Cishingini: Uzuwakpani u Savu n Cishingini; n aba'in a na a Zagbai a Uzukpani New Testament

Uzuwakpani u Savu n Cishingini; n aba'in a na a Zagbai a Uzukpani

Kanna ke te ka nan lo, Yesu u ka̱sa̱kpa̱i kpaꞋa ka, ɗa u banai a̱ ka̱kina̱ ka mala, u da̱sa̱ngi ɗe, ɗa u yaꞋin kuyotsongusu. Ka̱bunda̱i ka uma ka na ko ɓolongi wa̱ ni ki ta̱ n a̱bunda̱i, ali ɗa u uwai a kpantsu ɗa u da̱sa̱ngi punu, ka̱bunda̱i ka uma ka tamkpamu ka shamgbai a̱ ka̱kina̱ ka mala. Ɗa u yotsongushi le ili n a̱bunda̱i n agisana. U danai, “Vuma vi yoku ɗa u banai kuvishangu icuꞋu a kashina ka̱ ni. A̱yi a kuvishangu, ɗa icuꞋu i yoku i yikpa̱i a uye, ɗa nnu n yawai n ka̱ɗa̱i i ɗa. IcuꞋu i yoku i yikpa̱i a kagbata, ɗa yu uta̱i gogo lo, adama a na ubuta̱ wa wi n kayala ka̱u ba. Amma ana kanna ku uta̱i, ɗa ko songi i ɗa, adama a na ka̱ta̱ abinya a a zuwai aralu a utsura kpamu ba, ɗa e ɗekpei gogo lo. IcuꞋu i yoku i yikpa̱i a̱ ubuta̱ wa awana. Ana i gbonguroi, ɗa awana a̱ kpa̱Ꞌi le ɗa a̱ ka̱na̱i kara le. IcuꞋu i yoku i yikpa̱i a iɗika i singai, ɗa i gbonguroi ɗa a matsai arata a gbagbaꞋin. A̱ ma̱ca̱Ꞌa̱tsu dem ma na kacimbi ka ka vishangi, i yoku i matsai arata ali amangatawun, i yoku amangatatsu, i yoku kpamu kamankupa. Vuza na baci de dem wi n atsuvu a kupana, u pana!”


Mukumitoni n ni m banai wa̱ ni ɗa me ecei ni, “Yi ɗa̱i i zuwai ɗa vi ci yaꞋanka uma kadanshi n agisana?”
Ɗa wu ushuki, “A zagba ɗa̱ ta̱ adama a na i yeve ukuna wi ili i na yi usokongi i tsugono tsu gaɗi, amma aza o yoku e kuyeve ili yi usokongi i nam pa ya ba. Ka̱shile ki ta̱ o kudoku kuneke ka̱u vuza na wi n ili ɗe. Amma uma a na i n ili ba, i ta̱ a kunamba ko ili i kenu i na i n i ɗa. Ili i na i zuwai ɗa n ci yaꞋanka le kadanshi n agisana i ɗaɗa:
‘I ta̱ a kinda, amma e kene ba,
i ta̱ kpamu a kupana, amma e kuyeve ba.’
Ɗa uzuwakpani u Ka̱shile wo okpoi mayun, uteku u na keneki Ishaya u danai:
‘Uma a nam pa i ta̱ a kupanasa kadanshi ka̱ va̱,
amma e kuyeve kaꞋa ba.
I ta̱ e keneshe ili i na n yaꞋansai,
amma e kuyeve ko yi ɗa̱i ili ya ba.
Adama a na a̱ɗu a uma a nam pa i ta̱ ukpanduki,
o votsuku ta̱ kpamu atsuvu e le,
ɗa kpamu a̱ yimba̱sa̱ka̱i a̱shi e le, ali ɗa a̱ kpa̱ɗa̱i kene,
atsuvu e le kpamu a kupana ba,
a̱ɗu e le kpamu e kuyeve kakuna ba,
ta baci nannai ba, ishi ta̱ o kubono wa̱ va̱,
ka̱ta̱ m potsokpo le.’
“Amma a̱ɗa̱ Ka̱shile ka zuwaka ɗa̱ ta̱ una̱singai, adama a na a̱shi a̱ ɗa̱ i ta̱ e kene, atsuvu a̱ ɗa̱ kpamu i ta̱ a kupana! Eneki n a̱bunda̱i n uma a̱ usuɓi† a̱ Ka̱shile a ciga ta̱ e ene ili i na ye enei, ka̱ta̱ kpamu a pana ili i na i panai. Amma n dana ɗa̱ e ene ba, a pana ba.


“Panai, ka̱ta̱ i yeve ili i na agisana a vuza vu kuvishangu va i. IcuꞋu i na i yikpa̱i a uye, ele ɗa aza a na a panai kadanshi ko tsugono tsu Ka̱shile, amma e yeve kaꞋa ba. Ɗa vuza gbani-gbani u banai ɗa u fa̱ba̱na̱i kaꞋa a̱ a̱ɗu e le. IcuꞋu i na i yikpa̱i a kagbata i ɗaɗa aza a na a panai kadanshi ka̱ Ka̱shile, ɗa a̱ ushuki n kaꞋa m ma̱za̱nga̱ gogoꞋo lo. Amma a zuwa aralu a na i n utsura ba, ɗa a̱ kpa̱ɗa̱i kuyaꞋan megeshe. Ayin a na atakaci a cinai le adama a kadanshi a, ka̱ta̱ o bono n ka̱ca̱pa̱. IcuꞋu i na i yikpa̱i a̱ ubuta̱ wa awana, ele ɗa feu aza a na a panai kadanshi ka. Amma ɗa a̱ gita̱i koꞋuso ka̱ci ke le ubuta̱ wi ili ya aduniyan, ɗa ucigi wu uciyi wa aduniyan u kparasai le. Ɗa kadanshi ka ka̱ kuwa̱i, ɗa i iwain kumatsa ili i ma̱riki. IcuꞋu i na i yikpa̱i a iɗika i singai i ɗaɗa aza a na a panai ɗa e yevei kadanshi ka. Ɗa uma a o gbonguroi ɗa a matsai arata a gbagbaꞋin, ana a lapai a ɗa ele vi yoku a̱ ciya̱i ili amangatawun kpamu, aza o yoku amangatatsu, aza o yoku kamankupa.”

Ɗa Yesu u danai le agisana o yoku kpamu: “Tsugono tsu gaɗi ci ta̱ nahannai: Vuma vi yoku ɗa u ca̱Ꞌi icuꞋu i singai a kashina ka̱ ni. Kayin ke te, yaba dem a alavu, ɗa vurala vi ni vu banai ɗa vi ca̱Ꞌi ilya i gbani-gbani punu a̱ ubuta̱ wi ilya ya. Ɗa ilya ya n akaꞋa a a̱ ka̱na̱i kugbonguro koɓolo. Ana agbashi a vuma a e enei nannai ɗa a banai wa̱ ni ɗa a danai, ‘IcuꞋu i singai i ɗa vi ca̱Ꞌi a kashina ka̱ nu. Te ɗai tamkpamu akaꞋa a a̱ uta̱i?’
“Ɗa vuma va wu ushuki, ‘Vurala vu va̱ ɗa u ca̱Ꞌi le.’
“Ɗa agbashi a e ecei ni, ‘Vi ciga ta̱ tsu muɗa̱ a ɗa?’
“Ɗa vuma va wu ushuki, ‘A̱Ꞌa̱, adama a na i muɗa̱ baci akaꞋa a, yoku ba yi ta̱ a̱ kumuɗa̱ punu feu ilya ya. Ka̱sa̱kpa̱i akaꞋa a n ilya ya i gbonguroi koɓolo ali a kubana ayin a vikyaꞋa. Ka̱ta̱ n dana aza a ulinga, o ɓolongu biꞋi akaꞋa a cau, ka̱ta̱ a shiya a̱ ubuta̱ u te, o songu. Ka̱ta̱ o ɓolongu ilya ya a̱ tuka̱ n i ɗa o mopon ma̱ va̱.’ ”


Yesu u danai le agisana o yoku: “Tsugono tsu gaɗi ci ta̱ nahannai: Vuma vi yoku ɗa u ɗikai icuꞋu i musta,† ɗa u ca̱Ꞌi a kashina ka̱ ni. I ɗa i laꞋi n kenu a̱ ka̱tsuma̱ ki icuꞋu dem, amma i gbonguro baci, i tsu laꞋa ta̱ ica̱Ꞌa̱shi dem m gbayin. I tsu okpo ta̱ an maɗanga, ka̱ta̱ nnu n zuwa ɗe cikinda a acaka a̱ ni.”


Yesu u doku u danai le agisana o yoku: “Tsugono tsu gaɗi ci ta̱ nahannai: Vuka vi yoku ɗa vi ɗikai kusasu ɗa u satarai n kiya ka̱ a̱bunda̱i a masasu, ɗa ku ka̱ra̱Ꞌi ra̱ka̱ ɗa ku shitai.”


Ayin a na baci Yesu u danai ka̱bunda̱i ka uma ili i nam pa, u tsu dansa ta̱ n agisana. U tsu dansa ili ba, sai n agisana. U yaꞋan ta̱ nannai adama a na u zuwa ili i na keneki ka danai yo okpo mayun:
“Mi ta̱ a kuyaꞋanka ɗa̱ kadanshi n agisana.
Mi ta̱ a kudansa ili i na yi lo usokongi ali ayin a na Ka̱shile ka yaꞋin aduniyan.”

Ana Yesu u ka̱sa̱kpa̱i ka̱bunda̱i ka uma ka, ɗa u uwai a kpaꞋa ka, ɗa mukumitoni n ni m banai wa̱ ni ɗa a danai, “Dana tsu ili i na agisana a akaꞋa a kashina ka i.”
Ɗa wu ushuki, “Vuza na u ca̱Ꞌi icuꞋu i singai, a̱yi ɗa Maku ma Vuma. Kashina ka ɗaɗa aduniyan, icuꞋu i singai tamkpamu ele ɗa aza o tsugono tsu Ka̱shile. AkaꞋa, ele ɗa uma a vuza gbani-gbani. Vuza na kpamu u ca̱Ꞌi akaꞋa a a̱yi ɗa Kalijani. Ayin a vikyaꞋa a ɗa ayin a ukocishi wa aduniyan. Aza o kuɓolongu ili i na a kyaꞋi va, ele ɗa alingata a̱ Ka̱shile.
“AkaꞋa a tsu ɓolongu le ta̱ ka̱ta̱ o songu. Ta ki o kokpo nannai ayin a ukocishi. Mpa, Maku ma Vuma, mi ta̱ a̱ kusuku alingata a̱ va̱, ka̱ta̱ a yaꞋan vikyaꞋa punu o tsugono tsu va̱. Ele i ta̱ a̱ kuta̱ka̱ uma a wasasa dem n ili i na yi a kuzuwa uma a yaꞋan unushi n kavama. I ta̱ a kutaɗuku le a̱ kunu ku na ki n akina n usuɗukpi ka̱u, ta ɗe a̱ kushika̱sa̱ n a lumamgbanai ngaꞋan adama a̱ mɓa̱la̱. Uma a̱ ma̱riki a̱ Ka̱shile tamkpamu i ta̱ a kakana an kanna o tsugono ce Esheku e le. Vuza na baci de dem wi n atsuvu a kupana, u pana!

“Tsugono tsu gaɗi ci ta̱ nahannai: Vuma vi yoku ɗa vi ciya̱i uciyi u na vuza yoku u sokongi a kashina. Ɗa u doku u sokongusuki u ɗa mayin. U yaꞋin ma̱za̱nga̱ ka̱u, sapu ɗa u banai u dengei i na wi n i ɗa dem, ɗa u bonoi u tsulai kashina ka.

“Tsugono tsu gaɗi kpamu ci ta̱ nahannai: Zatsulaga vi yoku ɗa vuza na u tsu la̱nsa̱ nwaru mi ikebe† ka̱u. Ana u ciya̱i me te ma na ma laꞋi n na m buwai n tsuloboi, ɗa u banai u dengei ili i na wi n i ɗa dem, ɗa u tsulai mawaru mi ikebe ma.

“Tsugono tsu gaɗi ci ta̱ kpamu nahannai: Osoruku o yoku a ɗa a taɗuki maza ma̱ bilili me le a mala, ɗa a̱ ka̱na̱i icuꞋu ya adan kakau n a̱bunda̱i. Ana adan a shanai a maza ma, ɗa o ronoi maꞋa ɗa a̱ uta̱ka̱i pulai, ɗa a̱ da̱sa̱ngi adama a na e pecuku a ɗa. Ɗa a zuwai adan a singai a makpaɓu, ɗa a varuki a gbani-gbani a daꞋin. Ta ki o kokpo nannai ayin a ukocishi. Alingata i ta̱ a̱ kuta̱wa̱ ka̱ta̱ e pecuku uma a gbani-gbani a̱ ubuta̱ wa aza a singai. Alingata i ta̱ a kutaɗuku uma a gbani-gbani a̱ kunu ku na ki n akina n usuɗukpi ka̱u, ta ɗe a̱ kushika̱sa̱ n a lumamgbanai ngaꞋan adama a̱ mɓa̱la̱.”

Yesu we ecei le, “I yeve ta̱ ili i nam pa ya ra̱ka̱?”
Ɗa a̱ ushuki, “E, ci yeve ta̱.”
Ɗa u danai le, “Malum ma̱ Wila̱ dem ma na ma piꞋisai ukuna u tsugono tsu Ka̱shile, wi ta̱ tsu vuza vu kpaꞋa. A̱yi u tsu uta̱ka̱ ta̱ uciyi u savu koɓolo n u kuku a̱ ubuta̱ u na wi ishi u zuwai u ɗa.”


Ana Yesu u kotsoi kudansa agisana a nam pa, ɗa u ka̱sa̱kpa̱i ubuta̱ wa. Ɗa u bonoi a Nazara, likuci i ni a̱ ubuta̱ u na u kumgbai. Ana u yaꞋin kuyotsongusu a̱ kunu ka avasa, yaba dem u yaꞋin mereve ɗa u danai, “Te ɗai u ciya̱i kuyeve ku ni n utsura u kuyaꞋan ili i mereve i nam pa? A̱yi maku me kesheꞋwi maꞋa koci. A̱na̱ku a̱ ni a ɗa Meri, amgbu a̱ ni a ɗa anan Yakubu n Isuhu† n Sima, koɓolo n Yahuza. Itaku i ni kpamu yi ta̱ na koɓolo n a̱tsu. Nini ɗai u kuyaꞋan ili i nam pa dem?” Adama a nannai ɗa a iwain ni.
Amma ɗa u danai le, “A ci cikpa ta̱ keneki a̱ ubuta̱ dem, amma a̱ likuci i ni m kpaꞋa ku ni a ci cikpa yi ba.”
Adama a nannai u yaꞋan ili i mereve n a̱bunda̱i ɗe ba, adama a na i n uneki wa̱ a̱ɗu ba.

להקשיב ל Matiyu 13