MOTHI 17
17
Jisu Athok Kachirpharlep
(Mrk. 9:2-13; Luk. 9:27-36)
1La ni-thorok aphel Jisu si Pitor po pen Jemspo aro amuso Johon po yok ensi, analipen isi inglong kartul athak analiyok pono. 2Aro anali ngot anang athokpo chipharlepsi mahangpo arni badi tha-angwet no aro anang pe-rik helta katha-ang badi phlan etno. 3Aro langot te, lalong analiyok Mosi po pen Elija po chiklango aro anang pen lam chithano. 4Lasi Pitor po Jisu yok pulo, “Hemphu, ili holek kidopo akimelo, nang anengdo tene ne holek kuntulu ahem hum-thom keme, ihumke nang phan, ihumke Mosi po aphan aro ihum ke Elija po aphan.” 5Anang labang kithanjong amun, anang thak inghun phung klakngo aro langot, inghun para isi asi wangsi pulo, “Anangke ne nengdok Aso, anangyok ne neng ingsamman; anang lam onenot.” 6Adunhel labang arjusi, anali lungle athak mahang tong bakngo, aro kachiphere chilut detno. 7Manta Jisu wangsi analiyok otsi pulo, “Thurnot, phereye not.” 8Aro la-amun anali kilang ke, Jisu yok aparke kaiyok ta thekthe yongot. 9Aro ladisi anali inglong kartul para wangkisun jong amun, Jisu analiyok thano, “Arleng Aso kithi asitem para bur phakphe lengke labang kachiklang alampo kaiyok ta thanek.” 10La-amun anang adun hel anangyok arjulo, “Tene Elija po si ango wangpen nange pusi kanong paklang hel piyok puman?” 11Anang pu phakngo, “Elija po wangsi ahuwit abihini hel pangning phaknge, 12manta ne naliyok thando, Elija po ke daknesi wango; aro anali chinine si, anangyok nali neng potsi kar-ih labadi si anangyok sanselo. Ladisi anali parasi Arleng Aso duk hapme.” 13La-amun Johon Baptist po alamsi anang analiyok thando pusi adun hel abhu hlongo.
Si-ik ajiu Kachu-u Sopenso Ihut Jisu Kapame
(Mrk. 9:14-29; Luk. 9:37-43)
14Aro konam anali rat adungyok wango, ihut arleng anang dung wangsi, anang ngo tarhuksi pulo, 15“Hemphu, toh neso poyok jinso not, piyok pu tene anang tengrai kisopo phere memesi chiplang do, anang me along aro lang along jang damman. 16Ne anangyok nang adun hel adungyok kiwan manta anali pame un-eh yongot.” 17Aro Jisu pulo, “Kikrolkre aro kangho awe abang konbak adin ayok ne nalipen dobo? Konbak adin ayok ne nali pen chipaning ding bo? Ne dungyok oso-so wan.” 18Jisu anangyok tamsero, aro si-ik anang para wang olesi damo; aro la jongsi oso-so ta medetno. 19Laparake adun hel detsi Jisu adungyok wangsi pulo, “Piyok hali labang ujhar un-eh yongot?” 20La-amun anang analiyok pulo, “Nali kikrol bekso det. Piyok pu tene ne naliyok khanangsi thando, nali jamu amu athek krolta, nang konam inglong kartulpe yok puye, “Holek para ha aga yok dam,” aro anang dame; aro isi abihini tiki un-eh ke weye.” 21Labang ke ladi ujhar un-eh ye manta pingkit aro an-kihum pensi une.
Jisu Anang Kithi Alam Kachithan
(Mrk. 9:30-32; Luk. 9:43-45)
22Galili alongri kachingrum apor, Jisu analiyok pulo, “Arleng Asoyok arleng hel arideng champi detne, 23aro anali anangyok mariye, manta ni-thom arni anang wangbur phaknge.” aro anali aneng doho detno.
Kachirdom Ahem Khajana
24La-amun anali Kaparnaum yok wango apot, inghosi adhuli isi khajana kirung, labang kalukdar hel Pitor po adungyok wangsi arjulo, “Nali paklangpo khajana pipe ma?” 25Anang pulo, “Oik pido.” Aro konam anang hem wang-kilut amun, Jisu ke pangosi anang yok pulo, “Simon, pirthimipe arechohel khajana ingho para en? Abithang asohel para ma, ma bang arleng hel para? Nang nenglong pot chiron do?” 26Aro konam anang pulo, “Bang hel para” Jisu anangyok pulo, “Lasi aso helke joksi do.” 27La yongta ili analiyok aneng pangho nangne, la anat nang langpe yok damsi, burhi parhinot; labang parhi cheng amun ango kihlong okpo, nepsi, bangpo angho eksi, nang tanga isi hlonge, labangso en-ne, ne phan aro nang phan analiyok pinot.”
હાલમાં પસંદ કરેલ:
MOTHI 17: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
