Mákò 13
13
Yèésù wà fɔ̀ ní ilé-Ɔ̀ɖáyé nákó wáa fɔ́ kpó
(Màtéwò 24:1-2; Lúkà 21:5-6)
1Yèésù wà fùɖá nɔ́gbà-ilé-Ɔ̀ɖáyé†#ɛ́, tsí ɔmatsɛ́‐ɛ̀-kã̀ wà wí fúu ní: Akɔ́nɛ, kó rí gé! Òkúta yèé ŋa à ń malé#ɛ́, à kò tì tsàfɛ́ŋú bɔ̀! Tsí ilé ŋa#á gbo lákṹ tó bɛ́ɛ̀!
2Tsí Yèésù wà wí fúu ní: Ilé lákṹ yèé ó wà rí nyɛ̀ŋɛ̀ ŋa#á, à nákó wáa fɔ́ ŋa kpó títí kàkó bɔ élè-kã̀ gìɖì bí ró.
Yèésù wà fɔ iŋɛ́ yèé ŋa nákó wáa tse ńǹtã̀ntã́-ayé#ɛ́
(Màtéwò 24:3-14; Lúkà 21:8-19)
3Yèésù káà dzokó ńǹtá-òkè-Òlífì#13:3 Òlífì#ɛ́, èso-egi-kã̀ ni, tsí à náa ń tse àɖɛ̃́. si, tsí wà mú ilé-Ɔ̀ɖáyé wò bɛ́. Tsí Òkúta òŋu Yàkúbù má nára-Yòhánà† òŋu Ànɖérè gbo, àŋa sɔ̃́ŋú, à sɔ́ tìmá‐ɛ̀, tsí wà bèrèé ní: 4Ńǹwèrè yèésí iŋɛ́ nyɛ̀ŋɛ̀ ŋa nákó wáa tse? Tsí kí àŋa nákó rí, tsí nákó nyà ɖíre fú àŋa ní àsòkò yèé iŋɛ́ ŋa#á kó tse#ɛ́ tó? Kó fɔ̀ɔ́ fú àŋa.
5Tsí Yèésù wà wí fú ŋa ní: Ká tsɔ́ éwo-ara-ŋa rere, tsí ɔ̀nyà-kã̀ kpókpó kó máa rú ŋa. 6Ɔ̀nyà kpíkpɔ̀ nákó wáa wá, tsí ɛnɛ kṹnukṹ nákó wà fɔ̀ ní òŋu ní dzɛ́ Kírísítò Agbanɛlà yèé Ɔ̀ɖáyé bɛ̀ wá#á. Tsí à nákó rú ɔ̀nyà kpíkpɔ̀. 7Bí à wà gbɔ́ ìdzã̀mà-ogu nàmí à wà gbɔ́ ní à bàkó dzogu, odzo kó máa tse ŋá. Iŋɛ́ yèé tse#ɛ́, ó wà ní iŋɛ́ nyɛ̀ŋɛ̀ ŋa kó tse. Ó ɖi, ìtã̀ntã́-ayé#ɛ́ kò sì tó wòná. 8Ìlú ŋa nákó ǹɖe, tsí wà dzà bá ara-ŋa, tsí ìdzɔba ŋa gbo nákó ǹɖe, tsí wà dzà bá ara-ŋa. Tsí ilɛ̀ nákó wà mì, tsí ebi gbo nákó wà dzà ńǹɖì ńǹɖì ŋa. Tsí iŋɛ́ nyɛ̀ŋɛ̀ ŋa kpó wà kíbí, bí ɔnɔbɛ̃̀ɛ̃ bàkó bíma, ni inɔ́ náa tseé náàtsɛ̃̀tsɛ̃̀ tã́ná kó mú ɔma#á ɖà#á ni.
9Ó ɖi, àŋa òŋu, ká tsɔ́ éwo-ara-ŋa rere. Iŋɛ́ yèé tse#ɛ́, à nákó mú ŋa, tsí gbɛ̃́ ŋa lɔ fú àkpɛ̀dzɔ́ ŋa, tsí gbɛ̃́ ŋa lɔ ńlé-ìkpàɖé-ɔma-Ìyúɖà ŋa†, tsí tsɔ̀ ŋá nɔ́ɔ̀kpá tó bɛ́ɛ̀. À nákó mú ŋa lɔ ńɖi-kɔ̀màɖã́ã̀ ŋa òŋu ńɖi-ólú ŋa náàtsùgbé-òŋu. Ńbɛ̀ ní à nákó wà nya àyídzá-òŋu fú ɛnɛ nyɛ̀ŋɛ̀ ŋa#á. 10Ó ɖi, ó wà ní ká dzíkɔ̀-òŋu fú ìlú kpó náyé gbaŋgba#á tã́ná ìtã̀ntã́-ayé#ɛ́ kó tó. 11Tsí ńǹwèrè yèé à nákó mú ŋa lɔ, tsí ká káà kpɛdzɔ́ fú ŋa#á, ɛ̀ɖɔ̃̀-afɔ̀ yèé à nákó fɔ̀#ɛ́ kó máa ɖá ŋa tsúwádzú. Fee, náàsòkò nyɛ̀ŋɛ̀ tútútú#ɛ́, afɔ̀ yèé Ɔ̀ɖáyé nákó nyà si nárũ fú ŋa gé#ɛ́, ká fɔ̀ɔ́. Iŋɛ́ yèé tse#ɛ́, afɔ̀ ŋa#á kàkó ti ńɖi-ŋa, à nákó ti ńɖi-Mímí-Ɔ̀ɖáyé† ni.
12Ìnàbí nákó sɔ́ ìnàbí fú ikú, tsí boba gbo nákó sɔ́ ɔma fú ikú. Tsí ɔma ŋa gbo nákó nya boba-ŋà ŋa òŋu ìnà-ŋà ŋa kãdzú, tsí wà fɔ̀ ní ká kpa ŋá nóòkú. 13Ɔ̀nyà kpó nákó nyà ŋá kãdzú náàtsùgbé-òŋu. Ó ɖi, ɛnɛ yèé nákó sì gbódzú títí lɔ ńǹtã̀ntã́#á, ɛnɛ nyɛ̀ŋɛ̀ nákó rí ɔlà.
Yèésù wà fɔ̀ iŋɛ́ tsítsìíra yèé bàa ŋa#á
(Màtéwò 24:15-28; Lúkà 21:20-24)
14À nákó rí iŋɛ́ tsítsìíra yèé láre arũ fúnɛ#ɛ́, tsí nákó káà gbé ńbí kò wà ní kó gbé#ɛ́. Tsí ɛnɛ yèé wà kã ìwé yèé bɛ́#ɛ́, kó gbɔ́ òkpì‐ɛ̀ rere. Ńǹwèrè nyɛ̀ŋɛ̀#ɛ́, ɛnɛ yèé ŋa wà nérè-Yùɖéyà#á, ká sá gu òkè ŋa lɔ. 15Tsí ɛnɛ yèé wà ńkpàtá si#ɛ́, kó máa wɔ̀ lɔ ńnɔ́-ilé‐ɛ̀ ní òŋu kó káà kɛ́ iŋɛ́-kã̀. 16Tsí ɛnɛ yèé gbo wà nóko si#ɛ́, òŋu gbo kó máa bɔ̀ wá ńlé ró ní òŋu bàkó wáa kɛ́ ìwɔ̀ra-otútù-òŋu. 17Ó ɖi, nɔ́dzɔ́ nyɛ̀ŋɛ̀#ɛ́, abefũ̀ ŋa òŋu ìnà-olɔ́ma tsígíɖí ŋa, ɛ̀rá rá ŋa!
18Ńbɛ̀ɛ́, ká wà wúùre, tsí iŋɛ́ nyɛ̀ŋɛ̀ ŋa#á kó máa wá ńǹwèrè-òdzò òŋu otútù. 19Nɔ́dzɔ́-ɔdzɔ́ nyɛ̀ŋɛ̀#ɛ́, ɔ̀nyà ŋa nákó tse òfò kpíkpɔ̀. Ti títí ńǹkpìnkpìlɛ̀-ayé#ɛ́, ńǹwèrè yèé Ɔ̀ɖáyé ɖá iŋɛ́ ɔ̀kã̀lɔ́ɔ̀kã̀ kpó títí wáa fú òníbɛ́#ɛ́, à kò rí òfò-ìrɔ́ nyɛ̀ŋɛ̀ wòrí. Tsí ti nɔ́dzɔ́ nyɛ̀ŋɛ̀ gbo#ɛ́, à kàkó rí ìrɔ́-bɛ́ɛ̀ gbo láyé ró. 20Ó má dzɛ́ ní Ɔlɔ́dzɔ́ kò ɖá ìwèrè-kã̀ sì fú òfò#ɛ́ ní kó máa tse lárè bɛ́ɛ̀#ɛ́, ɔ̀nyà-kã̀ kpókpó kàá gbé náàyɛ̀. Ó ɖi, ó ɖá ìwèrè-kã̀ sì fú òfò#ɛ́, àtsùgbée ɛnɛ yèé ó tsã̀ si ŋa, tsí dzɛ́ tɛ̀ɛ̀ ŋa#á, ká máa tsɛ̀rá.
21Ńbɛ̀ɛ́, bí ɔ̀nyà-kã̀ fɔ̀ fú ŋa ní: Ká rí gé! Kírísítò Agbanɛlà wà ńbíbɛ́ nàmí bí ó fɔ̀ ní: Ká rí gé! Ó wà ńbɛ̀, ká máa gbàá gbɔ́. 22Iŋɛ́ yèé tse#ɛ́, ɔ̀nyà kã̀ŋa nákó wà wá, tsí wà tsòɖòbò ní àŋa ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á, tsí ɔ̀nyà kã̀ŋa òŋu nákó dzɛ́ atsìké-agbáfɔ̀-Ɔ̀ɖáyé fɔ̀ ŋa. Àŋa kpó, à nákó wà tse iŋɛ́-àwùsì ŋa ńǹrɔ́ǹrɔ́, tsí wà ń rú ɔ̀nyà ŋa. À má bàkó nyáa rú ɛnɛ yèé Ɔ̀ɖáyé tsã̀ si ŋa#á gbo, à má rú ŋa.
23Ńbɛ̀ɛ́, àŋa òŋu, ká tsɔ́ éwo-ara-ŋa rere. Òŋu ti fɔ iŋɛ́ ɔ̀kã̀lɔ́ɔ̀kã̀ kpó si fú ŋa tsúwádzú ná.
Yèésù ní òŋu, Ɛnɛ yèé ɔ̀nyà bí#ɛ́, òŋu nákó wá
(Màtéwò 24:29-31; Lúkà 21:25-28)
24Ó ɖi, nɔ́dzɔ́-ɔdzɔ́ nyɛ̀ŋɛ̀#ɛ́, bí ìwèrè-òfò#ɛ́ wáa lɔ tã́#á, òkùkù nákó mú odzúùrɔ̃̀ mì, tsí òtsùkpá gbo kàkó rã̀ ró. 25Tsí àrã̀wo ŋa gbo nákó tsubú ti ńǹgbèrí wá ńlɛ̀, tsí odzúùrɔ̃̀ gbo, òtsùkpá gbo, àrã̀wo ŋa gbo, àŋa kpó, à nákó mì kpó dzìgìdzìgì. 26Ńǹwèrè nyɛ̀ŋɛ̀#ɛ́, ɔ̀nyà ŋa nákó rí òŋu, Ɛnɛ yèé ɔ̀nyà bí#ɛ́†, tsí òŋu nákó tì bàa ńnɔ́-irì. Òŋu nákó wá òŋu ikpá lákṹ-kã̀ òŋu iyì lákṹ-kã̀ gbo. 27Náàsòkò nyɛ̀ŋɛ̀#ɛ́, òŋu, Ɛnɛ yèé ɔ̀nyà bí#ɛ́, òŋu nákó bɛ adzítsɛ́-ɔ̀rɔ̃† ŋa lɔ náàdzàkáyé#ɛ́ kpó, lɔ nóòtã́, nóòsì, lɔ ńwádzú, náànyì, tsí ɔ̀nyà yèé Ɔ̀ɖáyé tsã̀ si ŋa kpó#ɛ́, ká kpè ŋá kpàɖé kpó, ti títí ńǹgbèrí wáa kpa ńlɛ̀.
Yèésù ní ɛ̀kɔ́ yèé egi-òrì ŋa wà tse fú ŋa#á, kó wà yé ŋa rere
(Màtéwò 24:32-35; Lúkà 21:29-33)
28Ɛ̀kɔ́ yèé egi-òrì ŋa wà tse fú ŋa#á, kó yé ŋa rere. Bí egi-òrì ŋa kpé rúrú#ɛ́, à náa mà ní ìwèrè-òdzò ní sɔ́má#á. 29Bɛ́ɛ̀ ké ní bí iŋɛ́ nyɛ̀ŋɛ̀ ŋa wà tse, tsí à wà rí#ɛ́, àŋa gbo ká mà ní ìwèrè sɔ́má, tsí òŋu, Ɛnɛ yèé ɔ̀nyà bí#ɛ́†, òŋu kó dzoyè. Òŋu ti tó náànkpã̀nàkũ̀ ná.
30Òŋu wà wí òtítɔ́ fú ŋa ní fee, ɔma-ìsɛ̃̀ɛ̃́ ŋa kàkó kú tã́ kpó tã́ná iŋɛ́ nyɛ̀ŋɛ̀ ŋa kpó nákó tse. 31Ilɛ̀ gbo, ìgbèrí gbo, àŋa kpó, à nákó wáa nɔ̀ ǹɖe. Ó ɖi, afɔ̀ tòŋu nákó wà si títí lɔ.
Ɔ̀ɖáyé òŋu níìkã̀ntso gé ní ma ɔdzɔ́-ìtã̀ntã́-ayé#ɛ́
(Màtéwò 24:36-44; Mákò 13:32-37; Lúkà 21:34-38)
32Ó ɖi, ɔ̀nyà-kã̀ kpókpó kò ma ɔdzɔ́-wíwá-òŋu nàmí ńǹwèrè yèé òŋu nákó wá#á. Adzítsɛ́-ɔ̀rɔ̃† ŋa gìɖì gbo kò màá, tsí Ɔma bíbí-Ɔ̀ɖáyé gìɖì gbo kò màá. Ó ɖi, Ɔ̀ɖáyé Boba òŋu níìkã̀ntso gé ní màá#á. 33Ó ɖi, ká wà tsɔ́ éwo-ara-ŋa rere, tsí ká wà ɖíìdzáyè. Iŋɛ́ yèé tse#ɛ́, à kò ma ìwèrè yèésí nákó dzɛ́ ìwèrè#ɛ́.
34Kíbí olílé-kã̀ náa làkóò nɔ́ɔ̀nà, tsí náa kɔ ilé‐ɛ̀ dzɔ̀ɔ́ fú àtsìtsɛ́‐ɛ̀ ŋa, tsí náa ɖátsɛ́ fú ɛnɛ kṹnukṹ, tsí náa wí fú àɖèlé‐ɛ̀ ní kó wà nódzúfò sí#ɛ́, bɛ́ɛ̀ ké ní iŋɛ́ ŋa#á nákó wáa lɔ#ɛ́. 35Ó ɖi, ká wà nódzúfò si. Iŋɛ́ yèé tse#ɛ́, à kò ma ńǹwèrè yèésí olílé#ɛ́ nákó wá#á. Nalɛ́ niì, ńǹŋàáŋà niì, náàkìkɔ-ìɖádzá niì, náàwúrɔ̀ niì, à kò màá. 36Àkàámà, kó máa wáa kere ŋá, tsí kó dzɛ́ ní à sɔ̃rũ lɔ si. 37Iŋɛ́ yèé òŋu wà fɔ̀ fú ŋa#á, ɔ̀nyà kpó ní òŋu wà fɔ̀ɔ́ fú#ɛ́. È wà nódzúfò si!
© (Active), Wycliffe Bible Translators, Inc. All rights reserved.
