Gen 4
4
Kein ma Abel.
1Adam kawana Eve yavata ikena da iropeya. Ma ivi tuwa da tomowa ma ivona bo, “Bada ivi viteku da natuku tomowa avi tuwei.” Ma ivi vavei Kein. 2Muriyai ivi tuwame da bade natuna tomowa ma tuna ivi vavei Abel.
Natunatusi imagura na Abel ivivi ghamoghamo ma Kein na tano iwayowayowei. 3Imakamakai da mara sago ita suwara Bada kurina. Kein na iyaba ma vavai ipiyei. 4Ma Abel na siya monamonana ipiyei. Siyana na sipu natunatusi iyiyarokosi viya ivunuwa ma viyosi biibiisi kavakava isuwarei. Bada, Abel ina suwara yavata nuwanuwana iviiya. 5Ma Kein ina suwara yavata ibaresi da Kein nuwanuwana ipughu ma maghighina ibero.
6Ma Bada ivonei, “Avi kubiine nuwanuwam ipughu? Avi kubiine maghighim ibero?” 7Bera biibiisi kuna beraberai na ana kayowem. Kekitaruvim. Berabero ekayokayowei da ini badem, ikoyakoyagha da ina vowim. Kevi rewapana da kuna ghegavovori.
8Vaghina ma Kein, tina kikei Abel ivonei, “Takiibau ku warere.” Ikiibau ma Kein ikayaya tina kikei kurina da ikiivunui.
9Nani murinai Bada, Kein ivi tarakiiyanei, “Abel imapatana?”
“Ke atakovi. Taku ke tiku kikei kana koyakoyagha.”
10Ma Bada God ivona bo, “Kevi yana, tim kikei tarana tanowai imatakira kuriku, biwa viinina kubiine. Avi kuberai? 11Tam imamuwai da tarana dowa inunui da ivi beroi. Tuna kubiine aimimagim da ke kuna wayowa. 12Dowa kuna wayowei da imai ma kara vavai ke ghamana kuna panani. Kenae! Kuni ketabababa dobuwai.”
13Ma Kein ivona bo, “Kovogha kuvereku na irakata kirakai. 14Karako kekwavikwaviniku da dowa ke ana wayowei ma bade ana kiibukuyowem. Dobuwai ani ketabababa, aku numa kegha. Ma wawaya ina pananiku na ina kiivunuku.”
15Ma Bada God ivonapotei, “Kegha, sisiya atereterei da meni wawayina ina kiivunum na taku kovogha berona mara miikovimaruwa ana verei, biwa ghamanakina ina viiya.” Ma Bada matakira Kein gwabinai iterei da iyavo kava ita panapanani na ke ita kiivunui. 16Ma vaghina, Kein ivomiiri da Bada ikuyowei ma inae da ku dobu sago kana vava Nod ma nani dobunai imakai. Nod na ku maramatana Eden nevanevanai.
Kein ina rakaraka.
17Kein kawana yavata ikena ma kawana iropeya da natusi tomowa itupuwa, kana vava Inoka. Ma Kein kwanatu ivowai ma kwanatuna ivi vavei da Inoka, natuna yavata ivi varigheya. 18Ma Inoka imagura ma ivi tuwa da natuna kana vava Iradi. Ma Iradi imagura ma ivi tuwa da natuna Meyujayel. Ma Meyujayel imagura ma ivi tuwa da natuna Metusela. Ma bade Metusayel imagura ma ivi tuwa da natuna na Lameki.
19Ma Lameki kakawana ruwa, kii vava Ada ma Sila. 20Ada ivi tuwa da natuna Jabal. Ma tuna ina rakaraka yavata i kiki da ghamoghamo ivivi kam ma yobeyai ivivi makiiyana. 21Ma Jabal tina kikei kana vava Jubal. Tuna ina rakaraka yavata i kiki na durere iuvuveni ma hap ivivi rekwei. 22Ma bade Lameki kawana Sila ivi tuwa da natuna Tubal Kein. Tuna na kirama ma brons igudaguda da bagibagi sawarisi bogii ma bogiiyai iyamoyamona. Ma Tubal Kein novuna na Nama.
23Mara sago Lameki kakawana kurisi ikayotata, ivonesi bo,
“Ada ma Sila, aku sisiya kovi yanei. Kakawaku kovi yaneku.
Tomowa yaragina iraviku na akiivunui.
Tomowina gubaga ivereku tuna kubiine avi raboboi.
24God sisiya iterei da meni wawayina Kein ita kiivunui na kovogha berona mara miikovimaruwa ita verei.
Ma taku Lameki avonavona da meni wawayina ina kiitovoniku na biwa mara 77 ina viiya.”
Seti ma Inos.
25Kein tina kikei ikiivunui tuna kubiine Bada ikwavini da ina maduwa ma ina mamai ikuyowesi inae. Nani murinai, Adam kawana yavata ikena ma ivi tuwame da natusi tomowa. Ma ivona bo, “Kein ivomiiri da tina kikei Abel ikiivunui, tuna kubiine God weni pepeyina ivereku da Abel epayanina.” Ma ivi vavei Seti. 26Seti imagura ma ivi tuwa da natuna tomowa. Ma ivi vavei Inos.
Ma Seti ina mariyai na wawaya ivi karei da Bada kana vava ivovokavakavari.
હાલમાં પસંદ કરેલ:
Gen 4: pwgB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.