If you have would like a copy of this version please contact info@davarpartners.org

Text: Bilaspuri New Testament, CC-BY-SA-4.0, The Love Fellowship. Audio: Bilaspuri New Testament Audio Bible, CC-BY-SA-4.0, Davar Partners International, Hosanna/Faith Comes by Hearing), 2021

Bilaspuri New Testament

This work is licensed under Creative Commons Attribution-ShareAlike 4.0 License.

इन्हां गल्लां ते बाद यहूदियां रा इक त्योहार हुया, कने यीशु यरूशलेम नगरा जो गया। यरूशलेम च भेड-फाटका ले इक कुण्ड आ सै जे इब्रानी भाषा च बैतहसदा नौआं ते जाणया जां; तिसरे कनारे पांज्ज बराण्डे बणीरे। इन्हां बराण्डयां च बौहत सारे अन्हे, लंगड़े, बमार कने लकवे रे रोगी (पाणिये रे हिलणे रिया आशा च) पैईरे रैं थे। काँह्भई इक येढ़ा बगत हुआं था ताहली जे परमेशरा रे स्वर्गदूत कुण्डा च आईने पाणिये जो हिलां थे। पाणिये रे हिल्दे इ पैहले सै जे कोई कुण्डा च उतराँ, सै अपणियां सारियां बमारियां ते ठीक हुई जां था, चाये तिसरी कोई बी बमारी काँह नीं ओ। इन्हां रोगियां च इक येढ़ा रोगी बी था सै जे ठत्तियां साल्लां ते बमार पैईरा था। ताहली जे यीशुये तिस्सो देख्या कने तिसरे बारे च सारा हाल जाणीने भई ये कईयां साल्लां ते इसा हालता च पैईरा, तां तिने तिसते पुच्छया, “क्या तू ठीक हूणा चाँह?” तिने रोगिये तिस्सो जबाब दित्या, “प्रभु जी, मेरले कोई माहणु निआं सै जे पाणिये रे हिलणे पर, मेरी कुण्डा च जाणे च मदद करा; पर ताहली जे हऊँ पाणिये च जाणे री कोशिश करां, तां मेरे जाणे ते पैहले कोई दुज्जा माहणु पाणिये च उतरी जां।” यीशुये तिसजो गलाया, “उट्ठ, अपणी चट्टाई चक्कीने चल फिर।” सै माहणु इकदम ठीक हुईग्या, कने अपणी चट्टाईया चक्कीने चलने फिरने लगया।
सै विस्राम दिन था। इस खातर यहूदी अगुवे तिस ठीक हुईरे माहणुये जो गलाणे लगे, भई आज्ज त विस्राम दिन आ, “तिज्जो अजके दिन अपणिया चट्टाईया जो चकणे री इजाजत नीं।” इस पर तिने जबाब दित्या, भई “तिने जे हऊँ ठीक कित्या, तिने इ मिन्जो गलाया, ‘अपणी चट्टाई चक्क कने चल फिर।’ ” तिन्हे लोकें तिसते पुच्छया, “सै कुण माहणु आ तिने जे तिज्जो गलाया, ‘चट्टाई चक्क कने चल फिर’?” पर सै माहणु जे ठीक हुईरा था, सै नीं जाणदा था भई सै कुण आ, काँह्भई तिसा जगह मती भीड़ थी कने यीशु ऊत्थीते चुपचाप चलिग्या। इन्हां गल्लां ते बाद सै माहणु यीशुये जो मन्दरा च मिलया कने तिस्सो गलाया, “देख, हुण तू त ठीक हुईग्या; इस खातर दोबारा पाप देक्खां करदा, नैत किति येढ़ा नीं ओ भई कोई इसते बड्डी मुश्कल तूह पर आई जाओ।” तिने माहणुये जाईने यहूदी अगुवेयां ने बोलित्या भई तिने जे हऊँ ठीक कित्या, सै यीशु आ। इसा बजह ने यहूदी अगुवे यीशुये जो तंग करने लगे, काँह्भई सै येढ़े काम्म विस्राम रे दिन कराँ था। इस पर यीशुये तिन्हाजो गलाया, “मेरा पिता परमेशर कदीं काम्म बन्द नीं करदा, इस खातर हऊँ बी लगातार काम्म कराँ।” इसा बजह ने यहूदी अगुवे तिसजो मारने री होर बी जादा कोशिश करने लगे, काँह्भई सै न सिर्फ विस्राम रे दिना री बिधिया जो तोड़ां, पर परमेशरा जो अपणा पिता बोलीने, अप्पूँजो तिसरे बराबर समझां था।

इस पर यीशुये तिन्हांजो गलाया, “हऊँ तुहांजो सच्चाई दस्सां, भई पुत्र यनि हऊँ खुद अपणे आप किछ मनी करी सकदा, सै सिर्फ तियां कराँ तेढ़ा जे सै पिता परमेशरा जो करदे देक्खां; काँह्भई तिन्हां-तिन्हां कम्मां जो जे सै कराँ तिन्हांजो हऊँ पुत्र बी तियां इ कराँ। काँह्भई पिता परमेशर पुत्रा ने प्यार कराँ कने जितने काम्म जे सै खुद कराँ तिन्हां सारयां कम्मां जो सै तिस्सो दस्सां, कने पिता इन्हाते बी बड्डे काम्म तिस्सो दसणे, ताकि तुहें हैरान हुईजो। काँह्भई तियां जे पिता मूईरयां जो ठवाल़ीने तिन्हांजो नौंईं जिन्दगी देआं, तियां इ पुत्र बी तिन्हौं जे चाँह तिन्हौं जिन्दगी देआं। कने पिता किसी रा बी न्याय नीं करदा, पर तिने न्याय करने रा सारा काम्म पुत्रा जो सौंपीतरा, इस खातर भई सारे लोक तियां जे पिता परमेशरा रा आदर कराँ ये तियां इ पुत्रा रा आदर बी करो। सै माहणु जे पुत्रा रा आदर नीं करदा, सै तिस पिता परमेशरा रा आदर बी नीं करदा तिने जे मिन्जो भेज्जिरा। हऊँ तुहांजो सच्च बोलां, सै जे मेरा बचन सुणीने मेरे भेजणे औल़े पर विश्वास कराँ, सै अनन्त काल रा जीवन पां; कने तिस पर सजा रा हुक्म नीं हुन्दा, पर सै अनन्त काल रिया मौती ते बचीने पैहले तेई नईया जिन्दगिया च दाखल हुई चुक्कीरा।
“हऊँ तुहांजो सच्च बोलां भई सै बगत औणे औल़ा बल्कि आई चुक्कीरा, तिसच जे आत्मिक तरिके ने मूईरयां लोकां परमेशरा रे पुत्रा रा यनि मेरा बचन सुणना, कने सै जे सुणगे तिन्हां अनन्त जीवन पाणा। काँह्भई जिसा रितिया ने पिता परमेशर अप्पूँ च जीवन रखां, तियां इ तिने पुत्रा जो बी ये अधिकार दित्या भई अप्पूँ च जीवन रक्खूँ; बल्कि मिन्जो न्याय करने रा बी अधिकार दित्या, इस खातर भई हऊँ माहणुये रा पुत्र आ। इसते चम्भा नीं करा; काँह्भई सै बगत आई कराँ भई जितने मूईरे लोक ये, तिन्हां मेरा बचन सुणीने कब्रां ते बाहर निकल़ी औणा। तिन्हेजे खरे काम्म कित्तिरे थे तिन्हां अनन्त जीवन पाणे रे खातर जिऊंदा हुई जाणा, कने तिन्हे जे बुरे काम्म कित्तिरे तिन्हौ बी मूईरयां चा ते उट्ठीने इन्हां बुरयां कम्मां री सजा भुगतणे पौणी।

“हऊँ खुद अप्पूँ ते किछ मनी करी सकदा; पर हऊँ सै जे किछ परमेशरा ते सुणां, सिर्फ तिसरे इ मुतावक न्याय कराँ; कने मेरा न्याय सच्चा, काँह्भई हऊँ अपणिया इच्छा ते नीं बल्कि तिसरी इच्छा चाँह तिने जे हऊँ भेज्जिरा। जे हऊँ खुद अपणी गवाही देऊं, तां मेरी गवाही सच्ची नीं। मेरिया तरफा ते गवाही देणे औल़ा इक होर आ, कने हऊँ जाणाँ भई सै जे मेरी गवाही देआं सै सच्ची। तुहें लोकां जो यूहन्ने ले भेज्या कने तिने सच्चाईया री गवाही दित्ति। पर हऊँ अपणे बारे च माहणुआ री गवाही नीं चाहन्दा; तां बी ये गल्लां हऊँ इस खातर बोलां भई तुहांरा छुटकारा हुई सक्को। यूहन्ना तिस दिऊए साई था सै जे बल़िने रोशनी देआं, कने तुहांजो थोड़िया देरा खातर तिसरिया जोता च मगन हूणा ठीक लगया। पर मेरले सै जे गवाही सै यूहन्ने रिया गवाहिया ते बी बड्डी; काँह्भई सै काम्म जे पिता परमेशरे मिन्जो पूरा करने खातर सौंपीरा यनिके हऊँ तिन्हां इ कम्मां जो करी रां कने सैई काम्म मेरे गवाह ये भई पिता परमेशरे मिन्जो भेज्जिरा। कने पिता परमेशर तिने जे हऊँ भेज्जिरा, तिने इ मेरी गवाही दित्ति। तुहें लोकें न कदीं तिसरी अवाज सुणिरी, कने न तिस्सो आमणे सामणे देखीरा; कने पिता परमेशरा रा बचन अपणे अन्दर नीं रखदे, काँह्भई तिस्सो जे पिता परमेशरे भेज्जिरा तुहें तिस पर विश्वास नीं करदे। तुहें पवित्रशास्त्रा च टोल़ां ये, काँह्भई तुहें समझां ये भई तिसच तुहांजो अनन्त जीवन मिलां, पर ये सारे पवित्रशास्त्र मेरी इ गवाही दें; फेरी भीं तुहें अनन्त जीवन पाणे खातर मेरले नीं औणा चाहन्दे। हऊँ माहणुआं ते आदर नीं चाहन्दा। पर हऊँ तुहांजो जाणाँ भई तुहांरे अन्दर परमेशरा रा प्यार निआं। हऊँ अपणे पिता परमेशरा रे नौआं ते आईरा, कने तुहें मिन्जो ग्रहण नीं करदे; पर जे कोई होर अपणे इ नौआं ते आओ, तां तिसजो ग्रहण करी लेणा। तुहें माह पर विश्वास नीं करी सक्कां ये, काँह्भई तुहें त अप्पूँ बाटियें इक दुज्जे ते आदर लेणा पसन्द कराँ ये, कने तुहें इकमात्र परमेशरा ते तारीफ पाणे री कोशिश नीं करदे। ये नीं सोच्चा भई माह पिता रे सामणे तुहां पर दोष लगाणा; तुहां पर दोष लगाणे औल़ा त मूसा, तिस पर जे तुहें भरोसा रखीरा। काँह्भई जे सच्चीजो तुहें मूसे पर विश्वास करदे, तां तुहें माह पर बी विश्वास करदे हुन्दे, इस खातर भई तिने मेरे बारे च लिखिरा। पर जे तुसें तिसरी लिखी रियां गल्लां पर इ विश्वास नीं करदे, तां मेरियां गल्लां पर कियां विश्वास करगे?”

להקשיב ל यूहन्ना 5