Matáyɔ 20
20
Mɛní á mɛna-ciko á mujabíbu na ɓabɛɗanigi nɛkɛ
1«Koɓoamɛ á na koba akengeani na nndee: Nkpa moci ɗájúani ka mɔkɛsuɛ, ka kaɓa á ɓakpa á bɛɗanaga ka ciko nɛkɛ á mujabíbu. 2Áɔɔ́kana na ɓɔ k'ophendɔ nde akeni k'ésa ímoci. Mpɔ, áǒteka ka ciko nɛkɛ á mujabíbu. 3Áojuana goto ka mbenɔ á nji asasí, áɔ̌ɓɔna ɓakpa ɓunɛngbo na ɓámamege k'ɔ́ma ndɔ tɔ, kángá ekuma. 4Áǒngoɗea: ‹Ɓenu phɔtɔ, gǎni ɓɔ́bɛɗanɛgɛ ka ciko nɛmɔ á mujabíbu, nenóphendande ophendɔ índe akeni.› 5Ɓakpa ndɔ ɓáoga. Mɛna-ciko â goto ojuana ka kantende na ka akpaala, â tɔ ogea ɓó.
6Ajúani goto ka oyonga, áǒdonda ɓakpa ɓunɛngbo na ɓámamege k'ɔ́ma ndɔ tɔ, áǒngoɗea: ‹Ka nyɔngɔ éke nde ɓoiki wani ɓógaomaka maní, kángá ekuma?› 7Ɓáonsikisia gea: ‹Ka nyɔngɔ nde nkpa kásongisi k'ékuma.› Áǒngoɗea: ‹Cɔ, ɓenu phɔtɔ, gǎni ɓɔ́bɛɗanɛgɛ ka ciko nɛmɔ á mujabíbu.›
8Aɓi ye ɔgɔgɔ, mɛna-ciko áongoɗea mamei-ekuma nɛkɛ: ‹Ɔ́ɔphana ɓabɛɗanigi, ómphendɛ nkpa na nkpa ophendɔ nɛkɛ. Ókpangambɛ na ɓato á mbusa, óophiphia na ɓato á mosá.› 9Ɓundɔ ɓátókpangi ekuma ka oyonga, ɓâ phɔ́ obika nkpa na nkpa áɔbɛɗa ophendɔ nɛkɛ nnde akeni ka esa moci. 10Ɓundɔ ɗáɓákpangi ekuma mosá ɓáobika, ɓáokanisia gea, ɓátɔande kɔ̌nyɛ́nya ɓadaɓɔ. Ɓɔ, ɓâ ndiu phɔtɔ ɔtɔa nkpa na nkpa ophendɔ nde akeni ka esa ímoci. 11Ɓî ɓátɔi ye ophendɔ ndɔ, ɓáokpanga ngɔngɔnɛaga á mɛna-ciko na 12yɔngaga gea: ‹Ɓakpa nde ɓábiki mbusa ɓábɛɗanigi tɔ ka mbenɔ moci, ô tɔ ǒphenda ɓea ɓesu íɓundɔ ɓekini maní na ɓɔɛlu ɓéogaomaka maní?›
13Mɛna-ciko â gǎkɛ onsikisia ka ɓɔ moci te: ‹Dani, kékogi ájeɗe. Kótóɓeeki phɔ́ gea, nékophɛ ophendɔ nde akeni k'ésa ímoci? 14Cɔ, bɛɗa ophendɔ nɛkɔ ógɛ. Nekondi phɔtɔ némphendɛ nkpa nde atóbiki mbusa ɓea oɓɛ. 15Kékeni gea á imɔna nɛmɔ ɓíndɔ nekondi? Cɔ, ona ngíni ani ka nyɔngɔ nde nende nkpa anjánjá?›» 16Yéso áɔgɔɓɛa nyɔngɔ ɓe: «Kaɓondɔ unge, ɓato á k'ama mosá-mosá ɓáɓande ɓato á mbusa, na ɓato á mbusa, ɓáɓande ɓato á k'ama mosá-mosá.»
Yéso atɔ̌mi ka mɔngɔ á ko isaɔ nyɔngɔ á kukuwa na jujúka akɛ
(Ɔna phɔtɔ Mkɔ 10.32-34; Lók 18.31-34)
17Ɓî Yéso ɗáotáia na Yɛusalɛ́ma, áɔ̌ɓɔphana ɓagoigi nɛkɛ nkama na ɓaɓɛ (12) ka mpɛphɛ. Na ɓá phɔ́tɔ k'aphe, áǒgea: 18«Cɔ, ɓetái na Yɛusalɛ́ma. Kó, eme Muna-Nkpa ɓámobisande ka njaga á ɓagbɛga á ɓatoɓeigi-phɛ́a na ɓaɗundu-ɛɔphi. Ɓátenande nyɔngɔ á kukuwa ani, ɓáomobisa ka njaga á ɓakpa nde ɓáná Ɓayúda. Na ɓɔ ɓáunge, ɓátenande nyɔngɔ akɛ akpɛ ka kusa akɛ. 19Ɓámbisande ka njaga á ɓakpa ɓunde ɓáná Ɓayúda ka gea, ɓánɛphɛɛ, ɓámɓindɛ na gbutu na kɔkɛaga akɛ ka moyangɔ. Mpɔ, k'ésa á ko isaɔ ajujúkande ka kukuwa.»
Ɛmɛmi á amakɛ na Yakɔ́ɓɔ na Yoáni
(Ɔna phɔtɔ Mkɔ 10.35-45)
20Cɔ, nka Jɛbɛdáyɔ na ɓaniki nɛkɛ ɓaɓɛ, ɓáobika mɔtɛ á Yéso. Amaɓɔ áogbuka muanku akɛ mosá Yéso, ka mɛma akɛ kema moci. 21Yéso áomúsia: «Eke nde okondi?» Nke ndɔ áonsikisia te: «Ɓaniki nɛmɔ ɓaɓɛ ɓáunge. Ɓeekea kani ka gea moci áikɛ ka njaga akɔ á mǔku na ɓaangbo áikɛ ka njaga akɔ á nkei ka koɓoamɛ nɛkɔ.» 22Yéso áǒngoɗea gea: «Ɓókóoúba kema nde ɓɔmɛmi. Ɓɔtɔkande noa ka kiɓe á tambaga nde nenoande?» Ɓáonsikisia: «Eya, ɓɛɔtɔka.» 23Mpɔ, Yéso áǒngoɗea: «Ɗoni, ɓonoande kiɓe nɛmɔ á tambaga#Ɔna Eku 12.2. Cɔ, ikisa á ɓakpa ka njaga ani á mǔku na nnde á nkei, nna gǎkɛ nyɔngɔ nɛmɔ. Ɔma ndɔ, a tɔ ka ɓunde Abɛ ɗáɛɓɔngisíí.»
24Mbenɔ nde ɓagoigi ɓunɛngbo nkama (10) ɓáɔ́ki ɓó, ɓáɔ̌ɓɛɛa ɓana-amaɓɔ ndɔ ɓaɓɛ. 25Mpɔ, Yéso áɔ̌ɓɔphana ɓɔbu áǒgea te: «Ɓooúba ɓî ɓaamɛ á ka mokonda nde, ɓáɔbɛɗaneaga kɔkɔta nɛɓɔ akpɛ gǔ á ɓakpa nde ɓákusi aɓɔ na ɓî ɓamamei-nji ɓáǒtambisaga ɓakpa na kɔkɔta nɛɓɔ. 26Cɔ, sɔsɔɓɛ anu, káɓɛku ɓó. Aoɓá ka ɓenu moci n'akondi ɓá á mɔkɔta, akeni gǎkɛ áɓɛ mbɛɗanigi nɛnu. 27Aoɓá ka ɓenu moci n'akondi ɓá nto á k'ama mosá-mosá, akeni áɓɛ mbɛɗanigi nɛnu. 28Kaɓondɔ unge, eme Muna-Nkpa kébiki ka gea ɓakpa ɓámɔbɛɗaneɛgɛ, nebiki ndiu ka bɛɗaneaga á ɓɔ na bisa á enda ani k'ophendɔ ka amisa á ɓakpa ɓásii#Ɔna 1 Tim 2.6.»
Yéso ěamisi ɓakeíme-íme
(Ɔna phɔtɔ Mkɔ 10.46-52; Lók 18.35-43)
29Ɓî Yéso na ɓagoigi nɛkɛ ɗáɓátóki na Yɛlíkɔ, usɛsɛ á ɓakpa ɓáomɓea. 30Ɓakeíme-íme ɓaɓɛ ɗáɓáiki ka mpɛphɛ á aphe. Ɓî ɓáɔ́ki gea, Yéso aɔnyɛ́nya, ɓáokoga: «Mɔkɔta hoo! Mosuko á Daúdi hoo! Ósokuia ngomi ee!» 31Usɛsɛ á ɓakpa ɓáǒkea ka gea ɓádakanɛ, ɓakeíme-íme ndɔ ɓâ ndiu ososoisa nkogɔ: «Mɔkɔta hoo! Mosuko á Daúdi hoo! Ósokuia ngomi ee!» 32Yéso áomama, áɔ̌ɔphana, áǒúsia: «Ɓokondi nénogeeɛ ɓo?» 33Ɓáonsikisia: «Mɔkɔta, koɗa iso asu.»
34Yéso áǒkuia ngomi, áǒdunga k'iso, mɔngɔ ímoci ɓáɔɔnapha, mpɔ ɓáomɓea.
Sélection en cours:
Matáyɔ 20: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
