От Матфея 17

Иисусым Алъяңуҳлъыӷа

1Аӷвинлык аӷнық атуӷлюку, Иисусым кылъқыхкӣ Петр, Иаковылъю ынка̄м Иоанным, аңлыгуткулъҳӣк, маю̄ткӣ ӯсқалӷӣмун на̄йӷамун лъңинӣта. 2Ӣйңитның та̄хкын Иисус алъяңуҳтыкақ: хина̄ кӯкхуткақ сиқиныҳтун, а̄ткӣлъю қатыӷракхӯҳтыкат ниӷугыстун. 3Та̄хкын малихся̄ҳтыт ысҳақахкыт Моисейемлъю, Илиямлъю алӣӷлютык алыҳқуқаңак Иисус. 4Ынка̄м Петырым пика̄ Иисус: «Атанық, итагнапихтуқ хўа̄нтылъыҳпут! Пиюкылъқыхкувгу ныкыфлъяңи пиңают азигутат, лъпынунлъю, Моисейемунлъю, Илиямунлъю».

5Сялин акузималюку, қилягўа̄ӷым ниӷугракыхтам ся̄пыхкӣ, ынка̄м қиляўа̄ӷмың мым пикӣ: «Уна Иӷнықақа, пиниқыпихтақа, ыфқуқыпихтақа, нагатақитыху!»

6Малихся̄ҳтыт нагалъюку ма, алиңрӯӷым аңталяңаның нӣнӷуткат нунамун. 7Та̄хкын Иисусым такулюки ся̄флъюки, пикӣ: «Ныкывитык, алиңыхпынаси!» 8Сивухсялӷӣмың Иисусыңинаҳақ ысҳақа̄т.

9Укигуткылъюку на̄йӷамың Иисусым иныҳтыңъўа̄қӣ: «Китумун алңунак апыӷьяқуна̄н ысҳаӷўа̄лъық пинакыси кынляңа Иӷныӷа Югым уңуваҳтыкан туқулъыӷмың».

10Та̄хкын малихся̄ҳтыт а̄птыка̄т Иисус: «Сяңан апыҳтуӷистыңита Лӣлиҳтӯсят пӣқатху Илия сивуклъюни тагипыста̄ӷьяҳқа̄нилюку?»

11Иисусым кӣмсиқӣ: «Ипа Илия тагипыста̄ӷьяҳқа̄гуқ, ынка̄м сяңўа̄ қамахтыңъўа̄ӷлюку налъҳусянқихлъықа̄. 12Иўырңа уңипа̄тамси Илия тагиңўа̄қа̄гуқ, иўырңа югыт кинаңутаңа налъюкыхкақа̄т, пиюкылъыӷмыгыстунлъю пикақа̄т. Таўатыҳпигақ Иӷныӷа Югым икфиқыслъықа̄т».

13Та̄хкын малихся̄ҳтыт лӣгикыхка̄т Иоанн Крестителым акузиткақыфта̄.

Иисусым На̄лъҳускаңа Мыкылӷӣқ Туӷныӷа̄м Ӣтқа̄

14Юлӷутыҳлъягнун утыӷниӷьята, югым такулюку Иисус, ага сыгысқуҳтыңъина̄маӷми мануңакун пикақ. 15Пика̄: «Атанық, иӷнықа наңлъыгьягутаҳтигу! Сяюхпахталгӯқ, ынңа̄талъ икфиқңӯқ. Аўын кынӷыгнун ӯлъҳаҳтақуқ налиӷмың мыҳқӯтақуқ. 16Малихся̄хтыхпынун тагисяӷақа, иўырңа на̄лъҳутыпагниңитка̄т».

17Иисусым пикӣ: «Лъпыси югни, ухпықилъҳитусилъю, сыӷлыӷўа̄ӷӯсилъю! Натын тахка̄н лъпысининъақсиңа ухпықысқылъюңа? Мыкылӷӣқ хўавык тагитыху!» 18Иисусым аӷью̄қа̄ туӷныӷақ, та̄хкын а̄ныхкақ мыкылӷӣӷмың ынка̄м таўаниңинақ на̄лъҳуткақ мыкылӷӣқ.

19Та̄хкын Иисус лъңина̄ҳсян малихся̄ҳтыңита такулюку а̄птыка̄т: «Сяңан хўаңкута а̄нысныӷмың аҳтуӷыстыху туӷныӷақ?»

20Иисусым кӣмсиқӣ: «Қаюҳлъяк ухпықилъыҳқыста̄ҳа̄лӷӣси. Ипа уңипа̄тамси, ухпықилъылгуяқуфси горчицам пӣтутысқуҳан аңталңатун, уна на̄йӷақ пикуфсигу: “Иңавык нӯхтын!” нӯхнаяҳтуқ. Ынка̄м сяңўа̄ алңунак аҳтуӷнаянӷитаҳси!» 21Иўырңа таўатылңуқ туӷныӷақ юӷаҳӣнаҳқунлъю, посталъыҳқунлъю а̄нысяҳқақаҳси.

Иисусым Акузиткынқихтыкаңа Туқулъыҳқани

22Малихся̄ҳтыт қырңуӷусята Галилеями Иисусым пикӣ: «Иӷныӷа Югым тугулюку тӯнылъықа̄т югнун, 23ынка̄м туқулъықа̄т. Иўырңа пиңайӣтаңани аӷныӷым уңуваҳтысяҳқа̄гуқ».

Та̄хкын малихся̄ҳтыт қивӷуҳлъякат.

Иисусым, Петырым Лъивикыхкат Храмым Налога

24Та̄хкын Иисус малихся̄ҳтыкулъҳӣт Капернаумымун тагията, Храмым налогмың қырңуҳтистыңита такулюку Петр а̄птыка̄т: «Апыҳтуӷистызи Храмым налоганың лъивикӣқа̄?»

25Петырым кӣмсиқӣ: «А̄а, пӣқуқ». Петр итыӷьян мыңтыӷамун Иисусым алыҳқуӷьюхўа̄қа̄: «Симон, натыта лъпык сюмыҳпыни? Кинкуңўа̄қат нунат умӣлгита лъивикистақыхкаңит алъя̄ҳӣнаӷмың налогмың? Нуналгутмыхның пӣқа̄т налиӷмың накумӣның?»

26Петырым кӣмсиқа̄: «Накумӣның».

Иисусым пика̄: «Ынка̄м умӣлгыт югит лъивикина̄нӷитут. 27Иўырңа сыӷлыӷьюхсюнӷитапуң налогмың қырңуҳтистыт. Ынка̄м нулюӷья̄ на̄йвамун иқалъюхтақсюха̄ҳпык қа̄нӷани на̄лъкылъықан мани. Тугулюку лъивикусяҳтуӷнакыфкуң».

હાલમાં પસંદ કરેલ:

От Матфея 17: ess2

Highlight

શેર કરો

નકલ કરો