От Матфея 19

А̄пқуӷа̄лъҳыт Пылъҳутутылъыӷмың

1Иисусым тама̄кут апыҳтӯсяқныӷмың та̄қсямики аӷуляқыхкақ Галилеямың, нунаңанун Иудеям, иңлюңанилңуӷмун Кӣўым Иорданым. 2Юлӷутыҳлъягыт малихлъыӷа̄тка̄т ынка̄м таўани на̄лъҳуқуқӣ қинуюгыт.

3Иляңита Фарисеит такулюку анагнӣлъқавигиӷналюку а̄птыка̄т: «Лӣлиҳтӯсямнъи итагнаҳта̄ югым пыхтыкумигу нулӣни сяңўа̄ алңунак апалъюқлъюку?»

4Иисусым кӣмсиқӣ: «Атиҳтӣгастыкӣ Акузитыт Игақыхкат хўатын пилъҳит: “Пӣнлиӷьюхўа̄лъыӷми Кияӷнық юңлъяӷақңами улимакақыхкык югылъю, аӷна̄млъю”?» 5Ынка̄м пикӣ: «Та̄на апалъюқлъюку югым атанилъю, на̄нилъю унилъюкык, нулиҳқулъҳӣк қырңуӷулъықук, ынка̄м ата̄сӣҳлъықук югусӣк. 6Ынка̄ңам ма̄лӷугунаниҳтук, ата̄сӣҳтук югусӣк. Тама̄кын апалъюқлъюку Кияӷныӷым қырңуӷутыстыкакык йықай югым пылъҳутутысныӷилъикык».

7Фарисеит а̄птыка̄т: «Сяңанми Моисейем Лӣлиҳтӯсялитилъю югмун игалитысқылъюку нулиҳа пыхтухсиҳқамың, а̄нысима̄нлъю?»

8Иисусым кӣмсиқӣ: «Моисейем пыхтысяҳқа̄ҳтыстыкақӣ нулӣси қаюҳлъяк пиныҳлъюгулӷӣси. Иўырңа пӣнлиӷьюха̄лъыӷмың Кияӷныӷым таўатытысяҳқа̄нӷинъилюку пикақсяӷа̄. 9Ынка̄м хўаңа пӣмси, югым пыхсяҳқақынӷита̄ нулӣни ўыткуқун гылӷаӷнӣқан. Пыхтыкумигу сямың алъяның апалъюлиӷлюни, нулиҳтунқихтыкуми гылгаӷнӣӷулъықуқ нулиҳқынҳамикун».

10Малихся̄ҳтыңита пика̄т: «Та̄наңинаҳа̄кан апалъюқ югым пыхтусиҳқа̄ нулӣӷминун, ю̄к нулиҳтунӷитыӷңа̄ӷми итагнаӷнаяҳтуқ».

11Иўырңа Иисусым пикӣ: «Та̄на апалъюқ тамаҳаӷми тугуклъиӷна̄нӷита̄т, иўырңа Кияӷныӷым иляңитнун тугуклъиӷьяҳқа̄ҳтыстыкақа̄. 12Иляңи югыт нулиҳтӣгатут алъхықа̄тмыхның евнухыңъулютың. Иляңи нулиҳтӣгатут қаюҳлъяк югыт евнухыңлъяқақӣт. Паниның иляңи евнухыңўа̄қут пиниӷатаӷатун қыпҳа̄нъалюку Кияӷнық Атаныҳпагулъҳани Қилягым. Китум алңунак та̄на тугуклъиӷьяҳқақыхкумигу, тугуклъиӷлигу».

Иисусылъю, Таӷнуҳа̄тлъю

13Та̄хкын таӷнуҳа̄т тагиткӣт Иисусымун ся̄флъюки юӷа̄ткысқылъюки. Та̄ўаңинақ малихся̄ҳтыт иныҳтыкӣт тагитистыңит таӷнуҳа̄т. 14Иўырңа Иисусым пикӣ: «Йықай таӷнуҳа̄т тагилит хўаңамнун. Иныҳтыхпынаки, қаюҳлъяк Атаныҳпагулъҳа Қилягым таӷнуҳаӷыстун аюқылӷӣт пика̄т».

15Ынка̄м ся̄фтақлъюки қуястыкӣ, та̄хкын аӷуляқыхкақ.

Аклъюңилңуқ Нукалъпигақ

16Та̄хкын югым такулюку Иисус а̄птыка̄: «Апыҳтуӷиста, сяңўа̄ пинилӷӣ пияҳқақсикун алъхыӷутусиҳқа̄люку кынлыңилңуӷмың уңувалъыӷмың?»

17Иисусым пика̄: «Сяңан а̄псиңа сяңўа̄ пинӣтаңа? Ата̄сиҳа̄гуқ пинилӷӣ. Кынлыңилңуӷмың уңувалъыңьюкувык қа̄ткики Кияӷныӷым қылӷусӣ».

18Нукалъпигам а̄птыка̄: «Накут?»

Иисусым кӣмсиқа̄: «Юхтаҳпынаң. Гылгаӷнӣҳпынаң. Тыглыхпынаң. Иқлъыңиқуткихпынаң. 19Қӯлваӷлюкык атанлъю, на̄нлъю. Пиниқлъюки юлгутытын пиниқылъыҳпытун лъпынун».

20Нукалъпигам пика̄: «Қамахлъюки та̄кут қа̄ткақанка. Сяңўа̄лъю пияҳқақсикун?»

21Иисусым кӣмсиқа̄: «На̄михтыңъўа̄ӷьюкувгу Кияӷныӷым писқылъҳа лъпынун, агляӷлютын қамахлъюку сяӷьян акиклъюку, акиңа тама̄на аклъюмалӷӣнун тунқуӷнакын. Ынка̄м қилягми аклъюңилгулъықутын, та̄хкын тагилютың малихнакывңа».

22Нукалъпигам нагалъюку, аӷуляқыхкақ ӣлъқыпихлъюни қаюҳлъяк аклъюңитыпихлъыҳӣ.

23Та̄хкын Иисусым малихся̄ҳтыни пикӣ: «Ипа пӣмси, пияқнаӷьяҳқа̄гуқ аклъюңилңуӷмун югмун итылъыҳқа̄ Атаныҳпагулъҳанун Қилягым. 24Уңипа̄нъақлъя̄таӷамси иляңаның, пияқнӣсяҳқа̄гуқ верблюдым сюфлъюӷутылъыҳқа̄ сикӯм ӣйңакун, аклъюңилңӯм югым итылъыҳқа̄ның Атаныҳпагулъҳанун Кияӷныӷым».

25Малихся̄ҳтыт нагасямыхтыху таўатын пилъық сяӷӣӷаюхлъягумаӷмың пикат: «Кинаңам югулилъыңылъықа?»

26Иўырңа Иисусым таўавыҳлъюўа̄қ ысҳаӷлюки пикӣ: «Югыт пияҳқақынӷилъкаңит, Кияӷныӷым пияҳқақӣ».

27Та̄хкын Петырым пика̄: «Ысҳақаҳқутқун, сяңўа̄ қамахлъюку унилъюку малихтыкақамкын. Сяңўа̄ңам алъхыҳлъықыстыху?»

28Иисусым пикӣ: «Ипа пӣмси, нутаӷами нунами Иӷныӷа Югым ақумылъықуқ умӣлгусигныкун ақумутагмикун ниӷуҳқылъыӷмини. Та̄хкын лъпысилъю малигуткани хўаңамнун ақумлюси қуля ма̄лӷук сӣпнықлъюку умӣлгым ақумутӣтхун, иглыӷутилъықуси қуля ма̄лӷук сӣпнықлъюку рамкыни Израилым. 29Ынка̄м хўаңа апалъюқлъюңа килъю алңунак унискумыхтыки мыңтыӷатың, аңлыгутытың, наятың, ататың, на̄тың, авақутатың, налиӷмың пӣтысиӷаӷвитың, нулялъықут ю̄к талъиматалъпаглюку. Кынлыңилңуӷмыңлъю уңувалъыӷмың алъхыӷулъықут. 30Иўырңа а̄ңылӷӣлӷутыт укалӣҳлъықут ынка̄м укаванлыңӯт аңылъҳуҳлъықут».

હાલમાં પસંદ કરેલ:

От Матфея 19: ess2

Highlight

શેર કરો

નકલ કરો