Màtéwò 28
28
Yèésù dzí ti náàŋírĩ-òkú ŋa wá náyé
(Mákò 16:1-8; Lúkà 24:1-12; Yòhánà 20:1-10)
1Ɔdzɔ́-ìmíra† tã́, tsí ó ɖi ńfɛ̀ɛ̀-ilɛ̀ɛ́má-ɔdzɔ́ɔ̀sɛ̃̀, tsí Màríyà† ti ìlú-Màɖàlá òŋu Màríyà-èkéèdzì lɔ káà kpalɛwo èkpò#ɛ́. 2Tsí náàrìkã̀ntso gé#ɛ́, ilɛ̀-lákṹ-kã̀ mì, tsí adzítsɛ́-ɔ̀rɔ̃†-kã̀ tɔ̀rɔ̃ dzì, tsí wáa rí òkúta yèé à ń ɖí arũ-èkpò#ɛ́ si#ɛ́ si nákpálà-kã̀, tsí dzokó ńǹtá‐ɛ̀ si. 3Ó wà kɔ nyɛ̀nyɛ̀nyɛ̀ kíbí màmà náa bù bɛ́#ɛ́, tsí èbò-ara‐ɛ̀ gbo wà fṹ pémpém kíbí àlà bɛ́. 4Tsí dzidzi mú ɛnɛ yèé wà ɖe ibɛ̀ ŋa#á, tsí à kpé ŋíŋá, tsí wà si kíbí òkú ŋa bɛ́.
5Tsí adzítsɛ́-ɔ̀rɔ̃#ɛ́ fɔ̀ fú ɔnɔbɛ̃̀ɛ̃ ŋa#á ní: Àŋa òŋu ká máa sá. Ó ɖi, òŋu mà ní à wà wo Yèésù, ɛnɛ yèé à kã̀ si ńǹtá-egi-ìɖáàgàlàdzà†#á ni. 6Kò wà ńbí ró. Ó sɛ̃̀ dzí ti náàŋírĩ-òkú ŋa wá náyé kíbí ó ti fɔ̀ɔ́ si#ɛ́. Ó ɖi, ká wá, tsí ká wáa rí ńbí à ń tɛ́#ɛ́. 7Ó ɖi, ká yára lɔ káà dzɛ́ fú ɔmatsɛ́‐ɛ̀ ŋa ní: Ó sɛ̃̀ dzí ti náàŋírĩ-òkú ŋa wá náyé, tsí ó tsúwádzú-ŋa lɔ nérè-Gàlìlé. Ńbɛ̀ ní à nákó ríi#ɛ́. Ó ɖi, afɔ̀ yèé òŋu nɛ́, tsí òŋu kó fɔ̀ fú ŋa#á ńnɛ̀ɛ́.
8Tsí ɔnɔbɛ̃̀ɛ̃ ŋa#á yára ǹɖe nétí-èkpò#ɛ́, tsí lɔ. Odzo wà tse ŋá. Ó ɖi, ayè lákṹ-kã̀ gbo sì wà tɛ́ ŋa, tsí à sáré làkóò káà dzíkɔ̀#ɛ́ fú ɔmatsɛ́-Yèésù† ŋa. 9Tsí náàrìkã̀ntso gé#ɛ́, Yèésù rɛ̃̀ wáa kpàɖé ŋa, tsí wà fɔ̀ fú ŋa ní: Òŋu wà kí ŋa. Tsí à tìmá‐ɛ̀, tsí kálɛ̀ ńwádzú‐ɛ̀, tsí dzi ɛsɛ̀‐ɛ̀ ŋa, tsí mú erí kãlɛ̀ si fúu. 10Tsí Yèésù wà wí fú ŋa ní: Ká máa sá. Ó ɖi, ká lɔ káà dzɛ́ fú tòŋu ŋa ní ká lɔ nérè-Gàlìlé. Ńbɛ̀ ní à nákó rí òŋu#ɛ́.
Sɔ́dzà ŋa ní káà dzíkɔ̀-iŋɛ́ yèé tse ŋa#á
11Ńǹwèrè yèé ɔnɔbɛ̃̀ɛ̃ ŋa#á wà nɔ́ɔ̀nà#á si làkóò#ɛ́, sɔ́dzà kã̀ŋa náàŋírĩ-ɛnɛ yèé wà ɖe ìɖì#ɛ́ ŋa#á wɔ̀ lɔ náàŋírĩ-ìlú#ɛ́, tsí káà dzíkɔ̀-iŋɛ́ yèé tse ŋa#á kpó fú onùgbó-atsɛbɔ-Ɔ̀ɖáyé† ŋa. 12Tsí àŋa gbo, à kpàɖé bá onùgbó-ìlú#ɛ́ ŋa, tsí dzɔ́ dzokó si ńǹtá-afɔ̀#ɛ́. Tsí kíbí à dzokó bɛ́ɛ̀ tã́#á, à mú owó kpíkpɔ̀-kã̀ ki arũ fú sɔ́dzà ŋa#á, 13tsí fɔ̀ fú ŋa ní ká fɔ̀ ní: Nóoru, ńǹwèrè yèé àŋa sɔ̃rũ lɔ si#ɛ́, ɔmatsɛ́‐ɛ̀ ŋa wáa tsole òkú‐ɛ̀ lɔ. 14Ó ɖi, bí afɔ̀#ɛ́ dzì nétí-kɔ̀màɖã́ã̀-ìlú#ɛ́ ná, àŋa ká-àŋa nákó tu afɔ̀#ɛ́, tsí àŋa òŋu ìkparà-kã̀ kpókpó kàkó bá ŋa.
15Tsí sɔ́dzà ŋa#á gba owó#ɛ́, tsí tse iŋɛ́ yèé à fɔ̀ fú ŋa á. Tsí à wà kpɛ̀rɔ́-afɔ̀ nyɛ̀ŋɛ̀ wérí náàŋírĩ-ɔma-Ìyúɖà† ŋa títí wáa fú òní.
Yèésù mú ara‐ɛ̀ ŋa ɔmatsɛ́‐ɛ̀ ŋa
(Mákò 16:14-18; Lúkà 24:36-49; Yòhánà 20:19-23; Itsɛ́ 1:6-8)
16Ɔmatsɛ́-Yèésù† máàwɔɔ̀kã̀ ŋa#á lɔ nérè-Gàlìlé, tsí lɔ ńǹtá-òkè yèé Yèésù ti ɖíre si fú ŋa#á. 17Tsí à rí Yèésù ńbɛ̀. Kíbí à ríi#ɛ́, à kálɛ̀, tsí mú erí kãlɛ̀ fúu. Ó ɖi, ɔ̀nyà kã̀ŋa náàŋírĩ-ŋa wà dzèrèbe ró ní bóyá kò tsi òŋu ni. 18Tsí Yèésù tìmá-ŋa, tsí wíìnyɛ̀ fú ŋa. Ó wà fɔ̀ fú ŋa ní: Nɔ́ɔ̀rɔ̃ gbo, ńǹtalɛ̀ bí gbo, òŋu gba ikpá ɔ̀kã̀lɔ́ɔ̀kã̀ kpó. 19Ńbɛ̀ɛ́, ká lɔ, tsí ká sɔ ìlú kpó ɖi atɛ̀náànyì-òŋu ŋa. Ká wìwɛ̀-òŋu fú ŋa. Ká fɔ̀ ní ó ɖɔkpɛ́-Ɔ̀ɖáyé Boba, ó ɖɔkpɛ́-Ɔ̀ɖáyé Ɔma, ó ɖɔkpɛ́-Mímí-Ɔ̀ɖáyé†, tsí ń wìwɛ̀#ɛ́ fú ŋa. 20Tsí ká wà tsɛ̀kɔ́ fú ŋa ti nára-kíbí à nákó wà tse si ńǹtá-afɔ̀ yèé òŋu fɔ̀ si fú ŋa#á gbo kpó#ɛ́. Ó ɖi òŋu, òŋu wà náànyì-ŋa si nɔ́dzɔ́ kɔ́dzɔ́ títí káà fú ìtã̀ntã́-ayé#ɛ́.
© (Active), Wycliffe Bible Translators, Inc. All rights reserved.
