Wepélisiananu 3

Mi saanna

(Mt 4:1–11; 6:13; 1 Tim 2:14)

1Méné gi kini é mini winu faa lé Bale, Gakelebale a kɛlɛ, wo ta. É lé lezan lɛ léé: Kazambale a fe weboen nya léé, té ka féiyili poro faa ble loo? 2Lezan lé méné lɛ léé: Ko féi yili poro faa blé. 3Naa, yili lé é ke féi méléna bɛ, Kazambale a fe léé, té ko a poro ble lo, té ko mane a ma lo, dé ko kɛlɛ, ko gaan. 4Yé méné lé lezan lɛ léé: Ka ’ka dan ga lɛ lo; 5naa, Kazambale a gi dɔɔ léé, dé ka ble yian ma, ka yuɛ é dan fuo lɛ yé ka dan kɛlɛ lɛ balenu zo, ’té ka wezin valé wenyané vasina dɔɔ.

6Lezan a ye aan wo léé, yili ’ko poro a blefɛ zima nya, yé é a nɔnɔmi mi yuɛ gi, yé é a mi bɔn‐in kinifɛ zima nya, é a poro so yé é a ble; a zana lé ’bɛ ke a va bɛ, é a ke nɔ ’bɛ lɛ yé ’bɛ a ble.

7Yé wo fiénu yuɛ fuo, yé wa ye léé, ’wa é porole; wo go bɔrɔ laa so lɛ yé wo wo tan, yé wo wo dɔ ’wo gyɛn bélé kyɛsidi zo. 8Yé wo Bale, Gakelebale dére ’ma, ’té ’bɛ éé giéan féi nyanadi bléyi va yé gɔnézan valé é na yɔɔ Bale Gakelebale lee, féiyilinu méléna.

9Yé Bale, Gakelebale gɔnézan laa, yé é lé a lɛ léé: Bii a kyɛɛn? 10Gɔnézan léé: Maa i dére ’ma féi, yé maa a é porole amalé an kana yé an yɔɔ. 11Yé Bale, Gakelebale léé: De ɛ i bɔn‐in kini léé, i a é porolee? Yili lé maa a poro blele yi ga i lee bɛ ’naan, bé blee? 12Gɔnézan a zi vɔ léé: Lezan lé bé nɔ an lɛ, yee ɛ yiliporo nɔ an lɛ yé maa a ble. 13Yé Bale, Gakelebale lé lezan lɛ léé: Mɛmalé i ’bɛ kɛlɛɛ? Lezan ézé fe léé: Méné dabli kɛlɛ an lɛ yé maa a ble.

14Bale, Gakelebale lé méné lɛ léé: I ’bɛ we ’ko kɛlɛ, amalé bale a é pale i ma flawinu valé bwiiwinu méléna; i dan tawo lɛ i plɛ la, yé i dan vun ble lɛ ilé tɛrɛla faa gi. 15Maa dan guli pa lɛ bii valé lezan méléna, a kulu valé i kulu méléna; a kulu é dan i ’wuo wii lɛ yé i kulu é dan suiɛ dɔ lɛ a kulu ganetɛn ma. 16Yé Gakelebale lé lezan lɛ léé: Maa dan nyané blele taa pa lɛ i bɔn bɔle ma, yé i dan né yaa lɛ kleblele kaii nya; i bli é dan bɔ lɛ i zana ma yé i zana é dan pla lɛ i nwiin. 17Kazambale lé gɔnézan lɛ léé: I tɔné dɔ i na dére lɛ, yé yili lé maa a fe i lɛ léé, té bé poro ble lo, bé ble, bɛwemalé maa dan bale pa lɛ tɛrɛ ma ilé we ma. 18Nyanéblele nya lé i dan ilé fɛblele ye lɛ tɛrɛ va, ilé tɛrɛla faa gi. Tɛrɛ é dan lélinu valé goligyɛnénu bɔra lɛ i lɛ, yé i dan féi lunu ble lɛ. 19I yara kyɛyee zi lé i dan fɛ ble lɛ fɔɔ yé i nɔla é ziin tɛrɛ lé maa i kɛlɛ a nya bɛ, a nya; naa, i a vun nya, yé i dan nɔla lɛ vun nya é ziin.

20Adam é na tɔ pa Eve; é a mi yuɛmale faa bu nya, azama.

21Bale, Gakelebale wikɔlɛ kɛlɛ Adam valé é na lé sɔ nya yé é a zén wo ta.

22Bale, Gakelebale léé: Ka a yé loo? Mi kɛlɛ bélé kaa va mi do zo yé é wezin valé wenyané vasina dɔɔ. Naa, kaa mibéliyili poro sole yi ga a lee, dé é da ’bɛ ble yé é vo é yuɛma lɛɛfaama, ’té ’bɛ glɛ ’ka dɔa lo. 23Yé Bale, Gakelebale mi bin Édɛn féi, léé, ’é go féi pa, tɛrɛ lé wa kɛlɛ kɔɔn a nya bɛ, a va. 24’Bɛ zo lé é Adam bin; yé lanjenu lé wa laama sérubɛnnu, é wo dɔ Édɛn féi yirinwanazia, yé gwɔunnu lé kyɛ ke wo ’léé, é a ’bɛnu lee, ’té ’bɛnu a giéan, mibéliyili lé zi tabinle we ma.

Sélection en cours:

Wepélisiananu 3: GOURU

Surbrillance

Copier