Bantawa Rai

मोन्‍ग़रि गालिल हेन्‍कोप्‌दाओ धिखाहुप्‌दा हाङ्‌कामु हेरोद हाङ एन्‍तिपास्‌आ येसुओ अ़चुकाचिचिओ अ़तुक्‌वादा एनु। खोसाआ अ़यायोक काप़चि लोचि, “ओ बप्‍तिस्‍मा काप़ युहन्‍ना ओ। खो सुवादाओदाङ्‌का खोन्‍तालोन्‍तायुङ्‌सा। खोन्‌ओसा ओवाको म़दोम्‍दाओ काचिचि खोसाआ मुङुचि!”
बुया हेरोद हाङ्‌आ अ़निछा फिलिप्‌ओ अ़खिम्‍हाङ्‌मा हेरोदियास्‌ओ अ़तुक्‌वादा युहन्‍ना लाप्‍मेत्‍तुचिकि छेक्‍खाखिम्‌दा छेक्‍मेत्‍तुयुङ्‌सुचि। देकिनालो बप्‍तिस्‍मा काप़ युहन्‍नाआ “आम्‍निछाओ अ़खिम्‍हाङ्‌मा खाना सायाकाम्‍मा य़ङ्‌हुप्‌आ त़प़नान!”नि हेरोद लोयुङ्‌सु। खोन्‌ओसा हेरोद्‌आ युहन्‍ना सेत्‍मा लाप्‍तुङु, मेन अ़म़नाचिएदाङ्‌का क़साङा। देकिनालो मोचिआ खो निनाम्‍हाङ्‌य़ङ खाकालुनि अ़मित्‍ताङा।
मेन हेरोद्‌ओ अ़लिमा लेन ताहिदा हेरोदियास्‌ओ अ़मेत्‍छाछा छा तावाङ्‌चिओ अ़चुबुदा थोमाकि हेरोद्‌ओ अ़ऩङानुसु। खोन्‌ओसा खोसाआ मो दि दोत्‍तुनुछाङ प़मा किरे चासा मो हिप्‍तु। मेन मोसोओ अ़माआ यायोक प़ओसा मो य़ङा, “बप्‍तिस्‍मा काप़ युहन्‍नाओ अ़ताङ ओ फाङ्‌लान्‌दा अ़ङ्‌का प़नि!” मेन हाङ मिन्‍राक्‌दा छुक्‍तानुछाङ तावाङ्‌चिओ अ़चुबुदा खोसाआ हिप्‍तुओसा मोसोओ निम्‍पाङ मोवात्‍निङा मुमेत्‍तुचि, खोन्‍कि खोसाआ छेक्‍खाखिम्‌दा युहन्‍नाओ अ़ताङ खोक्‍मेत्‍तुचि। खोन्‍किना युहन्‍नाओ अ़ताङ अ़क्‌तात फाङ्‌लान्‌दा अ़पाआकि मो मेत्‍छाछा छा अ़पुवा। खोन्‍कि मोसाआ मो खात्‍तुकि अ़मा प़। खोन्‍किना युहन्‍नाओ अ़काखेङ्‌चि म़ताकि खोसोओ अ़स़पोक अ़खात्‍ता खोन्‍कि अ़खुम्‍ता। खोन्‍कि मोचि म़खाराकि येसु मो य़ङ्‌खान खाअ़एत्‍ता।


खोन्‍कि येसुआ बप्‍तिस्‍मा काप़ युहन्‍ना अ़सेराओ य़ङ्‌खान अ़एनाकि खोक्‍को नावादा म़वाङा खोन्‍कि मोदाङ्‌का वाइवेत सुकुलादा म़खारा। ओ य़ङ म़ना मुक्‍लाचिआ अ़एनाकि सहराचिदाङ्‌का कोन्‌याङ्‌सा खोक्‍को अ़त़ङ्‌ता। धियाङ्‌वामाओ अ़केम्‌दा नावादाङ्‌का म़धान्‍तान्‍चिन्‌हिदा मो म़ना मुक्‍लाचि येसुआ म़खाचिकि खोक्‍कोसाआ मोचि सोम्‌योक्‍तुचि, खोन्‍कि मोचिएदाओ कातुक्‌चि म़नुसुचि।
अ़नाम्‍प़क्‍साऱङ खोक्‍कोसोओ अ़चुकाखेङ्‌पाचि खोक्‍कोएदा म़ताकि अ़लोवा, “ओ ना अ़कुय़ङ ओ, खोन्‍कि अ़नाम्‍प़क लिसाचिआ। म़ना मुक्‍लाचि छुत्‍ताखाइसानुम्‍च़म, खोन्‍कि मोचि तेन्‍चिदा म़खात्‌कि दि-दि आप्‍पि अ़चुओ चामायु म़खित्‍ने।”
मेन येसुआ मोचि म़लोचि, “मोचि खात्‍मा अ़दोत्‍निन। खानानिन्‌आ मोचि चामा पुवानुम्‍च़म।”
मोचिआ खोक्‍को अ़लोवा, “ओदा आन्‍कान्‍काएदा पाच्‌कातात पेम्‍पाक खोन्‍कि ह्‍वातात ङाचि ओन्‍ङा म़युङ्‌याङ।”
खोन्‍कि खोक्‍कोसाआ म़लोचि, “मोचि ओदा अ़ङ्‌काएदा बात्‍तानुम्‍च़म।”
खोन्‍किना येसुआ म़ना मुक्‍लाचि ल़क्‍ल़क्‍ल़क्‌वाओ नागिदा युङ्‌म़मेत्‍तुचि, खोन्‍कि मो पाच्‌कातात पेम्‍पाक्‌चि खोन्‍कि ह्‍वातात ङाचि अ़क़क्‍ताकि निनाम्‍मादुत्‍नि चोप्‌याङ्‌सा निनाम्‍हाङ आलाङ अ़पुवा, खोन्‍कि पेम्‍पाक्‌चि म़धाङ्‌सुचिकि अ़चुकाखेङ्‌पाचि म़प़चि, खोन्‍कि काखेङ्‌पाचिआ म़ना मुक्‍लाचि म़प़चि। मो झारासाआ अ़चाकि अ़चुबुक खासा, खोन्‍कि हेनाओ अ़चेत्‌वाचि मोचिआ बारकाखेङ म़कोउचि। मेत्‍छामाचि खोन्‍कि छाचिदाङ्‌का नि काचा दुवाछाचि आप्‍फात पाच हजारा म़याआङा।


खोक्‍कोसा म़ना मुक्‍लाचि अ़चुखिम म़छुत्‍तुखाइसुङुचिवा अ़चुकाखेङ्‌पाचि खोक्‍कोएदाङ्‌का बुया नावादा वाङ्‌म़मेत्‍तुचिकि धियाङ्‌वामाओ अ़ह्‍याउधेत म़खाइसुचि। म़ना मुक्‍लाचि म़छुत्‍तुखाइसुचिकि खोक्‍को आप्‍पि यामात्‍सि भ़ऱदु म़लोन्‍ता। अ़नाम्‍प़क लिसाहिदा येसु भ़ऱदु अ़चुदाप्‍म़ङ म़युङाङा। मोन्‍ग़रि नावा धियाङ्‌वामाओ अ़केम्‌दाङ्‌का ब़द्‍धे अ़थाया तालायुङ्‌सा। ह़क देङ्‌सा बानाओसा नावादा अ़लोङ्‌वात्‌चि म़धुङ्‌साङा।
आप्‍फात अ़वाय़ङ्‌ओ सुम्‌काऱङ साङाहिदा खोक्‍को धियाङ्‌वामादा कोन्‌याङ्‌सा अ़चुकाखेङ्‌पाचिएदा म़ता। अ़चुकाखेङ्‌पाचिआ खोक्‍को धियाङ्‌वामादा म़कोलाङाओ अ़खाकि अ़चुक़माआ मोचि म़य़ङा, “मो ना स़लावा ओ!” खोन्‍कि अ़चुक़माआ मोचि म़पारा।
मेन येसुआ च़क्‍नि मोचि म़लोचि, “राक मुवानिन! अ़ङ्‌काङा ओ, मान्‍क़दानिन।”
पत्रुस्‌आ खोक्‍को लो, “हाङ्‌पो, खानानिन ओनालो अ़ङ्‌का चाक्‌वादा कोन्‌याङ्‌सा खानानिन्‌एदा बानानि लोनि।”
खोक्‍कोसाआ अ़लोवा, “बाना।”
खोन्‍किना पत्रुस नावादाङ्‌का धान्‍तान्‍चिन, खोन्‍कि चाक्‌वादा कोलाकि येसुएदा खारा। मेन ह़क बानाङाओ खाकि खोसोओ अ़क़माकारा, खोन्‍कि चाक्‌वादा वालुम्‍मा पुक्‍तुकि खो पारा, “हाङ्‌पो, अ़ङ्‌का लेन्‍नि।”
खोन्‍कि येसुआ च़क्‍नि अ़चुछुक अ़फेसाकि खो अ़लावा, खोन्‍कि खो अ़लोवा, “उन्‍नि ओन्‍ङा साकोङ्‌छ़ङ कामु, देकि खाना मान्‍केङ त़मुवा?”
खोन्‍कि खोचि नावादा म़वाङाहिदा ह़क सेम्‍ता। खोन्‍किना नावादा म़याआङाओ अ़चुकाखेङ्‌पाचिआ खोक्‍कोएदा बोम्‍नान्‍चिन्‍सा अ़लोवा, “अ़नुछ्‍या खानानिन निनाम्‍हाङ्‌ओ अ़चुछा त़मुन्‌येन!”
खोन्‍कि खोचिआ धियाङ्‌वामा अ़धेराकि गनेसरेत्‌निओदा म़धान्‍तान्‍चिन। मोदाओ म़नाचिआ येसु अ़सिन्‍ताकिना मोचिआ ओह्‍यात्‍नि-मोह्‍यात्‍निओ तेन्‍चिदा य़ङ्‌खान अ़खाइसा, खोन्‍कि म़नाचिआ झारा अ़चुओ कातुक्‌चि येसुएदा म़तारुचि। खोन्‍कि मोचिआ येसुओ अ़चुतित्‌ओ अ़चोम ओन्‍ङानुछाङ नोप्‍मा प़निनि खोक्‍को अ़लोवा, खोन्‍कि देम्‍पाङ्‌साआ अ़चुतित अ़नोप्‍ता, मोचि झारा म़नुवा।

Listen to मत्‍ति 14