YAM JAH 3
3
Pa Nyaw Glaw Ka Kawn Pui
1Siuing#Jhi 12:9, 20:2 mawh pa nie lhak khaing can totiag kuceu piang haktiex pa hoik phan Simiang Siyiex. Siuing ah nin ka sibun, “Siyiex hoik ah ka pax sonsang ang pax ih plix khaox kuceu pa koe daux sipeem tete lie?” 2Sibun deeh ah nin ka siuing, “Yiex pon ti ih plix khaox pa koe daux sipeem” 3Viang mawh nan, Siyiex hoik ah nin, “Pax tak ang pon ti ih ang pon teei ka plix khaox pa koe sigreung sipeem, phan pax ih, pax tak yum heue.” 4Siuing deeh ah nin ka pui bun, “Pax ang doh yum tete. 5Siuing baox ah nin ka bun, “Siyiex tawng ngai pax tak blah mai lih tawng pa mhawm mai pa ang mhawm ngaix ih pax plix khaox an heue.” 6Yam yaox pui bun ka plix khaox an, mawh pa mhawm son pa ih mai koe grang pa nyawm ti jhak ka ngai tix, grawng simie nawh plix khaox an, tawx krax tawng yung ka tix, nawh tom teei ti ih plix khaox an mai nawh tawx ka mex tix ih heue. 7Khaix an ngai kiex blah khawm ra mai tawng ang kraung ceep tix koe mai kiex caing ti ceep kraung ka lhax khaox ruh sonsang kheem ka cao tix heue. 8Yam bo praix, kiex mhong lox pa hoek Simiang Siyiex daux sipeem mai moeng nawh mox tix sinax khaox daux sipeem sivoe ngai Simiang Siyiex heue. 9Simiang Siyiex kok ka pui simex ah nin ka nawh, “Ot pax dee mawx?” 10Nawh pawk ah nin, “Aux hoik mhong lox kok yo Maix Cao daux sipeem, aux koe krax lhat graung, grawh grawng nawh aux ang lai koe kraung ceep mai mox cao tix jao an heue.” 11Nawh Cao deeh ah nin, “Mawh mawx pa krai pax ang koe kraung ceep lie? hoik ih pax plix khaox pa ang Aux kieh pax ih lie?” 12Khaix an kawn pui deeh ah nin, “Sibun pa tawx Maix Cao ot mai aux, nawh tawx plix khaox an ka aux, aux hoik ih heue.” 13Simiang Siyiex ah nin ka sibun, “Maix hoik yuh ceu inkix jao patix lie?” sibun deeh ah nin, “Siuing hoik pie ka aux, #2Kaw 11:3 aux hoik ih heue.” 14Simiang Siyiex ah nin ka siuing, “Mawh kheu hoik yuh maix ceu inkix, maix tak pon pa jhax lawg lheu khaing tobrie, totiag haktiex khawmuik heue. Maix tak mu ka vaig tix mai ih phawng tiex tom sidah ju tix. 15Aux tak kieh pa koeng koe sinax maix mai pui sibun, doeh ru maix mai doeh ru sibun, nawh tak dig kaing maix khlaix mai maix tak mat yuh loek caong nawh heue.” 16Nawh Cao ah nin ka bun, “Aux tak sang nie blon tawx krax kha rhawm ka maix ka daux pa keh maix kawn tix maix tak lo ka mex tix mai nawh tak sang kwang piang maix heue.” 17Khaix an Nawh Cao ah nin ka pui simex, “Mawh kheu nghiet maix ka lox moeng tix mai ih plix khaox pa tawm Aux maix ang ih, haktiex tak mawh pa jhax lawg kheu maix, maix tak yaox ti ih khaing nawh ka daux pa kha rhawm tix, tom sidah ju tix heue. 18Kat lawm mai pang kat khankix tak lih koe son maix, #He 6:8 maix tak ih taux lhax khaing haktiex. 19Maix tak lih rawm lah rawm lee, son sang pon maix ti ih priex preem mai deeh ing ka phawng tiex heue. Grawh grawng nawh maix hoik mawh pa yuh Aux khaing phawng tiex mai tak deeh ing ka phawng tiex heue.” 20Pui simex kok ceu kaux moeng tix mawh Evax, kheu mawh nawh miex kawn pui pa im ju heue. 21Son Adam mai moeng nawh, Simiang Siyiex yuh kraung ceep ka hak mai tawx kiex ceep ka heue. 22Khaix an Simiang Siyiex ah nin, “Jhak heue, kawn pui hoik lih ti tawng pa mhawm mai pa ang mhawm awm Siyiex, yam in paw lai kieh nawh nyeu taix tix teei ti ih ka plix khaox im ju#Jhi 22:14 an mai im ju leeing ju heue.” 23Mawh kheu nan Simiang Siyiex grheu kiex lih khaing daux sipeem Eden mai kieh kiex thai ti ih piang tiex, khaing tiex pa hoik kaoh kiex ka heue. 24Nawh Cao grheu kiex lih khaing tan mai Nawh Cao deeh deuh Cherubin plak lih singaix sipeem Eden mai tawx vaid ngu sah pa lawm ka nawh, sonsang pau krax ku krax, son daux krax pa hu ka khaox im ju an heue.
હાલમાં પસંદ કરેલ:
YAM JAH 3: WCL
Highlight
શેર કરો
નકલ કરો
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012