Màtéwò 10
10
Yèésù tsã ɔmatsɛ́‐ɛ̀ máàméèdzì ŋa#á
(Mákò 3:13-19; Lúkà 6:12-16)
1Náànyì-bɛ́ɛ̀ ró#ɛ́, Yèésù kpe ɔmatsɛ́‐ɛ̀ máàméèdzì ŋa#á, tsí à wá, tsí ó fú ŋa ńkpá ní edzò† yèé wà ɖɔ́kpɔ fú ɔ̀nyà ŋa#á, ká wà ń lé ŋa sɛ̃̀ náànyì-ŋa, tsí ká wà bɔ àrɔ̃̀ ɔ̀kã̀lɔ́ɔ̀kã̀ gbo kpó. 2Ɛ́kɔ-adzítsɛ́‐ɛ̀ máàméèdzì ŋa#á ní:
Sìmɔ́nì, tsí à náa ɖáakì gbo ní Òkúta òŋu ɔmàná‐ɛ̀ Ànɖérè,
tsí ɔ̀kã̀ gbo dzɛ́ Yàkúbù òŋu ɔmàná‐ɛ̀ Yòhánà†,
àŋa méèdzì méèdzì#ɛ́ kpó dzɛ́ ɔma-Sèbèɖé ŋa,
3ɔ̀kã̀ gbo dzɛ́ Fìlíkpò, ɔ̀kã̀ gbo dzɛ́ Bàtòlòméwò,
ɔ̀kã̀ gbo dzɛ́ Tòmá, ɔ̀kã̀ gbo dzɛ́ Màtéwò agbalómbà,
ɔ̀kã̀ gbo dzɛ́ Yàkúbù ɔma-Àfáyò, ɔ̀kã̀ gbo dzɛ́ Tàɖéwò,
4ɔ̀kã̀ gbo dzɛ́ Sìmɔ́nì, ɔma-ɛgbɛ́-Sèlɔ́tì#10:4 Ɔma-ɛgbɛ́-Sèlɔ́tì ŋa ní dzɛ́ ɛnɛ yèé ŋa nya ɛnɛ-Rómà ŋa kãdzú#ɛ́. À kò dzɛ́ ní ɛnɛ-Rómà ŋa kó dzoyè si ńǹtá-ɔma-Ìyúɖà ŋa ró. ŋa,
tsí ɔ̀kã̀ gbo dzɛ́ Yúɖà Sìkàrìyɔ́tì. Òŋu gìɖì ní wáa ta Yèésù#ɛ́.
Yèésù bɛ ɔmatsɛ́‐ɛ̀ máàméèdzì ŋa#á lɔ ńǹlú ŋa wérí
(Mákò 6:6-13; Lúkà 9:1-6)
5Tsí Yèésù wà bɛ ɔmatsɛ́‐ɛ̀ máàméèdzì ŋa#á, tsí wà fɔ̀ fú ŋa ní: Ká máa lɔ ńɖi-ɛnɛ yèé kò dzɛ́ ɔma-Ìyúɖà ŋa#á, tsí ká máa lɔ ńǹlú-erè-Sàmàríyà†-kã̀ kpókpó gbo. 6Ó ɖi, ká lɔ ńɖi-ɔma-Ìsàràyɛ́lì† yèé ŋa wà si kíbí àgùɖã̀ yèé nɔ̀ ŋa#á. 7Tsí bí à làkóò#ɛ́, ká wà dzíkɔ̀ fú ɔ̀nyà ŋa ní: Àsòkò tó, tsí Ɔ̀ɖáyé kó wáa dzoyè si ńǹtá-ŋa. 8Ká wà bɔ àkɔ̃̀rɔ̃̀ ŋa, tsí ká wà dzí òkú ŋa gbo wá náyé. Ká wà bɔ aɖɔ́ɔ̀tɛ̀† ŋa, tsí edzò† yèé ŋa wà ɖɔ́kpɔ fú ɔ̀nyà ŋa#á, ká wà lé ŋa sɛ̃̀ náànyì-ŋa. Òŋu fú ŋa ńkpá nɔ́ɔ̀fɛ́ ní ká wà tse iŋɛ́ yèé ŋa nyí. Ó ɖi, àŋa gbo ká lɔ káà tse bɛ́ɛ̀ fú ɔ̀nyà ŋa náàrì-bere iŋɛ́-kã̀ nɔ́wɔ́-ŋa. 9Bí à làkóò, ká máa banɛ́ owó-ìrɔ́-kã̀ kpókpó si náàkpò-owó-ŋà ŋa. 10Ká máa banɛ́ àkpò, ká máa banɛ́ ìwɔ̀ra-òmírɛ̃̀ gbo náànyì-yèé à wɔ̀ si#ɛ́. Ká máa banɛ́ ɔ̀kpá, ká máa bɔ kpákò gbo. Ó ɖi, ó wà ní ɛnɛ yèé tse ni kó dzɛ. 11Tsí ńǹlú ɔ̀kã̀lɔ́ɔ̀kã̀ yèé à nákó wɔ̀#ɛ́, ká wo ɛnɛ yèé wà wò ní òŋu kó gbà ŋá náàledzò#ɛ́, tsí ká sɔ̀ ńɖɔ̀‐ɛ̀ si títí fú ìwèrè yèé à nákó ǹɖe ńǹlú#ɛ́. 12Tsí bí à wɔ̀ lɔ ńkpàtá-ɛnɛ nyɛ̀ŋɛ̀#ɛ́, ká kí ɔ̀nyà-kpàtá ŋa#á ní: Tútùúrɔ̀ fú ŋa. 13Tsí bí ɔ̀nyà-kpàtá ŋa#á wà wò ní àŋa kó gba okũ-tútùúrɔ̀#ɛ́ fú ŋa, tútùúrɔ̀#ɛ́ nákó tú bò ŋá. Ó ɖi, bí à kò wà wò ní àŋa kó gbàá, tútùúrɔ̀#ɛ́ nákó sɛ̃̀ wá fú àŋa ká-ŋa. 14Bí à tó ńǹlú-kã̀ nàmí ńkpàtá-kã̀, tsí ɔ̀nyà-kã̀ kò gbà ŋá, tsí ɔ̀nyà-kã̀ gbo kò tsí etí si náfɔ̀-ŋa, ká ǹɖe bɛ̀, tsí gbákpá gbɛ́sɛ̀ náfɔ̀-ŋa. 15Ó ɖi, òŋu wà wí òtítɔ́ fú ŋa ní fee: Nɔ́dzɔ́-ɛdzɔ́ kpíkpè#ɛ́, ɛdzɔ́ yèé Ɔ̀ɖáyé nákó kpè bá ɛnɛ-ìlú bɛ̀ ŋa#á, nákó le láre ti ɛnɛ-ìlú-Sòɖómì òŋu ɛnɛ-ìlú-Gòmɔ́rà ŋa.#10:15 Ìwé-Ìkpìnkpìlɛ̀-ayé 19:24 (Genèse 19:24)
Yèésù wà kã́rã́ ɛnɛ yèé ó bɛ̀ làkóò ŋa#á si ní à nákó tsoró bá ŋa
(Mákò 13:9-13; Lúkà 21:12-17)
16Tsí Yèésù ní: Ká rɛ̃tígbè rere, tsí ká gbɔ́. Òŋu wà bɛ̀ ŋá làkóò kíbí àgùɖã̀ ŋa náàŋírĩ-òkóòkò ŋa bɛ́ ni. Ńbɛ̀ɛ́, ó wà ní ká wà ɖíìdzáyè kíbí edzò bɛ́, tsí ká dzɛ́ kòmàkã̀ ŋa gbo kíbí àlúǹkùkù ŋa bɛ́. 17Ká tsɔ́ éwo-ara-ŋa rere. Ó ɖi, ɔ̀nyà ŋa nákó mú ŋa, tsí gbɛ̃́ ŋa lɔ fú àkpɛ̀dzɔ́ ŋa, tsí tsɔ̀ ŋá náàtàmì ńlé-ìkpàɖé-ɔma-Ìyúɖà ŋa†. 18À nákó kpè ŋá ńɖi-kɔ̀màɖã́ã̀ ŋa òŋu ńɖi-ólú ŋa náàtsùgbé-òŋu. Ńbɛ̀ ní à nákó wà nya àyídzá-òŋu fú ŋa òŋu fú ɛnɛ yèé kò dzɛ́ ɔma-Ìyúɖà ŋa#á gbo#ɛ́. 19Tsí bí à mú ŋa, tsí gbɛ̃́ ŋa lɔ ńlé-ɛdzɔ́, ká máa tì ɖíìhã̀ŋù-afɔ̀ yèé à nákó fɔ̀#ɛ́ nàmí kíbí à nákó fɔ̀ɔ́ gbà#á. Ó ɖi, náàsòkò nyɛ̀ŋɛ̀ tútútú#ɛ́, afɔ̀ yèé à nákó fɔ̀#ɛ́, Ɔ̀ɖáyé nákó nyàá si nárũ fú ŋa. 20Ó ɖi, kò tsi àŋa ká-ŋa ní nákó wà wíìnyɛ̀#ɛ́, Mímí-Ɔ̀ɖáyé† Boba ní nákó wà wíìnyɛ̀ gbà ńǹtá-ŋa#á.
21Fee, ìnàbí nákó sɔ́ ìnàbí fú ikú, tsí boba gbo nákó sɔ́ ɔma fú ikú. Tsí ɔma ŋa gbo nákó nya boba-ŋà ŋa òŋu ìnà-ŋà ŋa kãdzú, tsí wà wò ní ká kpa ŋá nóòkú. 22Ɔ̀nyà kpó nákó nyà ŋá kãdzú náàtsùgbé-òŋu. Ó ɖi, ɛnɛ yèé nákó sì gbódzú títí lɔ ńǹtã̀ntã́#á, ɛnɛ nyɛ̀ŋɛ̀ nákó rí ɔlà. 23Tsí bí à wà tsoró bá ŋa ńǹlú-kã̀, ká sá lɔ ńǹlú-èkéèdzì. Ó ɖi, òŋu wà wí òtítɔ́ fú ŋa ní fee, à kàkó rɛ̃̀ gbà ńǹtá-ìlú-Ìsàràyɛ́lì† ŋa kòdzá kpó tã́ná òŋu, Ɛnɛ yèé ɔ̀nyà bí#ɛ́†, òŋu nákó sɛ̃̀ wá.
24Ɔmatsɛ́ kà láre ɔ̀gá‐ɛ̀, tsí bɛ́ɛ̀ ké ní arú gbo kà láre olówó‐ɛ̀#ɛ́. 25Ó bɔ ɔmatsɛ́ kó ɖé bá ɔ̀gá‐ɛ̀, tsí arú gbo kó ɖé bá olówó‐ɛ̀ gé ni. Bí à wà bú onùgbó-kpàtá-kã̀ ní Ètsù#10:25 Ńgɛ̀rɛ́kì ní à kpe Ètsù ní Bɛ̀yɛ̀sɛ̀búlù#ɛ́. fe, ti ɛnɛ kpàtá‐ɛ̀ ŋa kàkó yɔɔ̀?
Ká máa sá fú ɔ̀nyà, ká sá fú Ɔ̀ɖáyé
(Lúkà 12:2-7)
26Yèésù fɔ̀ ró ní ká máa wà sá fú ɔ̀nyà ŋa. Ó ɖi, iŋɛ́ ɔ̀kã̀lɔ́ɔ̀kã̀ kpó yèé ɔ̀nyà ŋa mú iŋɛ́ bò si#ɛ́, à nákó wáa tsí atsɔ nódzú‐ɛ̀, tsí iŋɛ́ ɔ̀kã̀lɔ́ɔ̀kã̀ kpó yèé wà ńǹɖúkù si#ɛ́, ɔ̀nyà kpó nákó wáa màá. 27Tsí iŋɛ́ yèé òŋu wà fɔ̀ fú ŋa gbo ńǹɖòɖò-ilé#ɛ́, ká wà fɔ̀ɔ́ náàbɔ̀ɔ́mɛ̀, tsí iŋɛ́ yèé òŋu wà ɖìkpá‐ɛ̀ fú ŋa#á, ká kpaŋgo‐ɛ̀ fú ìlú kpó. 28Ó ɖi, ká máa wà sá fú ɔ̀nyà ŋa, ɔ̀nyà gé ní à nákó nyáa kpa nóòkú#ɛ́, à kàkó nyáa kpa ɔlɔ́rɔ̃‐ɛ̀ òŋu nóòkú. Ó ɖi, ká sá fú Ɔ̀ɖáyé, ɛnɛ yèé nákó nyáa tse tsí ɔ̀nyà òŋu ɔlɔ́rɔ̃‐ɛ̀ méèdzì kpó nákó tsɛ̀rá ńná-àrìtã́#á. 29Egbèló à náa ta ɛ̀gã̀ méèdzì ná? Kò tsi bìyéè-kã̀ã̀? Tsí ɔ̀kã̀-ŋa-kã̀ kpókpó kà sì kú, tsí kó dzɛ́ ní Ɔ̀ɖáyé kò ti mà si. 30Ó ɖi, àŋa òŋu fee, irɔ̃-éwo-ŋa gìɖì#ɛ́, Ɔ̀ɖáyé ma mɛ́ɛló yèé ó dzɛ́#ɛ́. 31Ńbɛ̀ɛ́, ká máa sá fú iŋɛ́-kã̀ kpókpó, à fɛ́ fú Ɔ̀ɖáyé láre ɛ̀gã̀ ŋa kpó.
32Bí ɔ̀nyà-kã̀ fɔ̀ náàwùdzɔ ní òŋu dzɛ́ tòŋu, òŋu gbo, òŋu nákó fɔ̀ nódzú-Ɔ̀ɖáyé Boba-òŋu nɔ́ɔ̀rɔ̃ ní ɛnɛ nyɛ̀ŋɛ̀ dzɛ́ tòŋu. 33Ó ɖi, bí ɔ̀nyà-kã̀ fɔ̀ náàwùdzɔ ní òŋu kò ma òŋu, òŋu gbo, òŋu nákó fɔ̀ nódzú-Ɔ̀ɖáyé Boba-òŋu nɔ́ɔ̀rɔ̃ ní òŋu kò màá.
Yèésù wáa bàdzɛ́ àŋírĩ-ɔ̀nyà ŋa
(Lúkà 12:49-53)
34Yèésù fɔ̀ ró ní: Ká máa ɖédzú òŋu wá ńǹtalɛ̀ bí ní ɔ̀nyà ŋa kó ɖɔ̃̀. Ɛ̃ɛ̃, òŋu kò wá ní ɔ̀nyà ŋa kó ɖɔ̃̀. Òŋu wá ní òŋu kó wáa ɖá ìdzà si náàŋírĩ-ɔ̀nyà ŋa ni. 35Ɛ̃ɛ̃, òŋu wá ní òŋu kó wáa bàdzɛ́ àŋírĩ-ɔma ɔnɔkɛ̃̀ɛ̃ òŋu boba‐ɛ̀ méèdzì, tsí òŋu kó bàdzɛ́ àŋírĩ-ɔma ɔnɔbɛ̃̀ɛ̃ òŋu ìná‐ɛ̀ gbo méèdzì, tsí òŋu kó bàdzɛ́ àŋírĩ-aya-ɔma òŋu arɔkɔ‐ɛ̀ ɔnɔbɛ̃̀ɛ̃ gbo méèdzì ni. 36Ɔ̀tɛ̀-ɔ̀nyà nákó dzɛ́ ɔ̀nyà-kpáfɛ tòŋu ká‐ɛ̀ ŋa gìɖì gìɖì ni.
37Tsí ó fɔ̀ ró ní ɔ̀nyà ɔ̀kã̀lɔ́ɔ̀kã̀ kpó bí ó dzáfɔ̀-boba‐ɛ̀ nàmí ìná‐ɛ̀ lárè òŋu, ɛnɛ nyɛ̀ŋɛ̀ kò dzɔ kó dzɛ́ ɔmatsɛ́-òŋu. Tsí bí ó dzáfɔ̀-ɔma‐ɛ̀ ɔnɔkɛ̃̀ɛ̃ nàmí ɔma‐ɛ̀ ɔnɔbɛ̃̀ɛ̃ láre òŋu gbo kò dzɔ kó dzɛ́ ɔmatsɛ́-òŋu. 38Tsí bí ɔ̀nyà-kã̀ kò kɛ́ egi-ìɖáàgàlàdzà†‐ɛ̀ rù, tsí kó tɛ̀ náànyì-òŋu, ɛnɛ nyɛ̀ŋɛ̀ gbo kò dzɔ kó dzɛ́ ɔmatsɛ́-òŋu. 39Ó ɖi, ɛnɛ yèé nákó wò ní òŋu kó gba ara-òŋu dzɔ̀ɔ́ si náàyɛ̀#ɛ́, ɛnɛ nyɛ̀ŋɛ̀ nákó tsɛ̀rá. Tsí ɛnɛ yèé nákó mú ikú‐ɛ̀ tà náàtsùgbé-òŋu#ɛ́, ɛnɛ nyɛ̀ŋɛ̀ nákó sɛ̃̀ rí àyɛ̀.
Ɔ̀ɖáyé nákó tsɔ̀yà fú ɛnɛ yèé ŋa wà gba ɔmatsɛ́‐ɛ̀ ŋa náàledzò rere#ɛ́
(Mákò 9:41)
40Tsí Yèésù fɔ̀ fú ɔmatsɛ́‐ɛ̀ ŋa ró ní: Ɛnɛ yèé gbà ŋá rere, òŋu ká-òŋu gìɖì ní ó gbà#á, tsí bí ìwɔ-kã̀, ò gba òŋu rere#ɛ́, ò gba ɛnɛ yèé bɛ òŋu wá#á. 41Tsí bí ɔ̀nyà-kã̀ gbo gba agbáfɔ̀-Ɔ̀ɖáyé fɔ̀†-kã̀ rere, àtsùgbée kíbí ó dzɛ́ agbáfɔ̀-Ɔ̀ɖáyé fɔ̀#ɛ́, Ɔ̀ɖáyé nákó bù kɔ̃́ɔ̃ fúu ńǹrɔ́-kíbí nákó tse fú agbáfɔ̀-Ɔ̀ɖáyé fɔ̀ ŋa#á. Tsí bí ɔ̀nyà-kã̀ gbo gba atsòtítɔ́-kã̀ rere, àtsùgbée kíbí ó dzɛ́ atsòtítɔ́#ɛ́, Ɔ̀ɖáyé nákó bù kɔ̃́ɔ̃ fúu ńǹrɔ́-kíbí nákó tse fú atsòtítɔ́ ŋa#á. 42Bí ó tì dzɛ́ omi tútù igbá-kã̀ gìɖì bɛ́ gé ní ɔ̀nyà-kã̀ tse fú tsígíɖí-ɔmatsɛ́-òŋu ŋa-kã̀ ní kó mɔ, náàtsùgbée kíbí ó dzɛ́ ɔmatsɛ́-òŋu#ɛ́, òŋu wà wí òtítɔ́ fú ŋa ní fee, Ɔ̀ɖáyé kàkó kɔ àrìmáa bù kɔ̃́ɔ̃ fú ɛnɛ nyɛ̀ŋɛ̀.
© (Active), Wycliffe Bible Translators, Inc. All rights reserved.
