Mákò 10
10
Yèésù wà tsɛ̀kɔ́ ti nára-aya kíkɔ̀
(Màtéwò 19:1-12; Lúkà 16:18)
1Náànyì-bɛ́ɛ̀#ɛ́, Yèésù ǹɖe bɛ̀, tsí lɔ nérè-Yùɖéyà, tsí lɔ náàtàkè-oɖò-Yòɖánì gbo. Ńbɛ̀ gbo#ɛ́, ɔ̀nyà ŋa tsɛ́ kì, tsí lɔ káà sú wérí‐ɛ̀ si, tsí ó tsɛ̀kɔ́ kíbí náa ti tseé#ɛ́.
2Ńbɛ̀ɛ́, ɔma-ɛgbɛ́-Fàrísì† kã̀ŋa sɔ́ tìmá‐ɛ̀, tsí à wà wò ní àŋa kó sɔ ɔ̀kpákù fúu, tsí à wà bèrèé ní: Ɛkpa-Ɔ̀ɖáyé†#ɛ́ fee, ó fú ɔ̀nà ní ɔ̀nyà-kã̀ kó kɔ aya-ɛ̀ɛ̀?
3Tsí òŋu gbo wà bèrè ŋá ní: Ɛkpa yèésí Mɔ̀ɔ́sè† ɖá fú ŋɛ́ si ńnɔ́-ìwé‐ɛ̀?
4Tsí ɔma-ɛgbɛ́-Fàrísì ŋa fɔ̀ fúu ní: Mɔ̀ɔ́sè fɔ̀ si ní ɔnɔkɛ̃̀ɛ̃ kó tse ìwé-àyídzá-kã̀ lɔ fú ɔnɔbɛ̃̀ɛ̃ tã́ná, tsí kɔ̀ɔ́.
5Ńbɛ̀ɛ́, Yèésù wà wí fú ŋa ní: Kíbí ɛ̀ɖɔ̃̀ kã̀ ŋá tó gbà#á ní tse tsí Mɔ̀ɔ́sè ɖá ɛkpa nyɛ̀ŋɛ̀ fú ŋa#á. 6Ó ɖi, Ìwé-Ɔ̀ɖáyé† fɔ̀ ní: “Ńǹkpìnkpìlɛ̀-ayé#ɛ́, Ɔ̀ɖáyé ɖá ɔnɔkɛ̃̀ɛ̃ òŋu ɔnɔbɛ̃̀ɛ̃. 7Ńnɛ̀ ní ɔnɔkɛ̃̀ɛ̃ nákó ǹɖe ńɖi-boba‐ɛ̀ òŋu ìná‐ɛ̀, tsí káà tamá-aya‐ɛ̀#ɛ́, 8tsí àŋa méèdzì méèdzì#ɛ́, à nákó ɖi ɔ̀nyà ɔ̀kã̀ntso#ɛ́.”#10:8 Ìwé-Ìkpìnkpìlɛ̀-ayé 1:27, 5:2, 2:24 (Genèse 1:27, 5:2, 2:24)
Tsí Yèésù wí ró ní: Ńǹwèrè nyɛ̀ŋɛ̀#ɛ́, à kò dzɛ́ méèdzì ró, à ɖi ɔ̀kã̀ntso. 9Ó ɖi, iŋɛ́ yèé Ɔ̀ɖáyé tse má#á, ɔ̀nyà kó máa yaá níìkã̀ níìkã̀.
10Kíbí à ǹɖe bɛ̀ tã́, tsí à káà wà ńnɔlé si àŋa sɔ̃́ŋú#ɛ́, ɔmatsɛ́‐ɛ̀ ŋa sɛ̃̀ wà bèrèé náfɔ̀ ti nára‐ɛ̀ ró.
11Tsí ó wà wí fú ŋa ní: Bí ɔ̀nyà-kã̀ kɔ aya‐ɛ̀, tsí káà nɛ́ aya òmírɛ̃̀#ɛ́, ó kpilɛ̀ ńǹtá-aya yèé ó kɔ̀#ɛ́ ni. 12Bɛ́ɛ̀ ké ní bí ɔnɔbɛ̃̀ɛ̃-kã̀ gbo kɔ ɔkɔ‐ɛ̀, tsí káà nɛ́ ɔkɔ òmírɛ̃̀#ɛ́, òŋu gbo kpilɛ̀ ńǹtá-ɔkɔ yèé ó kɔ̀#ɛ́.
Yèésù wà tu kùsɛ̀ɛ̀ fú maɖé ŋa
(Màtéwò 19:13-15; Lúkà 18:15-17)
13Náànyì-bɛ́ɛ̀#ɛ́, ɔ̀nyà ŋa wà gbɛ̃́ maɖé ŋa wá fú Yèésù ní kó mɔ́wɔ́ lé ńǹtá-ŋa, tsí kó tu kùsɛ̀ɛ̀ fú ŋa. Tsí ɔmatsɛ́‐ɛ̀ ŋa kɔ̀ fú ŋa ní ká máa gbɛ̃́ maɖé ŋa wá ró.
14Kíbí Yèésù rí bɛ́ɛ̀#ɛ́, ó dzàá nára, tsí ó wí fú ɔmatsɛ́‐ɛ̀ ŋa ní: Ká kɔ maɖé ŋa dzɔ̀ɔ́, tsí ká wá ńɖɔ̀-òŋu. Ká máa ɖí ɔ̀nà fú ŋa. Iŋɛ́ yèé tse#ɛ́, ɛnɛ yèé ŋa wà kíbí maɖé ŋa#á, àŋa ní nákó gbé nóyè-Ɔ̀ɖáyé†#ɛ́. 15Ó ɖi, òŋu wà wí fú ŋa ní fee, ɛnɛ yèé kò dzɛ́ ní Ɔ̀ɖáyé kó dzoyè si ńǹtá-òŋu kíbí ɔma tsígíɖí náa dzɛ́, tsí gba iŋɛ́ bɛ́#ɛ́, Ɔ̀ɖáyé kàkó gbàá si nóyè‐ɛ̀.
16Ńbɛ̀ɛ́, ó fɔ̃́ maɖé ŋa#á ɔ̀kã̀kã̀, tsí mɔ́wɔ́ lé ńǹtá-ŋa, tsí tu kùsɛ̀ɛ̀ fú ŋa.
Ó le fú olówó ŋa ní Ɔ̀ɖáyé kó dzoyè si ńǹtá-ŋa
(Màtéwò 19:16-30; Lúkà 18:18-30)
17Kíbí Yèésù bàkó dzì nɔ́ɔ̀nà#á, ɔ̀nyà-kã̀ yáré wáa tó, tsí káà kálɛ̀ nábɛ́‐ɛ̀, tsí wà fɔ̀ ní: Akɔ́nɛ ɔ̀nyà-ire! Kí wà ní òŋu kó tse, tsí rí àyɛ̀-àrìtã́ ná? Kó fɔ̀ɔ́ fú òŋu.
18Tsí Yèésù wà wí fúu ní: Kí tse tsí ó wà kpe òŋu ní ɔ̀nyà-ire? Ó ɖi, ɔ̀nyà-kã̀ kpókpó kò wà, tsí dzɛ́ ɔ̀nyà-ire. Ɔ̀ɖáyé òŋu níìkã̀ntso gé ni. 19Ó ti ma ɛkpa-Ɔ̀ɖáyé† ná nɔ̀. Ɛkpa-Ɔ̀ɖáyé ŋa wà fɔ̀ ní: “Máa kpa ɔ̀nyà nóòkú. Máa gbaya. Máa gbɔkɔ. Máa tsolè. Máa tsòɖòbò má ɔ̀nyà-kã̀. Máa ɖínɛ si. Nà nɛ́ àrísá fú boba-ɛ̀ɛ òŋu ìnà-ɛ̀ɛ.”#10:19 Ìwé-Fúfùɖá 20:12-16, Ìwé-Àkóro 5:16-20 (Exode 20:12-16, Deutéronome 5:16-20)
20Tsí ɛnɛ nyɛ̀ŋɛ̀ ní: Akɔ́nɛ, ó ɖi, òŋu ti wà rɛ̃̀ si nɛ́kpa nyɛ̀ŋɛ̀ ŋa kpó títí nɔ́mɔ̀tsɔ́-òŋu ni.
21Ńbɛ̀ɛ́, Yèésù wòó kokoko, tsí iŋɛ́‐ɛ̀ dzɔdzú‐ɛ̀ gìɖì héŋú, tsí ó wà wí fúu ní: Ó bɔ iŋɛ́-kã̀ fúu. Ó ɖi, kó lɔ, tsí kó kɛ́ iŋɛ́‐ɛ̀ ŋa kpó tà, tsí kó mú owó‐ɛ̀ kpɛ̃́ fú adzìyàkú ŋa. Ńbɛ̀ɛ́, nákó kpaɖí iŋɛ́-ɛ̀fɛ́ ŋa si fú ara‐ɛ̀ nɔ́ɔ̀rɔ̃. Tsí bí ó tse bɛ́ɛ̀ tã́ ná, ni kó wáa tɛ̀ náànyì-òŋu.
22Kíbí afɔ̀#ɛ́ dzì nétí-ɛnɛ nyɛ̀ŋɛ̀#ɛ́, ara kúu kpó, tsí ó ǹɖe bɛ̀, tsí lɔ, iŋɛ́ yèé tse#ɛ́, iŋɛ́ lákṹ lákṹ ŋa wà nɔ́wɔ́‐ɛ̀.
23Ńbɛ̀ɛ́, Yèésù nyí wo ɔmatsɛ́‐ɛ̀ ŋa wáa lɔ, tsí wà wí fú ŋa ní: Ó le fú olówó ŋa héŋú ní Ɔ̀ɖáyé kó wáa dzoyè si ńǹtá-ŋa.
24Kíbí ó wí bɛ́ɛ̀#ɛ́, ó mù ŋá. Tsí ó sɛ̃̀ wà wí fú ŋa ró ní: Ɔma-mi ŋa, ó le fú ɔ̀nyà héŋú ní Ɔ̀ɖáyé kó wáa dzoyè si ńǹtá‐ɛ̀. 25Atsĩ kó gbà ńfò-abɛ́rɛ́#ɛ́ kò le tó olówó-kã̀ kó wɔ̀ lɔ nóyè-Ɔ̀ɖáyé†.
26Ńbɛ̀ɛ́, afɔ̀#ɛ́ lárè ŋá, tsí à wà bere ara-ŋa ní: Hàá! Bí ó dzɛ́ bɛ́ɛ̀#ɛ́, nɛ̀ɛ́ nákó nyáa rí oyè-Ɔ̀ɖáyé† ńǹkɛ̀ɛ́?
27Tsí ó nyí, tsí wò ŋá kokoko, tsí wà fɔ̀ fú ŋa ní: Ɔ̀nyà kàkó nyáa tseé. Ó ɖi, Ɔ̀ɖáyé òŋu nákó nyáa tseé, iŋɛ́ yèé tse#ɛ́, Ɔ̀ɖáyé òŋu nákó nyáa tse iŋɛ́ ɔ̀kã̀lɔ́ɔ̀kã̀ kpó.
28Ńbɛ̀ɛ́, Òkúta tsí arũ, tsí wà wí fúu ní: Kó rí gé! Àŋa òŋu, iŋɛ́-àŋa kpó, àŋa kɔ̀ ŋá dzɔ̀ɔ́, tsí waà tɛ̀ náànyì‐ɛ̀.
29Tsí Yèésù ní: Òŋu wà wí òtítɔ́ fú ŋa ní fee, bí ɔ̀nyà-kã̀ tse àtsùgbé-òŋu, tsí tse àtsùgbée kó dzíkɔ̀-òŋu, tsí kɔ ilé òŋu ìnàbí dzɔ̀ɔ́, tsí kɔ ínà òŋu boba dzɔ̀ɔ́, tsí kɔ ɔma ŋa òŋu oko gbo dzɔ̀ɔ́#ɛ́, 30ɛnɛ nyɛ̀ŋɛ̀ nákó rí òlárèbɛ́ɛ̀ ńǹwèrè yèé à wà si báàyí#ɛ́. Nákó rí ilé òŋu ìnàbí, tsí nákó rí ínà, tsí rí ɔma, tsí rí oko gbo. Tsí náànyìwà#á nákó wáa rí àyɛ̀-àrìtã́ gbo máa. 31Ó ɖi, ɔ̀nyà kpíkpɔ̀ dzɛ́ ɛnɛ-iwá ŋa si báàyí, tsí à nákó wáa ɖi ɛnɛ-ànyì ŋa, tsí ɛnɛ yèé ŋa dzɛ́ ɛnɛ-ànyì ŋa#á, à nákó wáa ɖi ɛnɛ-iwá ŋa.
Yèésù tɔ́ wà fɔ̀ nóláànkɛ́ɛta‐ɛ̀ ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé
(Màtéwò 20:17-19; Lúkà 18:31-34)
32Báàyí#ɛ́, à ǹɖe, tsí dzì nɔ́ɔ̀nà, tsí làkóò ńYèrúsàlɛ́mì, tsí Yèésù wà ńwádzú fú ŋa. Ɛ̀ɖɔ̃̀ wà ɖá ɔmatsɛ́‐ɛ̀ ŋa, tsí ɛnɛ yèé wà tɛ̀ náànyì-ɛ̀ ŋa gbo#ɛ́, odzo wà tse àŋa gbo. Tsí ó kpe ɔmatsɛ́‐ɛ̀ máàméèdzì ŋa#á, tsí à lɔ nákpálà-kã̀, tsí ó wà fɔ kíbí à bàkó tse báa gbà#á fú ŋa.
33Ó ní: Ká rɛ̃tígbè! Ó ɖi, àŋa làkóò ńYèrúsàlɛ́mì, tsí òŋu, Ɛnɛ yèé ɔ̀nyà bí#ɛ́†, à nákó ta òŋu fú onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa. Tsí à nákó ɖáàbi fú òŋu ní ká kpa òŋu nóòkú. Tsí à nákó mú òŋu bɔwɔ́-ɛnɛ yèé ŋa kò dzɛ́ ɔma-Ìyúɖà ŋa#á, 34tsí ɛnɛ nyɛ̀ŋɛ̀ ŋa nákó mú òŋu tsiwɛwɛ́, tsí titɔ́ ɖàbo òŋu, tsí tsɔ òŋu náàtàmì, tsí kpa òŋu nóòkú. Tsí bí òŋu kú#ɛ́, nɔ́dzɔ́-ɛ̀kɛ́ɛta‐ɛ̀ òŋu nákó sɛ̃̀ dzí ti náàŋírĩ-òkú ŋa wá náyé.
Yàkúbù òŋu Yòhánà wà wo ìɖì lákṹ
(Màtéwò 20:20-28)
35Ńbɛ̀ɛ́, Yàkúbù òŋu Yòhánà†, ɔma-Sèbèɖé méèdzì ŋa#á, à sɔ́má‐ɛ̀, tsí wà wí fúu ní: Akɔ́nɛ! Ó ɖi, iŋɛ́ ɔ̀kã̀lɔ́ɔ̀kã̀ yèé àŋa bòkó bèrèé#ɛ́, kó tseé fú àŋa ɖé.
36Tsí ó wà bèrè ŋá ní: Kí à wà wò ní òŋu kó tse fú ŋa?
37Tsí à ní: Ńǹwèrè yèé nákó waà dzoyè òŋu iyì‐ɛ̀#ɛ́, kó dzɛ́, tsí àŋa kó dzokó gbèé. Ɔ̀nyà-kã̀ kó dzokó náàwóòtã́‐ɛ̀, tsí enìkéèdzì‐ɛ̀ kó dzokó náàwóòsì‐ɛ̀.
38Ńbɛ̀ɛ́, Yèésù ní: À kò ma iŋɛ́ yèé à wà bèrè#ɛ́. Ó ɖi, ìréré yèé wà ɖóro ɖe òŋu#ɛ́ fe, à nákó nyáa dzɛ́ tsí kó rã̀ ŋáà? Nàmí nóòfò yèé à bàkó téle òŋu si#ɛ́, à nákó nyáa lɛ̀ɖɔ̃̀ gbèéè?
39Tsí à fɔ̀ fúu ní: Àŋa nákó dzɛ́, tsí kó rã àŋa.
Tsí Yèésù fɔ̀ fú ŋa ní: Bɛ́ɛ̀ ni. Ìréré yèé wà ɖóro ɖe òŋu#ɛ́ nákó rã̀ ŋá, tsí à nákó télè ŋá si nóòfò yèé à bàkó téle òŋu si#ɛ́. 40Ó ɖi, kò tsi òŋu ní nákó ɖíre ɛnɛ yèé nákó gbé náàwóòtã́-òŋu nàmí náàwóòsì-òŋu#ɛ́. Ìɖì nyɛ̀ŋɛ̀ ŋa#á, ti ɛnɛ yèé ŋa Ɔ̀ɖáyé ti tɔ́tse ŋá si fú#ɛ́ ni.
41Kíbí ɔmatsɛ́‐ɛ̀ maá àtíbɔ̀ ŋa#á gbɔ́ afɔ̀#ɛ́, à bínɔ́ fú Yàkúbù òŋu Yòhánà.
42Ńbɛ̀ɛ́, Yèésù kpè ŋá kpó, tsí fɔ̀ fú ŋa ní: Ɛnɛ yèé ŋa náa dzɛ́ ólú-ìlú ŋa#á náa kã́rũ-ìlú-ŋà ŋa gbegbé, tsí ɔ̀nyà-ìdzɔba ŋa gbo náa kã́rũ tiŋà ŋa. À mà bɛ́ɛ̀ yá nɔ̀! 43Ó ɖi, kó máa lɔ bɛ́ɛ̀ fú àŋa òŋu. Kà kàa bɛ́ɛ̀, bí ɔ̀nyà-kã̀ náàŋírĩ-ŋa wà wò ní òŋu kó dzɛ́ ɔ̀gá fú ŋa#á, ó wà ní ɛnɛ nyɛ̀ŋɛ̀ kó sɔ ara‐ɛ̀ ɖi adzítsɛ́ fú ŋa. 44Tsí bí ɔ̀nyà-kã̀ náàŋírĩ-ŋa wà wò ní òŋu kó gba iwádzú fú ŋa#á, ó wà ní ɛnɛ nyɛ̀ŋɛ̀ kó sɔ ara‐ɛ̀ ɖi arú fú àŋa kpó. 45Iŋɛ́ yèé tse#ɛ́, òŋu, Ɛnɛ yèé ɔ̀nyà bí#ɛ́†, òŋu kò wá ńǹtalɛ̀ ní ɔ̀nyà ŋa ká dzítsɛ́ fú òŋu. Ó ɖi, òŋu wá ní òŋu kó dzítsɛ́ fú ɔ̀nyà kpó, tsí òŋu kó mú ara-òŋu sã́ã̀bi si nárũ-ɔ̀nyà kpíkpɔ̀ ni.
Yèésù tsí odzú fú Bàtìmé
(Màtéwò 20:29-34; Lúkà 18:35-43)
46Tsí à ǹɖe, tsí lɔ káà tó ńǹlú-kã̀. À náa kpe ìlú#ɛ́ ní Yèríkò. Tsí Yèésù fùɖá ńnɔ́-ìlú#ɛ́, tsí ɔmatsɛ́‐ɛ̀ ŋa gbo òŋu ɔ̀nyà kpíkpɔ̀ tɛ̀ náànyì‐ɛ̀. Ńbɛ̀ɛ́, afɔ́dzú-kã̀ dzokó si nétí-ɔ̀nà, tsí wà bere iŋɛ́. Afɔ́dzú#ɛ́, à náa kpèé ní Bàtìmé, tsí boba‐ɛ̀ dzɛ́ Tìmé. 47Kíbí ó gbɔ́ ní Yèésù ti Nàsàrɛ́tì ní wáa làkóò#ɛ́, ó bu igbe ta ní: Yèésù! Ɔmalɔ́ma-Ɖàfíɖì†! Kó rí ànyínɔ́ fú òŋu ɖé ooò.
48Tsí ɔ̀nyà kpíkpɔ̀ wà gírí ɖíi ní kó famí igbe#ɛ́ bɛ́ɛ̀! Ó ɖi, àríkɛ̀ɛ́ yèé ó wà ɖúgbe#ɛ́ máa gìɖì#ɛ́ ńnɛ̀ɛ́. Ó wà ɖúgbe ní: Ɔmalɔ́ma-Ɖàfíɖì ééè! Kó rí ànyínɔ́ fú òŋu ɖé ooò.
49Tsí Yèésù ɖóro, tsí ní: Ká kpèé wá.
Tsí à kpèé, tsí wà wí fúu ní: Ɛ̀ɖɔ̃̀ kó máa ɖáa. Kó ǹɖe wá. Ó ɖi, Yèésù wà kpèé.
50Ńbɛ̀ɛ́, ó ǹɖe, tsí bɔ́ ìwɔ̀ra‐ɛ̀ taánù, tsí fòtalɛ̀, tsí lɔ ńɖi-Yèésù.
51Tsí Yèésù wà bèrèé ní: Kí ó wà wò ní òŋu kó tse fúu báàyí?
Tsí ó ní: Akɔ́nɛ! Òŋu wà wò ní òŋu kó rírã ni!
52Tsí Yèésù ní: Kó sɛ̃̀ lɔ, ó ɖi, Ɔ̀ɖáyé bɔɔ́, iŋɛ́ yèé tse#ɛ́, ó nɛ́ àkaralé si ńǹtá‐ɛ̀.
Ńǹɖì-bɛ̀ gbòkã́#á, odzú‐ɛ̀ tsí kpó, tsí ó kpé ìrã rírí, tsí ó tɛ̀ náànyì-Yèésù lɔ.
© (Active), Wycliffe Bible Translators, Inc. All rights reserved.
