Magə 5
5
Yeso a Tsóʼə Ŋwu Tsə̌ páʼ Pɛ̌sê a nə Ńchî nə́ á Mbɨ yə́
(Mat 8.28-34; Luk 8.26-39)
1Pó túmə əfooghɨ Galili ńkwúnə á ndzɛnə́ á mboʼ Gɛlɛsen. 2Əghâ ándó Yeso a nə fɛ́d nə́ á mə́mə aŋkənúʼə́, ŋwu tsə̌ páʼ pɛ̌sê a nə ńchî nə́ á mbɨ yə́ á fɛ́lə á mə́m məse ńgyǐ ńtégə yə́. 3Ŋwu wɨ́d ghɛnə́ a nə̈ ńchîə lə́ á mə́m məse. Mbɔʼ ŋwu tsə̌ a nə ńkě yí pɨ ńkwúd pô, kɨ nə́ məŋkɛd mə́ atəənə́, 4ńté ńgə́ pə́ nə ńchî lə́ ńdzá ńkwúd mbô mí pópə məko mí nə́ məŋkɛd mə́ atəənə́, lə́ a pə́ ńdzá ńdə́gtə məŋkɛd mimə wə́ á mbô yí pópə ətəənə́ pə wə́ á məko yə́. A nə ńtyantə̂ tə́shú tə ŋwu tsə̌ a kě ə́wɨ́ chî təmbɔʼ a pɨ ńgwaamə̂ yí pô. 5Əlě ətsəm pópə mətúʼ mətsəm, a kéelə ńtə́əmə á mə́m məse pópə məŋnkwəənə ḿbóʼə məngoŋ ńtûə ńkə́ʼtə mbɨ əjǐ nə́ məngɔʼə.
6A nə ńdzə́ənə Yeso á ndi yi sɛ, ńkə ndə̌ ńgyǐ ńkwə́ʼtə á mbi yí ńgóʼkə yə́. 7A tíʼ ńkyéŋ nə́ tə́kɔʼ ngye ə́sóŋ ńgə́, “Yeso Mɔ́ Əsê páʼ a Tsɛ nə Ajúmə Atsəm! Gho kwáalə lə́ akə̂ á mbô maŋə? Maŋ póʼ mbô nə́ gho nə́ əlɛ́n Əsê ńgə́ kɔ gho fɛ̂ ngə́ʼ nə́ maŋə!” 8(A kə sóŋ ə́lɨ́d lə́ ńté ńgə́ Yeso a kə sóŋ nə́ yí ńgə́, “Ajwiə təpɔŋ, fɛ́lə á mə́m ŋwu nə́!”)
9Yeso a tíʼ ḿbítə yí ńgə́, “Əlɛ́n əghô lə́ əwə?”
A kwěe ńgə́, “Əlɛ́nə mə lə́, Apoŋə Pəənə, ńté ńgə́ pəg nə́ənə!” 10A pyádnə ḿbóʼmbô nə́ Yeso ńgə́ kɔ a kəm pɛ̌sê pə̂ á mboʼ yi wə́.
11Mɛ́ akwɛlə pəkwúna yətsə́ á nə ńchîə á mbɨ kɔŋ, ḿbáatə ńtə́ ńjîə. 12Pɛ̌sê pə wɨ́ pə́ póʼ mbô nə́ Yeso ńgə́, “Tsɛɛkə̂ áwə́gə́ á mə́m pəkwúna pi ńgɛd pəg ghɛn ńkwúnə á mə́m pó.” 13A tíʼ ḿbí ńgɛd əjwi təpɔŋ pə̂ ə́ fɛ́lə á mə́m ŋwu wə̂ ńgɛn ńkwúnə á mə́m pəkwúna pə̂. Akwɛlə pəkwúna zə̂ tsɔʼə atsəm tə ńkoʼə̂ ándó tɔsə pɛ̌ a tíʼ ə́shwəənə̂ á mbɨ nkəŋə́ ńtíʼ ńtsó ńkwúnə á mə́m əfooghɨ ə́fə́mnə á mə́m nkǐə.
14Pɨ páʼ pə́ nə̈ ńtseŋnə̂ nə́ pəkwúna pi wɨ́ pó tíʼ ńkə ndə̌ ńgɛnə̂ á mə́mə aláʼ pópə mbɛnə́ mə́ aláʼ ə́fiʼtə̂ anuə atsəm páʼ á laŋ nə́. Ŋwu ntsəmə a tíʼ fɛ́d ńgɛnə̂ á mə́ jɨ́ nə́ anu páʼə á laŋ nə́. 15Pó nə ńgyǐəə á mbô Yeso ńdzə́ənə ŋwu wə̂ páʼə apoŋə pɛ̌sê a nə ńchî nə́ á mbɨ yí lə́, a náanə ńgwê ətsəʼ pí, əjî əyí ə́ kə́ ńchî əshîʼnə. Pó pɔ́g lɛ tətətə. 16Pɨ pə́ nə́ ńjɨ́ nə́ anu yə wɨ́ pó tíʼ ə́fiʼtə̂ ŋwu ntsəm nə́ anu páʼə á laŋ nə́ nə́ ŋwu wə̂ páʼ pɛ̌sê a nə ńchî nə́ á mbɨ yí lə̂, ńkə́ ə́sóŋə anu ńté pəkwúna pə̂. 17Pɨ pipə wɨ́ pó tíʼ ńchúʼə á mə́ póʼ nə́ mbô nə́ Yeso ńgə́ a fɛ́lə yə́ á əlá aláʼ pó.
18Ndzaŋə ándó Yeso a nə ńtə́ nə́ ńkwúnə á mə́mə aŋkənúʼə́ lə́, ŋwu wə̂ páʼ pɛ̌sê ə́ nə ńchî nə́ á mbɨ yí lə́ a póʼ mbô nə́ yí ńgə́ pó yí ghɛnə̂.
19Yeso a nə ńkě pí pô lə́ ḿbə́ sóŋ nə́ yí ńgə́, “Kwə̂ ńtég pəlim pô ə́fiʼtə̂ ághɔ́b nə́ ndɛn mənu páʼ Mmaʼmbîə a ghɛd nə́ á mbô gho ńkə́ ḿbə́ nə́ ndzaŋ páʼə a kó nə́ mələ́ŋ mô.”
20Ŋwu wə̂ a tíʼ ə́fɛ́lə aliʼ yi wɨ́ ńgɛnə̂ á mə́mə aláʼə Dekapolis tsɔʼə atsəm ə́fiʼtə̂ ndɛn mənu páʼ Yeso a faʼ nə́ nə́ yə́. Á nə ńkɨʼnə̂ ŋwu ntsəm páʼə a nə ńdzóʼ nə́ anu yəwə́.
Yeso a Júmkə Mɔ̂ Məngyě Yitsə̌ Páʼə a nə Ńkwú nə́ Ḿbɨ ńkə́ Ńchwádkə Ngɔ Məngyě Yitsə̌
(Mat 9.18-26; Luk 8.40-56)
21Yeso a kə́ ḿbɨ ńtúmə əfooghəəmə́ á mə́mə aŋkənúʼə́ ńkoʼə̂ á ndzɛnə́, mboŋ pɨ ə́ kyeetə̂ ńdíblə yí əghâ ándó a nə ńtɨ́ nə́ á nkaŋ əfooghɨ lə́. 22Jailɔsə páʼə a nə ḿbə́ nə́ táʼ nətûə á mə́m ndɛ̂sê Pəjusə a yǐ ə́wɨ́ ńdzə́ənə Yeso ńtíʼ ńgwǔəə á məko yí 23ńchígə́ ḿbóʼmbô nə́ yí ə́sóŋ ńgə́, “Mɔ́ kə́nyaŋ móonə mə yi məngyě a tə́əmə á ngə́ŋ nəse. Maŋ póʼ mbô, yǐ pɔ̌ ghɛn gho noŋkə̂ mbô mô atû yí ńjî ńgə́ a yáŋ ńchîə á mbîə.” 24Yeso a zoŋə̂ yí pó yí tə́ ńgɛnə̂. Mboŋ pɨ ə́ zoŋə̂ yí ńtíʼə ńjwíʼnə nəpɛnə́ yə́.
25Məngyě yitsə̌ a nə ńkə́ ńchî ə́wɨ́ páʼə a nə̈ ńgɔ nə́ mə́sɔ́ nə́ ngoʼ ntsɔb pɛ̌. 26Ńtsaŋnə̂ á ndzəm pəlɔ́gta, ńtsəŋ nkáb əjǐ tsɔʼə ntsəmə á mbô pó, lə́ ńtíʼ ńgə́ a yáŋ, aghoonə́ á gháʼə ńgɛnə̂ pə́ nə́ mbiə. 27Ndzaŋə a nə ńdzóʼ nə́ anu ńté Yeso lə́, ńtíʼ ńkɔ́ʼə á ndzəm yə́ á mə́m ənɔ ńkwumə̂ atsəʼə́ ají, 28ńté ńgə́ a nə ńkwaŋ ńgə́, “Mbɔʼ maŋ kwumə̂ atsəʼə́ ají maŋ yáŋə.”
29Tsɔʼə əghâ yí wɨ́, mə́sɔ́ əyǐ wə̂ á lə́gnə a zóʼ nə́ mbɨ əjǐ ńgə́ a chwád ngə́ʼ zə̂. 30Yeso a tɔ́g ńjî ńgə́ mətɨ mə́ fɛ́lə a mbɨ yə́, ńtíʼ sɛdnə̂ á mə́m mboŋ pɨ zə̂ ḿbítə ńgə́, “Əwə a kwum nə́ ətsəʼə́ mə?”
31Ngaŋə́zoŋə́ndzəm əjí ə́ kwěe yí ńgə́, “Gho jɨ́ ndzaŋ pɨ pə́ jwíʼnə nə́ á mbɨ gho; gho pɨ ńtə́ ḿbítə ńgə́ əwə a kwum nə́ gho lə́ ə́lɛ́?”
32Lə́ Yeso a pə́ ńkə́ ńnáŋə tsɔʼə əliʼə́ á mə́ jɨ́ nə́ ńgə́ lə́ kwum əwə ńkwumə̂ yə́. 33Məngyě wə̂ a pə́ ńjîə anu páʼə á laŋ nə́ á mbɨ yí lə́, ńtíʼə ḿbénkə nə́ apɔ́g, ńgyǐ ńgwǔəə á məko Yeso ə́fiʼtə̂ ndə̌ŋdəŋ əyǐ ntsəmə á mbô yə́. 34Yeso a tíʼ ə́sóŋə á mbô yí ńgə́, “Móonə mə, mbimə́ əzo ə́ ghɛd gho yáŋə. Ghɛn nə́ mbwɔ́dnə, aghoonə́ azô á měe.”
35Ndzaŋə ándó Yeso a nə ńtə́ nə́ ḿbɛ́lə ńtséebə lə́, pɨ pətsə́ pə́ lǒo á ndɛ̂ Jailɔsə páʼə a nə ḿbə́ nə́ nətû nə́ ndɛ̂sê Pəjusə lə́, ńgyǐ ə́sóŋ ńgə́, “Mɔ́ əgho a kwûə yə́. Kɔ gho pɨ ńjwaʼə̂ Ndzéʼkə.”
36Yeso a kě anu pó sóŋ nə́ lə́ nə́ anu yətsə́ néŋ pô, ḿbə́ ə́sóŋə á mbô nətû nə́ ndɛ̂sê Pəjusə zə̂ ńgə́, “Kɔ gho pɔ́gə, kə́ ńtúg tsɔʼə mbimə́.” 37A nə ńkě pí ŋwu tsə̌ a zoŋə̂ yí pô tə ńdéʼtə Pita pó Jɛmsə nə́ mɔ́mɛ́ əyǐ Jɔnə. 38Əghâ ándó pó nə ńgyǐ nə́ ńkwúnə á ngyaʼə́ nətû nə́ ndɛ̂sê Pəjusə zə̂ lə́, Yeso a zə́ənə ajwaʼlə páʼə á nə ńchî nə́ aliʼ yi wɨ́ pópə pɨ pə́ nə̈ ńkyéŋ nə́ nə́ pətə́kɔʼ pə́ məngye ńtûə ə́fɨnə̂. 39Yeso a kwúnə á ndɛ̂ ńtíʼ ə́sóŋə á mbô pó ńgə́, “Ajwaʼlə jɨ pópə afɨnə jɨ ə́ lánə ḿbə́ lə́ yə́ akə̂? Mɔ́ yi wə́ a kě kwû pô. A lê lə́ lê nə́.”
40Lə́ pó pə́ ńgweŋə̂ yə́, a kəmə̂ ŋwu ntsəm ə́fɛ̂ á apeŋ ńtíʼ ńdɔgə̂ tǎpə mɔ́ yi wɨ́ pó mǎ əyǐ ḿbɨ́ ḿbə́ nə́ ngaŋə́zoŋə́ndzəm əjí zɛ́n teelə́ pó po kwú ńgɛnə̂ á mə́m ntaŋ páʼ mɔ́ yi wə́ a nə ńnoŋnə̂ nə́ ə́wə́. 41A waamə̂ apô mɔ́ yi wɨ́ ńtíʼ sóŋ nə́ yí nə́ atséebə aláʼə azɔ́b ńgə́, “Talita, kum,” páʼə á pə́ nə́ lə́ ńgə́, “Mɔ̂ məngyě maŋ sóŋ nə́ gho ńgə́ gho lǒo á əsê!”
42Mɔ́ wə̂ a tɔ́g ńdǒo á ndəsê tsɔʼə əghâ yi wɨ́ ńchúʼə á mə́ nyi nə́. (A nə ḿbə́ lə́ mɔ́ ngoʼ ntsɔb pɛ̌.) Anu yəwə́ á nə ḿbyádnə ńkɨʼnə̂ ághóobə́. 43Yeso a chígə́ ńkwantə̂ ághɔ́b ńgə́ kɔ pó fiʼtə̂ ŋwu tsə́ nə́ anu yəwə́, ńtíʼ sóŋ nə́ pó ńgə́ pó fɛ̂ ajú nə́ yə́ a jîə.
હાલમાં પસંદ કરેલ:
Magə 5: azo
Highlight
શેર કરો
નકલ કરો
Want to have your highlights saved across all your devices? Sign up or sign in
