyawawene bwando wolawa mwa Mafariseo na Masadukeo womwizila yawasingule, kawalongela, “Mweye mlelo wa nyoka! Yuyo yalihi yamulongeleni mweye kwinega Lusango londalwize? 8Leleni mujo wa mgaluko unogile goya! 9Kabili sikumgelegeze mmiyoyo mmwenu kamba tunayo Tata yuyo Abrahamu, bali heyo nomulongelani kamba Mulungu kodaha mumo muna gamabwe gano kumulavila Abrahamu vinghele. 10Kabili nhemo imala kwikigwa hana imisina ya imibiki; vivo kamba biki hadilelile mujo unogile, wokanhwa umala wokwasigwa hamoto. 11Niye nomgelani mazi giladi mgaluke, bali Heyo ayo yokwiza kukisogo changu, kana mhiko kumbanza niye, kabili niye sidaha kumbokela vilatu vyake; heyo komogezani na Loho Yangʼalile hamonga na moto. 12Lungo lwake lwa mumkono wake; kolufagila goya lubuga lwake na kulundiza muhunga wake kukano, aija mikupi koigela hamoto haufaga.”
Yesu viyabatizwe
13Mazuwa higo Yesu keza yolawa Galilea, kavika Yordani kuyali Yohana, giladi na heyo yasingulwe. 14Komu Yohana kalonda kumgomesa yolonga, “Niye nolonda kugeligwa mazi na gweye, agweye kokwiza kumwangu?” 15Yesu kedika kamulongela, “Vumila vino sambi, kilumbo vivo vitwandakana kuivikiza Inzuma yose.” Baho kamvumila.
16Na heyo Yesu viyamalile kubatizwa, mhunde kenuka yolawa mmazi; lola ulanga ugubuka, kamona Loho wa Mulungu yohumuluka yagambile huwa, keza mditwi jake. 17Dizwi dilawa kuulanga dilonga, “Yuno Nyadimwe mzuwanda wangu inogelwe nayo.”
New Testament in Zaramo © United Bible Societies, 1975.
