Genesis 11
11
Akngeyel angka ingwerek-ingwer ilpertileyel
1Awank-akerr, ahern-areny-rnem angka anyentelant angkerrenh. 2Ikwer-theyan ingwer-rnem apmer Babylon akngerrakw-ampeny-warl alpek. Rernem ingkerrenh alperlewek akngerrakw, peleyn ilkwewarl, apmer Shinar-arrangarr-warl. Apmer-anem rernem arrernek. 3-4Rernem angkerrenh, “Tern ilkwa mpwaretyek, warl arrpanenh, warl arlpenty-then anwantherr mpwarey alker-warl-athek, alkerek-atwety. Apwert-weny anwantherr mpwarey bricks-elant, ankerelant anyentelhilem anterrkwetyek bricks renh.
Ingkerrenhel anwenhantherr iterl-aretyek apmer anyentek. Anwantherr apmer arrpanenh-warl nthakenh arlpimperrey-angenh. Anwantherr arlperrtyirreyang anetyek, apmer anyent ikwerel.”
5Akngeyel tawen renh aretyek apetyek rernemarl arnwarnenh. 6Ra ilek, “Nhernem warrkirreyel rernemarl angka anyentel angkerreyel. Rernem arlkwententyelan, ilek-ilek mpwarerl-anekerr. Rernem tnakelheyel rernemarl warl ilkwa artek-penh. 7Atha renh-rnem angka amentew-ament-anem iley, rernem awerrey-angenh-antey ingkerr anayntetyek.”
8-9Angka anyentarl angkerrenh-penh Akngeyel renh-rnem angka ilpertelhilek ingkerrenh. Angka ingwerek-ingwer-anem rernem angkerrenh. Rernem menty-anem ipmek, warrkirreyang-anem. Rernem arlperrtyirremel alpek apmer arrpanenh-warl, aney-alpek. ...
Abraham-kenh aynikw
27Nhenh angka Terah-penh-anem. Terah Abram Nahor-rnem aynikw-rnem anenh. Haran-kenh-rnemek aynikw anek. Haran ra Lot-kenh aynikw anenh. 28Haran Ur tawen-itwek atnyenek Chaldea-areny-rnem-kenh apmer-itwek. Ra apmer ikwerel-antey ilwek, aynikw ikwerenh Terah iteth anenhel-antey. 29-30Abram-el Sarai anew inek ikwer, Nahor-el Milcah anew ikwer inek. Milcah aytey ikwerenh Iscah anenh, Haran-kenh alerikw. Sarai ampek arrangkw anenh. 31Terah anperl-alhek Ur tawen-they, Canaan ikwer-warl anperl-alhetyek. Ra Abram alerikw ikwerenh akngek, Sarai, amikw ikwerenh, arrengikw ikwerenh, Lot ra akngek arrpemarl. Rernem Haran tawen-el-anem aney-alpek. 32Terah ra ampwirremel aherrety 205 anenh. Ikwer-penhan Haran tawen ikwerel-antey ilwek.
נבחרו כעת:
Genesis 11: aly
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2020, Wycliffe Bible Translators, Inc. All rights reserved.