Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእምዝ ቀርቡ ኀበ እግዚእ ኢየሱስ እለ መጽኡ እምኢየሩሳሌም ጸሐፍት ወፈሪሳውያን እንዘ ይብሉ። ለምንት ይትዐደዉ አርዳኢከ ሥርዐተ ረበናት ወትእዛዞሙ ለሊቃነ ካህናት እስመ ኢይትኀፀቡ እደዊሆሙ ሶበ ይበልዑ ኅብስተ። ወአውሥአ ወይቤሎሙ ለምንት አንትሙኒ ትትዐደዉ ትእዛዘ እግዚአብሔር በእንተ ሥርዐትክሙ። ወእግዚአብሔርሰ ይቤ አክብር አባከ ወእመከ ወዘአሕሠመ ቃለ ላዕለ አቡሁ ወእሙ ሞተ ለይሙት። ወአንትሙሰ ትብሉ ዘይቤሎ ለአቡሁ ወለእሙ ሀብተ ቍርባን ዘረባኅከ እምኔየ ዝ ብሂል ኢያክብር አባሁ ወእሞ። ወሰዐርክሙ ቃሎ ለእግዚአብሔር በእንተ ሥርዐትክሙ። ኦ መደልዋን ሠናየ ተነበየ ኢሳይያስ ላዕሌክሙ እንዘ ይብል፤ «ዝ ሕዝብ በከናፍሪሆሙ ያከብሩኒ ወበልቦሙሰ ነዋኀ ይርኅቁ እምኔየ። ወከንቶ ያመልኩኒ እንዘ ይሜህሩ ትምህርተ ሥርዐታተ ሰብእ።» ወጸውዖሙ ለሕዝብ ወይቤሎሙ ስምዑ ወለብዉ። ከመ አኮ ዘይበውእ ውስተ አፍ ዘያረኵሶ ለሰብእ አላ ዘይወፅእ እምውስተ አፍ ውእቱ ያረኵሶ ለሰብእ። ወእምዝ ቀሪቦሙ አርዳኢሁ ይቤልዎ ተአምርሁ ከመ ፈሪሳውያን ሰሚዖሙ ቃለከ አንጐርጐሩ። ወአውሥአ ወይቤ ኵላ ተክል እንተ ኢተከላ አቡየ ሰማያዊ ትሤሮ። ኅድግዎሙ ለእሉ እስመ ዕዉራን እሙንቱ ወአምርሕተ ዕዉራን ዕዉር ዕዉረ ለእመ መርሐ ክልኤሆሙ ይወድቁ ውስተ ግብ። ወአውሥአ ጴጥሮስ ወይቤሎ ፈክር ለነ ዘንተ ምሳሌ። ወይቤሎሙ እግዚእ ኢየሱስ ዓዲሁ አንትሙኒ ኢለበውክሙኑ ዘንተ። ኢተአምሩኑ ከመ ኵሉ ዘይበውእ ውስተ አፍ ውስተ ከርሥ ይትገመር ወጽመ ይትገደፍ። ወዘሰ ይወፅእ እምውስተ አፍ እምልብ ይወፅእ ወዝ ውእቱ ዘያረኵሶ ለሰብእ። እስመ እምውስተ ልብ ይወፅእ ኅሊና እኩይ ዘውእቱ ቀቲል ወዝሙት ስርቅ ስምዕ በሐሰት ወፅርፈት። እሉኬ ዘያረኵስዎ ለሰብእ ወዘእንበለ ተኀፅቦ እድሰ በሊዕ ኢያረኵሶ ለሰብእ።

ወወፂኦ እግዚእ ኢየሱስ ተግኅሠ እምህየ ውስተ ደወለ ጢሮስ ወሲዶና። ወናሁ ብእሲት ከነናዊት እምውእቱ አድዋል መጽአት እንዘ ትጸርሕ ወትብል መሐረኒ እግዚእየ ወልደ ዳዊት እስመ ለወለትየ እኩይ ጋኔን አኀዛ ወያአብዳ። ወኢያውሥኣ እግዚእ ኢየሱስ ቃለ ወቀሪቦሙ አርዳኢሁ አስተብቍዕዎ እንዘ ይብሉ ፈንዋ ለዛቲ ብእሲት እስመ ትጸርሕ በድኅሬነ። ወአውሥአ ወይቤሎሙ ኢተፈነውኩ ዘእንበለ ኀበ አባግዕ ዘተኀጕላ ዘቤተ እስራኤል። ወቀሪባ ሰገደት ሎቱ እንዘ ትብል እግዚኦ ርድአኒ። ወአውሥኣ ወይቤላ ኢኮነ ሠናየ ነሢአ ኅብስተ ውሉድ ወውሂብ ለከለባት። ወትቤ እወ እግዚኦ ከለባትኒ ጓ ይበልዑ እምፍርፋራት ዘይወድቅ እማእደ አጋዕዝቲሆሙ። ወእምዝ አውሥኣ እግዚእ ኢየሱስ ወይቤላ ኦ ብእሲቶ ዐቢይ ሃይማኖትኪ ይኩንኪ በከመ ተአመንኪ ወሐይወት ወለታ እምይእቲ ሰዓት።

ወኀሊፎ እምህየ እግዚእ ኢየሱስ በጽሐ ኀበ ሐይቀ ባሕር ዘገሊላ ወዐሪጎ ደብረ ነበረ ህየ። ወቀርቡ ኀቤሁ አሕዛብ ብዙኃን ወአምጽኡ ምስሌሆሙ ሐንካሳነ ወዕዉራነ ወጽሙማነ ወፅዉሳነ ወባዕዳነ ብዙኃነ ወገደፍዎሙ ኀበ እገሪሁ ለእግዚእ ኢየሱስ ወፈወሶሙ። እስከ ሶበ ያነክሩ አሕዛብ እንዘ ይሬእዩ ከመ በሃማን ይትናገሩ ወሐንካሳን የሐውሩ ወዕዉራን ይሬእዩ ወሰብሕዎ ለአምላከ እስራኤል ዘወሀበ ዘከመዝ ሥልጣነ ለሰብእ።

ወጸውዖሙ እግዚእ ኢየሱስ ለአርዳኢሁ ወይቤሎሙ ያምሕሩኒ እሉ ሕዝብ እስመ ናሁ ሠሉስ መዋዕል እምዘበልዑ እክለ ወአልቦሙ ዘይበልዑ ወኢይፈቅድ እፈንዎሙ ርኁባኒሆሙ ከመ ኢይመጽልዉ በፍኖት። ወይቤልዎ አርዳኢሁ እምአይቴ እንከ ለነ በገዳም ኅብስት ዘያጸግብ ለዘመጠነዝ ሕዝብ። ወይቤሎሙ እግዚእ ኢየሱስ ሚመጠን ኀባውዝ ብክሙ ወይቤልዎ ሰብዑ ኅብስት ወኅዳጥ ዓሣ። ወአዘዞሙ ለሕዝብ ይርፍቁ ዲበ ምድር። ወነሥአ ሰቡዐ ኅብስተ ወዓሣኒ ወይእተ ጊዜ አእኰተ ወፈተተ ወወሀቦሙ ለአርዳኢሁ ወአርዳኢሁኒ አቅረቡ ለሕዝብ። ወበልዑ ኵሎሙ ወጸግቡ ወአግኀሡ ዘተርፈ ፍተታተ ሰብዐተ አስፈሬዳተ ምሉአ። ወእለሰ በልዑ ዕደው የአክሉ አርብዓ ምእት ብእሲ ዘእንበለ አንስት ወደቅ። ወፈቲሖ አሕዛበ ዐርገ ውስተ ሐመር ወሖረ ውስተ ደወለ መጌዶል።

להקשיב ל ወንጌል ዘማቴዎስ 15