ZĨRINƆ 12

Yamisi dɛna kũ Pita dana kpɛ́siranwo

1Gɔrɔ kũ̀a kína Hɛrɔdu ɔ pɛ̀tɛ Yesude kenɔa pãsĩpãsĩ. 2À Yuhana vĩ̀ni Yamisi dɛ̀ kũ fɛ̃nɛdao. 3Kũ à è yã bire kɛ̀ Yudanɔnɛ nna, akũ à ɛ̀ra à Pita kũ̀ dɔ. À abirekũ kɛ̀ Burodi Futɛnasari dikpɛ zĩmɛ. 4Kũ à Pita kũ̀, à a dà kpɛ́siran à a nà sozanɔnɛ ń ɔĩ ò a dãkpã. Soza pìnɔ gã̀ do bi gbɛ̃nɔn siisiikɔ̃mɛ lɛu siikɔ̃. À dìtɛ à yãkpatɛ kɛ kãao gbɛ̃nɔ wára Vĩnla dikpɛ gbɛra. 5Akũ ò Pita kũna kpɛ́siran, ama sɔsi gbɛ̃nɔ tɛn adua kɛnɛ zɛnaa sari.

Pita bona kpɛ́siran

6Zĩ kũ tó gu dɔ̀ kũ Hɛrɔdu ni bo kãao, zĩ birea gwãanin Pita tɛn i o soza gbɛ̃nɔn planɔ dagura yĩna kũ mɔ̀kakɔ̃anaao mɛ̀n pla, akũsɔ̃ gbɛ̃nɔn planɔn kú kpɛ́lɛlɛa òtɛn kpɛ́ pì dãkpã. 7Kãnto gɔ̃̀nɔ Dikiri malaikaa gɛ̃̀ gwe, akũ kpɛ́ pì pura kũ̀. À Pita lɛ̀ a gbã̀ntɛrɛɛa à a vù à pì: Ǹ futɛ likalika. Akũ mɔ̀kakɔ̃anaa pìnɔ bɔ̀tɛ a ɔa. 8Akũ malaikaa pìi pìnɛ: Ǹ n uta da ǹ n kyate kpá. Pita kɛ̀ lɛ, akũ malaikaa pìi pì: Ǹ n uta kakara ǹ kũ ǹ tɛ́mai. 9Akũ Pita bò à tɛ̀i. Adi yã kũ malaika tɛn kɛnɛ dɔ̃ yãpura ũro, àtɛn da átɛn nana omɛ. 10Ò gɛ̃̀tɛ gudãkpãri káakula kũ a pladeo, akũ ò kà bĩnilɛa. Bĩnilɛ pìi gbà bi mɔ̀ɔmɛ, akũ à wɛ̃̀ńnɛ kũ a zĩdao. Ò bɔ̀tɛ òtɛn gɛ̃ wɛ̃tɛn, akũ gwe gɔ̃̀nɔ malaikaa pì Pita tò zɛ́da gũn. 11Kũ Pita wɛ́ kɛ̃̀ à pì: Má dɔ̃ sãnsãn sà kũ Dikiri a malaikaa zĩ̀ de à ma bo Hɛrɔdu ɔĩ kũ yã kũ Yudanɔ wɛ́ dɔi ò kɛmɛnɛo pínki.

12Kũ a laakarii sù, à gɛ̀ɛ Yuhana kũ òdi pinɛ dɔ Maaku da Mariama bɛa. Ò kakarana gwe dasidasi òtɛn adua kɛ. 13Kũ à gãnu gbà lɛ̀, akũ nɔgbɛ̃ zĩkɛri kũ òdi pinɛ Roda gɛ̀ɛ gwa. 14Kũ à Pita kòtoo dɔ̃̀, pɔnna gũn adi zɛ́ wɛ̃ro, à bàa lɛ̀ à ɛ̀ra à gɛ̀ɛ à pìńnɛ Pita zɛ kpɛ́lɛlɛa. 15Ò pìnɛ: Ĩa tɛn kámman yá? Akũ à zɛ̀o kũ yãpuramɛ. Akũ ò pì: A malaikaamɛ. 16Pita kpɛ́ àtɛn gbà lɛ́. Kũ ò wɛ̃̀, ò a è, akũ yã pìi bò ń sarɛ. 17Akũ à ɔ kɛ̀ńnɛ yáku ò yĩtɛ, akũ à bàbańnɛ lákũ Dikiri a bo kpɛ́siran nà. Akũ à pì: À gɛ́ à o Yamisinɛ kũ ó gbɛ̃ kparanɔ. Akũ à bò à gɛ̀ɛ gu pãndea dɔ.

18Kũ gu dɔ̀, zuka gbãna kà sozanɔ dagura òtɛn kɔ̃ lala: Bɔ́ mɛ́ à Pita lèe? 19Hɛrɔdu pì ò a wɛtɛ. Kũ odi a lero, akũ à yã làla gudãkpãrii pìnɔa, akũ à pì ò ń dɛdɛ.

Hɛrɔdu ganaa

Abire gbɛra Hɛrɔdu bò Yudea à gɛ̀ɛ à gɔrɔ pla kɛ̀ Sizaria. 20À pɔ fɛ̃̀ Tayadenɔ kũ Sidɔ̃denɔi manamana, akũ gbɛ̃ birenɔ lɛ́dokɔ̃nɔ kɛ̀ ò sù a gwa lɛɛlɛ. Ò gɛ̀ɛ kína pì bɛgwari Blasatu kĩnaa. Kũ Blasatu ń yãzɛ è, ò gɛ̀ɛ lɛ́dokɔ̃nɔ kɛ kũ Hɛrɔduo, zaakũ ń bùsu pɔ́ble dì bo a bùsummɛ.

21Kũ gɔrɔ kũ ò dìtɛ kà, Hɛrɔdu a kíble'utanɔ dà à gɛ̀ɛ à vùtɛ a tìntinnwa, akũ à yã ò gbɛ̃nɔnɛ. 22Gbɛ̃nɔ wiki lɛ̀ ò pì: Luda ke mɛ́ àtɛn yã o, adi kɛ bisãsirinlo. 23Gwe gɔ̃̀nɔ Dikiri malaika a lɛ̀ à a nɛ̀, kũ adi zɔ̃kɔ̃kɛ dɔ̃ Ludanɛro yãi, akũ a mɛ̀ɛ kɔ̀kɔɔ kà à gà.

24Luda yã tɛ́n dagula àtɛn kara. 25Baanaba kũ Soluo sɔ̃, kũ ò ń kámaza yã kɛ̀kɛ ò làka, ò bò Yurusalɛmu ò Yuhana kũ òdi pinɛ Maaku sɛ̀ ò tà kãao.

હાલમાં પસંદ કરેલ:

ZĨRINƆ 12: BB2005

Highlight

શેર કરો

નકલ કરો